BYO MWAFWAINWA KUBA NA BIJIKILA
Twakonsha Kwikala Bwikalo bwa Kubula Bijikila
Byaamba Baibolo bitukwasha kuchinuzhuka bintu byakonsha kwitulengela kwikala na bijikila. Atweba bene kechi twakonsha kupwisha bintu bitulengela kwikala na bijikila ne. Bino Mulenga wetu, aye uji na bulume bwa kwibipwisha. Watongola ne muntu wakonsha kwitukwasha. Uno muntu ke Yesu Kilishitu. Ukoba bintu byavula kukila byo aubile kimye kyo ajinga pano pa ntanda. Twayai twambepo bimo byo akoba:
YESU UKABUKA BAKOLWA, BYONKA BYO AUBILE.
‘Bamuletejilenga bajinga na bikola . . . byapusana pusana . . . , ne abo wibabukilenga.’—MATEO 4:24.
YESU UKANENGEZHEZHA BANTU BONSE MAZUBO MWA KWIKALA NE KAJO.
“Bakashimika [aba bo bakalamanga kwi Kilishitu] mazubo ne kwikalamo, kabiji bakajimba miñanzañanza ne kuja bipangwa byayo. Kechi bakashimika mazubo ne muntu ungi waikalamo ne, kabiji kechi bakajimba miñanzañanza ne muntu ungi waja bipangwa byayo ne.”—ISAYA 65:21, 22.
BUKALAMA BWA KWA YESU BUKALETA MUTENDE NE LUZHIKIJILO NTANDA YONSE.
“Mu kimye kya bukalama bwanji baoloka bakekalanga bulongo, ne mutende ukavula moba onse kufikatu ne ñondo byo akabula kwikalako. Aye ukekala na bangikazhi kufuma ku kalunga ka mema kukafika ne ku kalunga ka mema kakwabo ne kufuma ku Mukola kukafika ne konse kwapela ntanda. . . . Balwanyi banji bakamyanga lukungu.”—SALAMO 72:7-9.
YESU UKAPWISHA NSHIJI YONSE.
“Ukobila lusa mulanda ne muyanji, kabiji ukapulusha bumi bwa bayanji. Ukebapokolola ku lumanamo ne ku bukapondo, ne mashi abo akekala anema kwi aye.”—SALAMO 72:13, 14.
YESU UKAFUMYAPO BUYANJI NE LUFU.
“Lufu, mabingo, kujila ne misongo kechi bikekalako jibiji ne.”—LUMWEKESHO 21:4.