Mu oa moba Kesala Augusatusa wakambizhe kuba’mba Bayudea bonse babwele mu mizhi yabo na kunembesha mazhina. Yosefwa ne Maliya bayile ku Betelema, mambo ye muzhi mo bafumine. Bino Maliya juba ja kupaapa jajingatu pepi.

Byo bafikijile mu Betelema, kechi bamwenepo kwa kufikila ne. Onkao mambo, bafikijile mu kipaka. Muno Maliya momo asemejile mwananji aye Yesu. Wamupombele mu kisapi ne kumulaajika mu kijiilamo banyama.

Kabiji mu yoya mpunzha mwajinga bakafunga bajinga mungye kwipi na Yelusalema na kusopa matanga abo bufuku. Ponkapo malaika wa Yehoba waimene kulutwe yabo, ne lukumo lwa Yehoba lwibasamijile konse konse. Bakafunga baumvwine bingi moyo. Bino malaika wibambijile’mba: ‘Kuba moyo ne, naiya kwimubuula mambo awama. Lelo Mesiasa wasemwa mu Betelema. Ponkapo bamalaika bavula bamwekele ne kwamba’mba: “Lukumo kwi Lesa mwiulu, ne mutende pano pa ntanda.” Kepo bamalaika bonse bafumineko kwi abo ne kubwela mwiulu. Pano bakafunga baubile byepi?

Ponkapo bakafunga beambijile mulwabo amba: ‘Lonka luno twayai tuyenga ku Betelema.’ Byo bafikile bataine Maliya ne Yosefwa mu kipaka saka balajika mwana mu kijiilamo banyama.

Bantu bonse baumvwine byaambile bano bakafunga bakuminye bingi. Bino Maliya walangulukilepo bingi pa byaambile bamalaika kabiji kechi wibilubilemo ne. Bakafunga babwelele ko bashile mikooko saka batumbijika ne kutota Lesa pa bintu byonse byo baumvwine ne kumona.

Ku musela wa kyalo kya Isalela kwaikalanga bantu baitabijile’mba tubangabanga twakonsha kwibatangijila. Juba jimo bufuku banabalume bamo baikalanga ku Musela bamwene kabangabanga mwiulu kaendelenga kasamine bingi. Kano kechi kajinga kabangabangatu ne. Ponkapo batendekele kwikalondela. Kano kabangabanga kebatwajile ku Yelusalema. Bano banabalume batendekele kwipuzha bantu amba: ‘Nanchi Mfumu wa Bayudea wasemwa uji pi? Twaiya nakumumona.’

Heloda, Mfumu wa bena Yelusalema byo aumvwine’mba kuji mfumu wasemwa, waakaminwe bingi. Waipwizhe bañanga bakatampe ne banembeshi amba: ‘Nanchi uno mfumu wasemenwa pi?’ Abo bamubuujile’mba: ‘Mu Betelema wa mu Yudea, mambo bino byo byanembele bangauzhi.’ Kepo Heloda aichile boba banabalume bafumine ku Musela ne kwibambila’mba: ‘Yainga ku Betelema mukakebe kuji uno mwana. Mwafwainwa kubwela kuno na kumbuula pa kuba’mba ne amiwa nkayeko na kumulambila.’ Bino byo aambilenga wabepelengatu.

Kabangabanga katendekele kwenda jikwabo. Bano banabalume nabo batendekele kwikalondela kuya ku Betelema. Kaimene peulu ya nzubo mwajinga mwana. Byo batwelele mu nzubo, bataaine Yesu saka aji ne inanji aye Maliya. Bafukamine ne kumupa bya bupe bya ngolode ne binunka bulongo ne mola. Nanchi Yehoba ye watumine bano banabalume kwiya na kumona Yesu nyi? Ine.

Bufuku Yehoba wabujile Yosefwa mu kiloto amba: ‘Heloda ubena kukeba kwipaya Yesu. Yainga na mwana ne inanji. Nyemenai ku Ijipita. Mukekalenga konkakwa mukabwelatu inge nemubula’mba bwelai.’ Ponkapotu Yosefwa waimene bufuku ne kusenda mwana ne inanji, banyemena ne ku Ijipita.

Kabiji Yehoba wabujile banabalume bafumine ku Musela amba kange bapite kwi Heloda pa kubwela ne. Heloda wazhingijile bingi byo babujile kwiya. Byo abujile kumumona Yesu, wakambizhe kwipaya bakalombwana bonse bajinga pa jifumbi ja kwa Yesu. Bino Yesu aye wajinga kwalepa bingi ku Ijipita.

Heloda byo afwile, Yehoba wabujile Yosefwa amba: ‘Pano bwela mambo kuji mutende.’ Kepo Yosefwa ne Maliya ne Yesu babwelele kwabo ku kyalo kya Isalela. Byo babwelele bakekelenga mu muzhi wa Nazala.