Byambo Bikwabo bya mu Mutanchi wa Kupwila kwa Bwikalo ne Mwingilo
© 2025 Watch Tower Bible and Tract Society of Pennsylvania
MARCH 2-8
BYA BUNEME BIJI MU MAMBO A LESA ISAYA 41-42
“Kange Uchine Ne”
13 Nangwa kya kuba Yehoba waambijile Bayudea bazha kuba’mba ukebakasulula kufuma mu buzha, wayukile’mba bakapita mu makatazho pa kimye kya kwibakasulula. Yehoba waambijile jimo kuba’mba Bayudea byo bakebakasulula kufuma mu buzha, mfumu wa bulume ukashinda bisaka bya bantu byazhokolokele Babilona, apa bino ne kulukuka Babilona mwine. (Isa. 41:2-5) Nanchi Bayudea bafwainwe kumvwa moyo nyi? Yehoba wibatekeneshejile jimo bantu banji kuba’mba: “Kange uchine ne, mambo amiwa nji ne obewa. Kange wakamwe ne, mambo amiwa yami Lesa wobe.” (Tangai Isaya 41:10-13.) Yehoba walumbulwilenga ka byo aambile’mba “Amiwa yami Lesa wobe”? Kechi wavulwilengamo Bayudea amba bafwainwe kumupopwela ne, mambo bayukijile jimo kuba’mba bafwainwe kumupopwela. Pakuba wibavulwilengamo kuba’mba aye ukatwajijila kwibakwasha.—Sala. 118:6.
ijwbv kibaaba 5 mafu. 4-7
Isaya 41:10—“Kange Uchine ne, Mambo Amiwa nji Nobe”
“Amiwa nji nobe.” Yehoba wabuula bakalume banji ene mambo o bafwainwa kubujila kumvwa moyo mambo kechi banji bunke ne. Aye umona bintu byo bapitamo kabiji umvwa ne milombelo yabo, kijitu nobe uji pepi ne abo.—Salamo 34:15; 1 Petelo 3:12.
“Amiwa yami Lesa wobe.” Yehoba watekeneshe bapopweshi banji kupichila mu kwibavululamo kuba’mba ukiji Lesa wabo kabiji ukeba’mba bekale bapopweshi banji. Baketekejile kuba’mba nangwa bakapite mu makatazho a mutundu ka Lesa ukebazhikijila.—Salamo 118:6; Loma 8:32; Bahebelu 13:6.
“Amiwa nkakukosesha ne kukukwasha, kine, amiwa nkakukwata na kuboko kwami kwa kilujo kwa bololoke.” Yehoba waingijishe bino byambo kukosesha kishinka kuba’mba amweshe byo akwasha bantu banji. Kabiji waingijishe bino byambo kumwesha byo oba inge bantu banji babena kupita mu makatazho. Inge muntu wapona, Lesa umukwata na kuboko kwaji kwa kilujo ne kumwimanyapo.—Isaya 41:13.
Lesa ukosesha ne kukwasha bakalume banji kupichila mu Mambo anji, Baibolo. (Yoshua 1:8; Bahebelu 4:12) Mambo a Lesa akwasha bantu kuyuka mwakubila na makatazho nabiji buyanji, kukolwa nangwa inge bafwisha bantu bo batemwa. (Byambo bya Maana 2:6, 7) Lesa wingijisha mupashi wanji wazhila, ngovu yanji ingila kukwasha bakalume banji kutwajijila kuchinchika makatazho o babena kupitamo.—Isaya 40:29; Luka 11:13.
“Kuchina ne, Amiwa Nkakukwasha”
Nanchi bino byambo bimulengela kushiinwa nyi? Fwanyikizhai kuba’mba muji ne Yehoba. Bino kino kechi kibena kulumbulula’mba mubena kwendela pamo ne Yehoba ne, pano bino mwakonsha kulanguluka’mba bino byambo byawama bingi. Umvwe mubena kwendela pamo nanji, aye ukemukwata ku kuboko kwenu kwa kipiko na kuboko kwanji kwa kilujo. Pakuba Yehoba wimukwata ‘na kuboko kwanji kwa kilujo kwa bololoke’ kabiji ukakwata ‘kuboko kwenu kwa kilujo,’ pa kuba’mba emufumye mu lukatazho lo mujimo. Kimye kyo abena kuba bino, wimutundaika’mba: “Kuchina ne, amiwa nkakukwasha.”
Nanchi mumona Yehoba amba Shenu wimutemwa kabiji Mulunda ukemukwasha inge mwaikala na bijikila nyi? Wimuta bingi muchima, wayuka bintu byo mupitamo mu bwikalo bwenu kabiji ukeba kwimukwasha. Inge ke mupite mu makatazho, Yehoba ukeba’mba mumvwenga’mba mwazhikijilwa mambo uji pepi ne anweba. Kine “witukwasha kimye kyonse kyo tupita mu bya malwa.”—Sala. 46:1.
Bishinka Bikwabo Byanema
Kwikala Wakishinka Kulumbulula Ka?
Yehoba waambijile mulunda nanji Abalahama amba: “Amiwa yami jikebo jobe.” (Ntendekelo 15:1; Isaya 41:8) Bino byambo byafikile. Yehoba wazhikijile ne kupokolola Abalahama ne ba mu nzubo yanji kwi Felo ne Abimeleki. Kabiji wakwashishe Abalahama kupulusha Lota ku balwanyi banji bamfumu bana. Yehoba walengejile Abalahama wajinga na myaka 100 ne Sala wajinga na myaka 90 kwikala na lusemo jibiji pa kuba’mba mwi abo mukafume lukunwa walayilwe. Yehoba wisambanga ne Abalahama mu bimwesho ne biloto kabiji waingijishanga ne bamalaika. Yehoba wamwesheshe’mba wajinga wakishinka kwi Abalahama kimye kyo ajinga mumi ne panyumatu ya lufu lwanji. Pa myaka yavula, Yehoba watwajijile kufikizha milaye yanji ku bena Isalela ba mu kisemi kya kwa Abalahama nangwa kya kuba bamusatukilanga. Bulunda bwajinga na Abalahama ne Yehoba bumwesha bilumbulula bukishinka kuba’mba ke kumwesha butemwe mu byo tuba.—Ntendekelo, bitango 12 kufika ku 25.
TAIKO MUCHIMA KU MWINGILO WA KUSAPWILA
Mwafwainwa Kushinda Byepi Moyo wa Kuchina Lufu
ijwbq kibaaba 60
Mukumbu wa mu Baibolo
Tuchina lufu mambo ke mulwanyi wetu kabiji tubapo bintu bimo kuba’mba twizhikijile. (1 Kolinda 15:26) Nangwa byonkabyo, kuchina lufu na mambo a mafunjisho a bubela kulengela bavula kwikala ‘bazha mu bwikalo bwabo.’ (Bahebelu 2:15) Kuyuka bukine bwaamba pa lufu kukemulengela kubula kuchina lufu kabiji kino kikemulengela kwikala na lusekelo mu bwikalo bwenu.—Yoano 8:32.
Bishinka byaamba pa lufu
Bantu bafwa kafwako kintu nangwa kimo kyo bayuka ne. (Salamo 146:4) Muntu inge wafwa kechi umvwa kukola nangwa kumanama ne, mambo Baibolo waesakanya lufu ku tulo.—Masalamo 13:3; Yoano 11:11-14.
