Mafoni Ne Makompyuta Alengela Masongola Enu Kwikala Byepi?
Inge bamulume ne mukazhi ke bengijishe bulongo mafoni ne makompyuta, masongola abo akakosa bingi. Abino bintu byakonsha kulengela bamulume ne mukazhi kwisambanga kimye kyonse.
Pano bino, baji mu masongola bamo kechi bengijisha bulongo bino bintu ne. Kwibingijisha kutama, mufumatu makatazho nabiji . . .
kechi bekalapo na kimye kya kwisamba ne.
nangwa baji pa nzubo, kimye kyonse balangulukatu pa nkito.
kulengela bamulume ne mukazhi kubula kwiketekela.
BYO MWAFWAINWA KUYUKA
MWINGIJISHA BYEPI FONI NANGWA KOMPYUTA INGE MWAIKALA PAMO NA BENAKWENU?
Ba Micheal baambile’mba: “Kimye kimo inge twaikala pamo na mukazhami mu nzubo, mmonatu nobe ‘ufwamo.’ Aye maana anji onse ekalatu pa foni. Kabiji wamba’mba ‘ne luno nkyangye kutaana bintu byo mbena kukeba.’” Ba Jonathan nabo baambile’mba mu bimye bya uno mutundu “bamulume ne mukazhi bakonsha kwikala pamo, pano bino saka babula kwisamba uba nobe bekala ku mapunzha apusana pusana.”
BYA KULANGULUKAPO: Nanchi mutaya kimye kyabaya pa foni na kwisamba na bakwenu ne kwitumina tubyambo kya kuba ke mukankalwe ne kwikala na kimye kyabaya kya kwisamba na benakwenu nyi?—EFISESA 5:33.
MINGILO
Bantu bamo bengila mingilo ivwangamo kukumbula mafoni, kutanga byo batuma bufuku nangwa kya kuba baji ku nzubo. Bino nangwatu bantu bamo bengila nkito yo babula kwingijisha mafoni, nangwa kya kuba bakotoka ku nkito abo batwajijilatu na kwingila saka baji pa nzubo. Mwanamulume wasongola wa jizhina ja Lee waambile’mba: “Kinkatazha bingi kuleka kukumbula mafoni nangwa kutanga byo bantumina kufuma ku nkito pa kimye kyo nebikila kwikala pamo na mukazhami.” Mwanamukazhi wasongolwa wa jizhina ja Joy waambile’mba: “Amiwa ñingijila pa nzubo, akino kinkatazha bingi kuyuka kimye kya kulekelapo kwingila. Kikebewa kwibikako bingi pa kuba’mba ngabanye bya nkito ne bya kisemi.”
BYA KULANGULUKAPO: Nanchi muteshako bingi muchima inge bamwatawenu nangwa bakazhi benu babena kwisamba ne anweba nyi?—LUKA 8:18.
BUKISHINKA
Bantu bavula bamba’mba batoboka bingi na benakwabo na mambo a kuba’mba bekalakanya pa bintu byo babika pa foni. Bantu bamo baswile kuba’mba babika bipikichala bimo mu foni mu bufyamfya kuchina’mba benakwabo bakayuka.
Bantu bavula bamba’mba pa intaneti paji bintu byavula bingi byakonsha konauna masongola ne kwibalengela kuba bukende. Onkao mambo, kechi twafwainwa kukumya ne, mambo bashabyambo bamba’mba intaneti yalengela masongola avula kupwa.
BYA KULANGULUKAPO: Nanchi mufya benakwenu bintu byo mwisamba na muntu wabula mulume wenu nangwa mukazhenu nyi?—BYAMBO BYA MAANA 4:23.
BYO MWAFWAINWA KUBA
TANGIZHAIKO BINTU BYANEMA
Muntu ubula kukeba kuja kajo kechi wikala na butuntulu bwa mubiji bwawama ne. Kyo kimotu, bantu babula kwikala na kimye na bamwatawabo nangwa bakazhi babo bekala bingi na makatazho mu masongola abo.—Efisesa 5:28, 29.
JIFUNDE JA MU BAIBOLO: “Muyuke bintu byanemesha.”—FILIPAI 1:10.
Isambai na benakwenu mashinda aji panshipo o mukeba kwingijisha nangwa nembai mashinda enu afwainwa kwimukwasha kuyuka pa kupelela pa kwingijisha foni nangwa kompyuta pa kuba’mba bibule konauna masongola enu.
Tujiilenga pamo kajo pa juba pa juba
Tusalepo bimye bimo bya kubula kwingijisha mafoni nangwa makompyuta etu
Tutanchikepo kimye kya kubilamo bintu byo twatemwa pamo
Tuzhimyenga mafoni bufuku ne kwiabika kwalepa
Muzhimyenga mafoni kimye kyonse pa maminiti 15 pa kuba’mba mwisambenga na benakwenu
Pa juba pa juba zhimyainga intaneti pa bimye bimo