Mfumu mukwabo watendekele kulama mu Babilona wajinga Daliusa mwina Meda. Daliusa wamwene kuba’mba Danyela wapusanako na bakwabo. Wamutongwele kwikala mukulumpe wa babinemanga ba mu kyalo kyonse. Abano banabalume batendekele kumumvwina kichima. Kabiji bakebeshe bingi kumwipaya. Bayukile kuba’mba Danyela walombanga kwi Yehoba bimye bisatu pa juba pa juba. Onkao mambo, bamwambijile Daliusa amba: ‘Anweba mfumu twafwainwa kulenga muzhilo wa kuba’mba bantu bonse bapopwelangatu ne kulomba kwi anweba. Kabiji yense ukabulanga kulondela uno muzhilo bakamutaye mu jiyengo ja mabokwe.’ Daliusa naye wamutemenwe uno muzhilo ne kufwachikako.

Danyela byo aumvwinetu amba balenga uno muzhilo, wayile mu nzubo yanji, ne kufukama na kulomba kwi Yehoba saka amweka pa kipenze kyashinkuka. Bano banabalume bakichima batwelele mu nzubo yanji ne kumutana saka abena kulomba. Ponkapotu banyemejile kwi Daliusa na kumulobela’mba: ‘Danyela, wimulengulula anweba mfumu. Ulomba kwi Lesa wanji jisatu pa juba pa juba.’ Daliusa watemenwe bingi Danyela. Kabiji kechi wakebelenga’mba afwe ne. Juba jazhikiletu na kulanguluka bya kupulusha Danyela. Bino nangwatu mfumu kechi wakonsheshe kupimpula uno muzhilo ye afwachikileko ne. Kepo akambizhe banabalume amba bataye Danyela mu jiyengo ja mabokwe.

Bufuku bonse Dailusa watoñamine na kulangulukatu pe Danyela. Wayile lubilo ku jiyengo ja mabokwe lukelokelo ne kubijika’mba: ‘Danyela, nanchi Lesa wobe ye wingijila wa kupokolola ku mabokwe nyi?’

Daliusa waumvwine jiwi ja kwa Danyela. Danyela waambile’mba: ‘Yehoba wajikushinka tunwa twa mabokwe, kabiji mabokwe kechi ankozha ne.’ Daliusa waumvwine bingi bulongo.’ Wakambizhe kuba’mba Danyela bamufumye mu jiyengo ja mabokwe. Danyela kechi wajingapotu nangwa na kikozha ne. Ponkapo mfumu wakambizhe’mba: ‘Tayai banabalume bapelemo mambo Danyela mu jiyengo ja mabwe.’ Bano banabalume byo bebatayile mu jiyengo, bebajile ku mabokwe.

Kepo Daliusa atayile mbila mu bantu banji bonse ya kuba’mba: ‘Bantu bonse bafwainwa kwakamwa Lesa wa kwa Danyela. Mambo wapulusha Danyela ku mabokwe.’

Nanchi ulomba kwi Yehoba pa juba pa juba byonka byaubanga Danyela nyi?

Eshita wajinga nsongwakazhi Muyudea waikalanga mu muzhi wa Shushanyi mu Pelisha. Kisemi kyanji bekifumishe ku Yelusalema kwi Nebukaneza. Eshita bamukomeshe ku muvwala wanji aye Modekai, waingilanga mu kipango kya Mfumu wa bena Pelisha aye Ahaselusa.

Kimye kimo, Mfumu Ahaselusa wakebelenga mwanamukazhi wa kusongola. Bakalume banji bamuletejile bakamwale bavula balamba bingi ba mu kyalo kyonse. Pa bano pajinga ne Eshita. Pa bakamwale bonse bo baletele, Mfumu wasajilepo Eshita kwikala mukazhanji. Modekai wabuujile Eshita amba kechi wafwainwa kwisolola amba Muyudea ne.

Hamane, mwanamulume witotele bingi ye wajinga mukulumpe wa babinemanga ba mfumu bonse. Wakebelenga’mba bantu bonse bafukamenga ne kumupopwela. Modekai wakaine. Kino kyalengejile Hamane kuzhingila bingi ne kufuukulapo kumwipaya. Hamane byo ayukile kuba’mba Modekai Muyudea, wafukwilepo kuba’mba Bayudea bonse bajinga mu kyalo bebepaye. Hamane wabujile mfumu amba: ‘Bayudea ke bantu batama bingi. Mwafwainwa kwibepayatu bonse.’ Ahaselusa waambile’mba: ‘Nakuswisha kuba byonse byo ukeba.’ Wamupele bulume bwa kulenga muzhilo. Hamane walengela muzhilo wa kwipaya Bayudea bonse pa juba ja bu 13 mu ñondo wa Adala. Bino Yehoba wamwenenga bino byonse.

Eshita kechi wayukile amba balenga uno muzhilo ne. Onkao mambo, Modekai watumijile Eshita uno muzhilo ne kumwambila’mba: ‘Yanga ukesambe na bamfumu.’ Eshita wambile’mba: ‘Yense uya ku bamfumu kwa kubula kumwita bamwipaya. Bamfumu kechi bangitapo ne, papita ne moba 30. Bino nsakuya. Inge batambike ndondo, nsakwikala na bumi. Inge babula kwiitambika, basakungipaya.’

Eshita wayile mu kipango kya mfumu. Mfumu byo amumwene, watambikile ndondo. Byo ayile ku mfumu, mfumu wamwambijile’mba: ‘Eshita ubena kukeba ka?’ Eshita wakumbwile’mba: ‘Mbena kwimwita anweba ne Hamane mwiye ku kijiilo.’ Byo bayile ku kijiilo, pa kupwisha Eshita wibechile ku kijiilo kikwabo. Ku kijiilo kya bubiji, mfumu wamwipwizhe jikwabo amba: ‘Eshita ubena kukeba kubilepo ka?’ Eshita wakumbwile’mba: ‘Kuji ubena kukeba kungipaya pamo na balongo bami. Napopwela tupulushai.’ Mfumu wamwipwizhe amba: ‘Ñanyi yenkao ubena kukeba kuba kino kintu?’ Eshita wakumbwile’mba: ‘Awe yenka mbanzhi Hamane.’ Ahaselusa wazhingijile bingi ne kukambizha kuba’mba Hamane bamwipaye.

Bino muzhilo walengela Hamane kafwako wakonsheshe kumwalula ne. Nangwatu mfumu kechi wakonsha kuba bino ne. Onkao mambo, mfumu wasajile Modekai kwikala mukulumpe wa babinemanga ba mfumu ne kumupa luusa lwa kulenga muzhilo wa katataka. Modekai walengele muzhilo waswishishe Bayudea kwizhikijila inge bebalukuka. Juba ja bu 13 mu ñondo wa Adala byo jafikile, Bayudea bashinjile balwanyi babo. Kufumatu pa joja juba, jino juba batendeke kwijivuluka pa mwaka pa mwaka.