Bantu bafwa kechi bakonsha kwituba kintu kyatama. Nangwatu bantu bakanamine nabo baya na “kulaala kwalaala bafwa.” (Byambo bya Maana 21:16) Baibolo waamba’mba “lupato lwabo ne kichima kyabo byonse byaonaika.”—Musapwishi 9:6.
Lufu kechi yo mpelo yine ya bumi bwetu ne. Na mambo a lusanguko, Lesa ukasangula bantu bafwa ne kwikala na bumi jibiji.—Yoano 5:28, 29; Byubilo 24:15.
Lesa walaya kuba’mba ‘lufu kechi lukekalako jibiji ne.’ (Lumwekesho 21:4) Baibolo waamba pa kikye kimye amba: “Baoloka bakaswana ntanda, kabiji bakekalangamo myaka ne myaka,” kechi bakekalapo jibiji na moyo wa kuba’mba basakufwa ne.—Salamo 37:29.
MARCH 9-15
BYA BUNEME BIJI MU MAMBO A LESA ISAYA 43-44
Bungauzhi Bwanembelwe Saka Kwakishala Myaka Nobe 200 Kufika
Muji Bungauzhi bwa Kine
Nanchi mu Baibolo muji bungauzhi bwa kine nyi? Twayai twisambe pa bungauzhi bumo buji mu buku wa Isaya bwaamba pa konaunwa kwa Babilona.
Bungauzhi: Mu myaka kitota kya bu 8 B.C.E., nembi wa Baibolo aye Isaya waawile amba Babilona, bufumu bukatampe bakebonauna kabiji ukashalatu ke masala. (Isaya 13:17-20) Isaya watongwele ne muntu ukafikizha buno bungauzhi kuba’mba Kilusa. Walumbulwile ne jishinda jo bakengijisha pa konauna Babilona amba ‘bakomisha mikola.’ Kabiji waambijile jimo kuba’mba bibelo bya muzhi bikashalatu kyashi.—Isaya 44:27–45:1.
Byafikile Bungauzhi: Byo papichile myaka nobe 200 kufuma pa aawijile Isaya buno bungauzhi, mfumu wa Pelisha walukukile Babilona. Wajinga ñanyi jizhina? Wajinga Kilusa. Babilona wajinga na nsakwa yakosa bingi. Onkao mambo, Kilusa wasendwile mema a mu Mukola wa Ufelata wazhokolokele muzhi. Nzhita yanji yapoyile mufolo pa kuba’mba basendule mema. Kino kyalengejile mema kuuma kabiji nzhita ya kwa Kilusa yakubwile mu mema ne kutwela mu muzhi. Pa joja juba, bena Babilona bashile binzhilo kyashi byatajile ku mukola. Kilusa ne nzhita yanji balukukile muzhi wa Babilona ne kumonaunatu shata.
Nangwa byonkabyo, kuji kishinka kimo kyo twafwainwa kuyuka. Nanchi muzhi wa Babilona washajiletu masala nyi? Pa myaka yavula, bantu batwajijile kwikala mu uno muzhi. Lelo jino muzhi wa Babilona washalatu ke masala. Uno muzhi waikela kwipi na muzhi wa Baghdad mu kyalo kya Iraq. Abino byonse bimwesha kuba’mba byaambile bungauzhi byafikile. Kinetu, byonse byamba Baibolo bifika.
Nanchi Mumona Bintu Byamwene Zekaliya Nyi?
BAYUDEA basangalele bingi. Yehoba Lesa “walengejile Kilusa Mfumu wa Pelisha” kukasulula bena Isalela bajinga bazha mu Babilona pa myaka yavula. Mfumu wabijikile kuba’mba Bayudea bafwainwe kubwela ku ntanda yabo ne kushimukulula “nzubo ya Yehoba Lesa wa Isalela.” (Eze. 1:1, 3) Uno mukambizho wawamine bingi. Kino kyalumbulwilenga kuba’mba Bayudea bakatendeka kupopwela Lesa wa kine jibiji mu ntanda yo ebapele.
Bishinka Bikwabo Byanema
Mepuzho Afuma ku Batanga
Kintu kikwabo kyo tusakwisambapo ke bungauzhi bwaamba pe Kilusa washindañene ne kupokolola Bayudea bajinga mu buzha ne kupana mukambizho wa kushimukulula nzubo ya Yehoba. (Isa. 44:26–45:4) Mfumu Kilusa mwina Pelisha ye wafikizhe buno bungauzhi. (Eze. 1:1-4) Nangwa byonkabyo, Kilusa kechi wapopwelanga Lesa ne. Yehoba waingijishe Kilusa kufikizha bungauzhi bwanji. Pano bino Yehoba waswishishe Kilusa kwisajilapo aye mwine kumupopwela nangwa ne.—Maana 21:1.
MARCH 16-22
BYA BUNEME BIJI MU MAMBO A LESA ISAYA 45-47
“Amiwa Yami Lesa, Kafwako Mukwabo Waesakana ne Amiwa Ne”
“Jizhina Jenu Jizhile”
14 Satana waingila papelela bulume bwanji kukeba kukanya Yehoba kuba kyaswa muchima wanji. Bino Satana wapulwilamotu mabula. Baibolo wamwesha Yehoba byo auba, kabiji wamwesha kuba’mba kafwako waesakana pamo ne Yehoba Lesa ne. Kya kine, bunsatuki bwa kwa Satana ne bantu banji bwamukozha bingi Yehoba ku muchima. (Sala. 78:40) Pano bino, waingijilapo pa luno lukatazho mu jishinda jawama jimwesha maana, butekanye ne bunchibamambo bwaoloka. Kabiji wamwesha bulume bwanji bukatampe mu mashinda avula bingi. Kyakilamo kunema, butemwe bwanji bumwekela mu bintu byonse byo oba. (1 Yoa. 4:8) Yehoba kechi waleka kwingila pa kuba’mba azhijike jizhina janji ne.
“Yehoba. . . Bulume Bwanji bo Bukatampe Bwakila”
14 Byonka byo tusakumona, Lesa wingijisha bulume kulenga bintu, konauna, kuzhikijila, ne kubwezha bintu jibiji. Lesa wingijisha bulume bwanji kuba kiji kyonse mwayila nkebelo yanji yalumbuluka. (Isaya 46:10) Kimye kimo, Yehoba wingijisha bulume bwanji kusolwelamo mbaji yanji imo yanema ya bumuntu bwanji ne mizhilo yanji. Kyakila pa byonse, wingijisha bulume bwanji kufikizha kyaswa muchima wanji kya kubingisha bumfumu bwanji ne kuzhijika jizhina janji kupichila mu Bufumu bwa Bumesiasa. Kafwako nangwa kimo kyakonsha kukanya ino nkebelo yanji ne.
