Juba jimo bufuku, Mfumu Nebukaneza walotele kiloto kyamupezhezhe bingi maana. Kyamulengejile kukankalwa kulaala. Waichile boba bingelekezha ne kwibambila’mba: ‘Ndumbulwilai mwatala kino kiloto.’ Abo bamukumbwile’mba: ‘Anweba mfumu tubuulai byo mwakulota.’ Bino Nebukaneza wakaine’mba: ‘Ine, anweba mbulai byo nakulota, inge mukankalwe nsakwimwipaya.’ Kabiji bamwambijile jikwabo amba: ‘Tubuulai byo mwakulota ne atweba tusa kwimulumbulwila mokyatala. Kepo ebambijile’mba: ‘Namona mubena kuntayilatu kimye, anweba mbulai byo nakulota!’ Babuujile mfumu amba: “Kafwako muntu nangwa umo pano pa ntanda wakonsha kuba kintu kibena kukeba mfumu ne.”

Nebukaneza wazhingijile bingi kabiji wakambizhe kwipaya ba maana bonse bajinga mu kyalo. Ko kuba’mba Danyela, Shadalaka, Meshaka ne Abedenego bafwainwe kwibepaya. Danyela waambijile mfumu kwibapako kimye. Kepo aye ne balunda nanji balombele Yehoba kuba’mba ebakwashe. Yehoba waubile byepi?

Mu kimwesho, Yehoba wamwesheshe Danyela byalotele Nebukaneza ne mo byatajile. Juba ja londejilepo Danyela wayile ku kalume wa mfumu ne kumwambila’mba: ‘Kange mwipaye banabalume ba maana ne. Nsakulumbulula kiloto kyalotele bamfumu.’ Kepo uno kalume atwajile Danyela kwi Nebukaneza. Danyela waambile ku mfumu amba: ‘Lesa wimusolwela bikamweka kulutwe. Bino byobyo mwalotele. Mwamwene lukipashañano mukatampe wajinga na mutwe wa ngolode yawamisha, kyaji ne maboko anji byajinga bya siliva, jivumo ne mambwata anji byajinga bya mukuba, kabiji mikupa yanji yajinga ya kyela kya kapotwe ne maulu anji ajinga a kyela kya kapotwe kyapatankana na buchimba. Kepo mwamwene jibwe jaalumukilenga kufuma ku mutumba javingakenye maulu a kino kipashañano. Maulu avingakene kabiji mwela wibyululwile kya kuba kafwako nangwa kimo kyashajilepo ne. Kepo jino jibwe javingakenye maulu, jaalukile ke mutumba mukatampe wakumbene pa ntanda ponse.’

Kabiji Danyela waambile’mba: ‘Muno mo mwatala kiloto kyenu. Bufumu bwenu ye yewa mutwe wa ngolode. Kabiji kukekala bufumu bukwabo bukekala nobe mukuba bukalamanga pano pa ntanda ponse. Bukwabo bukalondelapo bukakosatu nobe kapotwe. Kabiji bukapelako bukabenamo, lubaji lumo lwa buno bufumu bukakosa, bukwabo kechi bukakosa ne, bukekalatu nobe buchimba. Aja jibwe jaalukile ka mutumba bo Bufumu bwa Lesa. Bukalalaula bufumu bonse kabiji abo bukekala myaka ne myaka.

Nebukaneza wafukamine ne kukinka kilungi kyanji panshi. Waambile’mba: ‘Kine, Lesa wobe wasolola byo nalotele. Kafwako Lesa mukwabo waesakana nanji ne.’ Danyela kechi bamwipayile ne. Nebukaneza wamutongwele kwikala mukulumpe wa kutangijila banabalume bonse ba maana kabiji wamutongwele ne kwikala kinemanga wa kibunji kya mu Babilona. Nanchi wamona Yehoba byo akumbwile lulombelo lwa kwa Danyela nyi?

Byo papichile moba kufuma po alotejile kiloto, Mfumu Nebukaneza walengele kipashañano kya ngolode kikatampe. Wikimikile mu musanza wa Dula ne kukonkanya pamo babinemanga bonse ku kino kipashañano. Kabiji Shadalaka, Meshaka ne Abedenego nabo bebechile. Kepo mfumu akambizhe amba: ‘Umvwe mwaumvwa kuvuma kwa lusengo, mumpempe, jisense, kyansa, kijimba kya mizhinge ne mpwita, mwafwainwa kufukama! Yense usakubula kufukama basakumutaya ponkapotu mu kisha kya mujilo.’ Nanchi bano Bahebelu basatu baswile kufukama nyi, inyi abo bafwainwetu kupopwela Yehoba kwapwa nyi?

Kepo mfumu akambizhe’mba bebivumye. Bantu bonse baponene panshi kinkuvumene saka bapopwela kino kipashañano. Bino Shadalaka, Meshaka ne Abedenego bashajiletu monka baimena. Bantu bebamwene babuujile mfumu amba: ‘Aba Bahebelu basatu bakukana kupopwela kimpashañano.’ Nebukaneza wakambizhe’mba bebalete. Wibambijile’mba: ‘Nsakwimupa kimye kya kupopwela kimpashañano. Inge mukane nsakwimutaya mu mujilo. Ñanyi lesa wakonsha kwimupokolola mu kuboko kwami?’ Abo bamukumbwile’mba: ‘Kwitupa ne kimye kya kuba byobyo ne. Lesa wetu wakonsha kwitupulusha. Pano bino, nangwa abule kwitupokolola, bino anweba mfumu yukai’mba kechi tusakupopwela kipashañano kyenu ne.’

Nebukaneza wazhingijile bingi. Wakambizhe’mba: ‘Bekisonsele kisha kya mujilo bimye bitanu na bibiji kukila byo bekisonselanga kimye kyonse!’ Kepo akambizhe bashilikale banji amba: ‘Bakasai bano banabalume mwibataye mu mujilo!’ Na mambo a kuba mujilo wabayile bingi, bashilikale bebasendele bafwile na lubebe lwa mujilo ponkapotu. Bino Bahebelu basatu bebatayile mu kisha kya mujilo. Mfumu Nebukaneza byo atajilemo, wamwene bantu bana saka babena kwenda mu mujilo saka bakutayamotu basatu. Waumvwine moyo kabiji ponkapotu waimene ne kushikisha babinemanga banji amba: ‘Nanchi kechi twajikutayamo bantu basatu mu mujilo nenyi? Monai, muji bana, kabiji wa buna ubena kumweka nobe malaika.’

Kepo Nebukaneza ayile kwipi na kisha kya mujilo ne kubijika’mba: ‘Anweba bakalume ba Lesa Mwine Wakila, fumaimo, iyai kuno!’ Bantu bonse bakuminye bingi pa kumona Shadalaka, Meshaka ne Abedenego bafuma mu mujilo saka bajitu bulongo. Mibiji yabo, nsuki ne bivwalo kechi byapile ne, kabiji kechi banukilepotu nangwa mubabo ne.’

Nebukaneza waambile’mba: ‘Atotwe Lesa wa kwa Shadalaka, Meshaka ne Abedenego, yenka wajikutuma malaika wanji kwiya na kupokolola bakalume banji. Kafwako Lesa mukwabo uji nobe uno ne.’

Nanchi ne obewa wakonsha kutwajijila kwikala wa kishinka kwi Yehoba nangwa bintu byakatazhapotu byepi byonka byaubile bano Bahebelu basatu nyi?