Byambo Bikwabo bya mu Mutanchi wa Kupwila kwa Bwikalo ne Mwingilo
© 2025 Watch Tower Bible and Tract Society of Pennsylvania
JANUARY 5-11
BYA BUNEME BIJI MU MAMBO A LESA ISAYA 17-20
“Bikamwekela Boba Betulukuka”
“Bufumu Bwami Kechi bwa Pano pa Ntanda Ne”
16 Luno lupimpu lo baubile lwanema bingi. Baibolo waesakanya byubilo bya bantu ku kupoota ne kuvwandauka kwa mema pa kalunga. (Isa. 17:12; 57:20, 21; Lum. 13:1) Nangwa kya kuba bya bumulwila ntanda bilengela bantu kuzhingila, kuleta mabano ne malwañano, atweba twatwajijila kwikala mu mutende ne kukwatankana. Kabiji Yehoba byo amona bantu mu ntanda byo baabenamo, kimusangajika bingi ku muchima pa kumona bya kwatankana bantu banji.—Tangai Zefwaniya 3:17.
Kubula Kwimvwanga mu bya Bumulwila Ntanda mu Ntanda Yaabenamo
4 Apo kampe twikala mu mpunzha mo babula kwitukanjikizha kwivwanga mu bya bumulwila ntanda. Bino byo tubena kunangijila ku mpelo ya buno bwikalo bwa kwa Satana, kiketukatazhanga bingi kubula kwivwanga mu bya bumulwila ntanda. Bantu ano moba kechi ‘bakeba kumvwañana’ nangwa “kumvwa” ku bakwabo ne, kabiji bakayangatu na kwabenamo. (2 Timoti 3:3, 4) Balongo betu bamo babena kuyanda na mambo a kwaluka kwa bintu bibena kuba ba mulwila ntanda mu kyalo kyabo. O ene mambo o twafwainwa kwinengezhezha jimo lonka luno kubula kwivwanga mu bya bumulwila ntanda inge bintu byakatazha. Twayai twisambe pa bintu bina byo twakonsha kuba pa kuba’mba twinengezhe.
ip-1 198 jifu. 20
Yehoba byo Afunjileko Bisaka bya Bantu
20 Ki ka kyafuminemo? Isaya waambile’mba: “Mu kimye kya mabanga, kukamweka bintu bilengesha moyo. Saka bukyangye kukya, abyo bikazhimañana. Bino byo bikamwekela boba betulukuka ne boba betwangata bintu byetu.” (Isaya 17:14) Bantu bavula bamanyika bantu ba Yehoba, kwiboba byatama ne kwibalengulula. Na mambo a kuba’mba kechi bevwanga mu bisho bya bupopweshi biji mu ino ntanda ne, Bena Kilishitu ba kine bebamanyika ku balwanyi babo. Pano bino, bantu ba Lesa bashiinwa’mba katatakatu bya malwa byo babena kupitamo luno bikapwe.—2 Tesalonika 1:6-9; 1 Petelo 5:6-11.
Bishinka Bikwabo Byanema
Bishinka Bikatampe Kufuma mu Buku Mutanshi wa Isaya
20:2-5—Nanchi Isaya kya kine waendelenga bwamba myaka isatu nyi? Isaya wavujiletu kivwalo kyanji kya peulu ne kwenda na ‘kivwalo kya mukachi.’—1 Samwela 19:24, monai tubyambo twa panshi mu Baibolo wa, NW.
JANUARY 12-18
BYA BUNEME BIJI MU MAMBO A LESA ISAYA 21-23
Byo Tufunjilako ku Byamwekejile Shebina
Lujimuno Lumwesha Butemwe bwa Lesa
7 Pa kuba’mba tumvwishe buneme bwa lujimuno, twayai twisambe pa bantu babiji Yehoba bo ajimwineko: Shebina, wajingako mu kimye kya Mfumu Hezekiya, ne mulongo wa mu ano moba aye Graham. Na mambo a kuba’mba wajinga kalama kabiji mukulumpe ‘watalanga pa nzubo ya mfumu,’ Shebina walangulukilenga’mba wajinga na luusa lukatampe. (Isa. 22:15) Kino kyamulengejile kutendeka kwitota ne kukeba kutumbalala. Wipoyejile aye mwine kilende kyawama, ne kwenda mu ‘makalaki awamisha.’—Isa. 22:16-18.
8 Na mambo a kuba Shebina watendekele kwitumbijika aye mwine, Lesa ‘wamufumishepo pa kifulo kyanji’ ne kupingizhapo Eliakima. (Isa. 22:19-21) Luno lupimpu lwaubiwe kimye mfumu wa bena Asilya aye Senakelibu kyo anengezhezhenga kulukuka Yelusalema. Byo papichile kimye, uno mfumu watumine babinemanga banji ku Yelusalema na nzhita ikatampe kuya na kuzakamisha Bayudea ne Hezekiya kuba’mba bakookele bena Asilya. (2 Mfu. 18:17-25) Eliakima bamutumine kuya na kwisamba na babinemanga, bino kechi wayile bunke ne. Wayijile pamo na bakwabo babiji, kabiji umo pa bano wajinga Shebina, waingijilenga mwingilo wa bunembeshi pa kyokya kimye. Nanchi kino kechi kimwesha’mba Shebina waswile mwingilo mucheche ye bamupele kabiji kechi wazhingijile nangwa kwikala na kizhingijisha pa kumufumya pa kifulo kikatampe nenyi? Inge ibyo, ñanyi bintu byo twakonsha kufunjilako ku jino jishimikila? Twayai twisambeko bintu bisatu.
9 Kitanshi, Shebina bamufumishe pa kifulo kyo ajingapo. Byamumwekejile bitujimunako kuba’mba “paji kwitota palondela lonaiko, kabiji muchima wa kwilundumika ulengela kwituntula.” (Maana 16:18) Inge muji na mingilo mu kipwilo, kampe mwatumbalala ne kutumbalala, nanchi mukebikako kwikala bepelula nyi? Nanchi mukatumbijika Yehoba pa bya bupe byonse byo muji nabyo nangwa byonse byo mwauba nyi? (1 Ko. 4:7) Mutumwa Paulo wanembele’mba: “Mbena kwambila yense uji mwi anweba namba, kange alangulukenga kukila po afwainwa kwilangulukila ne, poso kwikala na milanguluko yawama.”—Loma 12:3.
Lujimuno Lumwesha Butemwe bwa Lesa
10 Kya bubiji, byo ajimwineko Shebina, kimwesha kuba’mba Yehoba wayukile’mba Shebina wakonsha kupimpula byubilo byanji. (Maana 3:11, 12) Luno ke lufunjisho lwanema bingi ku boba bo bangata mingilo mu kipwilo kya Lesa lelo jino. Kechi bafwainwa kuzhingila ne, pakuba bafwainwa kutwajijila kwingijila Lesa papelela bulume bwabo, ne kumona lujimuno amba kiyukilo kya butemwe bwa Yehoba. Vulukainga kuba’mba, Shetu wa mwiulu wayuka’mba twakonsha kupimpula byubilo byetu inge twipelula ne kulondela byo etujimunako. (Tangai 1 Petelo 5:6, 7.) Lujimuno lwakonsha kwikala jishinda jimo Lesa jo etubumbilamo, onkao mambo, twafwainwa kwikala nobe buchimba bwanekena mu maboko anji.