Ipelulainga Inge Kuji Bintu byo Mwabula Kuyuka
15 Nangwa kya kuba kechi twayuka bintu byakonsha kwitumwekela mu bwikalo bwetu ne, pano bino twayuka’mba Yehoba witulaya bumi bwa myaka ne myaka, mwiulu nangwa pano pa ntanda. Twayuka kuba’mba Yehoba kechi ubepa ne, kabiji kafwako kintu kyakonsha kumulengela kukankalwa kufikizha milaye yanji yonse ne. (Titu. 1:2) Yehoba ye yenkatu wakonsha ‘kwambila jimo bintu bikamweka kulutwe, kabiji kufumatu ne kala kene, wamba bintu bikyangye kumweka.’ Bintu byo aambijile jimo kuba’mba bikamweka mu moba a kala, byamwekele. Kabiji bintu byo aambila jimo kuba’mba bikobiwa kulutwe, kine bikafika. (Isa. 46:10) Kabiji twayukishatu bulongo kuba’mba kafwako kintu nangwa kimo kyakonsha kulengela Yehoba kuleka kwitutemwa ne. (Loma 8:35-39) Kabiji inge ketupite mu makatazho, Yehoba uketutekeneshanga, kwitupa maana ne bulume bwa kuchinchika makatazho onse o twakonsha kupitamo. Twashiinwa’mba Yehoba uketukwashanga ne kwitupesha.—Yele. 17:7, 8.
Nkalata Yakonsha Kwitukwasha Kutwajijila Kuchinchika Kufika ne ku Mpelo
13 Byo bapembelejilenga kiyukilo kya kwibabuula kunyema, bena Kilishitu Bahebelu bafwainwe kupeezhako bwikalo bwabo, ne kubula “kutemwa mali.” (Tangai Bahebelu 13:5.) Bamo bayanjile na mambo a kipowe kya nzala ne makatazhotu akwabo. (Hebe. 10:32-34) Bamo batatwile kuta muchima ku bintu bya ku mubiji nabiji kukebesha mali kuba’mba bezhikijile ku buyanji ne ku makatazhotu akwabo. Nangwa byonkabyo, mali kechi akonsheshe kwibapulusha ku malwa akatampe aishilenga ne. (Yako. 5:3) Bantu batemenwe bintu bya ku mubiji kyakonsheshe kwibakatazha bingi kunyema ne kusha mazubo abo ne bipe byabo.
14 Kiketupelela bingi kubula kutemwisha bintu bya ku mubiji inge twaikala na lwitabilo lwakosa ne kuyuka’mba mpelo ya buno bwikalo bwatama ijitu pepi. Mu kimye kya malwa akatampe, bantu “bakataya siliva mu mikwakwa” mambo bakayuka’mba “siliva nangwa ngolode yabo kechi bikebapulusha mu juba ja bukaji bwa Yehoba ne.” (Ezi. 7:19) Mu kifulo kya kuta muchima pa kukebesha kwikala na mali avula bingi, twafwainwa kubanga bintu byakonsha kwitukwasha kumwena ba mu kisemi ne kwitulengela kutwajijila kwingijila Yehoba. Kabiji twafwainwa kuchinuzhukanga makongole nangwa kwingijishanga kimye kyabaya na kukebatu bya ku mubiji. Kechi twafwainwa kutesha muchima ku bipe byo tuji nabyo ne kwibimona’mba byo bintu byanema bingi mu bwikalo bwetu ne. (Mat. 6:19, 24) Mpelo ya buno bwikalo byo ibena kufwenya pepi, twafwainwa kusalapo kana kuketekela mwi Yehoba nangwa mu bipe byetu.
Bishinka Bikwabo Byanema
Nanchi Lesa Wayukile’mba ba Adama ne Evwa Bakalenga Mambo Nyi?
Binembelo bimwesha’mba Yehoba ye “yenkatu uji na maana.” (Loma 16:27) Bamalaika ba mwiulu bemwenejile bintu byavula byaubile Yehoba bimwesha maana anji akila. Bamalaika “babijikilenga saka batakaika” kimye Yehoba kyo alengele bintu pano pa ntanda. (Yoba 38:4-7) Kwakubula nangwa kuzhinaukatu ne, bino bilengwa bya mupashi byateleko bingi muchima kimye Yehoba kyo alengelenga bintu mu bujimi bwa Edena. Nanchi Lesa uji bingi na maana walengele bintu byonse biji mwiulu ne pano pa ntanda byalengejile bamalaika kwikala na lusekelo, wakonsheshe kulenga bantu babiji bo ayukile’mba kechi bakatwajijila kumukookela nenyi? Kwambatu kine, kuba bino inge kechi kwayijilemo ne.
Nangwa byonkabyo, bamo bakonsha kwipuzha’mba ‘pano nga Lesa uji na maana akila wakonsheshe kubula kuyuka byepi kino?’ Ibyo Yehoba uji bingi na maana kabiji wayuka bintu “Kufumatu ku ntendekelo.” (Isaya 46:9, 10) Nangwa byonkabyo, wingijisha maana anji kwesakana na kyaswa muchima wanji byonkatu byo engijisha bulume bwanji bukatampe. Yehoba usala bintu byo akeba kuyukila jimo ne byo abula kukeba kuyuka. Wingijisha ano maana a kuyukila jimo bintu inge kekikebewe kwesakana na biji bintu pa kyokyo kimye.
MARCH 23-29
BYA BUNEME BIJI MU MAMBO A LESA ISAYA 48-49
Taingako Muchima ku Bintu Bimufunjisha Yehoba ne Kwibingijisha
it “Mufunjishi, Kufunjisha” jifu. 2
Mufunjishi, Kufunjisha
Yehoba Lesa, kabiji Mulenga, ye Mufunjishi Wakila wa bakalume banji. (1Mf 8:36; Sl 27:11; 86:11; 119:102; Is 30:20; 54:13) Bintu byalengele Yehoba bitufunjisha’mba kuji Lesa uji na maana akila kabiji bantu batwajijila kukebakeba ne kufunda pa bino bilengwa pa myaka yavula, bino bayukakotu bicheche. (Yob 12:7-9) Na mambo a kuba Yehoba watemwa bantu, wibafunjisha jizhina janji, kyaswa muchima wanji ne mizhilo. (Esakanyaiko Lup 4:12, 15; 24:12; 34:5-7.) Bino bintu byo etusolwela bitanwa mu Mambo a Lesa Baibolo kabiji byo byo twingijisha kufunjishamo bantu bukine kwesakana na kyaswa muchima wanji. (Lo 15:4; 2Ti 3:14-17) Mupashi wa Lesa naye witufunjisha.—Yoa 14:26.
ijwbq kibaaba 44 jifu. 2-3
Baibolo Waambapo’mba ka pa Luusa lwa Kwifuukwila? Nanchi Lesa ye Ulengela Bintu Kwitumwekela Nyi?
● Lesa walengele bantu mu kipasha kyanji. (Ntendekelo 1:26) Kupusanako na banyama bengijisha maana a kisemwa, atweba tuji na byubilo bijipo ne Yehoba nabiji butemwe ne bunchibamambo bwaoloka. Kabiji byonka biji Mulenga wetu, tuji na luusa lwa kwifuukwila.
● Tuji na bulume bwa kwifuukwila bintu byo tukeba kuba kulutwe. Baibolo witutundaika ‘kusala bumi,’ kupichila mu “kumvwina jiwi [ja Lesa],” ko kuba’mba kufuukulapo kukookela mikambizho yanji. (Mpitulukilo ya mu Mizhilo 30:19, 20) Lesa kechi wakonsha kwitubuula kuba bino inge kya kuba kechi twajinga na luusa lwa kwifuukwila ne. Lesa kechi witukanjikizha kuba bintu byo akeba ne, pakuba witusashijila’mba: “Umvwe mwakookela mikambizho yami, mutende wenu ukekala nobe mukola.”—Isaya 48:18.
