Bantu Batanu na Basatu Bapulukile ne Kwikala mu Ntanda Yawama

Nowa ne kisemi kyanji, ne banyama batwelele mu bwato. Yehoba washinkile kinzhilo, kabiji mvula yatendekele kunoka. Yaubiletu nokee, bwato bwatendeka ne kutumpauka pa mema. Kabiji pano pa ntanda ponse pakumbene mema. Bantu bonse batama babujile kutwela mu bwato bafwile. Bino Nowa ne kisemi kyanji kechi bafwile ne, mambo bajinga mu bwato. Baumvwine bulongo mambo bakookejile Yehoba.

Mvula wanokele pa moba 40, mute ne bufuku kwa kubula kuleka. Byo yachibikile, mema atendekele kunyeka pachepache. Kyapeleleko, bwato bwaikele pa mitumba. Bino pano pa ntanda pakijinga mema, onkao mambo Nowa ne kisemi kyanji batwajijile kwikala mu bwato.

Byo papichile moba, mema onse aumine. Nowa ne kisemi kyanji baikele mu bwato mwaka umo. Kepo Yehoba ebambijile’mba balupuke mu bwato ne kuya mu ntanda mwabujile bantu babi. Bamusanchijile bingi Yehoba byo ebapulwishe. Bapaine kitapisho kwi Yehoba pa kuba’mba bamweshe kusanta.

Yehoba watemenwe bingi pa kino kitapisho kyo bapaine. Wachipile kuba’mba kechi ukonaunapo jibiji bintu byonse mu ntanda na muyulo ne. Wabikile kakongolo mwiulu amba kekale kayukilo ka kumwesha’mba byo alayile bya kine. Wakimonapo kala kakongolo nyi?

Kepo Yehoba aambijile Nowa ne kisemi kyanji amba baseme baana ne kuyuzha ntanda.