Lujimuno Lumwesha Butemwe bwa Lesa
11 Kya busatu, aba bapana lujimuno ku bakwabo, nabiji bansemi ne bakalama mu kipwilo bafwainwa kufunjilako ku jishinda Yehoba jo ajimwijilemo Shebina. Bakonsha kufunjilako ka? Nangwa kya kuba lujimuno lwa Yehoba lumwesha byo ashikwa bubi, bino lumwesha ne byo ata muchima muntu walenga mambo. Umvwe mwi bansemi nangwa bakulumpe mu kipwilo mukeba kujimunako bakwenu, nanchi mukalondela byuba Yehoba, kushikwa kyatama kya uba muntu kabiji ne kulanguluka pa byubilo byawama biji na mwanenu nangwa mukwenu wa mu lwitabilo nyi?—Yuda 22, 23.
Bishinka Bikwabo Byanema
Bishinka Bikatampe Kufuma mu Buku Mutanshi wa Isaya
21:1—Ñanyi kibunji kitelwa’mba “kiselebwa kya ku kalunga ka mema”? Nangwa kya kuba Babilona kechi waikejile kwipi na kalunga ka mema ne, utelwa pa jino jizhina. Kino kibunji kyaikalanga ke “kalunga ka mema” mambo mikola ya Ufelata ne Tigris yayuzhanga kyokya kibunji pa mwaka pa mwaka.
TAIKO MUCHIMA KUMWINGILO WA KUSAPWILA
Nafwainwa Kusala Byepi Muntu Wawama wa Kufunjilako?
ijwyp kibaaba 71
Nafwainwa Kusala Byepi Muntu Wawama wa Kufunjilako?
“Inge naikala na makatazho ku sukulu, kulanguluka pa muntu wapichile mu makatazho epasha na o mbena kupitamo kwankwashanga bingi. Kabiji nafunjilangako ku byo aubile. Kwikala na muntu wa kufunjilako kwankwashishe kuchinchika makatazho.”—Haley.
Bantu bo tufunjilako bakonsha kwitukwasha kuchinuzhuka makatazho ne kufikizha bikonkwanyi byetu. Onkao mambo, kyanema kusala bakufunjilako bawama.
Mambo ka a kusajila bulongo?
Byo twafwainwa kuba pa kusala
Byaambapo bakwenu
Mambo ka a kusajila bulongo?
Mukekala na byubilo bijipo na bantu bo mwasala kufunjilako. Baibolo waamba pa bena Kilishitu bo twafwainwa kufunjilako amba: “Byo mulanguluka langulukapo pa byubilo byabo, londelainga lwitabilo lwabo.”—Bahebelu 13:7.
Bya kuba: Bantu bo musala ba kufunjilako bakonsha kwimulengela kwikala na byubilo byawama nangwa byatama, onkao mambo mwafwainwa kusala baji na byubilo byawama, kechi ba mafumbi enutu nangwa aba baya nkuwa ne.
“Nafunjijileko byavula ku mwina Kilishitu mukwetu aye Adam. Nafunjijileko ku byo aubanga ne byo amonanga bintu. Nangwatu luno nkivuluka byo aambanga ne kuba. Ne aye mwine kechi wayuka ne byo nafunjijileko kwi aye ne.”—Colin.
Bantu bo musala kufunjilako bakonsha kwimulengela kwikala na milanguluko yawama nangwa ne.
Baibolo waamba’mba: “Kange mujimbaikwe ne. Kupwanañana na babi konauna byubilo byawama.”—1 Kolinda 15:33.
Bya kuba: Salainga bantu baji na byubilo byawama kechi bamwekatu bulongo ne, mambo kusala baji ba byubilo byatama kukemulengela kulefulwa.
“Kwiesakanya ku bantu bamweka bingi bulongo kwakonsha kwimulengela kulangulakanga nobe kechi mwanema ne, kabiji nobe kechi mumweka bulongo ne. Kuba bino kukemulengela kutatu muchima pa mwekelo yenu.”—Tamara.
Bya kulangulukapo: Ñanyi bintu byatama bifuma mu kusala bantu baya nkuwa kwikala ba kufunjilako?
Bantu bo musala ba kufunjilako bakonsha kwimulengela kukankalwa kufikizha bikonkwanyi byenu.
Baibolo waamba’mba: “Awa wenda na ba maana ukekala na maana.”—Byambo bya Maana 13:20.
Bya kuba: Salai bantu ba kufunjilako baji na byubilo byawama byo mukeba kwikala nabyo. Kuba bino kukemulengela kufunjilako ku byo baubile pa kuba’mba mufikizhe bikonkwanyi byenu.
“Kange mwibikilenga bikonkwanyi byo mwabula kuyuka bya kwibifikizha ne, nabiji kya kuba’mba ‘nkeba kubanga bintu bulongo,’ pakuba mwakonsha kwamba’mba ‘nkeba kubanga bintu bulongo byonka byuba Jane. Mambo uba bintu mu kimye kyafwainwa kabiji utako muchima pa kuba bintu.’”—Miriam.
Kishinka ke kino: kusala muntu wawama wa kufunjilako kukemukwasha kwikala na byubilo byawama.
Byo twafwainwa kuba pa kusala
Kuji mashinda abiji afwainwa kwimukwasha kusala bantu bo mwafwainwa kufunjilako.
1. Mwakonsha kumonapo kyubilo kimo kyo mukeba kwikala nakyo ne kumonapo muntu uji na kino kyubilo kuba’mba mufunjileko.
2. Mwakonsha kusala muntu wa kufunjilako uji na kyubilo kyo mwatemwa kyo mukeba kufunjilako.
Byambo biji mu kino kibaaba byakonsha kwimukwasha.
Bantu bo musala kufunjilako bakonsha kwikala:
Bakwenu. “Mulunda nami wa kine uji na byubilo byo nkeba kwikalapo nabyo. Uta muchima bantu ne kumwesha’mba wibatemwa. Nangwa kya kuba amiwa nakoma kukila aye, bino uji na byubilo byawama byo nabula. Kabiji kino kindengela kufunjilako kwi aye.”—Miriam.
Bakulumpe. Bano bakonsha kwikala bansemi benu nangwa bo mupwila nabo. “Kwambatu kine bansemi bami ke bakufunjilako bawama kwi amiwa. Baji na byubilo byawama. Nangwa kya kuba nabo balubankanya, bino bakishinka bingi. Ne amiwa inge nakoma nkeba bantu bakambenga byawama pe amiwa.”—Annette.
Bantu banembwa mu Baibolo. “Nasala bantu bakufunjilako bavula banembwa mu Baibolo nabiji Timoti, Luta, Yoba, Petelo ne nsongwakazhi mwina Isalela, ku bano bonse kuji byo mfunjilako. Kufunda pa bantu banembwa mu Baibolo kundengela kwibayuka bulongo. Ñumvwa bingi bulongo kutanga mashimikila aji mu buku wa Londelainga Lwitabilo Lwabo, ne aji mu kakitenguluzha ka kuba’mba ‘Muntu wanembwa mu Baibolo ye mwafwainwa kulondela’ katanwa mu buku wa Questions Young People Ask—Answers That Work.”—Melinda.
Bya kuba: Kechi mwafwainwa kusalatu muntu umo wa kufunjilako ne. Mutumwa Paulo wabuujile bena Kilishitu bakwabo “kutajisha aba babena kwenda mwayila bwikalo bo twaikele.”—Filipai 3:17.
Nanchi mwayuka nyi? Bantu bakonsha kufunjilako kwi anweba. Baibolo waamba’mba: “wikale wa kumwenako bantu ba kishinka mu ñambilo, mu byubilo, mu butemwe, mu lwitabilo ne mu kwilama bulongo.”—1Timoti 4:12.