“Ikomeshainga Anwe Bene mu Lwitabilo Lwenu Lwazhila”
8 Yehoba ubena kwitubuula’mba yetu tumwenamo bintu byawama umvwe twamukookela. Witulaya mfweto ibiji umvwe twamukookela. Mfweto itanshi, mutende wetu ukekala nobe mukola upitatu kikupu. Ya bubiji, bololoke bwetu bukekala nobe manyaki a pa kalunga ka mema. Umvwe mwaimana ku kitulu ne kumona byenda manyaki, mwakonsha kuyuka byo mukekala kikupu. Mwayuka’mba manyaki kechi akaleka kwenda ne, akatwajijila kwenda ne kwipuma ku kitulu myaka ne myaka. Yehoba waamba’mba bololoke bwenu bwakonsha kutwajijila nobe kwenda kwa manyaki. Kikulutu mubena kwibikishako kwikala ba kishinka kwi aye, kine kechi ukemulekelela ne. (Tangai Salamo 55:22.) Nanchi ino milaye yawama kechi yakonsha kukosesha lwitabilo lwenu mwi Yehoba ne mu mizhilo yanji yaoloka nenyi?
Bishinka Bikwabo Byanema
it “Kimye Kyaitabilwa” mafu. 1-3
Kimye Kyaitabilwa
Pa 2 Kolinda 6:2, mutumwa Paulo waambile byambo bya bungauzhi bitanwa pa Isaya 49:8, bya kuba’mba: “Yehoba waamba’mba: ‘Mu kimye kyafwainwa, nakukumbwile, kabiji mu juba ja lupulukilo nakukwashishe; amiwa nakulaminenga ne kukupana kwikala lulayañano lwami na bantu, kuba’mba uwamishe kyalo, ne kwibalengela kwikala jibiji mu kyalo kyabo kyaonaikile.’” Mu kimye kyajingako Isaya, bino byambo bebinembejile Isaya kwimenako bena Isalela. (Is 49:3) Buno bwajinga bungauzhi bwaambilenga pa kushimukulula Yelusalema kabiji bwafikile patanshi kimye bena Isalela bajinga bakaili kyo bebafumishe mu Babilona ne kwibambila’mba “Lupukaimo!” Byo bafuminemo, babwelele kwabo ne kumushimukulula muzhi wabo washajile masala.—Is 49:9.
Nangwa byonkabyo, byambo bya kuba’mba “nakulaminenga ne kukupana kwikala lulayañano lwami na bantu” biji mu kyepelo 8 mu kino kitango ne byambo byafumako mu kyepelo 6 bya kuba’mba “kalume” wa Yehoba ukekala ‘kyeya ku bisaka bya bantu, kuba’mba [Lesa] akapulushe bantu kufika kwapela ntanda,’ bimwesha’mba buno bungauzhi bwaambilenga pe Mesiasa kabiji bwaambilenga pe Kilishitu Yesu amba ye “kalume” wa Lesa. (Esakanyai Is 42:1-4, 6, 7 na Mat 12:18-21.) Byo kiji kuba’mba “kimye kyafwainwa” kyajinga kimye Yehoba kyo akumbwile ne kukwasha kalume wanji, kino kibena kutazha ku kimye Yesu kyo ajinga pano pa ntanda kyo alombele “milombelo ya misashijilo, na kujijisha ne mipolo, ku yewa wafwainwe kumupokolola mu lufu, kabiji Lesa wamumvwine na mambo a kumwakamwa.” (Heb 5:7-9; esakanyaiko Yoa 12:27, 28; 17:1-5; Luk 22:41-44; 23:46.) Onkao mambo, jino jajinga “juba ja lupulukilo” ja mwana Lesa na mambo a bukishinka bwanji bo amwesheshe kabiji kino kyamulengejile kwaluka “ke upana lupulukilo lwa myaka ku bonse bamukookela.”—Heb 5:9.
Kunungapo, byambo byaambile Paulo bya bungauzhi bwa kwa Isaya bimwesha’mba buno bungauzhi bwafikile ne mu moba a bena Kilishitu bo atundaikile’mba “mutambule lusa lukatampe lwa Lesa kabiji kange mwilwalule kwikala ke lwatutu ne.” Kabiji bo atundaikile’mba (panyuma ya kwamba byambo biji pa Is 49:8): “Pano kino kyo kimye kyaitabilwa. Jino jo juba ja lupulukilo.” (2Ko 6:1, 2) Bano bena Kilishitu batendekele kwikala “bena Isalela ba Lesa” ba ku mupashi mu mwaka 33 C.E. kuya kulutwe (Nga 6:16), pano bino, bafwainwe kutwajijila kwibikako pa kuba’mba batambwile lusa lukatampe lwa Lesa, kuba’mba “kimye kyaitabilwa” kikale ke “juba ja lupulukilo” kwi abo.
APRIL 6-12
BYA BUNEME BIJI MU MAMBO A LESA ISAYA 50-51
Umvwinainga bo Bafunjisha kwi Lesa
Kufunjisha Bamwingilo ba Bufumu
5 Kimye byo kyafikile, Yehoba wafunjishe Mwananji pa byo akengila mwingilo pano pa ntanda. Monai bungauzhi bwaamba pa bulunda buji pa Mufunjishi Wakila ne Mwananji Mubeji. (Tangai Isaya 50:4, 5.) Bungauzhi bwaamba’mba Yehoba wabushanga Mwananji “lukelo pa juba pa juba.” Buno bungauzhi bumwesha mufunjishi ubusha mwana wa sukulu lukelo pa kuba’mba amufunjishe. Buku umo waamba pa Baibolo waamba’mba: “Yehoba ufunjisha Mwananji nobe mwana wa sukulu kabiji umufunjisha bya kusapwila.” Mu uno sukulu wa mwiulu, Yehoba wafunjishe Mwananji ‘byo afwainwa kubulañana ne kwamba.’ (Yoano 12:49) Kabiji uno Shanji wafunjishe Mwana bya kufunjisha. Byo ajinga pano pa ntanda, Yesu waingijishe bulongo byo bamufunjishe. Kechi wasapwilangatu aye mwine ne, bino wafunjishe ne baana banji ba bwanga nabo bya kwingila mwingilo.
“Natemwa Batata”
13 Byo ajinga mwiulu, uno Mwana wafunjile byavula kufuma kwi Shanji. Bungauzhi buji mu Isaya 50:4-6 bumwesha’mba Yehoba wafunjishe Mwananji pa mwingilo ye amupele wa Bumesiasa. Nangwa kya kuba luno lufunjisho mwavwangile kuyuka makatazho akonsheshe kupitamo Mushingwa wa Yehoba, aye Mwana wafunjile mwakubila na ano makatazho. Palutwe kacheche, Yesu byo aishile kusemwa pano pa ntanda ne kwikala mukulumpe, wayanga bingi ku nzubo ya Shanji na kupopwela ne kufunda bintu Yehoba byo akebanga kubiwa mu nzubo yanji. O ene mambo Baibolo o aambila’mba Yesu watanwanga kimye kyonse ku nzubo ya Lesa ne ku nshinagoga. (Luka 4:16; 19:47) Umvwe tukeba butemwe bwetu pe Yehoba kutwajijila, twafwainwa kutanwanga kimye kyonse ku kupwila kwa bwina Kilishitu ko tupopwela Yehoba ne kufunda bintu byavula ne kumwesha lusanchilo lwetu kwi aye.
