Juba jimo Bufuku, Nebukaneza walotele kiloto kyamuletejile bingi moyo. Waichile banabalume ba maana kuba’mba bamubuleko byo kyalumbulwilenga. Bino kafwako nangwa umo wakonsheshe kulumbulula mwatajile kino kiloto ne. Kepo mfumu abujile Danyela.

Nebukaneza wabujile Danyela amba: ‘Namwene kichi mu kiloto, kyajinga pakachi ka ntanda kyalepele bingi. Kino kichi kyafikile ne mwiulu. Kabiji kyamwekelengatu konse pano pa ntanda. Mabuula akyo amwekelenga bingi bulongo. Kabiji kyapangile bipangwa byavula bingi. Banyama bamungye baikelenga munshi yakyo ne bañonyi balengejilenga binsa ku misampi yakyo. Kepo namwene malaika saka abena kufuma mwiulu.’ Wabijikile’mba: ‘Tema kichi, ukopole ne misampi yakyo. Pano bino, ushe kishiki na mizhazhi yakyo mu mushiji kabiji upombeko kyela kya kapotwe ne mukuba. Muchima wakyo afume mu bumuntu, kikale na muchima wa bunyama poso pakapite bimye bitanu na bibiji. Bantu bonse bakayuka’mba Lesa ye Kalama, kabiji amba ye upana bufumu ku muntu yense ye akeba.’

Yehoba wasolwele kwi Danyela mwatala kino kiloto. Danyela byo ayukile mwatajile kino kiloto waumvwine bingi moyo. Waambile’mba: ‘Anweba mfumu, nanchi kino kiloto inge kya kwamba pa balwanyi benu. Pano kibena kwamba pe anweba. Akya kichi kyabaya ye anweba. Bakemufumya pa bufuku kabiji mukajanga nsono nobe nyama wa mungye. Bino byonka byaambile malaika amba kishiki bekishe na mizhazhi yakyo, ne anweba mukabwela pa bufumu jikwabo.’

Byo papichile mwaka umo, Nebukaneza saka abena kwenda pa musemi wa nzubo yanji na kutala mwaya muzhi wa Babilona byo awamine. Waambilenga’mba: ‘Nashimika muzhi wawama bingi. Monai byo natumbalala!’ Byo akyambilenga, waumvwine jiwi mwiulu amba: ‘Nebukaneza! Bufumu bakwangatabo.’

Ponkapotu Nebukaneza wakonyenye, waikeletu nobe nyama wa mungye. Wafumine mu nzubo yanji ya bufumu ne kuya na kwikala na banyama ba mungye. Nsuki yalepele nobe mayona a mpungu ne ngala yanji yamwekelenga nobe ngala ya ñonyi.

Myaka itanu na ibiji byo yapwile, Nebukaneza maana abwelelemo. Yehoba wamubwezhezhe pa bufumu jikwabo. Kepo Nebukaneza aambile’mba: ‘Namusanchila Yehoba, Mfumu wa mwiulu. Pano nayuka namba Yehoba ye Kalama. Ulengesha bumvu muntu witota ne kupana bufumu ku muntu yense ye akeba.’

Mu kuya kwa moba, Beleshaza ye waswaine pa bufumu mu Babilona. Juba jimo bufuku, wajinga na kijiilo na babinemanga ba mu bufumu bwanji. Wakambizhe bakalume banji kuleta tutomeno twa ngolode twasendele Nebukaneza mu nzubo ya Yehoba. Beleshaza ne bantu bo aichile batendekele kutomenamo binyu saka babena kutakaika balesa babo. Ponkapotu, bamwene kuboko kwa muntu mu mwela kwatendeka ne kunemba pa lubumbulu byambo byo bakankelwe kutanga.

Beleshaza waumvwine bingi moyo. Waichile boba bingelekezha ne kwibabula’mba: ‘Muntu usakutanga bino byambo ne kundumbulwila mo byatala ukekala kalama wa busatu mu bufumu bwa bena Babilona.’ Bonse bakankelwe, kafwakotu nangwa umo wakonsheshe kwibilumbulula ne. Inamfumu watwelele ne kwamba’mba: ‘Kuji mwanamulume umo, jizhina janji Danyela, ye walumbulwilanga Nebukaneza biloto. Wakonsha kwimulumbulwila bino byambo.’

Danyela waishile kwi Beleshaza. Beleshaza wamwambijile’mba: ‘Inge wakonsha kutanga bino byambo ne kulumbulula mo byatala, nsakukuvwika bupela bwa ngolode mu nshingo, kabiji ukekala kalama wa busatu mu bufumu bwa bena Babilona. Danyela waambile’mba: ‘Kumpa bya bupe ne, bino nsakwimulumbulwila bino byambo mo byatala. Bashenu ba Nebukaneza, betotele bingi. Bino Yehoba wibalengeshe bumvu. Mwayuka byonse bibamwekejile, pa kuba anweba kechi mwaji kunemeka Yehoba byo mwakutomenanga binyu mu makapu a ngolode a mu nzubo ya Lesa ne. Lesa wanemba bino byambo bya kuba’mba: Mene, Mene, Tekel ne Parsin. Bino byambo bibena kulumbulula’mba bena Meda ne bena Pelisha bakashinda Babilona, kabiji anweba kechi mukatwajijila kwikala mfumu ne.’

Kyamwekangatu nobe kafwako wakonsha kushinda muzhi wa Babilona ne. Uno muzhi wajinga na nsakwa ikatampe kabiji bamuzhokolokele ku mukola. Pa jonkaja juba bufuku, bena Meda ne bena Pelisha balukukile uno muzhi. Mfumu wa bena Pelisha aye Kilusa wasendwile mema a mukola pa kuba’mba bashilikale baye ku bibelo bya muzhi. Byo bafikile, bataine bibelo bya muzhi byashalatu kyashi. Ino nzhita yatwelele ne kushinda uno muzhi ne kwipaya mfumu. Kilusa ye watendekele kulama Babilona.

Mu yenka uno mwaka, Kilusa watayile mbila ya kuba’mba: ‘Yehoba Lesa wa mwiulu wakambizha kumushimikila nzubo mu Yelusalema. Yense wa mwi anweba bantu banji usaka kwingilako ayenga.’ Onkao mambo, byonka Yehoba byo alayile, Bayudea bavula babwelele kwabo byo papichile myaka 70 kufuma po baonawijile Yelusalema. Kilusa wabwezhezhe bipe bya siliva ne bya ngolode byasendele Nebukaneza mu nzubo ya Lesa. Nanchi wamona Yehoba byo aingijishe Kilusa pa kukwasha bantu ba Lesa nyi?