“Inge mwibikako kwikala na byubilo byawama, bavula bakonsha kufunjilako kwakubula anweba bene kuyuka. Kechi mwakonsha kuyuka’mba muntu ubena kufunjilako kwi anweba ne, kabiji byubilo byenu byawama byakonsha kupimpula bwikalo bwa muntu.”—Kiana.
Byambapo bakwenu
“Bantu baya bingi nkuwa kechi banemeka mubiji wabo wibapele Yehoba ne. Kufunjilako ku bantu ba uno mutundu kwakonsha kwitulengelatu kwikala na byubilo ne mweno yatama mu bwikalo.”—Emma.
“Kusala bantu ba kufunjilako baji na byubilo byawama kukemukwasha kwikala bwikalo bwawama. Kechi twafwainwa kusala bantu bakufunjilako saka tukyangye kuyuka byubilo byabo ne, pakuba twafwainwa kwibayuka bulongo ne byubilo byawama byo baji nabyo byo tukeba kwikala nabyo.”—Justine.
“Mwafwainwa kukebanga bantu ba kufunjilako, kwibayuka bulongo ne kwikala balunda. Bantu ba kufunjilako batanwa ku mapunzha o twabula ne kuketekela.”—Micah.
JANUARY 19-25
BYA BUNEME BIJI MU MAMBO A LESA ISAYA 24-27
“Awe ye Lesa Wetu!”
“Talai, Uno Ye Lesa Wetu”
21 Nanchi mwakimonapo kala mwana wa mucheche saka abula bakwabo bashanji na lusekelo lwa kine’mba “Abe bo batata” nyi? Bapopweshi ba Lesa nabo baji na bishinka byavula bya kwiumvwina byonkabyo pe Yehoba. Baibolo waambila jimo kimye bantu bakishinka kyo bakamba’mba: “Talai, uno ye Lesa wetu.” (Isaya 25:8, 9) Umvwe mwayukisha byubilo bya Yehoba, po po mukayuka kuba’mba muji na Shenu wawama kya kine kine.
Byo Tufunjilako ku kya Kukumya kya Bashinkwa Kyaubile Yesu
14 Yesu byo etubujile’mba twafwainwa kulomba pa “kajo ketu ka lelo,” waambilenga pa kyaswa muchima wa Lesa byo kikobiwa “pano pa ntanda, byonka byo kibena kubiwa mwiulu.” (Mat. 6:9-11) Mulanguluka’mba ntanda ikekala byepi pa kyokya kimye? Baibolo waamba’mba kyaswa muchima wa Lesa ke kya kuba’mba pano pa ntanda pakekale ne kajo kawama. Byonka byaamba Isaya 25:6-8, kukekala kajo kawama kavula kakajanga bantu kimye Bufumu bwa Yehoba kyo bukalamanga. Salamo 72:16 waamba’mba: “Kajo kakavula bingi pano pa ntanda; kakekala ne peulu ya mitumba.” Nanchi mutengela kukanengezhanga kajo ko mwatemwa nangwa ko mukyangye kujapo nyi? Kununga pa bino, mukeyowanga kuja bipangwa bya ku miñanzañanza yo mukajimba. (Isa. 65:21, 22) Kabiji bantu bonse bakekalanga pano pa ntanda bakeyowanga bino bintu.
Byo Tumwenamo mu Butemwe bwa Lesa
11 Fwanyikizhai bwikalo byo bukawama mu Paladisa pano pa ntanda. Kechi mukalangulukangapo’mba mwakonsha kukolwa nangwa kufwa ne. (Isa. 25:8; 33:24) Yehoba ukemubila bintu byonse byawama byo mukeba. Ñanyi bintu bimo byo mukakebanga kufunda mu ntanda ipya? Nanchi mukakebanga kufunda pa banyama, tuñonyi ne bilengwatu bikwabo nyi? Abya mukakeba kufunda bya kwimba kidali nangwa bya kulengalenga nyi? Kukakebewanga ne bantu bayuka bya kulenga bikekala bishimikwa, bayuka kushimika ne banjimi. Kabiji kukakebewanga bantu ba kujima ne kunengezha kajo, kubunda byela bya kwingijisha, kujima bijimwa byapusana pusana ne kwibilama bulongo. (Isa. 35:1; 65:21) Byo mukekalanga myaka ne myaka, mukekala na kimye kyabaya kya kuba bino bintu byonse byo mukakebanga kuba.
12 Tukekala bingi na lusekelo kutambwila bantu bo bakasangula. (Byu. 24:15) Kabiji fwanyikizhai byo mukekala na lusekelo byo mukafunjilapo byavula pe Yehoba kupichila mu bintu byapusana pusana byo alenga. (Sala. 104:24; Isa. 11:9) Kabiji kyakilapo kuwama ke kya kuba’mba tukapopwelanga Yehoba bulongo mambo kechi tukalenganga mambo nangwa kulomba kwitulekelako mambo etu ne. Nanchi mwafwainwa kushalapo pa bino bintu byawama bikekala mu Paladisa na mambotu a kukeba “kusekela kwa pa kakimye kacheche kwa bundengamambo” nyi? (Hebe. 11:25) Ine kwalepeshatu. Bino bintu byawama byo twaambapo byanema bingi kukila bintu bya mu ino ntanda byo twakonsha kwikala nabyo pa kino kimye. Vulukainga’mba Paladisa wa pano pa ntanda ukafika, kechi ukekala nobe lwimbotu ne. Abino byonse bikobiwa mambo Yehoba witutemenwe ne kwitupa Mwananji kwiya na kwitufwila.
Bishinka Bikwabo Byanema
Baibolo wa Binembelo bya Ntanda Ipya ye bapitulukamo wa mu 2013
Mambo ka Bitango Byavula o Bebinembela Luno mu Nsansawilo? Kwesakana na milaka yo banembejilemo Baibolo, mabuku avula a mu Baibolo beanembele mu nsansawilo. Mu milaka ya ano moba, nsansawilo javula iyukanyikilwa ku ntelelo ya byambo bipasha, pakuba nsansawilo ya mu Kihebelu beingijishanga pa kwesakanya ne kupusanya bintu. Ñuvwanyikilo ya byambo mu nsansawilo ya mu Kihebelu kechi yayukanyikilwanga ku ntelelo ya byambo bine ne, bino yayukanyikilwanga ku bintu bine bibena kwambiwapo.
Mu Baibolo wa Binembelo bya Ntanda Ipya mutanshi, mabuku a Yoba ne Masalamo beanembele mu jishinda ja kuba’mba bafwainwa kwiemba ne kubwezhabwezhapo. Ino nembelo ya nsansawilo yo banembejilemo yakwashanga bantu kumvwisha ne kulabijila binembelo. Mu Baibolo ye bapitulukilemo wa mu 2013, mabuku a Byambo bya Maana, Lwimbo wa Solomone ne bitango byavula bya mu mabuku a bungauzhi, mikuku ya byambo ijimo beyabanya mu jishinda jimwesha’mba ano mabuku beanembele mu nsansawilo kabiji esakanya ne kupusanya bintu. Abino byo biji ne kinembelo kya Isaya 24:2. Mu kino kyepelo, mikuku yonse ijimo yapusanya kintu kimo ku kikwabo kabiji mukuku umo umo waamba byambo kununga pa mukwabo kumwesha’mba kafwako nangwa umo ye bakabula kuzhachisha kwi Lesa ne. Ino nembelo ya nsansawilo ikwasha muntu ubena kutanga kuyuka’mba nembi kechi wabwezhezhengapotu ne, pakuba waingijishenga ino nembelo kuba’mba akwashe bantu kumvwisha Mambo a Lesa.
