Byo papichile myaka kukila pa 400 kufuma po bapwishishe kushimukulula nsakwa ya Yelusalema, kwajinga ñanga wa Lesa waikalanga kwipi na Yelusalema. Jizhina janji wajinga Zekaliya, mukazhanji wajinga Elisabeta. Baikele mu masongola myaka yavula bingi kwa kubula kusemapo mwana. Juba jimo Zekaliya byo asokelenga bya kufutumuna mu nzubo ya Lesa, malaika Ngabaliela wamwekele kwi aye. Zekaliya waumvwine bingi moyo. Ngabaliela wamwambijile’mba: ‘Kuchiina ne. Naleta mambo awama afuma kwi Yehoba. Mukazhobe Elisabeta ukasema mwana wamulume, kabiji ukamutumbe’mba Yoano. Yehoba ukamupa Yoano mwingilo wanema bingi. Zekaliya wamwipwizhe’mba: ‘Nakonsha kuketekela byepi kino? Mambo amiwa ne mukazhami twakota kechi twakonsha kusema mwana ne.’ Ngabaliela wamukumbwile’mba: ‘Amiwa bantuma kwi Lesa kwiya na kukubuula ano mambo awama. Bino umvwa! Mambo waji kuzhinauka, usakwikala kamaama. Ukakonshatu kwamba inge uno mwana wasemwa.’

Zekaliya wabanjile bingi mu nzubo ya Lesa kukila byo kyaikalanga kimye kyonse. Byo alupukile, bantu bajinga pangye bakebelenga kuyuka kyalengejile kubanda. Bino Zekaliya kechi waambilenga ne. Waambilengatu na maboko. Bantu popo bayukile’mba Zekaliya watambula byambo kufuma kwi Lesa.

Mu kuya kwa moba, Elisabeta waimichile, ne kusema mwana wamulume, byonkatu byaambile malaika. Balunda nanji ne balongo banji basangalele bingi byo baishile na kumona mwana. Elisabeta waambile’mba: ‘Jizhina ja uno mwana Yoano.’ Abo bakaine’mba: ‘Mu kisemi kyenu kafwamo muntu wajingapo na jino jizhina ne. Mutumbai amba Zekaliya, jizhina ja bashanji.’ Kepo Zekaliya anembele amba: “Jizhina janji Yoano.” Ponkapotu Zekaliya watendekele kwamba jikwabo! Mbila ya kusemwa kwa uno mwana yaumvwanyikile monse mu Yudea, kabiji bantu baambilenga’mba: “Nanchi uno mwana ukekala muntu wa mutundu ka?”

Zekaliya byo ayujile na mupashi wazhila waawile’mba: ‘Atotwe Yehoba, walayile Abalahama amba ukatuma Mesiasa wa kwitupokolola. Yoano ukekala ngauzhi, kabiji ye ukanengezhezha Mesiasa jishinda.’

Kuji kintu kikwabo kyamwekele kwi Maliya mulongo wa kwa Elisabeta. Tusakwisamba pa kino kyamumwekejile mu mutwe walondelapo.

Elisabeta wajinga na mulongo wanji kamwale. Jizhina janji wajinga Maliya. Waikalanga mu muzhi wa Nazala mu Ngalilea. Maliya bamwipangwizhe kwi Yosefwa, wajinga kalipentala. Elisabeta byo ajinga na jiimi ja bañondo batanu na umo, Malaika Ngabaliela wamwekele kwi Maliya. Wamwambijile’mba: ‘Mutende Maliya, Yehoba wakubila bibusa.’ Maliya kechi wayukile mwatajile byambo byaambile Ngabaliela ne. Ngabaliela kepo amwambijile Maliya amba: ‘Ukemita ne kusema mwana wa mulume kabiji ukamutumbe’mba Yesu. Uno mwana ukekala Mfumu. Kabiji Bufumu bwanji kechi bukapwa ne.’

Maliya wamwambijile’mba: ‘Amiwa ne kisungu. Pano nakonsha kwikala byepi na mwana?’ Ngabaliela wamukumbwile’mba: ‘Kyonse kyaamba Lesa kikafika. Mupashi wanji wazhila ukekala pe obewa, kabiji ukasema mwana wa mulume. Mulongo wobe Elisabeta naye waimita.’ Kepo Maliya aambile’mba: ‘Amiwa ne muzha wa Yehoba! Kimmwekele monka mo mwaambila.’

Maliya waimene ponkapotu ne kuya ku kyalo kya mitumba kwaikalanga Elisabeta. Maliya byo amwimwine, mwana wafunkile munda mwa kwa Elisabeta. Elisabeta wayujile na mupashi wazhila ne kubijika’mba: ‘Obewa Maliya, Yehoba wakupesha. Natokwa bingi mambo bamfwakesha kwi inanji Nkambo yami?’ Maliya waambile’mba: ‘Namutumbijika Yehoba na muchima wami yense.’ Maliya waikele ne Elisabeta bañondo basatu. Kepo abwelele koaikalanga ku Nazala.

Yosefwa byo ayukile’mba Maliya waimita, wakebelenga kukana kumusongola. Malaika wamwekele kwi aye mu kiloto ne kumubuula’mba: ‘Kange uchine kusongola Maliya ne. Mambo kechi waubapo kyatama ne.’ Yosefwa wasongwele Maliya ne kumuvilwila ku nzubo yanji.