Kechi tuji na bantangi bo tupa mali mu jibumba jetu ne. Pano bino byonka byo kyajinga kimye kyatendekele kipwilo kya bena Kilishitu, bakalama bafikilamo batongolwa ‘kufunga jitanga ja Lesa.’ (Byubilo 20:28) Bano bakulumpe mu kipwilo ke banabalume bakoma ku mupashi batangijila ne kufunga kipwilo, “kechi na muchima wa kukeba kumwenamo mali ne, bino na muchima yense.” (1 Petelo 5:1-3) Betwingijila byepi?

Betuta muchima kabiji betuzhikijila. Bano bakulumpe batangijila ne kukwasha ba mu kipwilo kufwenya kwipi ne Lesa. Bayuka kuba’mba Lesa ye wibapa uno mwingilo wanema bingi. Kechi bobila bunkambo bantu banji ne, pa kuba betulengela kumwingijila bulongo na lusekelo. (2 Kolinda 1:24) Byonkatu kafunga byo alama mikooko yanji yonse, ne bakulumpe mu kipwilo nabo bebikako kuyuka bonse mu kipwilo pa muntu pa muntu.—Byambo bya Maana 27:23.

Betufunjisha bya kuba kyaswa muchima wa Lesa. Pa mulungu pa mulungu, bakulumpe mu kipwilo batangijila kupwila pa kuba’mba bakoseshe lwitabilo lwetu. (Byubilo 15:32) Bano banabalume batangijila ne mwingilo wa kusapwila, twingila nabo kabiji betufunjisha ne bya kwingila mu mbaji yapusana pusana ya mwingilo wetu.

Betutundaika pa muntu pa muntu. Pa kuba’mba betukwashe kukosesha bulunda bwetu ne Yehoba pa muntu pa muntu, bakulumpe mu kipwilo bakonsha kwiya ku nzubo nangwa kwisamba ne atweba pa Nzubo ya Bufumu ne kwitukwasha nangwa kwitutekenesha na Binembelo.—Yakoba 5:14, 15.

Bakulumpe mu kipwilo kechi bengilatu mingilo ya mu kipwilo ne, baya ne ku nkito kabiji baji ne na mingilo ikwabo ya kisemi ikebewa kimye kyabaya. Twafwainwa kwibanemeka bano balongo betu pa byo bengila na ngovu.—1 Tesalonika 5:12, 13.

• Bakulumpe mu kipwilo baji na ñanyi mwingilo?

• Bakulumpe mu kipwilo bamwesha byepi byo betuta muchima pa muntu pa muntu?

Baibolo waamba pa mabumba abiji a banabalume bengila mingilo, “bakalama ne bankwasho mu kipwilo.” (Filipai 1:1) Mu bipwilo byonse muji bakulumpe ne bankwasho. Bankwasho betukwasha byepi mu kipwilo?

Bakwasha jibumba ja bakulumpe mu kipwilo. Bankwasho bata muchima ku bintu bya ku mupashi kabiji banabalume baketekelwa bingi, bonse bengila bingi na ngovu, bamo banyike ne bakwabo bakulumpe. Bengila mingilo yanema bingi ya mu jibumba ja Lesa ne mingilotu ikwabo ikebewa kwingila mu kipwilo. Kino kilengela bakulumpe mu kipwilo kuta muchima pa kufunjisha ne pa mingilo ya bukafunga.

Bengila mingilo yanema bingi. Bankwasho bamo bebapa mwingilo wa kutambwila bonse babena kwiya na kupwila. Bakwabo bengijila ku bya kwambilamo, kupana mabuku, ku mali a kipwilo ne kupa basapwishi manyaunda a mwakwingijila. Kabiji bengila ne mwingilo wa kuwamisha Nzubo ya Bufumu. Bakonsha ne kwibambila ku bakulumpe mu kipwilo kuya na kukwasha bakikulumpe. Bankwasho bengila mingilo yonse yo bebapa, kabiji kipwilo kibanemeka bingi pa mingilo yo bengila ne pa kwipana kwabo.—1 Timoti 3:13.

Baji na byubilo byawama bya bwina Kilishitu. Bankwasho bebatongola na mambo a byubilo byabo byawama bya bwina Kilishitu. Majashi o bamba pa kupwila akosesha bingi lwitabilo lwetu. Byo batangijila mwingilo wa kusapwila, betulengela ne atweba kwikala na kizaku mu mwingilo. Kukwatankana kwabo na bakulumpe, kuleta mutende ne kukwatankana mu kipwilo. (Efisesa 4:16) Mu kuya kwa kimye, nabo bakonsha kufikilamo kwikala bakulumpe mu kipwilo.

• Bankwasho mu kipwilo ke banabalume baji byepi?

• Bankwasho balengela byepi kipwilo kwingila bulongo?