Bishinka Bikwabo Byanema
it “Kimbo” jifu. 2
Kimbo
Kwingijisha ñambilo ya kifwanyikizho, Yehoba kupichila mwi Isaya waambile pa kimbo ne mwingilo wakyo. (Is 51:1) Byonka byo bamwesha mu kyepelo kyalondelapo “jibwe” jaimenejilengako Abalahama mwafumine kisaka kya bena Isalela, kabiji “kimbo” kyaimenejilengako Sala wasemene mushakulu wa bena Isalela, aye Izaka. (Is 51:2) Nangwa byonkabyo, byo kiji kuba’mba Izaka wasemenwe na bulume bwa Yehoba kabiji mu jishinda ja kukumya, ino ñambilo ya kifwanyikizho ya kuba’mba kimbo nayo imena kintu kyanema bingi. Onkao mambo, kinembelo kya Mpitulukilo ya mu Mizhilo 32:18 kyamwesha’mba Yehoba ye ‘Jibwe wasemene’ bena Isalela “Yenka wimusemene” [kyo kyambo kyo baingijishe kwamba pe Sala pa Is 51:2] na bisanso.
TAIKO MUCHIMA KU MWINGILO WA KUSAPWILA
Nanchi Kwitabila Mwi Yesu kyo Kyonkatu Kikebewa pa Kuba’mba Tukapuluke Nyi?
ijwbq kibaaba 140 jifu. 4
Ine. Nangwa kya kuba twafwainwa kwitabila mwi Yesu pa kuba’mba tukapuluke, bino kuji ne bikwabo bikebewa. (Byubilo 16:30, 31) Baibolo waamba’mba: “Byonkatu mubiji wabula mupashi byo afwa, ne lwitabilo lwabula mingilo nalo lwafwa.” (Yakoba 2:26) Pa kuba’mba aketupulushe, twafwainwa:
Kufunda pe Yesu ne Shanji, Yehoba.—Yoano 17:3.
Kwibetabila.—Yoano 12:44; 14:1.
Kumwesha lwitabilo lwetu kupichila mu kukookela mikambizho yabo. (Luka 6:46; 1 Yoano 2:17) Yesu wafunjishe’mba kechi bonse bamwita’mba “Nkambo” bakapuluka ne, kanatu boba “kyaswa muchima wa [Shanji] wa mwiulu.”—Mateo 7:21.
Kutwajijila kumwesha lwitabilo lwetu nangwatu mu bimye bya makatazho. Yesu walumbulwile bulongo kino byo aambile’mba: “Awa ukachinchika kufika ne ku mpelo, ye ukapuluka.”—Mateo 24:13.
APRIL 13-19
BYA BUNEME BIJI MU MAMBO A LESA ISAYA 52-53
Yesu Wamwesheshe Butemwe Bukatampe!
Anweba Bakyanyike, Kanainga Kuba Bintu Byatama Bimukanjikizha Bakwenu
2 Nanchi bakwenu bemukanjikizha kuba bintu byo mubula kukeba kuba nyi? Umvwe byo byo boba, mambo ka? Nanchi musaka kulondela byo boba kuba amba bemutemwe nyi? Kino kechi kyatama ne. Mambo nangwatu bakulumpe nabo bakeba kwibatemwa ku bakwabo. Kafwako nangwa umo kikale mukulumpe nangwa mwanyike ukeba kumushikwa ku bakwabo ne. Pano bino, kechi kimye kyonse kyo bakemutemwa bakwenu na mambo a kuba byawama ne. Mambo ne Yesu kyamumwekejile. Nangwa byonkabyo, Yesu waubanga byawama kimye kyonse. Bamo bamulondejile ne kwikala baana banji ba bwanga, pakuba bakwabo bamushibulukilenga kabiji ‘kechi bamushingikile ne.’—Is 53:3.
Kebai Bukimote ne Kutokesha Yehoba ku Muchima
15 Mu bañondo bapeleleko pano pa ntanda, Yesu waikele bingi na bijikila. Wayukile’mba bakamumanyika kya mama nafwa ne kumwipaya. (Yoa. 3:14, 15; Nga. 3:13) Byo kwashajile bañondo bacheche kuba’mba bamwipaye, waambile’mba wajinga bingi na bijikila. (Luka 12:50) Kabiji byo kwashajiletu moba acheche kuba’mba bamwipaye, Yesu waambile’mba: “Muchima wami wankatazha bingi.” Tumona byo epelwile ne kukookela Lesa mu byo alombele ne kwamba byajinga mu muchima wanji amba: “Tata, mpulushai ku kino kimye. Pano bino, kino kyo kyo naishila ku kino kimye. Tata tumbijikai jizhina jenu.” (Yoa. 12:27, 28) Kimye byo kyafikile kya kumwipaya, Yesu wachinchikile ne kwisolola mwine ku balwanyi ba Lesa, kabiji bamwipayile lufu lwatama bingi. Nangwa kya kuba wajinga na bijikila kabiji wamanamine bingi, Yesu waubile kyaswa muchima wa Lesa. Kwa kubula nangwa kuzhinaukatu ne, Yesu ye mwine ye twafwainwa kufunjilako bya kwikala bakimote inge tuji na bijikila.—Tangai Isaya 53:7, 10.
Bishinka Bikwabo Byanema
it “Bipe” jifu. 2
Bipe
Javula kyambo kya kuba’mba keliʹ bekingijisha kwimenako bipe byapusana pusana byajinga mu Nzubo ya Lesa. Pa bino bipe pajinga ne masanyi, milondo, mafosholo, masanyi afukumana, mafoloko, bya kwapwilamo mujilo, bya kuzhimyako mujilo, tubimano, mashomeka ne makapu. (Lup 25:29, 30, 39; 27:3, 19; 37:16, 23; 38:3; 1Mf 7:40-50; 2Mo 4:11-22) Na mambo a kuba byaingilanga mwingilo wazhila, bino bipe byajinga “byazhila.” (1Mf 8:4) Byo kiji kuba’mba Bayudea bafumune mu Babilona mu mwaka wa 537 B.C.E. bebapele mwingilo wa kusenda bipe byazhila byasendele Mfumu Nebukaneza mu Yelusalema, bafwainwe kwikala bazhila ku mupashi ne mu byubilo. Bafwainwe kulondela mukambizho waambile ngauzhi wa kuba’mba: “Fumaiko, fumaiko, lupukaimo kange mukwate ku kintu nangwa kimo kyatama ne! Lupukaimo mwi aye, itokeshai, anweba musenda bipe bya mu nzubo ya Yehoba.” (Is 52:11) Kino kechi kyalumbulwilenga’mba bafwainwe kwitokeshatu ku mubiji mwayijile kisho ne. Pakuba bafwainwe kwitokesha ne mu muchima. Mutumwa Paulo, byo anembejile bena Kilishitu ba mu Kolinda waingijishe byambo biji pa Isaya 52:11 kuba’mba bena Kilishitu bafwainwe kwitokesha ku bubipisho bonse bwa mubiji ne bwa mupashi.—2Ko 6:14-18; 7:1.
APRIL 20-26
BYA BUNEME BIJI MU MAMBO A LESA ISAYA 54-55
Ñanyi Bintu byo Mwafwainwa Kusankilapo pa Kuba’mba Bemufunjishe kwi Yehoba?