Lupusano luji pa nembelo ya Kihebelu ne nsansawilo ya Kihebelu kechi yayukanyikwa bulongo ne. Onkao mambo, mu ma Baibolo avula kyakatazha bingi kuyuka paji nsansawilo. Bantuntuluzhi bafwainwa kuyuka bulongo byepelo biji na nsansawilo. Byepelo bimo bebinemba mu nsansawilo, kufwanyikizha kintu kwesakana na byo kiji, kwingijisha byambo byapusana pusana ne kwesakanya bintu pa kuba’mba bifike bantu pa muchima.
TAIKO MUCHIMA KU MWINGILO WA KUSAPWILA
Mambo ka Yesu o Atelelwa’mba Mwana Lesa?
ijwbq kibaaba 160
Mukumbu wa mu Baibolo
Baibolo javula utela Yesu amba “Mwana Lesa.” (Yoano 1:49) Byambo bya kuba amba “Mwana Lesa” bimwesha kuba’mba Lesa ye Mulenga, nangwa’mba ye Nsulo ya bumi bonse, kubikakotu ne bumi bwa kwa Yesu. (Salamo 36:9; Lumwekesho 4:11) Baibolo kechi ufunjisha amba Lesa waikele na mwana byonka bantu byo basema baana ne.
Baibolo utela ne bamalaika amba “baana ba Lesa.” (Yoba 1:6) Kabiji Baibolo waamba’mba muntu mutanshi, aye Adama, wajinga “mwana wa kwa Lesa.” (Luka 3:38) Nangwa byonkabyo, Lesa walengele Yesu patanshi kabiji ye yenkatu yeelengejile mwine, o ene mambo Baibolo o atelela Yesu amba Mwana Lesa wakila.
Nanchi Yesu waikalanga mwiulu saka akyangye kusemwa pano pa ntanda nyi?
Ñanyi mwingilo waingilanga Yesu saka akyangye kwiya pano pa ntanda?
Nanchi Yesu waikalanga mwiulu saka akyangye kusemwa pano pa ntanda nyi?
Ee. Yesu wajinga kilengwa kya mupashi mwiulu saka akyangye kusemwa pano pa ntanda. Yesu aye mwine waambile’mba: “Amiwa nafuma mwiulu.”—Yoano 6:38; 8:23.
Lesa walengele Yesu saka akyangye kulenga bintu byonse. Baibolo walumbulula Yesu amba:
“Aye ye . . . mubeji wa bilengwa byonse.”—Kolose 1:15.
Aye ye “ntendekelo ya bilengwa bya Lesa.”—Lumwekesho 3:14.
Yesu wafikizhe bungauzhi bwaamba pa mwine uji na “Ntendekelo yanji ya kala kene, kufumatu ku moba a kala.”—Mika 5:2; Mateo 2:4-6.
Ñanyi mwingilo waingilanga Yesu saka akyangye kwiya pano pa ntanda?
Wajinga na kifulo kikatampe mwiulu. Wajinga na kifulo kikatampe mwiulu. Yesu waambile pa kino kifulo byo alombele’mba: “Tata, ntumbijikai na lukumo lo najinga nalo nenu saka mukyangye kulenga ntanda.”—Yoano 17:5.
Wakwashisheko Shanji kulenga bintu byonse. Yesu waingijilanga pamo ne Lesa nobe “sendwe wanji.” (Byambo bya Maana 8:30) Baibolo walumbulula Yesu amba: “Bintu byonse byalengelwe kupichila mwi aye, bya mwiulu ne bya pano pa ntanda.”—Kolose 1:16.
Lesa waingijishe Yesu kulenga bintu byonse biji pano pa ntanda. Mu bintu byalengele Lesa mwavwangwa ne bamalaika ne bya mwiulu. (Lumwekesho 5:11) Yehoba Lesa ne Yesu baingijijile pamo pa kulenga bintu, byonkatu byo kikala pa kushimika, sendwe wingijila pamo na bantu bakwabo. Sendwe wibabuula bya kuba pa kushimika kishimikwa, kepo nabo balondela byo ebamubuula.
Wajinga Mambo. Yesu saka akyangye kwiya pano pa ntanda, Baibolo waamba’mba wajinga, “Mambo.” (Yoano 1:1) Kino kilumbulula’mba Lesa yeye aingijishanga pa kubuula bilengwa bikwabo bya mupashi mikambizho.
Kabiji Lesa wamwingijishe Yesu kumwambilako ku bantu bekala pano pa ntanda. Lesa waingijishe Yesu pa kupana mikambizho kwi Adama ne Evwa mu bujimi bwa Edena. (Ntendekelo 2:16, 17) Kyamweka Yesu ye wajinga yewa malaika watangijilenga bena Isalela ba kala mu kiselebwa kabiji ye wajinga mwina jiwi bena Isalela jo bafwainwe kukokela.—Kulupuka 23:20-23.
JANUARY 26–FEBRUARY 1
BYA BUNEME BIJI MU MAMBO A LESA ISAYA 28-29
Nemekainga Yehoba na Byatunwa Byenu ne na Muchima Wenu
ip-1 299 jifu. 23
Isaya Waawile Bintu Bikoba Yehoba
23 Bantangi ba bupopweshi bwa Bayudea baambanga’mba bajinga bakishinka kwi Yehoba, bino bamukaine. Bafunjishanga milanguluko yabo yaluwankana pa bintu byawama ne byatama. Kabiji bamwesheshe’mba kechi bajinga na lwitabilo ne, mambo byubilo byabo ne bintu byo bafunjishanga byalengelanga bantu kubula kwitabilwa kwi Lesa. Yehoba wibakambwila mu ‘jishinda ja kukumya’ na “bintu bya kukumya”. Yehoba waambile’mba: “Abano bantu beya kwi amiwa na tunwa twabo, kabiji bannemekatu na byatunwa byabo, pano bino, michima yabo iji kwalepa ne amiwa; kabiji kungakamwa kwabo kwaimenatu pa mikambizho ya bantu yo bebafunjisha. Onkao mambo, amiwa yami nkoba jikwabo bintu bya kukumya ku bano bantu, bya kukumya pa bya kukumya; kabiji maana a bantu babo ba maana akapwa, ne kukwatakanya bintu kwa bantu babo ba maana kukazhimañana.” (Isaya 29:13, 14) Maana a Bayudea apwile kimye Yehoba kyo alengejile bena Babilona kufumyapo bupopweshi bwa Bayudea bwafunjishanga bya bubela. Kino kyo kyamwekejile ne bantangi ba Bayudea bajingako mu myaka kitota kitanshi bemonanga’mba bajinga na maana batwajile bantu mungi. Kabiji kino kyo kikamwekela ne boba bebepekezha’mba bena Kilishitu.—Mateo 15:8, 9; Loma 11:8.
