Bo Bañanyi?

BAKAMONYI BA KWA YEHOBA bakebesha bingi amba mwibayuke bulongo byo baji. Kampe mwikala nabo kipikipi, kwingila nabo, nangwa musambakana nabo mu mingilo ya pa juba pa juba. Kampepo mwakibamonapo kala mu mukwakwa saka bashila bantu magazini. Nangwa kampe bakimufwakeshapo kala pa nzubo yenu.

Bakamonyi ba kwa Yehoba bemutemwa kabiji bakeba bingi kwimukwasha. Bakeba kwikala balunda nenu ne kwimubula byo baji, kwimubulako bintu byo baitabilamo, jibumba jabo byo jiji kabiji ne byo bamona bantu bakwabo ne ntanda motwikala atweba bonse. O ene mambo o bemunengezhezha uno buloshuwa.

Mu mbaji yavula, Bakamonyi ba kwa Yehoba bajitu byonka biji bantu bakwabo. Nabo bapita mu makatazho apitamo bantu bonse—a bya mali, a ku mubiji ne a mu milanguluko. Kimye kimo balubankanya mambo kechi baoloka ne. Pano bino, bafunjilako ku bilubo byo boba kabiji ne kwibikishako kufunda Baibolo kuba’mba bololeko mubena kukebewa. Bepana kwi Lesa kuba kyaswa muchima wanji kabiji bekela monka mwayila kwipana kwabo. Mu mingilo yabo yonse, bakeba Mambo a Lesa ne mupashi wanji wazhila kwibatangijila.

Mafunjisho abo onse aimena pa Baibolo kechi pa milanguluko ya bantu nangwa pa mafunjisho a bya bupopweshi ne. Balanguluka byonka byalangulukile mutumwa Paulo byo atangijilwe na mupashi kunemba’mba: “Lesa ekale wa bukine nangwa bantu bonse baikala ke ba bubela.” (Loma 3:4) Pa mambo a mafunjisho a bukine bwa mu Baibolo, Bakamonyi balondela byaubile bena Beliya byo baumvwine bintu byasapwijile mutumwa Paulo. Abo “batambwile mambo na maboko abiji, ne kubalaulabalaula mu binembelo pa juba pa juba, amba, tumone kana bino bintu bya kine.” (Byubilo 17:11) Bakamonyi ba kwa Yehoba baketekela’mba mafunjisho onse a bupopweshi afwainwa kwiapesapesa na Binembelo byanembelwe na lutangijilo lwa mupashi kikale alo lufunjisho lwafuma kwi abo nangwa ku muntu ungi. Babena kwimutundaika kuba bino kimye kyo mubena kwisamba nabo.

Kino kibena kumwesha kuba’mba, Bakamonyi ba kwa Yehoba baitabila’mba Baibolo Mambo a Lesa. Baketekela’mba mabuku onse ajimo 66 anembelwe na lutangijilo lwa mupashi wazhila kabiji aluñama mu bya mpito. Kipungu kyo batela bavula’mba Lulayañano Lupya, abo bekitela’mba Binembelo bya bwina Kilishitu bya Kingiliki, kabiji Lulayañano lwa Kala belutela’mba Binembelo bya Kihebelu. Bino Binembelo bya Kingiliki ne bya Kihebelu bebiketekela bingi kabiji bebyumvwina monka mo byanembejilwe kanatu umvwe kya kuba abyo byambo nangwa akyo kintu kibena kumwesha’mba kiji mu ñambilo ya kifwanyikizho. Baumvwisha kuba’mba bungauzhi bwavula bwa mu Baibolo bwafika kala, bukwabo buji pepi kufika kabiji bukwabo nabo bukyangye kufika.

JIZHINA JABO

Bakamonyi ba kwa Yehoba? Ee, byo byo betela. Jino jizhina jiji na mo jatala, kumwesha’mba bashimuna bukamonyi pe Yehoba, buLesa bwanji ne nkebelo yanji. Byambo bya kuba’mba “Lesa,” “Nkambo,” ne “Mulenga”—byonka bijitu “Ndamakyalo,” “Mfumu” ne “Kilolo”—ke byambotu bya mushingi kabiji bantu bakonsha kwibingijisha kutelelamo babinemanga. Bino “Yehoba” ke jizhina ja mwine Lesa wa bulume bonse aye Mulenga wa bintu byonse. Kwesakana na Buku wa Lesa, jino jizhina jiji mu Salamo 83:18 mwaamba’mba: “Namba, bayuke amba, Anweba yenka, wa jizhina ja YEHOBA, Yenu Mwine Wakila wa panopantanda ponse.”

