A teenage boy gets up from a chair and begins running

BANYIKE BEPUZHA’MBA

Nafwainwa Kuba Byepi pa Kuba’mba Ngikale na Kizaku kya Kukaya Makayo Akosesha Mubiji?

Mambo ka o nafwainwa kukayilanga makayo akosesha mubiji?

Mu byalo bimo, banyike kechi bakaya makayo akosesha mubiji ne, kabiji baji mu kizumba kya kukolwa bikola byapusana-pusana. Na mambo a kino, Baibolo waamba’mba “mu kukosesha mubiji ukamwenamo bicheche.” (1 Timoti 4:8) Langulukai pa bino:

Makayo akosesha mubiji akonsha kwimulengela kumvwa bulongo. Makayo akosesha mubiji akonsha kwimukwasha kwikala na lusekelo ne kukasuluka. Bamo bamba’mba kukaya makayo a kukosesha mubiji kukepeshako binyenge.

“Inge lukelokelo naya na kunyema, ñingila bingi bulongo juba jonse kabiji neyowa mingilo. Kunyema kundengela kwikala na lusekelo.—Regina.
Kukaya makayo akosesha mubiji kwakonsha kwimukwasha kumweka bulongo. Kukaya makayo awama akosesha mubiji kwakonsha kwimukwasha kukosa ne kubula kukolwakolwa, ne kubula kwilengulula.

“Luno mbena kumvwa bingi mambo nkayako makayo amo akosesha mubiji, mwaka wapwa nakankalwanga kukaya makayo akosesha mubiji. Ne kyakilamo kuwama, nayuka kuba’mba mbena kulama mubiji wami bulongo.”—Olivia.
Makayo akosesha mubiji akonsha kwimulengela kwikala myaka yavula. Kukaya makayo akosesha mubiji kulengela mashi kwenda bulongo mu mubiji ne kupema bulongo. Kabiji makayo akosesha mubiji akonsha kwimukwasha kubula kukolwa kikola kya muchima kibena kwipaya bonse banabalume ne banabakazhi.

“Inge twaikala na makayo awama a kukosesha mubiji, tumwesha’mba tusanchila Mulenga wetu pa mubiji ye etupa.”—Jessica.

Kishinka ke kino: Kukaya makayo akosesha mubiji kukakwasha kulutwe kabiji wakonsha kumwenamo ne pa kino kimye. Nsongwakazhi wa jizhina ja Tonya waambile’mba: “Kechi mukelangulushapo’mba, ‘Nanchi inge kechi naji kuya na kunyema lukelo ne.’ Inge nakaya makayo akosesha mubiji kechi nelangulushapo ne.”

Kalombwana ubena kutala pa motoka ye balengulula — Motoka ye babula kutako muchima mu kuya kwa kimye ukaleka kwingila; kyo kimotu ne na mubiji, inge ke mubule kukaya makayo akosesha mubiji

Ki ka kindengela kukankalwa kukaya makayo akosesha mubiji?

Abino byo bimo bilengela:

Kulanguluka’mba kafwako kyo mmwenamo ne. “Bantu inge bakiji banyike, balanguluka’mba bakosa. Kechi tulangulukapo’mba juba jimo tukakolwa ne. Tulangulukatu’mba bantu bakoma bo bakolwa-kolwa.”—Sophia.
Kubula kimye. “Na mambo a kupayankana, nafwainwa kumonapo kimye kya kuja kajo kawama ne kulaala, bino kikatazha bingi kumonapo kimye kya kukaya makayo akosesha mubiji.”—Clarissa.
Kubula mapunzha kwa kukayila. “Kyakatazha bingi kukaya makayo akosesha mubiji, mambo wafwainwa kulipila pa kuba’mba aye mu kishimikwa mwa kukayila!”—Gina.

Bya kulangulukapo:

Ñanyi kintu kikatampe kimulengela kukankalwa kukaya makayo akosesha mubiji? Kikebewa kwingila na ngovu pa kuba’mba mushinde ino mikiika, pano bino, mukamwenamo byawama.

Nafwainwa kuba byepi pa kuba’mba nkayenga makayo akosesha mubiji?

