Bena Isalela bamo bakishajile na kwikala mu Bufumu bwa bena Pelisha nangwatu byo papichile myaka 70 kufuma pabwelejile bena Isalela ku Yelusalema. Umo pa bano bashajile wajinga ñanga Ezela, wafunjishanga Mizhilo ya Yehoba. Ezela byo aumvwine kuba’mba bantu mu Yelusalema kechi balondejilenga Mizhilo ne, wakebeshe bingi kuya na kukwasha bantu. Atazakeshi Mfumu wa bena Pelisha wamwambijile’mba: ‘Lesa wa kulengejile kwikala na maana kuba’mba ufunjishenga Mizhilo bantu banji. Uye pamo na bonse basakukeba kuya ne obewa. Ezela wakonkenye bonse bakebelenga kubwela ku Yelusalema. Bonse balombele pamo Yehoba kwibazhikijila pa lwendo lwabo. Kepo batendekele kuya ku Yelusalema.

Byo papichile bañondo bana, bafikile mu Yelusalema. Babitumbafumu babuujile Ezela amba: ‘Bena Isalela baleka kukookela Yehoba. Basongola banabakazhi bapopwela balesa babubela. Ezela waubile byepi? Ezela waimene ku meso a bantu bonse ne kufukama panshi, watendeka ne kulomba’mba: ‘Anweba Yehoba mwitubila byavula, bino atweba twimulenga mambo.’ Bantu balapijile, pano bino batwajijile kuba bintu byatama. Ezela watongwele bakulumpe ne bamitonyi bakuchibila bantu mambo o balengelenga. Mu bañondo basatu balondejilepo, bantu bonse babujilenga kukookela Yehoba bebapangile mu muzhi.

Byo papichile myaka 12, saka bapwisha kushimika nsakwa ya Yelusalema, Ezela wakonkenye bantu mu lubanza ne kwibatangila Mizhilo ya Lesa. Ezela byo azhikwile buku, bantu bonse baimene. Batotele Yehoba, kabiji bonse basuntwile maboko abo mwiulu kumwesha patoka kuba’mba baswa. Kepo Ezela atwajijile kutanga ne kwibalumbulwila mwatala Mizhilo. Bantu bonse bazhindaminetu nzoo na kuteleka. Baswile kuba’mba kine basatukila Yehoba jikwabo kabiji batendekele kujila. Juba jalondejilepo, Ezela watwajijile kwibatangila Mizhilo. Kepo bayukile kuba’mba bafwainwa kwikala na Kijiilo kya Mimba. Ponkapotu batendekele kunengezha kino kijiilo.

Bantu basangalele pa kino kijiilo pa moba atanu na asatu kabiji basanchijilenga Yehoba mambo banowele kajo kavula yeo mwaka. Kufumatu mu moba a kwa Yoshua, kechi kwajingapo Kijiilo kyajinga nobe kino ne. Kino kijiilo byo kyapwile, bantu bakonkene pamo ne kulomba’mba: ‘Anweba Yehoba mwitupokolwele mu buzha, mwitupelenga kajo mu kiselebwa, kabiji mwitupele ino ntanda yawama. Bino twimusatukijilenga javula bingi. Mwatumanga bangauzhi bakwitujimunako, bino kechi twibomvwinanga ne. Nangwa byonkabyo anweba mwatwajijile kwitutekenya. Mwalamine mulaye wenu ye mwalayile Abalahama. Ja lelo tubena kwimulaya kuba’mba tusakwimukokelanga.’ Kepo banembele uno mulaye wabo. Kabiji babinemanga, bena Levi ne bañanga bonse bafwachikilepo.

Pano twaya twisambe pa byamwekele mu moba ajingako Nehemiya. Nehemiya wajinga mwina Isalela waikalanga mu muzhi wa Shushani wa bena Pelisha kabiji wajinga kalume wa Mfumu Atazakeshi. Mulongo wanji umo byo aishile kufuma ku Yuda wamubujile sawakya watama wa kuba’mba: ‘Bantu babwelele ku Yelusalema kechi bazhikijilwa ne. Nsakwa ne binzhilo byaonawine bena Babilona ne luno kechi bebishimika ne.’ Nehemiya kyamukolele bingi ku muchima. Wakebeshe kuya ku Yelusalema na kukwasha bantu ba Lesa. Onkao mambo, walombele kwi Lesa kuba’mba mfumu amuswishe kuya ku Yelusalema.

Byo papichile moba, mfumu wamwene’mba Nehemiya uji na bulanda. Wamwipwizhe’mba: ‘Kechi wakasuluka lelo ne. Ki ka kyalengela?’ Nehemiya wakumbwile’mba: ‘Nakonsha kwikala byepi kwa kubula bulanda, Yelusalema saka bamonauna? Mfumu wamwipwizhe’mba: ‘Ubena kukeba ngube byepi?’ Ponkapo Nehemiya walombele mulombelo wa kishinshi. Kepo aambile’mba: ‘Mwane nswishai ngye ku Yelusalema na kushimukulula nsakwa.’ Mfumu Atazakeshi wamuswishishe Nehemiya kuya kabiji wamwene kuba’mba waenda bulongo nangwa kya kuba lwendo lwalepele bingi. Kabiji mfumu watongwele Nehemiya kwikala kinemanga wa kyalo kya Yuda ne kumupa bichi bya mapulanga a kulengela binzhilo.

Nehemiya byo afikile mu Yelusalema, wayile na kumona nsakwa byo iji. Kepo akonkenye bañanga ne bakalama ne kwibabula’mba: ‘Kyatama bingi. Twafwainwa kushimukulula nsakwa.’ Bantu bonse baswile kabiji batendekele kushimukulula nsakwa.

Bino balwanyi bebobilenga mukeyu bena Isalela ne kwibambila’mba: ‘Lubwala wakonsha kukundula nsakwa yo mu bena kushimika.’ Bino kechi bateleko muchima ku myendeleko ne, abo batwajijiletu kushimika nsakwa. Nsakwa yakosele bingi kabiji bibumba byajinga pepi kupwa.

Balwanyi bafuukwilepo kuzhokoloka bena Yelusalema ne kwibalukuka. Bayudea byo baumvwine kino, baubile bingi moyo. Nehemiya wibambijile’mba: ‘Kange mube moyo ne. Yehoba uketukwasha.’ Kepo asajile bakusopa bantu baingijilenga, kabiji balwanyi babo kechi bakonsheshe kwibalukuka ne.

Nsakwa yapwile mu moba 52. Nehemiya waichile bena Levi bonse kwiya ku Yelusalema na kuzhijika nsakwa. Wanengezhe mabumba abiji a banyimbi. Bonse bakanjijile pa nsakwa ku Kibelo kya ku Nsulo. Banyimbi bamo bapichilenga peulu ya nsakwa ku lubaji lumo bakwabo ku lubaji lulwabo saka bemba minsakayi, masimbo, nsonsolo, bijimba bya mizhinge ne byansa. Ezela wayile na jibumba jimo, jikwabo jibumba jajinga ne Nehemiya. Basambakenejile ku Nzubo ya Lesa. Bantu bonse, banabalume ne banabakazhi ne baana bapaine milambo kwi Yehoba kabiji basangalele bingi. Kusangalala kwa bantu kwaumvwanyikilenga ne kwalepa.