Binembelo bya bwina Kilishitu bya Kingiliki javula byaambapo bingi pe Banabasa ne mutumwa Paulo. Bano banabalume bajinga bakalama benda, bafwakeshanga bipwilo bya bena Kilishitu batanshi. Mambo ka? Mambo batele muchima balongo babo ba bwina Kilishitu. Paulo waambile’mba wakebelenga ‘kubwela na kupempula balongo’ ne kumona byo baji. Waendanga miseke yalepa pa kubatu’mba aye na kwibatundaika. (Byubilo 15:36) Uno ye muchima uji ne na bakalama betu benda lelo jino.

Beya na kwitutundaika. Kalama wa Mwanzo ufwakashisha bipwilo nobe 20, pa kipwilo kimo wikalapo mulungu umo, kabiji ufwakesha bipwilo jibiji pa mwaka. Twakonsha kufunjilako byavula bingi ku bipitamo bano balongo ne bakazhi babo inge basongola. Bakebesha kuyuka bakulumpe ne banyike pamo, kabiji bakeba kwingila ne atweba mu mwingilo wa mu bujimi ne kuya netu ku mafunjisho etu a Baibolo. Bano bakalama baya ne ku lupempu lwa bukafunga na bakulumpe mu kipwilo, betutundaika, kabiji bamba ne majashi atundaikañana pa kupwila kwa kipwilo ne pa kubuñana.—Byubilo 15:35.

Bata muchima bonse mu kipwilo. Bakalama bamwanzo bata bingi muchima pa biji bulunda bwetu ne Lesa atweba bonse tuji mu bipwilo. Basambakana pamo na bakulumpe ne bankwasho na kupituluka mu bibena kwenda mingilo ne kwibakwasha bya kwingila mingilo yabo bulongo. Bakwasha bapainiya ba kimye kyonse kwingila bulongo mu mwingilo, kabiji bakebesha kuyuka bakatataka ne kumvwa byo babena kukomenako mu maana a kuyuka Lesa. Bano bonse balongo bepana kwikala ‘bakwetu bamwingilo betwingijila.’ (2 Kolinda 8:23) Ne atweba twafwainwa kulondela lwitabilo lwabo ne kwipana kwabo kwi Lesa.—Bahebelu 13:7.

• Mambo ka bakalama bamwanzo o bayila na kufwakesha bipwilo?

• Mwakonsha kumwenamo byepi mu kufwakasha kwabo?

Inge kwamweka bya malwa, Bakamonyi ba kwa Yehoba ponkapotu batendeka kunengezha bya kukwasha balongo babo baponenwa na bya malwa. Kino kimweshatu patoka byo twitemwa atweba bene na bene. (Yoano 13:34, 35; 1 Yoano 3:17, 18) Twakonsha kwibakwasha byepi?

Tupana mali. Mu Yudea byo mwaponene kipowe kya nzala, bena Kilishitu batanshi mu Antioka batumijile bano balongo babo bena Kilishitu mali. (Byubilo 11:27-30) Byobyo tuba ne atweba, inge twaumvwa’mba balongo mu mapunzha amo mwaya ntanda babena kumanama, tutuma mali kupichila mu kipwilo kyetu akukwasha boba babena kumanama.—2 Kolinda 8:13-15.

Twibapa byo bakajilwa. Bakulumpe mu kipwilo baji kwamwekela bya malwa bamona kuba’mba bonse ba mu kipwilo batanwa kabiji bazhikijilwa. Kavoto ka bukwasho ko katangijila ne kwabila balongo betu kajo, mema a kutoma awama bulongo, bivwalo, mwakulaala ne muchi. Bakamonyi bavula bayuka mingilo bepana kwingijisha mali abo kuya na kukwasha bakwabo ba mu lwitabilo kushimukulula mazubo abo ne Mazubo a Bufumu aonaika na kinkunkwila. Kukwatankana kwa jibumba jetu ne kupilwa kwingijila pamo kwitulengela kunengezha bukiji bukiji bibena kukebwa inge kwamweka bya malwa. Nangwa kya kuba tukwasha “bakwetu ba mu lwitabilo,” tukwasha ne bantu bakwabo ba mu bupopweshi bwapusana pusana.—Ngalatiya 6:10.

Twibatekenesha na Binembelo ne kwibalengela kuchinchika. Aba baji mu bya malwa bakebewa kwibatekenesha. Mu bimye bya uno mutundu, Yehoba, “Lesa wa lutekenesho lonse” ye witukosesha. (2 Kolinda 1:3, 4) Twisamba pa milaye ya mu Baibolo na bapopomenwa ne kwibabula’mba, Bufumu bwa Lesa katatakatu bukafumyepo bya malwa byonse bilengela bantu kumanama.—Lumwekesho 21:4.

• Mambo ka Bakamonyi o bayila bukiji na kukwashañana inge kwamweka bya malwa?

• Ñanyi lutekenesho lwa mu binembelo lo twakonsha kwisambapo na bapuluka mu bya malwa?

