Mfumu wa bena Silya aye Benehadada, watwajijile kulukuka bena Isalela. Bino ngauzhi Elisha kimye kyonse wajimunangako mfumu wa bena Isalela. Kino kyamulengelanga kupuluka. Onkao mambo, Benehadada wafuukwilepo kukwata Elisha. Byo aumvwine kuba’mba Elisha uji mu muzhi wa Dotanyi, watumine bashilikale ba bena Silya kuya na kumukwata.

Bashilikale ba bena Silya bafikile ku Dotanyi bufuku. Juba jalondejilepo lukelo, kalume wa kwa Elisha byo alupukile pangye, wamwene nzhita ikatampe ya bashilikale yazhokolokele muzhi. Waumvwine bingi moyo ne kubijika’mba: ‘Ba Elisha, tusa kuba byepi?’ Elisha wamwambijile’mba: ‘Atweba tuji na bavula kukila bo baji nabo.’ Pa kyonka kino kimye, Yehoba walengejile kalume wa kwa Elisha kumona bambili ne makalaki a nkondo a mujilo pa mitumba yazhokolokele muzhi.

Bashilikale ba bena Silya byo bakebele’mba bakwate Elisha, walombele’mba: ‘Anweba Yehoba, napopwelapo pofulai meso a bano bashilikale.’ Ponkapotu nangwa kya kuba bamwenenga, bashilikale kechi bayukile ko bajinga ne. Elisha waambijile bashilikale’mba: ‘Uno muzhi ye mujimo kechi iye ne. Ndondelai, nsa kwimutwala ku mwanamulume ye mubena kukeba.’ Bano bashilikale balondejile Elisha kufika ne ku Samaliya kwaikalanga mfumu wa bena Isalela.

Bena Silya kechi bayukile kyamwekelenga ne. Mfumu wa bena Isalela waipwizhe Elisha amba: ‘Nebatape nyi?’ Nanchi Elisha walangulukilenga’mba pano ke kimye kyawama kya kwipaya bantu bakebelenga kumwipaya nyi? Ine. Elisha waambile’mba: ‘Kwibatapa ne. Bapai kajo baje apa bino mwibambile bayenga.’ Kepo mfumu ebanengezhejile kijiilo kikatampe ne kwibambila’mba bayenga ku mazubo abo.

Yezebeli wajinga na mwana wamukazhi jizhina janji wajinga Ataliya. Wataminetu muchima nobe inanji. Ataliya wasongwelwe ku mfumu wa bena Yuda. Mwatawanji byo afwile, mwananji wamulume ye watendekele kulama. Bino mwananji byo afwile, Ataliya wibikilepotu aye mwine pa bufumu ne kutendeka kulama bena Yuda. Wakebelenga kuzhiisha kisemi kya bufumu. Waipayilenga bonse bafwainwe kwikala pa bufumu kubikapotu ne bankana banji. Bantu bonse bamuchiinanga bingi.

Ñanga Mukatampe Yehoyada ne mukazhanji Yehosheba bayukile kuba’mba byaubilenga Ataliya byatamine bingi. Babikile bumi bwabo mu kizumba byo bafile Yehoashi, munkana wa kwa Ataliya. Bamukomeshe pa nzubo ya Lesa.

Yehoashi byo afikizhe myaka itanu na ibiji, Yehoyada wakonkenye bakulumpe ne bena Levi ne kwibambila’mba: ‘Sopainga bibelo bya nzubo ya Lesa kabiji kange muswishe muntu nangwa umo kutwelamo ne. Yehoyada watongwele Yehoashi kwikala mfumu wa bena Yuda ne kumuvwika munchinya wa bufumu ku mutwe. Bena Yuda babijikile’mba: ‘Mfumu ekale myaka yavula!’

Mfumu wa mukazhi aye Ataliya byo aumvwine bantu na kubijika wanyemejile ku nzubo ya Lesa. Byo amwene mfumu ye batongwele, wabijikile’mba: ‘Bunsatuki! Bunsatuki!’ Bakulumpe babikota bakwachile uno mfumu wamukazhi wakanamine ne kumulupwila pangye ne kumwipaya. Pano bantu baubilenga byatama na mambo a uno mfumu bebobile byepi?

Yehoyada wakwashishe bano bantu kabiji balayile Yehoba amba bakengijilangatu aye yenka kwapwa. Yehoyada wibambijile konauna nzubo mo bapopwelanga Baela ne kulalaula bankishi bonse. Watongwele bañanga ne bena Levi bakwingila pa nzubo ya Lesa, pa kuba’mba bantu bakatendeke jikwabo kupopwela Lesa. Watongwele bakwingijila ku bibelo na kusopa nzubo ya Lesa ne kumona kuba’mba kafwako muntu nangwa umo wa muzhilo wafwainwe kutwelamo ne. Kepo Yehoyada ne bakulumpe bonse basendele Yehoashi ne kumutwala ku kipango ne kumwikazha pa kipona kya bufumu. Bena Yuda basangalele bingi. Batendekele kwingijila Yehoba jikwabo, kwa kubula lukatazho lwaletanga Ataliya ne bupopweshi bwa kwa Baela. Nanchi wamona Yehoyada byo akwashishe bantu bavula nyi?