Panshipo paji bimo byo mwakonsha kuba:

Mwafwainwa kuta muchima ku butuntulu bwa mubiji wenu.—Ngalatiya 6:5.
Chinuzhukainga kwikangaizha. (Musapwishi 11:4) Kechi kikebewa kutayapo mali pa kuba’mba mukaye makayo akosesha mubiji ne. Mwafwainwa kumonapotu makayo amo o mwiyowa ne kwiakayanga kimye kyonse.
Pa kuba’mba muyuke bya kuba, ipuzhaiko bakwenu bemubuuleko byo boba.—Byambo bya Maana 20:18.
Ilengelai mutanchi wawama. Ibikilai bikonkwanyi kunemba byo mwauba pa kuba’mba mutundaikwenga.—Byambo bya Maana 21:5.
Kebaipo mukwenu wa kukaya nanji makayo akosesha mubiji. Mukwenu ukemutundaikanga ne kwimukwasha kulondela mutanchi ye mwalenga.—Musapwishi 4:9, 10.
Yukai’mba bimye bimo mukakankalwanga, pano bino, kechi mwafwainwa kukooka ne.—Byambo bya Maana 24:10.

Kukizhamo ne

Baibolo utundaika bonse banabalume ne banabakazhi ‘kwilama bulongo.’ (1 Timoti 3:2, 11) Onkao mambo, mwafwainwa kuyuka pa kupelela mu bya makayo akosesha mubiji. Bantu bakizhamo kukaya makayo akosesha mubiji javula beonaunatu bene. Nsongwakazhi wa jizhina ja Julia waambile’mba: “Kechi mmona bulongo mwanamulume inge kya kuba watatu muchima pa kukosesha mubiji bino saka abula kuta muchima ku kufunda maana alumbuluka ne.”

Kabiji mwafwainwa kujimuka na bipachi bitundaika bantu kukaya makayo akosesha mubiji nabiji bya kuba’mba mwafwainwa kutwajijilatu na kukaya makayo nangwa kya kuba mwaumvwa’mba mwakooka. Lutundaiko lwa uno mutundu lwakonsha kwimulengela kukooka bingi ne kubula kuta muchima pa “bintu byanemesha.”—Filipai 1:10.

Kikwabo, bintu byo bamba’mba byakonsha kwimutundaika, byakonsha kwimufichishatu ku muchima. Nsongwakazhi wa jizhina ja Vera waambile’mba: “Bansongwakazhi bavula balama bipikichala bya bantu bamona bulongo ne kukeba kumweka byonka byo bamweka, kabiji batala pa bino pa kuba’mba batundaikwe. Pano bino, batendeka kwiesakanya ku bano bantu kabiji kifumamo ke kulefulwa. Kyawama kwibikila kikonkwanyi kya kukosesha butuntulu bwa mubiji, kechi mwekelo ne.”

Byambapo bakwenu

“Natemwa kunyema mambo kunkwasha kukepeshako bijikila. Kabiji kunyema kulengela muchima kudukauka lubilo ne kunkwasha kukepeshako mafuta mu mubiji. Inge napwisha kunyema, ngikala na bulume bwa kwingila mingilo kabiji ne mubiji ukasuluka.”—Yasmine.

“Makayo o natemwa ke kupama mpila ya ku maboko. Neyowa bingi kya kuba ndubako ne kuba’mba mbena kukosesha mubiji. Papita kimye pa kuba’mba ayuke bya kupama bulongo mpila ne kwiyowa, bino inge mwibikako mukamwenamo byawama.”—Joel.

“Kwenda kunkwasha bingi. Kunkwasha kwikala na butuntulu bwa mubiji bwawama ne kulanguluka bulongo. Byonkatu biji bantu bavula, bimye bimo ngikala na bijikila, bino inge naya na kupitañana na kumona bulengwa na Lesa, bulume bubwelamo kabiji milanguluko yami iwama, kintu kibula kumwekamweka mu ino ntanda yaimbwa ñoma na bichi.”—Lily.

“Bintu byavula bilengela kukaya makayo a kukosesha mubiji kumweka nobe akatazha kechi ntako muchima ne. Inge kya kuba’mba mbena kupama mpila ya ku maboko, nta muchima pa kukaya kechi pa byo mbena kumvwa kukooka ne. Kupama mpila ya ku maboko jo jishinda jimo ja kwikelamo na balunda bavula.”—Miles.