Kufwakesha Kyalo kya New Zealand

Mapu wamwesha paikela kyalo kya New Zealand

PAPITA myaka nobe 800 kufuma bantu bamba mulaka wa Maori po baendele musinso walepa ne kwabuka kalunga ka mema ne kuya na kwikala mu New Zealand. Mu kino kyalo bataine mpunzha yapusanako na jikuji ja Polynesia ko bafumine kabiji muji bingi mitumba, mashika ne mabebe. Byo papichile myaka yavula, jibumba jikwabo ja bantu jaishile mu kino kyalo kufuma ku Europe. Lelo jino bantu bekala mu New Zealand balondela bisho bya bena Anglo-Saxon ne bena Polynesia. Bantu bavula mu kino kyalo bekala mu mataunyi. Muzhi mukatampe wa mu kino kyalo ke Wellington kabiji waikela ku kabeta ka ku bulenge bwa kino kyalo.

Mateshi akaba abena kufuma pa jikuji ja ku kabeta ka ku buyeke mu kyalo kya New Zealand — Mateshi akaba abena kufuma pa jikuji ja ku kabeta ka ku buyeke

Mu kino kyalo muji bilengwa na Lesa byapusana pusana kabiji kino kilengela bantu bavula kuya na kufwakesha kyalo kya New Zealand pa mwaka pa mwaka nangwa kya kuba kyaikela kwalepa.

Kichi kitelwa’mba silver — Kichi kitelwa’mba *silver* kyakonsha kulepa mamita 10

Kañonyi kabula kutumbuka ko batela’mba takahe — Mu myaka yafumineko kufika mu 1948, bantu balangulukilenga’mba bañonyi bo batela’mba *takahe* bazhiya

Mu kyalo kya New Zealand muji banyama ne bañonyi bavula babula kutumbuka kukila byalo byavula. Kabiji muji ne bajapatama bakonsha kwikala myaka 100. Mu kino kyalo mutanwa mijima ne banyama ba mu mema nabiji masabi akatampe a mu tulunga.

Mu kyalo kya New Zealand muji Bakamonyi ba kwa Yehoba kabiji baikalamo myaka nobe 120. Bafunjisha bantu Baibolo mu milaka 19 kuvwangakotu ne milaka ya mu Polynesia ya Niuean, Rarotongan, Samoan, ne Tongan.

Jibumba ja bantu bo batela’mba Maori babena kwimba lwimbo — Jibumba ja bantu bo batela’mba Maori babena kwimba saka bavwala bya kishakulu