Adama ne Evwa basemene baana bavula byo bafumine mu bujimi bwa Edena. Mubeji wabo wamulume wajinga Kaina. Uno wajinga njimi. Kabiji mwanabo wa bubiji wajinga Abela. Aye wajinga kafunga.

Juba jimo Kaina ne Abela bapainenga milambo kwi Yehoba. Nanchi milambo wiiyuka nyi? Mulambo ke bupe bwanema bingi. Yehoba watemenwe mulambo wa kwa Abela, bino wakaine mulambo wapaine Kaina. Onkao mambo, Kaina wazhingijile bingi. Yehoba wamujimwineko Kaina amba bukaji bwanji busakumulengela kuba kyatama. Bino Kaina kechi waumvwine ne.

Kaina waambijile Abela amba: ‘Twaya tuye mungye.’ Byo bajinga kwa bunke bwabo mungye, Kaina wavundumukijile nkasanji ne kumwipaya. Yehoba waubilepo byepi? Yehoba wapangijile Kaina kwalepa na kisemi kyanji. Kabiji wamwambijile’mba kechi akabwele jibiji ne.

Twakonsha kufunjilako ka? Kimye kimo, tuzhingila inge babula kwitubila byo tubena kukeba. Inge twamona’mba twatendeka kuzhingila, nangwa inge bakwetu betubuula amba tuji bingi na bukaji, twafwainwa kupelawizha kuleka uno muteeto saka tukyangye kuba kyatama.

Abela watemenwe bingi Yehoba kabiji waubanga byawama. Onkao mambo, Yehoba kechi ukamulubako ne. Lesa ukasangula Abela ne kumulengela kwikala na bumi kimye kyo akalula ino ntanda kwikala paladisa.

Byo papichile myaka, bantu batendekele kuvula pano pa ntanda. Bavula bakanamine bingi. Ne bamalaika bamo mwiulu nabo batendekele kuba byatama. Bafumine mwiulu ne kwiya pano pa ntanda. Wayuka kyo baubijile bino nyi? Bakebelenga’mba bekale na mibiji ya bantu ne kusongola banabakazhi.

Bano bamalaika ne banabakazhi bo basongwele batendekele kusema baana. Abano baana byo bakomene, baikele babiyangala kabiji bapumanga bingi bantu. Bamanyikanga bingi bantu. Yehoba kechi wakebelenga bino bintu byatama kutwajijila ne. Onkao mambo, wafuukwilepo konauna bantu batama na muyulo.

Pano bino, kwajinga muntu umo waubanga byawama. Aye watemenwe bingi Yehoba. Jizhina janji wajinga Nowa. Aye ne mukazhanji basemene baana babalume basatu, Shema, Hama, ne Yafeta, kabiji bonse basatu bajinga na bakazhi. Yehoba waambijile Nowa kufiika bwato bukatampe, pa kuba’mba aye ne kisemi kyanji bakapuluke Muyulo. Buno bwato bwajinga nobe kibokoshi kikatampe kyatumpaukilenga na mema. Kabiji Yehoba waambijile Nowa kutwezha banyama bavula mu bwato pa kuba’mba bakapuluke.

Ponkapotu, Nowa watendekele kufiika bwato. Nowa ne kisemi kyanji baingijile uno mwingilo wa kufiika bwato pa myaka 50. Bafiikile buno bwato byonkatu Yehoba byo ebabuujile kwibufiika. Byo afiikilenga buno bwato, Nowa wabujilenga ne bantu amba kukeya Muyulo. Pano bino kafwakotu nangwa umo wamumvwijile ne.

Pano kimye kya kutwela mu bwato kyafikile. Twaya tumone kyamwekele.