Yosefwa ne Maliya baikalanga mu Nazala ne Yesu, ne bankasanji babalume ne babakazhi. Yosefwa wamwenanga mali akulaminamo kisemi mu bukalipentala, kabiji baana banji wibafunjishanga pe Yehoba ne Mizhilo yanji. Kisemi kyonse bayanga ku nshinagoga na kupopwela Lesa. Kabiji bayanga ku Yelusalema ku Kijiilo kya Lupitailo pa mwaka pa mwaka.

Yesu byo afikizhe myaka 12, bonse mu kisemi bayile ku Yelusalema byonka byo baubanga pa mwaka pa mwaka. Kwalepele bingi. Kwaikalanga bantu bavula bingi baiyanga ku Kijiilo kya Lupitailo. Kijiilo kya Lupitailo byo kyapwile, Yosefwa ne Maliya batendekele kubwela kwabo. Abo balangulukilenga’mba Yesu uji nabo pa jibumba. Byo batendekele kumukeba mu balongo babo, kechi bamumwene ne.

Ponkapo babwelele ku Yelusalema. Moba asatu apwile na kukebatu mwanabo. Kepo bayile mu nzubo ya Lesa. Byo bafikile, bamutaine Yesu mu nzubo ya Lesa saka aikala ne bafunjishi bamuzhokoloka. Watelekelenga ne kwibepuzha mepuzho. Bafunjishi nabo bamwipwizhenga Yesu mepuzho. Kabiji bakuminyenga mambo wibalumbulwijilenga bingi bulongo. Bayukile’mba wayuka bingi mwatala Mizhilo ya Yehoba.

Yosefwa ne Maliya baakaminwe bingi. Maliya wamwambijile Yesu amba: ‘Mwanami twakooka na kukukeba. Wajinga pi?’ Yesu waambile’mba: “Nanchi kechi mwayuka’mba nafwainwa kwikala mu nzubo ya Batata nenyi?”

Yesu wabwelele ku Nazala pamo na bansemi yanji. Yosefwa wamufunjishe Yesu bukalipentala. Walanguluka’mba Yesu wajinga byepi ku bwanyike? Yesu wakomenenga mu maana ne mu kimino saka bamutemwa kwi Lesa ne ku bantu.

Yoano, mwana Zekaliya byo akomene waikele ngauzhi. Inanji wajinga Elisabeta. Yehoba wapele Yoano mwingilo wa kubuula bantu kuba’mba Mesiasa ubena kwiya. Yoano wasapwilanga mungye kechi mu nshinagoga nangwa mu mizhi ne. Bantu baiyanga kufuma ku Yelusalema ne monse mu kyalo kya Yuda na kuteleka ku byafunjishanga Yoano. Wibafunjishanga’mba bafwainwa kuleka kuba byatama pa kuba’mba Lesa ebatalenga bulongo. Bantu bavula batelekanga ku byasapwilanga Yoano balapilanga, kabiji Yoano wibabatizhanga mu Mukola wa Yodano.

Yoano kechi wajinga na bintu byavula ne. Wavwalangatu kivwalo kyo bapikula na boya bwa bangamela kabiji wajangatu nzhiye. Bantu bavula bakebanga bingi kumuyuka Yoano. Nangwatu Bafaliseo ne Basadusea bayanga kwi Yoano. Yoano wibambilanga’mba: ‘Mwafwainwa kulapila ne kuleka kuba byatama. Kange mulangulukenga’mba kafwako kyo bakonsha kwimuba na mambo a kuba’mba mwi baana ba kwa Abalahama ne. Kino kechi kilumbulula’mba mwi baana ba Lesa ne.’

Bantu bavula baiyanga kwi Yoano na kumwipuzha’mba: ‘Twafwainwa kuba byepi pa kuba’mba Lesa etubile bibusa? Yoano wibabulanga Bayudea amba: ‘Inge uji na bivwalo bibiji papo kimo mukwenu wabulakyo.’ Nanchi wayuka ene mambo o aambilanga byobyo nyi? Wakebelenga bantu kuyuka’mba Lesa wakonshatu kwibatemwa inge batemwa bakwabo.

Yoano waambijile basonkeshi amba: ‘Ingilainga mu bukishinka kange mubepenga bantu ne.’ Kabiji wambijile bashilikale amba: ‘Kange mutambulenga mali alunkanankana ne kubepela bantu ne.’

Bañanga ne bena Levi nabo baishile kwi Yoano na kumwipuzha’mba: ‘Nanchi yobe ñanyi? Bantu bonse babena kukeba kukuyuka.’ Yoano wibakumbwile’mba: ‘Amiwa ne muluwe ubena kubijika mungye, ubena kubwezha bantu kwi Yehoba byonka byaambile Isaya.’

Bantu batemenwe bingi bibafunjishanga Yoano. Bavula balangulukanga’mba kampe ye Mesiasa. Bino aye wibabulanga’mba: ‘Kuji ubena kwiya wankila bulume. Kechi nakonsha nangwatu kukasulula ntambo ya pa makwabilo anji ne. Amiwa nemubatizha mu mema, pakuba aye ukemubatizhanga na mupashi wazhila.’