Bena Yuda balekele kupopwela Yehoba bimye byavula bingi ne kutendeka kupopwela balesa babubela. Pa myaka yavula, Yehoba wibajimunangako kuba’mba baleke byubilo byabo byatama. Wibatuminanga bangauzhi bakwibajimunako, pano bino kechi baumvwanga ne. Baubanga bangauzhi mukeyu. Yehoba waubile byepi pa kuba’mba baleke kupopwela bankishi?

Mfumu wa bena Babilona aye Nebukaneza, washinjile mikoka yavula bingi. Muzhi mutanshi kushinda wajinga wa Yelusalema, wakwachile Mfumu Yehoyakina, babinemanga ne banabalume bayuka kulwa nkondo ne bonse bayuka mingilo ne kwibatwala ku Babilona. Kabiji wasendele byonse bya buneme byajinga mu nzubo ya Yehoba. Kepo Nebukaneza atongwele Zedekiya kwikala mfumu wa bena Yuda.

Patanshitu, Zedekiya wakokelanga Nebukaneza. Byalo byamuzhokolokele ne bangauzhi ba bubela balengejile Zedekiya kusatukila bena Babilona. Bino Yelemiya wamujimwineko amba: ‘Inge usatuke, ukepayisha bantu ku kipowe kya nzala ne kikola kikeya mu Yuda.’

Zedekiya wasatukijile bena Babilona byo alamine pa myaka itanu na isatu. Wayile nakobola nzhita ya bena Ijipita. Kino kyalengejile Nebukaneza kutuma bashilikale banji kuya na kulukuka muzhi wa Yelusalema ne kumuzhokoloka muzhi yense. Yelemiya waambijile Zedekiya amba: ‘Yehoba waamba’mba inge wipaane ku bena Babilona, muzhi kechi bakamonauna ne kabiji obewa ukekala na bumi. Bino inge ubule kuba bino, bena Babilona bakasoka muzhi wa Yelusalema ne kukutwala mu buzha.’ Zedekiya wakaine’mba: ‘Kechi nsakwipana kwi abo ne.’

Byo papichile mwaka umo ne kichika, bashilikale babena Babilona bakundwile nsakwa ya muzhi wa Yelusalema ne kumusoka. Basokele nzubo ya Lesa, kabiji baipayile bantu bavula. Bavula wibasendele ne kwibatwala mu buzha.

Zedekiya wanyemene mu muzhi wa Yelusalema, bino bena Babilona batatwile kumupupila. Bakamukwachijile kwipi na muzhi wa Yeliko, ne kumuleta kwi Nebukaneza. Mfumu wa bena Babilona waambijile Zedekiya kwiya na kumona baana banji byo bebepayilenga. Nebukaneza wasabawile Zedekiya meso ne kumukasa mu kaleya kabiji momo afwijile. Yehoba walayile bena Yuda amba: ‘Myaka 70 inge yapwa, mukabwela ku Yelusalema.’

Ki ka kyamwekele ku banyike bo batwajile mu buzha mu Babilona? Nanchi bakonsheshe kutwajila kwikala ba kishinka kwi Yehoba nyi?

Mfumu Nebukaneza byo asendele babinemanga ba mu Yuda ne kwibatwala ku Babilona, waambijile bashilikale banji kusalamo bansongwalume bakosa kabiji ba maana. Bano bansongwalume bebatwajile na kwibafunjisha pa myaka isatu. Byo bebafunjishenga bibalengejile kwikala babinemanga mu Babilona. Nebukaneza waambijile Ahipenaze wajinga mukulumpe wa bamitonyi kwibafunjishanga. Bano bansongwalume bafunjilenga kutanga, kunemba ne kwamba Kiakadeyanyi, mulaka wa bena Babilona. Kabiji bebanengezhezhanga ne kajo konka kajangapo mwine mfumu ne babinemanga banji. Bano bansongwalume bana bajinga Danyela, Hananiya, Mishela ne Azaliya. Ashapenaze wibatumbile mazhina a bena Babilona, Danyela wamutumbile’mba Beleteshaza, Hananiya amba Shadalaka, Mishela amba Meshaka ne Azaliya wamutumbile’mba Abedenego. Nanchi byo bafunjilenga bibalengejile kuleka kwingijila Yehoba nyi?

Bano bansongwalume bana bafuukwilepo kukookela Yehoba. Bayukile kuba’ma kechi bafwainwe kujanga kajo kebapelenga mfumu kakainye Yehoba mu Mizhilo yanji ne. Onkao mambo, babuujile Ashapenaze amba ‘mwane kange betupenga kajo ka mfumu ne.’ Ashapenaze wibakumbwile’mba: ‘Mfumu ukangipaya inge akemumone mwanyana na mambo a kubula kuja kajo ko abena kwimupa.’

Danyela wamubuujile wibalaminenga’mba : ‘Mwane mwitupengatu bishu ne mema pa moba jikumi. Kepo mukesakanye mmwekelo yetu na ya bansongwalume babena kuja kajo ka mfumu.’ Naye waswile.

Moba jikumi byo apwile, Danyela ne balunda nanji bamwekelenga bingi bulongo kukila bakwabo bansongwalume. Yehoba waumvwine bingi bulongo mambo bamukookejile. Wapele Danyela maana akulumbulula mwatala bimwesho ne biloto byonse.

Byo bapwishishe byo bafunjilenga, Ashapenaze watwajile bano bansongwalume kwi Nebukaneza. Mfumu byo esambilenga nabo wamwene Danyela, Hananiya, Mishela ne Azaliya kuba’mba bajinga na maana kukila bakwabo. Wibasajile bano bonse bana kwikala babinemanga banji. Mfumu javula wibepuzhanga kumubulako bya kuba pa bintu byanema. Yehoba wibalengejile kwikala na maana kukila bafundako mfumu ne boba bingelekezha.

Nangwa kya kuba bajinga mu kyalo kingi, Danyela, Hananiya, Mishela ne Azaliya kechi balekele kwikala bantu ba Yehoba ne. Nanchi ne obewa ukatwajijila kuvuluka Yehoba kimye kyonse nangwa kya kuba bansemi yobe bafwapo nyi?