Mambo ka Bantu Bavula o Belengulwila?
ENE MAMBO KUBULA KWILENGULULA O KWANEMENA
Bantu bayuka’mba Lesa wibanemeka, bayuka mwa kubila na makatazho a mu bwikalo o bapitamo. Kechi balefulwa bukiji ne.
Mabuku avula amba’mba bantu belengulula bene, bekala na makatazho nabiji bijikila, kupopomenwa ne kukankalwa kuja. Kabiji javula batoma bingi maalwa ne kwingijisha bizhima.
Bantu bepa mushingi bene bachinuzhuka kwiesekanya ku bakwabo, kuba bino kwibalengela kuyila mumo na bakwabo ne kwikala na balunda bavula. Pakuba aba belengulula batemwa kuzhachisha bakwabo kabiji bapita mu makatazho ne kupwisha bulunda bwabo na bakwabo.
Bantu babula kwilengulula bene batwajijila kuchinchika makatazho o bapitamo. Kechi baleka makatazho kwibalengela kubula kufikizha bikonkwanyi byabo ne. Pakuba bantu belengulula bene babayisha makatazho nangwa kya kuba achechetu. Kino kibalengela kulefulwa bukiji.
BYO MWAFWAINWA KUBA PA KUBA’MBA MULEKE KWILENGULULA
Salai balunda bakemutundaikanga. Pwanañanainga na bantu baji na byubilo byawama, bakeba byawama mwi anweba kabiji bakemutundaikanga.
“Mulunda wa kine umwesha butemwe kimye kyonse, kabiji ye mulongo ye wakonsha kuketekela mu kimye kya bya malwa.”—Byambo bya Maana 17:17.
Kwashainga bakwenu. Inge muji na lusa ne kubila bakwenu byawama kuvwangakotu ne boba bakajilwa, mukekala na lusekelo lwa kine lufuma mu kupana. Mukekala na lusekelo nangwa kya kuba kafwako ubena kwimusanchila pa mingilo yawama yo mubena kwingila.
“Mu kupana mufuma lusekelo lukatampe kukila mu kutambula.”—Byubilo 20:35.
Funjishainga baana benu kubula kwilengulula abo bene. Jishinda jimo ja kubilamo bino, ke kwibakwasha kuyuka bya kupwisha makatazho abo bene kufikatu ne byo bakafunda. Kwashainga baana kuyuka bya kushinda makatazho ne kwingijilapo abo bene. Kuba bino kukebakwasha kuyuka’mba banema nangwatu byo bakakoma.
“Funjishai mwana jishinda jo afwainwa kwendamo; inge wakoma kechi ukasendukamo ne.”—Byambo bya Maana 22:6, tubyambo twa munshi.
BAKAMONYI BA KWA YEHOBA BAMWESHA BYEPI AMBA BANEMEKA BANTU?
Kupwila ne kufunda Baibolo na Bakamonyi ba kwa Yehoba kwakwasha bantu kuyuka’mba nabo banema bingi.
KUPWILA KWETU KWA MULUNGU NE MULUNGU
Pa kupwila kwetu kwa mulungu ne mulungu, tuteleka ku majashi aimena pa Baibolo, javula amba pa byo twafwainwa kwiyuka’mba twanema bingi. Bantu bonse bakasuluka kutaanwa ku kupwila kwetu. Pa kupwila kwetu mukafunda bintu nabiji . . .
ene mambo o mwanemena kwi Lesa
bya kwikala bwikalo bwawama
bya kutaana balunda ba kine ne bya kukosesha bulunda bwetu na bakwetu
Kabiji mukataana balunda ‘belama bene na bene.’ —1 Kolinda 12:25, 26.
Pa kuba’mba muyukilepo byavula pa kupwila kwetu, kebai vidyo wa kuba’mba: Ñanyi Bintu Byubiwa pa Nzubo ya Bufumu? pa jw.org
BYO TUFUNJISHA BANTU BAIBOLO
Tufunjisha bantu Baibolo kyatutu kwingijisha buku wa kuba’mba Mukekala Myaka ne Myaka! Uno buku ukwasha ubena kufunda Baibolo kumvwisha mwatala binembelo kupichila mu kwingijisha mepuzho awama. Bishinka biji mu uno buku bebilumbulula bulongo kwingijisha bipikichala byawama ne mavidyo azakula muchima. Byo tufunjisha bantu Baibolo bibakwasha kuyuka’mba banema ne kwikala bwikalo bwawama.
Pa kuba’mba muyuke kufunda Baibolo na Bakamonyi ba kwa Yehoba byo kwafwainwa kwimukwasha, yai pa jw.org musakutaanapo vidyo mwipi uji na mutwe wa kuba’mba: Mambo ka a Kufunjila Baibolo?