Lufunjisho lwa Lesa Lwakila mu Kunema
3 Na mambo a buwame bwanji, Yehoba wipana kufunjisha bantu bambulwa kulumbuluka. Bungauzhi bwa mu Isaya 54:13 bwaamba pa bena Kilishitu bashingwa na mupashi amba: ‘Baana bobe bonse bakebafunjisha kwi amiwa Yehoba; kabiji bakekala na mutende wa kine kine.’ Bino byambo bingila ne ku ‘mikooko ikwabo’ ya kwa Kilishitu. (Yoa. 10:16) Kino kishinka kyamwekana kwesakana na bungauzhi bubena kufika mu moba etu. Isaya wamwene mu kimwesho bantu saka bafuma mu mikoka yonse ya bantu ne kwiya ku mpopwelo ya kine. Wibalumbulwile saka beambila bene na bene amba: “Twayai, tuye ku mutumba wa Yehoba, ku nzubo ya Lesa wa Yakoba; namba aketufunjishe mwa kwendela, twendenga mu mashinda anji.” (Isa. 2:1-3) Byo jaikalapo jishuko jikatampe kwitufunjisha kwi Lesa!
“Pota Bukine Kabiji Kange Wibupotolweshe Ne”
6 Tangai Isaya 55:1-3. Byambo bya Yehoba byanembele Isaya byatokeshapo bulongo byo kilumbulula kupota bukine. Mu kino Kinembelo, Yehoba waesakanya byambo byanji ku mema, mukaka ne binyu. Umvwe muntu watoma mema a munyango kilaka kipwa, byo biji ne byambo bya Lesa. Kabiji byonkatu mukaka byo akosesha ne kukomesha baana, ne byambo bya Yehoba nabyo bitukosesha ne kwitukwasha kwikala na bulunda bwawama na Lesa. Kunungapo, byambo bya Yehoba biji nobe binyu. Mu ñanyi jishinda? Baibolo waamba’mba binyu bisangajika muchima wa muntu. (Sala. 104:15) Onkao mambo, Yehoba byo aambijile bantu banji amba ‘batambule binyu’ wibabuujilenga’mba inge kebakookele byambo byanji bakekala na lusekelo. (Sala. 19:8) Yehoba waingijishe ino ngesakenyo pa kuba’mba etukwashe kuyuka byo tumwenamo mu kufunda bukine ne kwingijisha byo tufunda. Twakonsha kwesakanya kino ku byo twingila na ngovu pa kuba’mba tupote kintu. Onkao mambo, twayai twisambe pa bintu bitanu byo twakonsha kuba pa kuba’mba tupote bukine.
ÑANYI BINTU BYO MWASANKIJILEPO PA KUBA’MBA MUPOTE BUKINE?
7 Kimye. Kyo kintu kipana muntu yense pa kuba’mba apote bukine. Pakebewa kimye pa kuba’mba tumvwe byambo bya Bufumu, kutanga Baibolo ne mabuku alumbulula Baibolo, lufunjisho lwa pa bunke, ne kunengezha kupwila ne kupwila kimye kyonse. Twafwainwa “kupota kimye” nangwa’mba kuleka kuba bintu bimo byabula kunema. (Tangai Efisesa 5:15, 16 ne tubyambo twa munshi.) Twafwainwa kufunda kimye kyabaya byepi mafunjisho atanshi a mu Baibolo? Kino kyaimena pe atweba bene. Kechi kuji pa kupelela pa kufunda maana a Yehoba, mashinda anji ne mingilo yanji ne. (Loma 11:33) Kyamba kya Usopa kitanshi kyaambile’mba, “bukine buji nobe jiluba jicheche,” kabiji kyaambile ne kuba’mba: “Bino kechi kyawama kwikalatu na jiluba jimo ja bukine ne. Inge mwatondwa na jiluba jimotu, kechi mwakonsha kukebelapo maluba akwabo ne. Onkao mambo, mwafwainwa kufunjilapo ne bukine bukwabo.” Twakonsha kwiipuzha’mba, ‘Nanchi nji na maluba avula a bukine nyi?’ Nangwatu inge tukekalenga myaka ne myaka, kechi tukaleka kufunda pe Yehoba ne. Lelo jino, kintu kyanemesha kyo twafwainwa kubanga ke kwingijisha kimye kyetu bulongo pa kuba’mba tufunde byavula pe Lesa. Twayai twisambe pa muntu umo wakebeshe bingi kufunda bukine.
“Teshaingako Muchima ku Byo Mumvwa”
Kuji bintu byavula bingi bitulengela kubula kumvwisha. Milanguluko yetu yakonsha kwikala na bijikila byavula. Kyungwe ne bantu babena kukinsana mukachi nangwa pangye ya luonde byakonsha kwitulabika. Kubula kwikala pawama kwakonsha kwitulengela kubula kutako muchima ku bibena kwambiwa. Aba baji na baana babacheche javula batana kuba’mba milanguluko yabo yaabanwa. Ki ka kyakonsha kwitukwasha kuteshako muchima ku majashi?
Kwatala meso, ne milanguluko ko koiji. Engijishai kwimukwasha kuteshako muchima ku bibena kwamba ñambi kupichila mu kumutajisha. Umvwe watongola Kinembelo—nangwatu mwikiyuka—zhikulaipo ne kulondelamo byo abena kwikitanga. Kutalangatu konse konse kubena kufumina kyungwe nangwa kubena kukinsana bantu ne. Umvwe meso kealengele milanguluko yenu kuya kungi, mukashalapo pa bintu byavula bingi bibena kwambiwa pa mutuntamo.
Umvwe “milanguluko” imo keimulengele kubula kuta muchima ku jashi, lombai Yehoba emukwashe kwikala na milanguluko yabula kususubala ne muchima ukebewa kuba’mba mumvwishe. (Sala. 94:19; Fili. 4:6, 7) Bwezhaipo ne jikwabo umvwe kibena kukebewa. (Mat. 7:7, 8) Kupwila kwa kipwilo ke lunengezho lwafuma kwi Yehoba. Ketekelai’mba ukeba anweba kumwenamo mu kuno kupwila.—1 Yoa. 5:14, 15.
Bishinka Bikwabo Byanema
“Kange Wakamwe ne, Mambo Amiwa Yami Lesa Wobe”
14 Kitanshi, byo tuji baana ba bwanga ba Kilishitu, bantu betushikwa. (Mat. 10:22) Yesu waambijile jimo kuba’mba baana banji ba bwanga bakebamanyikanga bingi mu moba a kupelako. (Mat. 24:9; Yoa. 15:20) Kya bubiji, bungauzhi bwa kwa Isaya bwitujimunako’mba balwanyi betu kechi baketushikwatu ne, bino bakengijisha ne bilwilo byapusana-pusana pa kwitulukuka. Bino bilwilo byavwangamo kwitumanyika ne kwamba bya bubela pe atweba ne kulengela buno bubela kumweka nobe babena kwamba bya kine. (Mat. 5:11) Yehoba kechi ukakanya balwanyi betu kwingijisha bino bilwilo pa kwituluka ne. (Efi. 6:12; Lum. 12:17) Pano bino, kechi twafwainwa kuchina ne. Mambo ka?
15 Monai kishinka kya busatu kyo twafwainwa kuvulukanga. Yehoba waambile’mba “kafwako kyela” kyo bakengijisha kwitulwishako “kikengila ne.” Byonkatu nsakwa yakosa byo izhikijila muzhi ku mvula wa kinkunkwila, ne Yehoba naye wituzhikijila ku “bantu bashinta.” (Tangai Isaya 25:4, 5.) Balwanyi betu kechi baketumanyikanga myaka ne myaka ne.—Isa. 65:17.