Kafwako Kintu Kyakonsha Kutuntwisha Bantu Baoloka Ne
7 Yesu wachinchikile ne kusanzamo bantangi ba bopopweshi bajingako pa kyo kya kimye na mambo a kubula kufunjisha bantu bya kupopwela Lesa mu jishinda jafwainwa. Pa kimye kimo, wamwesheshe kuba’mba Bafaliseo bajinga bajimbijimbi, mambo batangatu muchima pa kowa ku maboko kukila kuta muchima pa kulama bulongo bansemi babo. (Mat. 15:1-11) Kyamweka baana ba bwanga ba kwa Yesu bakuminye bingi pa kumvwa byambo byo aambile. Onkao mambo, bamwipwizhe’mba: “Nanchi mwayuka’mba Bafaliseo baji kuzhingila pa byo mwaji kwamba nyi?” Yesu wibakumbwile’mba: “Kichi kyonse kyabujile kujimba Batata ba mwiulu bakekizhulapo. Balekai bekalenga. Mambo bo bantangi bampofu. Umvwe mpofu watangijila mpofu mukwabo bonse baponena mu kimbo.” (Mat. 15:12-14) Nangwa kya kuba bantangi ba bupopweshi bazhingijile Yesu na mambo a bintu byo aambile, Yesu kechi walekele kwamba bukine ne.
Twajijilai Kwikala Benyi ba Yehoba Myaka ne Myaka!
8 Aba ‘bamba bukine mu muchima wabo’ kechi bebepekezha’mba baoloka ku bakwabo bino saka balala mizhilo ya Lesa inge baji kwa bunke ne. (Isa. 29:13) Bachinuzhuka kwikala bantu ba bujimbijimbi. Muntu wa bujimbijimbi utendeka kulanguluka’mba mikambizho ya Yehoba imo kechi yawama ne. (Yako. 1:5-8) Wakonsha kuleka kukookela Yehoba mu bintu byo amona aye mwine amba kechi byanema ne. Inge kafwako byatama byafumamo mu kubula kukookela kwanji ne, wakonsha kutwajijla kulala mizhilo ya Lesa kabiji mpopwelo yanji kechi itabilwa kwi Lesa ne. (Sapwi. 8:11) Nangwa byonkabyo, atweba bonse twafwainwa kwikala ba kishinka mu bintu byonse.
Bishinka Bikwabo Byanema
it “Aliela” jifu. 1; it “Aliela” Na. 3
Aliela
(Aliela) [kya kusokelapo bitapisho kya Lesa; nangwa, Bokwe wa Lesa].
3. Jino jizhina jo jo baingijisha kutela Yelusalema pa Isaya 29:1, 2, 7. Mu Yelusalema mo mwajinga nzubo ya Lesa ne kya kusokelapo bitapisho. Na mambo a kino, uno muzhi wajingatu nobe kya kusokelapo bitapisho kya Lesa. Kabiji wafwainwe kwikala muzhi mwajinga bupopweshi bwa kine. Nangwa byonkabyo, byambo bitanwa pa Isaya 29:1-4 byaambile pa bintu bilenga moyo byafwainwe kumwekela Yelusalema kimye kyo bakamulukuka ku bena Babilona mu 607 B.C.E., byo akekala nobe “kya kusokelapo bitapisho”, ko kuba’mba muzhi mo basuumisha mashi kabiji ye basoka muji mibiji ya bantu bafwa yalalazhama na mambo a lonaiko. Byalengejile kuba’mba kino kimweke bebinemba pa byepelo 9 kufika ku 16. Nangwa byonkabyo pa Isaya 29:7, 8, pamwesha’mba bisaka bya bantu byalukukilenga Yelusalema kechi bikooba byo bibena kulanguluka ne.
FEBRUARY 2-8
BYA BUNEME BIJI MU MAMBO A LESA ISAYA 30-32
Ketekelai Amba Yehoba Ukemuzhikijila
w01 11/15 16 jifu. 7
Ketekelai Amba Yehoba Ukemuzhikijila
7 Yehoba byoaji kyakufyamamo kyetu, tutekeneshiwa bingi nabino byambo: “Aye ukakuvweta na byapi byanji, ne munshi ya byapi byanji mo ukafyama: bukine bwanji jo jikebo, jo jilaya ja kyela.” (Masalamo 91:4) Lesa wituzhikijila byonka kañonyi byokabakamina peulu yamwanako pakwikazhikijila. (Isaya 31:5) ‘Na byapi byanji, ushinkila bantu bonse bakeba kwitulukuka.’ Kañonyi kavweta twana twako nabyapi pakuba’mba ketuzhikijile kubijanyi. Nobe twana twakañonyi, twazhikijilwa mubyapi byakwa Yehoba byakifwanyikizho mambo twafyama mujibumba janji jakine jabwina Kilishitu.—Luta 2:12; Masalamo 5:1, 11.
Yehoba Ukemukwasha Inge Kemupite mu Makatazho
13 Byo twafwainwa kuba. Kange mwitolwelenga ne. Inge ketwitolwele, ndangulukilo yetu ipimpulwa kabiji tutatula kulangulukatu pe atweba bene ne pa makatazho o tubena kupitamo. Kabiji kino kyakonsha kwitulengela kubula kufuukulanga bintu bulongo. (Maana 18:1) Pa bimye bimo, atweba bonse tukeba kwikala kwa bunke, kikatakata inge tubena kupita mu bya malwa. Pano bino, inge twatwajijila kwikala kwa bunke bwetu kimye kyabaya twakonsha kulengela bantu Yehoba bo abena kwingijisha kubula kwitukwasha. Onkao mambo, nangwa bintu bikatazhepotu byepi kimye kyo tubena kupita mu bya malwa, twafwainwa kuswa ba mu kisemi kyetu, balunda netu ne bakulumpe mu kipwilo kwitukwasha. Bamonainga’mba Yehoba bo bo abena kwingijisha kuba’mba bemukwashe.—Maana 17:17; Isa. 32:1, 2.
Yehoba ‘Ukemukosesha’
19 Mwakonsha kukosesha byepi luketekelo lwenu? Umvwe muji na luketekelo lwa kwikala myaka ne myaka pano pa ntanda, tangainga byaambapo Baibolo pa Paladisa ne kulanguluka langulukapo. (Isa. 25:8; 32:16-18) Langulukainga pa bikekala bwikalo mu ntanda ipya. Fwanyikizhai kuba’mba muji monka. Ñanyi bantu bo mubena kumona? Ñanyi bintu byo mubena kumvwa? Mubena kumvwa byepi ku muchima kutamba bipikichala biji mu mabuku etu byamwesha Paladisa nangwa kutamba mavidyo a nyimbo nabiji a kuba’mba Ntanda Ipya Iji Kulutwe, Paladisa Ujitu Pepi nangwa Fwanyikizhai Ntanda Ipya. Kuba bino kukemukwasha kufwanyikizha bulongo bikekala Paladisa. Inge twatwajijila kulanguluka pa ntanda ipya, tukamonanga’mba makatazho o tupitamo ke a pa ‘kakimye kacheche kabiji apela.’ (2 Ko. 4:17) Luketekelo lwitupa Yehoba luketulengela kuchinchika makatazho.
Bishinka Bikwabo Byanema
it “Shinkwa” jifu. 6
Shinkwa
Byo ba Mwingijisha mu bu Kifwanyikizho. Kyambo kya “shinkwa,” bekingijisha mu bukifwanyikizho mu Baibolo pa kwimenako kajo ne bintutu bikwabo byavula. Pa kimye kimo Yoshua ne Kaleba babuujile kisaka kya bena Isalela kyakonkene pamo kuba’mba bakepaya bena Kenana bajinga nobe ‘shinkwa wabo’ kulumbulula’mba kisaka kya bena Isalela kikekala na bulume. (Ba 14:9) Bulanda bwiya na mambo a kubula kwitabilwa kwi Yehoba kafunga wa bena Isalela be bwambapo pa Salamo 80:5, amba: “Mwibajiisha mipolo uba nobe ko kajo kabo.” Kabiji Yehoba bamwambapo’mba wapelenga bantu banji ‘bya malwa kwikala kajo kabo ne lumanamo kwikala mema a kutoma,’ kumwesha bintu byo bakapitamo inge bebalukuka’mba bikekala nobe kajo ne mema.—Is 30:20.
