Mu kyalo kya Asilya mwajinga muzhi ye batelanga’mba Ninevwa. Mu uno muzhi bantu baubanga bingi bintu byatama. Yehoba waambijile ngauzhi wanji Yona kuya ku Ninevwa na kubuula bantu amba baleke byubilo byabo byatama. Bino Yona wakaine ne kuya kungi. Wakanjijile mu bwato bwayilenga ku Tashishi.

Bwato byo bwajinga pa kalunga, kwaishile kipuupu kikatampe bingi. Baendeshenga bwato baumvwine bingi moyo. Batendekele kulomba ku balesa babo amba: ‘Mambo ka kino o kibena kumwekela?’ Kyapeleleko, Yona wibabujile’mba: ‘Yami nalengela kino kipuupu. Mbena kunyema, nakana kuba byambujile Yehoba amba ngube. Ntayai pa kalunga, ne manyaki asakuleka.’ Baendeshenga bwato bakaine kuba bibabujilenga Yona. Bino Yona aye wakoselepotu. Byo bamutayile pa kalunga, ponkapotu manyaki alekele.

Yona walangulukilenga’mba kyapwa wafwa. Byo aibijilenga pa kalunga ka mema, walombele kwi Yehoba. Kepo Yehoba atumine jisabi jikatampe bingi. A jino jisabi jaminine Yona, bino kechi jamwipayile ne. Saka aji munda ya jisabi, Yona walombele’mba: ‘Nkemukokelanga kimye kyonse.’ Yehoba wamuzhikijile Yona munda ya jisabi moba asatu kabiji jino jisabi jakamulashijile Yona kumutunta.

Nanchi Yehoba byo apulwishe Yona kyalumbulwilenga’mba kechi ukaya ku Ninevwa nenyi? Ine. Yehoba wamwambijile Yona jikwabo kuya ku uno muzhi. Yona wakookejile. Wayile ku uno muzhi ne kwambila bantu baubilenga bintu byatama amba: ‘Kwashalatu moba 40, muzhi wa Ninevwa bakamonauna.’ Bantu baubile kyakukumya. Balapijile ne kuleka byubilo byabo byatama. Mfumu wa mu Ninevwa waambijile bantu banji amba: ‘Mwitai Lesa ne kulapila. Kampe usakuleka kwitwipaya.’ Yehoba byo amwene’mba bantu balapile, kechi waonawine muzhi wa Ninevwa ne.

Yona wazhingijile bingi mambo uno muzhi kechi bamonawine ne. Akilanguluka pa kino: Yehoba wamutekenyejile ne kumubila lusa Yona, bino aye kechi waumvwijile lusa bantu bajinga mu muzhi wa Ninevwa ne. Yona wakekele pangye ya muzhi munshi ya kijimwa. Kino kijimwa byo kyaumine, Yona wazhingijile bingi. Kepo Yehoba amwambijile’mba: ‘Waubila lusa kino kijimwa kukila bena Ninevwa. Nebobijile lusa. O ene mambo o bapulukila.’ Nanchi Lesa watazhizhe mwepi? Bantu bajinga mu muzhi wa Ninevwa banemene bingi kukila kyo kya kijimwa.

Bufumu bwa bena Asilya bwatendekele ne kulama ba mu bufumu bwa mikoka jikumi bwa bena Isalela. Senakelibu mfumu wa bena Asilya wakebelenga ne kwangata bufumu bwa mikoka ibiji bwa bena Yuda. Watendekele kwangata mizhi ya bena Yuda. Bino Yelusalema ye muzhi ye akebeshenga bingi. Senakelibu kechi wayukile kuba’mba Yehoba ukazhikijila Yelusalema ne.

Hezekiya mfumu wa bena Yuda wapele Senakelibu mali avula bingi kuba’mba abule kulukuka Yelusalema. Senakelibu watumine bashilikale banji kuya na kulukuka Yelusalema nangwa kya kuba watambwile ano mali. Bantu bajinga mu uno muzhi baumvwine bingi moyo mambo bena Asilya bafikile kwipi na uno muzhi. Kepo Hezekiya ebambijile’mba: ‘Kuba moyo ne. Bena Asilya bakosa, pano bino Yehoba usakwitupa bulume bwa kwibashinda.’

Senakelibu watumine muluwe wanji aye Labashake kuya ku Yelusalema na kwibendeleka. Labashake waimene pangye ya muzhi na kubijika’mba: ‘Yehoba kechi wakonsha kwimupulusha ne. Kange Hezekiya emujimbaike ne. Kafwako lesa wakonsha kwimupokolola mu kwi atweba ne.’

Hezekiya walombele kwi Yehoba kuba’mba amubule bya kuba. Yehoba wamukumbwile’mba: ‘Kuba moyo na byambo byaamba Labashake ne. Senakelibu kechi ukalukuka muzhi wa Yelusalema ne.’ Kyalondejilepo, Hezekiya watambwijile makalata atumine Senakelibu. Mu ano makalata wanembelemo amba: ‘Leka byo ubena kulanguluka. Yehoba kechi ukemupokolola ne.’ Bino Hezekiya walombele’mba: ‘Anweba Yehoba, tupokololai, pa kuba’mba bantu bonse bayuke kuba’mba anweba yenu Lesa wa kine.’ Yehoba wamwambijile’mba: ‘Mfumu wa bena Asilya kechi ukatwelamo mu Yelusalema ne. Nkazhikijila muzhi wami.’

Bino Senakelibu aye wapwishishe mu muchima wanji amba muzhi wa Yelusalema ukekala muzhi wanji. Juba jimo bufuku, Yehoba watumine malaika wajinga bashilikale babena Asilya pangye ya muzhi wa Yelusalema. Uno malaika waipaile bashilikale ba bena Asilya 185,000. Bashilikale bonse ba Mfumu Senakelibu bafwile. Wabwelele kwabo mambo kafwako kyo afwainwe kuba ne, bamushinjile. Yehoba wazhikijile Hezekiya ne muzhi wa Yelusalema byonka byo amulayile. Inge wajinga mu muzhi wa Yelusalema, nanchi ne obewa inge waketekejile mwi Yehoba nyi?