TAIKO MUCHIMA KU MWINGILO WA KUSAPWILA
Mfunjilo
Mu kifulo kya kufikenatu ponkapo kutatula kutanga jifuka 1 shoo ne kwakapela, patanshi akipitulukaimo mu mutwe yense nangwa kitango kyonse kuba’mba muyukile jimo bijimo. Akimonai yewo mutwe byo aji. Uno mutwe kyo kishina kya byo musakufundanga. Apa bino mumweshe bulongo tumitwe twatuchetuche byo twakwatankana na kishina. Talatalai bulongo bipikichala, mamapu, nangwa tubitenguluzha (boxes) twa mepuzho a kufunda aji mu yewo mutwe. Ishikishai anwe bene’mba: ‘Pano byo napitamo bibye, bi ka byo nsakufunda? Mu ñanyi jishinda mo byanemena kwi amiwa?’ Kino kimulengela kuyuka bintu byo musakufunda mu lufunjisho lwenu.
Pano yukai bishinka. Bibaba bya kufunda mu Kyamba kya Usopa ne mu mabuku amo bikala na mepuzho. Kimye kyo mubena kutanga mafuka, kikwasha bingi kushabula mikumbu. Nangwa kya kuba kafwamo mepuzho a kufunda ne, mwakonsha kushabula paji bishinka byanema byo mukeba kuvulukanga. Umvwe mulanguluko ujimo mukyangye kumumvwapo kala, tulumanaiko kakimye kabayako mumone’mba mwamumvwisha bulongo. Tai muchima ku bya kumwenako nangwa ku bishinka bikemukwasha mu mwingilo wa mu bujimi nangwa byo mukakonsha kuvwanga mu jashi jo bakemupa. Langulukaipo bantu bamo bo mwakonsha kukosesha lwitabilo lwabo umvwe mwibabulako byo mubena kufunda. Shabulai pa bishinka byo mukeba kwingijisha, kabiji ne kwibipitulukamo panyuma ya kupwisha lufunjisho lwenu.
Byo mubena kufunda, tangai binembelo bijimo. Langulukaipo pa kinembelo kimo kimo byo kyakwatankana na kine kishinka kiji mu jifuka.
Mwakonsha kutana bishinka bimo byo mwabula kumvwisha nangwa byo mukeba kupesapesapo bulongo. Mu kifulo kya kulabamina pa byobyo bishinka, bishabulaitu kuba’mba mwiye mwibipesepesepo kimye kikwabo. Javujisha bishinka byumvwanyika monka mukuya na kutanga byobyo byambo. Umvwe ne, mwakonsha kupesapesapo. Bintu ka byo mwakonsha kushabula kuba’mba mupesepesepo? Kampe paji kinembelo kyo mwabula kumvwisha bulongo. Nangwa kampe kechi mwamwesha bulongo kyokyo kinembelo byo kyakwatankana na mutwe ye mubena kufundapo ne. Kampe mwakonsha kumona’mba mwaumvwamo kishinka kimo mu kyokyo kibaba, pano bino kechi mwikyumvwisha bulongo kuba’mba mukakonshe kulumbulwila muntu ne. Mu kifulo kya kwibilubakotu, kyakonsha kuwama bingi kwibipesapesapo panyuma ya kupwisha byo mwaji kutatula kufunda.
Mutumwa Paulo byo anembejile nkalata bena Kilishitu Bahebelu, mukachi ka nkalata watulumeneko pacheche ne kwamba’mba: “Kintu kine kikatampe kyo kyo kino.” (Hebe. 8:1) Nanchi mwivululako anwe bene byonkabye pa kimye pa kimye nyi? Langulukai kyalengejile Paulo kuba kino. Mu bitango bya kunyuma bya mu nkalata yanji yoanembele na lutangijilo lwa mupashi, waambile’mba Kilishitu aye Ñanga Mukatampe wa Lesa watwelele kala mwiulu. (Hebe. 4:14–5:10; 6:20) Onkao mambo, byo ateshe muchima pa kino kishinka kikatampe, ku ntendekelo ya kitango 8, Paulo wanengezhe milanguluko ya batangilenga byambo byanji kulangulukishapo pa byo byakwatankene na bwikalo bwabo. Waambile kuba’mba Kilishitu wamwekele ku meso a Lesa mu kwibemenako kabiji wibashinkwijile jishinda ja kutwela mwiulu “mwazhila.” (Hebe. 9:24; 10:19-22) Bukine bwa luketekelo lwabo bwibakwashishe kwingijisha mafunde akwabo ajinga mu ino nkalata aambilenga pa lwitabilo, kuchinchika, ne byubilo bya bwina Kilishitu. Ne atweba umvwe ke tufunde, kutesha muchima ku bishinka bikatampe kuketukwasha kumona kishina byo babena kwikisaabaula kabiji ne kumvwisha ene mambo o twafwainwa kubilanga bintu mwayila kyokyo kishina.
Nanchi lufunjisho lwenu lukemutundaika kubila bintu mwayila kyo mubena kufundapo nyi? Abwe ke bwipuzho bwanema bingi. Umvwe mwafunda kintu, ishikishai anwe bene’mba: ‘Nga kino kyakonsha kundengela kubapo byepi pa byubilo byami ne bintu byo nkeba mu bwikalo? Nakonsha kwingijisha byepi bino byambo kupwisha lukatazho, pa kufuukula bya kuba, nangwa pa kukeba kuba kintu kyo nkeba? Nakonsha kwibingijisha byepi mu kisemi kyami, mu mwingilo wa mu bujimi, ne mu kipwilo?’ Langulukishaipo na lulombelo pa ano mepuzho, kabiji ne kulanguluka pa bintu bya kine bimweka mo mwakonsha kwingijishisha maana enu.
Panyuma ya kupwisha kitango nangwa kibaba, pitulukaimo mu byo mwafunda. Monai umvwe mwakonsha kuvuluka bishinka bikatampe ne milanguluko ibena kwibikosesha. Jino jishinda jikemukwasha kubula kulubamo bishinka byo mukakonsha kwingijisha kimye kya kulutwe.
APRIL 27–MAY 3
BYA BUNEME BIJI MU MAMBO A LESA ISAYA 56-57
Tuji Bingi na Lusekelo Kwikala na Yehoba Lesa Wetu
ip-2 269 mafu. 14-16
Yehoba Ukosesha Baji na Bulanda
14 Nangwa byonkabyo kimye kya kutekanya kwa Yehoba kikapwa. Tubena kutengela kufika kwa byambo bya Yehoba bya kuba’mba: “Amiwa nkasolola patoka ‘bololoke’ bobe ne mingilo yobe, kabiji kechi bikakukwasha ne. Byo ukakebanga bukwasho, bankishi bobe bo wakonkanya pamo kechi bakakupokolola ne. Mwela ukebasenda bonse, muya ukebatwala kwalepa.” (Isaya 57:12, 13a) Yehoba wasolwele byubilo bya Bayudea bebepekezhenga koloka. Kafwako kyo bamwenejilemo mu bukamfutumfutu bwabo ne. Bankishi babo bo bakonkenyenga pamo kechi bakonsheshe kwibapulusha ne. Inge kwamweka bya malwa balesa bobaketekelamo bakebasenda ku mwela ne kwibatwala kwalepa.