FEBRUARY 9-15
BYA BUNEME BIJI MU MAMBO A LESA ISAYA 33-35
“Aye ye Nkwasho Wenu Kimye Kyonse”
Yehoba Ukemukwasha Inge Kemupite mu Makatazho
7 Lukatazho. Umvwe tubena kupita mu lukatazho, byo tulanguluka, byo tumvwa ku muchima ne byo tuba bipusanako na byo kikala inge kechi tuji mu lukatazho ne. Byonkatu bwato byo bebukumpula ku luvula, ne atweba tumvwatu nobe babena kwitukumpula ku makatazho o tupitamo. Ana, ye twaambapo kala waambile’mba wapichile mu makatazho avula bingi Luis byo afwile. Waambile’mba: “Kimye kimo naikalanga bingi na binyenge kabiji kino kyandengelanga kwilangulusha bingi. Kabiji kimye kimo nazhingilanga bingi inge natendeka kulanguluka’mba wafwa.” Ana winyengaikanga ne kumvwa ku muchima kutama inge kyamukatazha kufuukula bintu byafuukulanga bulongo mwatawanji aye Luis. Pa bimye bimo waumvwangatu nobe uji mu bwato bo bakumpula ku mvula wa kinkunkwila pa kalunga ka mema. Yehoba umvwa byepi inge tubena kupita mu makatazho avula bingi?
8 Byuba Yehoba. Aye witulaya’mba uketukwasha. (Tangai Isaya 33:6.) Mvula wa kinkunkwila inge waiya, bwato butendeka kukumpauka bingi. Kunshi ya mato avula balengelako tubilapo tuji nobe towelo twa jisabi twiakwasha kubula kukizhamo kusunkena nangwa kupinuka inge kwaiya mwela nangwa mvula wa kinkunkwila. Kino kilengela bantu kwenda bulongo kwakubula kumvwa moyo ne kwibazhikijila ku mapuso. Tuno tubyela tulengela bwato kubula kukumpuka, twingila bingi bulongo inge bwato bubena kwenda kuya kulutwe. Po pamotu ne atweba, Yehoba uketukwasha inge twatwajijila kumwingijila mu bukishinka mu bimye bya makatazho.
Bya Kutwajijila Kwikala na Lusekelo Inge Tubena Kuchinchika Meseko
10 Bya kuba: Lombai maana kwi Yehoba. Pa kuba’mba tuchinchike meseko na lusekelo, patanshi twafwainwa kulomba Yehoba kwitupa maana a kwitusha kufuukula bintu bulongo. (Tangai Yakoba 1:5.) Twakonsha kuba byepi inge twamona’mba Yehoba kechi ubena kukumbula milombelo yetu bukiji ne? Yakoba waambile’mba twafwainwa ‘kulombanga’ kwi Lesa. Yehoba kechi wituzhingijila inge twatwajijila kumulomba maana ne. Kechi uketunena pa kuba bino ne. Shetu wa mwiulu “upana na muchima yense” umvwe twamulomba kuba’mba etupe maana a kwitukwasha kuchinchika meseko. (Sala. 25:12, 13) Umona makatazho o tupitamo, umvwa kutama inge wamona byo tubena kuyanda, kabiji uketukwasha. Kino kitulengela kwikala bingi na lusekelo. Pano Yehoba witupa byepi maana?
11 Yehoba witupa maana kupichila mu Mambo anji. (Maana 2:6) Pa kuba’mba twikale na ano maana, twafwainwa kufundanga Mambo a Lesa ne mabuku etu aimena pa Baibolo. Pano bino, kuji byavula byo twafwainwa kuba, kechi kwikalatu na maana ne. Twafwainwa kwingijishanga maana a Lesa mu bwikalo bwetu. Yakoba wanembele’mba: “Ubainga byamba mambo a Lesa, kechi kwiomvwatu. (Yako. 1:22) Umvwe ketukookele lujimuno lwa Lesa, twikala mu mutende na bakwetu, kechi tukominangatu pa kintu kyo tukeba ne, kabiji tukekala na lusa. (Yako. 3:17) Kwikala na bino byubilo kwakonsha kwitukwasha kuchinchika meseko ne kutwajijila kwikala na lusekelo.
ip-1 352-355 mafu. 21-22
“Kafwako Muntu Nangwa umo Ukekala mu Kyalo Ukamba’mba: ‘Nakolwa ne’”
21 Nangwa byonkabyo, buno bungauzhi bwa kwa Isaya bubena kufika ne mu ano moba. Bantu ba Yehoba lelo jino nabo babukwa ku mupashi. Bakasululwa ku mafunjisho a bubela nabiji a kuba’mba mweo kechi ufwa ne, kuji Balesa basatu ne mujilo wa helo. Batambwila mikambizho ya kwi bakwasha kuchinuzhuka byubilo byatama ne ya kwibakwasha kufuukulanga bintu bulongo. Kabiji na mambo a bukuzhi bwapaine Yesu Kilishitu baji na bulunda bwawama na Lesa kabiji baji na jiwi ja mu muchima jatoka. (Kolose 1:13, 14; 1 Petelo 2:24; 1 Yoano 4:10) Kubukwa kwa ku mupashi kwibalengela kwikala na butuntulu bwa mubiji bwawama. Bachinuzhuka bulalelale ne kubula kwingijisha bizhima, bintu byakonsha kwibalengela kwikala na kansa ne bikola biiya na mambo a bulalelale.—1 Kolinda 6:18; 2 Kolinda 7:1.
22 Pano bino bungauzhi butanwa pa Isaya 33:24 bukafika bonse panyuma ya Amagedonyi, mu ntanda ipya ya Lesa. Mu bukalama bwa kwa Mesiasa, bantu bakekala na butuntulu bwa mubiji bwawama kabiji bakabukwa ku mupashi. (Lumwekesho 21:3, 4) Panyuma yakonauna ino ntanda ya kwa Satana, kwakubula nangwa kuzhinaukatu ne, bya kukumya byaubile Yesu byo ajinga pano pa ntanda bikobiwa ntanda yonse. Bampofu bakalaba, matwi a bashinkwa matwi akashinkuka, bantu balemana bakendanga. (Isaya 35:5, 6) Kino kikalengela bantu bonse bakapuluka pa malwa akatampe kwikala na mwingilo mukatampe wa kuwamisha ino ntanda kwikala ke paladisa.
Bishinka Bikwabo Byanema
w23.05 15 jifu 8
Twajijilai Kwenda mu “Mukwakwa Wazhila”
8 Kampe bamo bakonsha kutendeka kulanguluka’mba: ‘Nanchi bintu byamwekejile Bayudea kala, ne atweba byakonsha kwitumwekela lelo jino nyi?’ Ee, byakonsha kwitumwekela, mambo byo tubena kuba bijitu nobe tubena kwenda mu “Mukwakwa Wazhila.” Inge twashingwa nangwa twi “mikooko ikwabo,” twafwainwa kutwajijila kwenda mu “Mukwakwa Wazhila.” Kuba bino kuketulengela kutwajijila kupopwela Yehoba byo tubena kutengela Bufumu bwa Lesa kuleta bintu byawama pano pa ntanda. (Yoa. 10:16) Kutendekatu mu 1919 C.E., ma milyonyi a banabalume, banabakazhi ne baana bafuma mu Babilona Mukatampe, ko kuba’mba bupopweshi bwa bubela bwa ntanda yonse kabiji babena kwenda mu mukwakwa wa kifwanyikizho. Ne anweba muji pa bano bantu. Bantu bavula batendekele kwenda mu uno mukwakwa myaka nobe 100 yapitapo. Pakuba bakwabo batendekele kala kene kunengezha uno mukwakwa.
