LUFUNJISHO 6

Kulumbulula Bulongo Binembelo

Yoano 10:33-36

BYO MWAFWAINWA KUBA: Inge mwatanga kinembelo kilumbululai saka mukyangye kuya pa kishinka kikwabo. Kwashai bantu kumvwisha kinembelo kyo mwatanga ne byo kyakwatankana na kishinka kyo mubena kwambapo.

BYA KUBA:

Tongolai byambo byanema. Inge mwapwisha kutanga kinembelo, tongolai byambo byakwatankana na kishinka kyo mubena kwambapo. Mwakonsha kubwezha bwezhapo byobyo byambo nangwa kwipuzha bwipuzho busakukwasha bantu kuyuka byambo byanema biji mu kyepelo.

Nangwatu inge mwaingijisha byambo bikwabo pa kulumbulula kinembelo, bino mwafwainwa kukwasha bantu kumvwisha bine byambo biji mu Baibolo byo byakwatankana na kishinka kyo mubena kwambapo.
Koseshai kishinka kiji mu kinembelo. Inge mwatanga kinembelo, lumbululai byambo biji mu kinembelo byamwesha ene mambo o mwatangila kyokyo kinembelo.

Kimye kyo mubena kulumbulula kinembelo, kechi mwafwainwa kuzhika Baibolo ne. Kuba bino kukwasha bantu kumona byambo byo mubena kwamba byo byakwatankana na kinembelo kyo mwatanga.
Ambai bishinka mu jishinda japeela kumvwa. Kange muvwangemo bintu byabula kukwatankana na kishinka kyo mubena kwambapo ne. Kwesakana na bintu byayuka bantu pa yewo mutwe, mwakonsha kusala bishinka byaesakanatu byakonsha kwibakwasha kumvwisha ne kuyuka bya kwibingijisha mu bwikalo bwabo.