Jizhina ja kuba’mba Yehoba (nangwa’mba Yahweh kwesakana na Baibolo wa Bakatolika wa Jerusalem Bible kabiji ne bikeba bashayuka bamo) jitanwa mu Binembelo bine bitanshi bya Kihebelu bimye pepi nobe 7,000. Mu ma Baibolo avula, jino jizhina kafwamo, bejipingizhapo na byambo bya kuba’mba “Lesa” nangwa’mba “Nkambo.” Pano bino, nangwatu mu onka ano ma Baibolo, muntu wakonsha kuyuka kinembelo kya Kihebelu kine kitanshi po kyaamba’mba Yehoba na mambo a kuba pa byobyo byepelo byambo byo bapingizhapo bebinemba mu bisopelo bikatampe ne bicheche amba: LESA, NKAMBO. Ma Baibolo avula o babena kutuntulula ano moba muji jizhina ja kuba’mba Yehoba nangwa’mba Yahweh. Onkao mambo mu Buku wa Lesa, Isaya 42:8 waamba, “Amiwa ne Yehoba, ajo jo jizhina jami.”

Bakamonyi ba kwa Yehoba bafumya jizhina jabo mu Kinembelo kya Isaya kitango 43. Mu kino kinembelo mikoka ya bantu beimwesha kwikala mu kije: Balesa ba mikoka ya bantu bebeta kuleta batumonyi babo kuba’mba bebemeneko kwamba bishinka bibena kumwesha bololoke bwabo nangwa abo bonka bomvwe ku batumonyi ba kwa Yehoba ne kuyuka babena kwamba bukine bañanyi. Mu kino kije, Yehoba waamba ku bantu banji amba: “Anweba bantu bami yenu batumonyi bami, kabiji mwi bami ba mwingilo bo nasalulula, namba mungyuke ne kungitabila ne kukwatakanya bulongo amba: Yami i ye. Pa nyuma yami kechi kwajipo Lesa mukwabo ne, kabiji kechi kukekalapo mukwabo palutwe yami ne. Amiwa yami Yehoba, ka kuji mupulushi mukwabo nangwa umo ne, kana amiwa yenka.”—Isaya 43:10, 11.

Myaka nobe kajo Yesu saka akyangye kusemwa, Yehoba Lesa wajinga na batumonyi banji panopantanda. Mu kitango 11 kya Bahebelu byo mwatanchikwa bantu ba lwitabilo, mu kitango 12:1 mwaamba’mba: “Onkao mambo, ne atweba netuwa, byo twazhokolokwa ne jibumba jikatampe ja batumonyi jiji byonka bino, tutaye byonse bitunemena, ne abwa bundengamambo bupelawizha kwitukasankanya, tunyeme kapela na mukoyo, konka ko betutongwela.” Yesu waambijile Pontiusa Pilato amba: “O mambo o nasemenwe, ne o naishijile panopantanda, namba nshimune bya bukine.” Kabiji utelwa’mba “kamonyi wa kishinka ne wa kine.” (Yoano 18:37; Lumwekesho 3:14) Yesu wabujile baana banji ba bwanga amba: ‘Mukatambula bulume, byo akemwikijila mupashi wazhila: kepo mukekala batumonyi bami ba kunshimuna ne mu Yelusalema, ne monse mu Yudea, ne mu Samaliya, ne monse mwapela ntanda.’—Byubilo 1:8.

Onkao mambo, lelo jino, bantu kukila pa 7,000,000 babena kusapwila mambo awama a Bufumu bwa Yehoba buji mu maboko a Kilishitu Yesu mu byalo kukila pa 230 kabiji balanguluka’mba kyafwainwa abo kutelwa’mba Bakamonyi ba kwa Yehoba.

[Blurb on page 4]

Baitabila’mba Baibolo Mambo a Lesa

[Blurb on page 4]

Jizhina ja Lesa mu Kihebelu kya kala

[Blurb on page 5]

Jizhina bejimwesha kwikala mu kije

[Blurb on page 5]

Bakamonyi kukila pa 7,000,000 mu byalo kukila pa 230

[Picture on page 3]

Bemutemwa bingi

[Picture on page 4]

Bepana kuba kyaswa muchima wa Lesa