FEBRUARY 16-22
BYA BUNEME BIJI MU MAMBO A LESA ISAYA 36-37
“Kange Mube Moyo na Mambo a Byambo byo Mwaumvwa” Ne
it “Hezekiya” Na. 1 jifu. 14
Hezekiya
Senakelibu byo akankelwe kushinda Yelusalema. Senakelibu wakebelenga kulukuka Yelusalema na mambo a byaubile Hezekiya. Kimye Senakelibu kyo alukukile muzhi wajinga na nsakwa yakosa wa Lakishi, watumine bashilikale banji na kubuula bena Yelusalema kuba’mba bepane kwi abo. Mukulumpe wa bashilikale aye Labashake (kechi jajinga jizhina janji ne, bino bamutelanga bino na mambo a bushilikale), wayukile kwamba Kihebelu bulongo, waendelekelenga Hezekiya ne kukosamika Yehoba kuba’mba kechi wakonsha kupokolola Yelusalema ne, byonkatu byo kyajinga ne ku balesa bakwabo babuujile kupokolola bantu babo ku maboko a mfumu wa Asilya.—2Mf 18:13-35; 2Mo 32:9-15; Is 36:2-20.
ip-1 387 jifu. 10
Mfumu Bamupesheshe na Mambo a Lwitabilo Lwanji
10 Kabiji Labashake wabuujile Bayudea kuba’mba bashilikale babo kechi bayukile bya kulwa nkondo ne. Mambo waambile’mba: “Amiwa nsakukupa bambili 2,000 tumone inge obewa wakonsha kutaana bantu ba kwendapo.” (Isaya 36:8) Nanchi kino kyalumbulwilenga’mba bashilikale ba Bayudea benda pa bambili, bafwainwe kuvula pa kuba’mba bashinde nkondo nyi? Ine, kushinda kwa Bayudea kechi kwaimenejile pa bulume bwa bashilikale ne. Pa Byambo bya Maana 21:31 paamba’mba: “Mbili bamunengezhezha jimo mu juba ja nkondo, bino Yehoba ye upulusha.” Labashake waambile’mba mapesho a Yehoba aji pa bena Asilya, kechi pa Bayudea ne. Nangwa byonkabyo, bena Asilya kechi bakonsheshe kulukuka muzhi wa bayudea ne.—Isaya 36:9, 10.
ip-1 388 mafu 13-14
Mfumu Bamupesheshe na Mambo a Lwitabilo Lwanji
13 Byo etotelenga na bilwilo byo ajinga nabyo, Labashake waambile ne pa kilwilo kikwabo. Wajimwineko Bayudea kubula kuketekela byambo byaambile Hezekiya amba: “Yehoba uketupokolola.” Labashake wavulwilemo Bayudea kuba’mba balesa ba bena Samaliya kechi bapokolwele bisaka jikumi ku bena Asilya ne. Ñanyi balesa bapopwelenga bisaka bya bantu byo bashinjile ku bena Asilya? Waambile’mba “Nanchi balesa ba ku Hamata ne ba ku Alapada baji pi?” “Nga balesa ba ku Sefwabaimu baji pi? Nanchi bapokolwele Samaliya mu kuboko kwami nyi?”—Isaya 36:18-20.
14 Labashake wapopwelanga balesa ba bubela kechi wayukile lupusano lwajinga pa bena Samaliya basatukile ne Yelusalema muzhi mwalaminanga Hezekiya ne. Balesa ba bubela ba bena Samaliya kechi bajinga na bulume bwa kupokolola bufumu bwa mikoka jikumi ne. (2 Bamfumu 17:7, 17, 18) Pakuba bantu balamwanga na Mfumu Hezekiya baikalanga mu Yelusalema, balekele kupopwela balesa ba bubela ne kutendeka kwingijila Yehoba. Nangwa byonkabyo, bantomesha ba Bayudea bo batumine kuya kwi Labashake kechi bamulumbulwijile bino ne. “Bino bantu bazhindaminetu nzoo kabiji kechi bamukumbwilepo ne, mambo mfumu wibakambizhe’mba, ‘kange mumukumbule ne’” (Isaya 36:21) Eliakima, Shebina, ne Yoa babwelele kwiya Hezekiya na kumubuula byambo byaambile Labashake.—Isaya 36:22.
Bishinka Bikwabo Byanema
it “Lutambo” jifu. 4
Lutambo
Yehoba wabuujile Mfumu wa Asilya aye Senakelibu amba: “Nkakukoba kanda mu moona ne kukukasa lutambo ku byatunwa, kabiji nkakubwezha mu jishinda monka mo waishijile.” (2Mf 19:28; Is 37:29) Bulume bwa Yehoba bwalengejile Senakelibu kukankalwa kushinda bena Yelusalema ne kubwela ku Ninevwa, ko bakamwipayile na mpoko ku mwananji. (2Mf 19:32-37; Is 37:33-38) Yehoba byo abikile lutambo ku byatunwa bya balwanyi banji, bimwesha’mba bakebatangijilanga byonkatu muntu byo atangijila nyama ye akasa ku lutambo.—Is 30:28.
TAIKO MUCHIMA KU MWINGILO WA KUSAPWILA
Nanchi Lubatizhilo lo lu ka?
ijwbq kibaaba 110 mafu. 1-4
Mukumbu wa mu Baibolo
Lubatizhilo ke kwibizha muntu mu mema. Mu Baibolo muji bantu bavula babatizhiwe. (Byubilo 2:41) Pa bano babatizhiwe paji ne Yesu ye baibizhe mu mukola wa Yodano. (Mateo 3:13, 16) Pakupitapo myaka mwanamulume mwina Etiopya naye wabatizhiwe mu “mema avula” ajinga kwipi na mukwakwa mo bapichilenga.—Byubilo 8:36-40.
Yesu wafunjishe’mba muntu wafwainwa kubatizhiwa pa kuba’mba ekale mwana wanji wa bwanga. (Mateo 28:19, 20) Kabiji mutumwa Petelo wabwezhezhepo kwamba bino byambo byafunjishe Yesu.—1 Petelo 3:21.
Biji mu uno mutwe
Lubatizhilo lulumbulula ka?
Baibolo waambapo’mba ka pa kubatizha balukeke?
Kubatizhiwa mu jizhina ja Tata, ja Mwana ne ja mupashi wazhila kulumbulula ka?
Nanchi kubatizhiwa jikwabo mambo nyi?
Lubatizhilo lukwabo lo baambapo mu Baibolo
Bintu bya bubela byamba bantu pa kubatizhiwa kwa bena Kilishitu
Lubatizhilo lulumbulula ka?
Lubatizhilo lulumbulula kwipana pa mvula bantu ne kumwesha’mba muntu walapila ku bundengamambo, kabiji walaya’mba ukatwajijila kuba kyaswa muchima wa Lesa. Kino kyavwangamo kukookela Lesa ne Yesu. Muntu inge wabatizhiwa, utendeka kwenda mu jishinda jaya ku bumi bwa myaka ne myaka.
