BYA KUBA NA MITENGO YA BINTU IBENA KUKANJIJILAKOTU
Paingapo Bakwenu Bintu
Inge kimukatazha bingi kupota bintu na mambo a mitengo ibena kukanjila, mwakonsha kulanguluka’mba kechi kyakonsheka kupapo bakwenu ne. Pano bino, kupapo bakwenu kukemukwasha kuchinchika makatazho eyako na mambo a kubula mali. Kwikala na muchima wa bumpanyi kukemulengela kupapo bakwenu bintu byo muji nabyo kabiji mukalamangapo mali amo mu nzubo.
ENE MAMBO O KYANEMENA KUPAPO BAKWENU BINTU
Twikala bingi na lusekelo inge saka tupapo bakwetu, nangwatu inge kakintu ko twibapa kakepa. Ba dokotala bamo baamba’mba kupana kukwasha muntu kwikala na butuntulu bwa mubiji bwawama ne kulanguluka bulongo. Kulengela muntu kubula kutwajijila kwikala na bijikila, kunyema mashi lubilo ne kubula kukolwakolwa. Kabiji kulengela muntu kulaala bulongo.
Inge ketukwashe bakwetu kampe kwibapapo mali nangwa bintu bikwabo byo bakeba, kiketupeelela bingi ne atweba kuswa kwitukwasha ku bakwetu. Ba Howard bekala mu England baambile’mba: “Kumonapo mashinda a kupeelamo bakwetu bintu ne kwibakwasha, kwitulengela kukasuluka ne kuswa inge bakwetu kebakebe kwitukwasha.” Bantu batemwa kupapo bakwabo bintu kechi bapana kuba’mba nabo bakebapepo ne. Pakuba bakeba kwikala na balunda bepana kwibakwasha mu kimye kyo baji na makatazho.
BYO MWAFWAINWA KUBA
Paingapo bakwenu bintu byo muji nabyo. Nangwatu inge muji na bintu bicheche mwakonsha kupapo bakwenu nabiji kujiila nabo pamo kajo. Ba Duncan, bakazhi babo ne mwanabo wa myaka itanu na umo bekala mu Uganda bayanda bingi. Pano bino, batemwa kupapo bakwabo bintu. Ba Duncan baambile’mba: “Pa mulungu pa mulungu amiwa ne bakazhi bami twitako muntu umo ku nzubo kwetu ne kujiila nanji pamo kajo. Tutemwa bingi kwisamba na bakwetu.”
Nangwa byonkabyo, mwafwainwa kuyuka pa kupelela na bintu byo mupapo bakwenu, kechi kupanatu byonse kya kuba kisemi kyenu kyayanjilamo ne.—Yoba 17:5.
Esekai bino: Itaiko muntu kuba’mba mujiile nanji pamo kajo nangwa kutomena pamo nanji biseke nangwa munkoyo. Inge mujipo na bintu bimo byo mwaleka kwingijisha mwakonsha kwibipana ku balunda nenu ne bantutu bakwabo bafwainwa kwibingijisha.
Monaipo mashinda akwabo a kupainamo. Bupe bumo kechi pataiwa ne mali ne. Twafwainwa kwingijisha kimye kyetu kukwashishamo bakwetu. Kwambila bakwenu byambo byawama nabo bupe. Buulainga bakwenu byo mwibatemwa ne kwibasanchila pa bintu byo boba.
Esekai bino: Kwashaingako bakwenu mingilo ya pa nzubo nabiji kwibawamishishako pafwafwafwa ne mingilotu ikwabo. Batuminai nkalata nangwa tubyambo twa pa foni ne kwibabuula’mba mwaji kwibalangulukangapo.
Inge saka mupapo bakwenu bintu, mukekala na lusekelo.