15 Byambo bya Yehoba byafikile mu 607 B.C.E. Kimye Mfumu wa bena Babilona aye Nebukaneza kyo aonawine Yelusalema, kusoka nzubo ya Lesa ne kutwala bantu bavula mu buzha. “Byonkabyo, bena Yuda bayile mu buzha kufuma mu kyalo kyabo.”—2 Bamfumu 25:1-21.
16 Kyo kimotu ne bupopweshi bwingijisha bankishi mu ano moba kechi bakebazhikijila mu juba ja bukaji bwa Yehoba ne. (Isaya 2:19-22; 2 Tesalonika 1:6-10) Kuvwangakotu ne “Babilona Mukatampe” muji bupoweshi bwavula bwapusana pusana kubikapotu ne Kilishitendomu. Kipashañano kyachijisha ne nsengo jikumi “bikamushikwa [Babilona Mukatampe] ne kumonauna ne kumuvuula, kabiji bikaja nyama yanji ne kumusokatu pelu na mujilo.” (Lumwekesho 17:3, 16, 17) Tuji bingi na lusekelo mambo twakokela mukambizho wa kuba’mba: “Anweba bantu bami, lupukaimo mwi aye, inge kechi mukeba kwivwangamo mu bubi bwanji ne, kabiji inge kechi mukeba kupitamo mu binkunka byanji ne.” (Lumwekesho 18:4, 5) Kange twisulwe malwa kubwela mu Babilona Mukatampe nangwa kuba byo oba ne.
“Bufumu Bwami Kechi bwa Pano pa Ntanda Ne”
16 Luno lupimpu lo baubile lwanema bingi. Baibolo waesakanya byubilo bya bantu ku kupoota ne kuvwandauka kwa mema pa kalunga. (Isa 17:12; 57:20, 21; Lum. 13:1) Nangwa kya kuba bya bumulwila ntanda bilengela bantu kuzhingila, kuleta mabano ne malwañano, atweba twatwajijila kwikala mu mutende ne kukwatankana. Kabiji Yehoba byo amona bantu mu ntanda byo baabenamo, kimusangajika bingi ku muchima pa kumona byakwatankana bantu banji.—Tangai Zefwaniya 3:17.
it “Mutende” jifu. 3
Mutende
Kukeba Mutende. Yehoba ke Lesa wa mutende (1Ko 14:33; 2Ko 13:11; 1Te 5:23; Heb 13:20) kabiji ye nsulo ya mutende (Ba 6:26; 1Mo 22:9; Sl 4:8; 29:11; 147:14; Is 45:7; Lo 15:33; 16:20), mutende ke kipangwa kya mupashi. (Nga 5:22) Na mambo a kino mutende wakonsha kwikalatu na bantu bengijila Lesa. Mambo akatampe alengela bulunda bwa muntu ne Yehoba konaika ne kumulengela kubula kwikala na mutende. Ñimbi wa masalamo waambile’mba: “Mu bikupa byami kafwamo mutende na mambo a bubi bwami.” (Sl 38:3) Aba bakebesha mutende ne kumulondalonda bafwainwa ‘kuleka kuba bintu byatama, ne kubanga byawama.’ (Sl 34:14) Muntu kechi wakonsha kwikala na mutende inge ke obe bintu byatama ne. (Sl 72:3; 85:10; Is 32:17) O ene mambo babi obabujila kwikala na mutende ne. (Is 48:22; 57:21; esakanyaiko Is 59:2-8.) Pakuba bantu bepana kwi Yehoba, batemwa mizhilo yanji (Sl 119:165), kabiji bakokela mikambizho yanji bo bonkatu bekala na mutende.—Is 48:18.
Bishinka Bikwabo Byanema
Bishinka Bikatampe Kufuma mu Buku wa Bubiji wa Isaya
56:6—Nga “benyi,” bo bañanyi kabiji mu ñanyi mashinda mo babena ‘kulamina lulayañano lwa [Yehoba]’? “Benyi” ke ‘mikooko ikwabo’ ya kwa Yesu. (Yoano 10:16) Balama lulayañano lwakatataka mu jishinda ja kuba’mba bakokela mizhilo ya lulayañano, kukwatankana bulongo na lunengezho lonse lwanengezhiwa, kuja kajo konse ka ku mupashi byonka byuba bena Kilishitu bashingwa, kabiji ne kwibakwasha mu mwingilo wa kusapwila Bufumu ne kulenga baana ba bwanga.
Kunemeka Kupwila Kwetu Kwazhila
YEHOBA waleta pamo bantu banji, bena Kilishitu bashingwa ne balunda nabo, na kumupopwela pa ‘mutumba wanji wazhila.’ Ubena kwibalengela kwikala balusekelo mu ‘nzubo yanji ya lulombelo,’ ino ke nzubo yanji ya ku mupashi, ayo yaikala ke “nzubo ya lulombelo ya mikoka yonse ya bantu.” (Isaya 56:7; Mako 11:17) Kino kintu kyauba Yehoba kya kuleta pamo bantu banji na kumupopwela kibena kumwesha’mba mpopwelo yetu yazhila, yatoka kabiji yakila bintu byonse. Umvwe tumona bintu byazhila byonka Yehoba byo ebimona, twafwainwa kunemeka kupwila ne mpopwelo yetu.
TAIKO MUCHIMA KU MWINGILO WA KUSAPWILA
Nanchi Kijitu Bulongo Kwikala mu Bupopweshi Muji Bantu Bakwatankana Nyi?
ijwbq kibaaba 90
Mukumbu wa mu Baibolo
Ee, mambo Lesa ukeba bantu kupwila pamo na kumupopwela. Baibolo waamba’mba: “Twayai twitenga muchima atwe bene na bene kuba’mba twitundaikenga kwitemwa atwe bene na bene ne kuba mingilo yawama, kabiji kange tuleke kupwila pamo . . . ne.”—Bahebelu 10:24, 25.
Yesu waambile’mba baana banji ba bwanga bakekala jibumba ja bantu bakwatankana kimye kyo ebabuujile’mba: “Kino kyo kyo bakayukilako bonse amba mwi baana bami ba bwanga, umvwe mwitemwa anwe bene na bene.” (Yoano 13:35) Byo jiji jishinda janema ja kumwesheshamo byo betemwa, baana ba bwanga ba kwa Kilishitu bafwainwa kupwila pamo na bakwabo bena Kilishitu. Bakakwatankana ne kupwila mu bipwilo mo bapopwela Lesa kimye kyonse. (1 Kolinda 16:19) Bonse pamo bakekala balongo mwaya ntanda.—1 Petelo 2:17.
Kuji bintu byavula byafwainwa kuba muntu kechi kwikalatu mu bupopweshi ne
Nangwa kya kuba Baibolo waamba’mba bantu bafwainwa kupwila pamo na kupopwela Lesa, kechi ufunjisha’mba muntu wakonsha kutookesha Lesa ku muchima pa kwikalatu mu bupopweshi ne. Pa kuba’mba muntu bamutemwe kwi Lesa, bupopweshi bo ayamo bwafwainwa kumukwasha kupimpula byubilo byanji. Baibolo waamba’mba: “Kupopwela kwatoka kabiji kwabula kutama kwi Lesa wetu kabiji Tata ko kuno: kulama bulongo baana ba kishale ne banabakazhi bafwilwa babena kumanama, ne kwifumyako ku biko bya pano pa ntanda.”—Yakoba 1:27.