Kwibizha muntu mu mema ke kiyukilo kimwesha’mba muntu wapimpula bwikalo bwanji. Mu ñanyi jishinda? Baibolo waesakanya lubatizhilo ku kuzhiika muntu. (Loma 6:4; Kolose 2:12) Kwibizha muntu mu mema kulumbulula’mba wafwa nangwa’mba waleka byubilo byatama byo aubanga kala. Inge bamutumpula mu mema ko kuba’mba watendeka bwikalo bwa katataka bwa bwina Kilishitu.
FEBRUARY 23–MARCH 1
BYA BUNEME BIJI MU MAMBO A LESA ISAYA 38-40
“Aye Ukalama Mikooko Yanji Byonkatu Byuba Kafunga”
Baibolo byo Etufunjisha pa Mwine Mwinaye
3 Tangai Isaya 40:8. Mambo a Lesa akwasha banabalume ne banabakazhi ba kishinka pa myaka yavula bingi. Kino kyakonshekele byepi? Buno bwipuzho bwawama mambo Baibolo patanshi bamunembele kala kene pa mivungilo ne pa biseba byonaika bukiji. Onkao mambo, bino bintu byazhiile kala. Nangwa byonkabyo, Yehoba walengejile bantu kukopolola bino Binembelo byazhila. Nangwa kya kuba bano bantu bajinga bambulwa kulumbuluka bateleko bingi muchima kukopolola. Shayuka umo wanembele pa Binembelo bya Kihebelu amba: “Twashiinwa kuba’mba uno buku wa kala bamukopolwele bingi bulongo.” Nangwa kya kuba Baibolo bamunembele kala kene pa bintu byonaika bukiji kabiji bamukopolwelenga bajinga bambulwa kulumbuluka bino twakonsha kushiinwa kuba’mba Baibolo ye tutanga ano moba muji milanguluko ya Mwine mwinaye, Yehoba.
4 Bya bupe byonse byawama ne byalumbuluka” bifuma kwi Yehoba. (Yako. 1:17) Baibolo ke bupe bumo bwawama bwitupa Yehoba. Umvwe muntu witupa bupe kimwesha’mba wituyuka bulongo kabiji wayuka ne byo twakajilwa. Byo byo kiji ne ku Mwine witupa Baibolo. Buno bupe bwitufunjisha bintu byavula pe Yehoba. Tufunda kuba’mba wituyuka bingi bulongo kabiji wayuka byo twakajilwa. Mu uno mutwe, tusakwisamba pa Baibolo byo amwesha bino byubilo bisatu bya Yehoba: maana, bololoke ne butemwe. Patanshi twayai twisambe Baibolo byo amwesha maana a Lesa.
cl 70 jifu 7
Bulume bwa Kuzhikijila—“Lesa Ye Kyetu kya Kufyamamo”
7 Byo epashañanya aye mwine kwi kafunga, Yehoba witubujishatu mu bukishinka byo asakisha kwituzhikijila. (Ezikyo 34:11-16) Vulukai Yehoba byo alondololwa mu Isaya 40:11, waambiwapo mu Kitango 2 kya uno buku amba: ‘Wauba nobe kafunga ujisha jitanga janji, ne kusenda baana ba mikooko mu maboko anji, kasa ebabukata mu kyanji kyaji, ne kwiitangijila bitende, bitende aya iji na baana.’ Pano nga kaana ka mukooko keya byepi mu “kyaji” kya kafunga—mu fukuta wa pa kyaji kya munkukumba wanji? Kaana ka mukooko kakonsha kwiya kwi kafunga ne kumufunkaula kukulu kwanji. Kafunga ye ubandama ne kwikatola wikabukata ne mu kyaji kyanji. Kino kifwanyikizho kya butemwe kibena kumwesha Kafunga wetu Mukatampe byo etulamawizha ne kwituzhikijila.
“Aye Upana Bulume ku Bakooka”
4 Tangai Isaya 40:26. Kafwako muntu wakonsha kubala tubangabanga twa mwiulu ne. Bashayuka ba sayansi bamba’mba mu mwala wanshansha umo muji tubangabanga twafika ku 400 bilyonyi. Bino Yehoba witutela tonse pa mazhina. Kino kitufunjishapo ka? Inge Yehoba wata muchima bilengwa bibula kupema, ko kuba’mba wakilamo kuta muchima anweba mumwingijila na mambo a kumutemwa kechi na mambo a kwimukanjikizha ne. (Sala. 19:1, 3, 14) Shetu wa mwiulu wimuyuka bulongo. “Nangwatu nsuki ya ku mitwe yenu” wiibala yonse. (Mat. 10:30) Kabiji nyimbi wa masalamo waambile’mba: “Yehoba wayuka bintu bipitamo bantu babula kaneneno.” (Sala. 37:18) Kine, Lesa umona meseko onse o mupitamo, kabiji wakonsha kwimupa bulume bwa kwiachinchika onse.
5 Tangai Isaya 40:28. Yehoba ye Nsulo ya bulume bukatampe. Akilangulukai pa bulume bo apana ku juba. Shayuka wa bya sayansi aye David Bodanis waambile’mba: “Bulume bufuma ku juba mu kakimyetu kacheche bwakonsha kwesakana pamo na kutubika kwa mabilyonyi ne mabilyonyi a mabomba ashinta.” Shayuka mukwabo waambile’mba mu sekondi umotu, juba “jipana bulume bwakonsha kusamisha kyeya ne kuleta kyuya pano pa ntanda pa myaka 200,000.” Nanchi kujipo wakonsha kuzhinauka kuba’mba Mwine upana bulume ku juba wakonsha kwitupa bulume bwa kuchinchika makatazho nyi?
6 Tangai Isaya 40:29. Kwingijila Yehoba kwituletela bingi lusekelo. Yesu waambijile baana banji ba bwanga amba: “Sendai kikonkoji kyami.” Kabiji wanungilepo’mba: “Anweba mukakokoloka. Mambo kikonkoji kyami kyapeela, ne kipe kyami kyapeela.” (Mat. 11:28-30) Abino byambo bya kine. Bimye bimo tumvwa kukooka inge tubena kufuma pa nzubo kuya na kupwila nangwa na kusapwila. Bino tumvwa byepi pa kubwela? Tukookoloka, kabiji michima yetu inengezha kushinda makatazho a mu bwikalo. Kikonkoji kya kwa Yesu kechi kyanemapo nangwa pachechetu ne.
Bishinka Bikwabo Byanema
ip-1 400 jifu. 7
“Tekeneshai Bantu Bami”
7 Buno bungauzhi bwaamba pa kushimukulula kechi bwafikiletu mu myaka kitota kya butanu na bumo B.C.E. ne. Buno bungauzhi bwafikile ne mu myaka kitota kitanshi C.E. Yoano Mubatizhi wajinga jiwi ja muntu ‘wabijikilenga mungye,’ wafikizhe bungauzhi buji pa Isaya 40:3. (Luka 3:1-6) Yoano bamutangijile ku mupashi kwamba bino byambo pe aye mwine. (Yoano 1:19-23) Kutendeka mu mwaka wa 29 C.E., Yoano watendekele kunengezhezha Yesu Kilishitu jishinda. Byasapwijilenga Yoano byalengejile bantu bavula kukebesha kuyuka Mesiasa walayilwe pa kuba’mba nabo bakateleke kwi aye ne kumulondela. (Luka 1:13-17, 76) Kupichila mwi Yesu, Yehoba ukakwasha bantu balapila kukasuluka ku bundengamambo ne lufu. (Yoano 1:29; 8:32) Byambo byaambile Isaya byafikile kimye bashalapo ba mu Isalela wa ku mupashi kyo bafumine mu Babilona Mukatampe mu mwaka wa 1919 ne kubwezha bupopweshi bwa kine.