Lufu lwanji byo lwafwenyenye pepi, Yesu wisambilenga ku mbaji na baana banji ba bwanga bana, ba Petelo, Yakoba, Yoano ne Andeleo. Byo alumbulwilenga kiyukilo kya kwikalapo kwanji kikamweka mu moba akapelako, waipwizhe bwipuzho bwanema bingi bwa kuba’mba: “Nanchi kalume wa kishinka kabiji wa maana ye ñanyi, nkambo yanji ye atongwele kutalanga pa ba mu nzubo yanji amba ebapenga kajo pa kimye kyafwainwa?” (Mateo 24:3, 45; Mako 13:3, 4) Yesu walayile baana banji ba bwanga amba byo aji “nkambo” yabo, ukatongola bakapanga baana banji ba bwanga kajo ka ku mupashi mu moba akupelako. Pano uno kalume ye ñanyi?

Baana ba bwanga bakine ba kwa Yesu bashingwa. “Kalume” ke Jibumba Jitangijila ja Bakamonyi ba kwa Yehoba. Bobanengezhezha bakwabo bapopweshi ba Yehoba kajo ka kumupashi ka pa kimye kyafwainwa. Atweba bonse twaketekela uno kalume wakishinka kutwajijila kwitupa kajo ka ku mupashi “kawaina pa kimye kyafwainwa.”—Luka 12:42.

Bo babena kulama bya mu nzubo ya Lesa. (1 Timoti 3:15) Yesu wapele kalume mwingilo wanema bingi wa kutangijila lubaji lwa pano pa ntanda lwa jibumba ja Yehoba, kulama bipe, kutangijila mwingilo wa kusapwila ne kwitufunjisha mu bipwilo. Pa kuba’mba betunengezhezhe byo tukeba pa kimye kyafwainwa, “kalume wakishinka kabiji wa maana” usampanya kajo ka ku mupashi kupichila mu mabuku o twingijisha mu mwingilo wa kusapwila ne o twingijisha pa kupwila kwa kipwilo ne pa kubuñana.

Kalume wa kishinka ku bukine bwa mu Baibolo ne ku mwingilo wa kusapwila mambo awama, kabiji wa maana mambo ubena kulama bulongo bintu bya kwa Kilishitu pano pa ntanda. (Byubilo 10:42) Yehoba ubena kulengela bantu bavula kwikala bakamonyi banji kabiji ubena kukwasha kalume wakishinka kunengezha kajo ka ku mupashi kavula ko babena kusampanya.—Isaya 60:22; 65:13.

• Ñanyi Yesu ye apele mwingilo wa kujisha baana banji ba bwanga kajo ka mupashi?

• Mu ñanyi mashinda kalume mo aikela wa kishinka kabiji wa maana?

Mu myaka yajingako bena Kilishitu batanshi kwajinga jibumba jicheche ja ‘batumwa ne bakulumpe mu kipwilo bajinga mu Yelusalema’ jatangijilanga ne kufukula bintu byanema byakunzhile kipwilo kya bena Kilishitu bashingwa. (Byubilo 15:2) Kimye kyo bafukwilenga pa kintu kimo, lutangijilo lwa mupashi wa Lesa ne byo besambile mu Binembelo bibalengejile bonse kwitabunzhanya. (Byubilo 15:25) Ne lelo jino byobyo boba.

Lesa bobo abena kwingijisha kuba kyaswa muchima wanji. Bano balongo bashingwa baji mu Jibumba Jitangijila banemeka bingi Mambo a Lesa kabiji baibijila kutangijila mingilo ne kukumbula mepuzho a mu Mambo a Lesa. Mu mulungu pa juba jimo bekala pamo na kwisamba pa bibena kukebewa mu bwanabwankazhi bwetu bwa ntanda yonse. Byonka byo kyajinga mu myaka yajingako bena Kilishitu batanshi, jino jibumba jipana mikambizho yaimena pa Baibolo mu makalata nangwa kupichila mu bakalama benda ne bakwabotu. Ino mikambizho ilengela bantu ba Lesa kuyila mumo mu milanguluko ne kukwatankana pa kuba bintu. (Byubilo 16:4, 5) Jibumba Jitangijila jo jitala pa mwingilo wa kunengezha kajo ka ku mupashi, jitundaika mwingilo wa kusapwila Bufumu ne kutongola balongo bakutangijila.

Balondela lutangijilo lwa mupashi wa Lesa. Jibumba Jitangijila ja mu ano moba jilondela lutangijilo lwa Nkambo Walengele Bintu Byonse, Yehoba, ne Mutwe wa kipwilo aye Yesu. (1 Kolinda 11:3; Efisesa 5:23) Bano banabalume kechi bemona’mba bantangi ba bantu ba Lesa ne. Bonse pamo na bena Kilishitu bakwabo bashingwa “balondela Mwana mukooko [Yesu] konse konse ko aya.” (Lumwekesho 14:4) Ba mu Jibumba Jitangijila basanta bingi pa milombelo yo twibalombelako.

• Bañanyi bajinga mu jibumba jitangijila ja bena Kilishitu batanshi?

• Jibumba Jitangijila ja mu ano moba jilondela byepi lutangijilo lwa Lesa?

Betele ke jizhina ja Kihebelu jilumbulula’mba “Nzubo ya Lesa.” (Ntendekelo 28:17, 19, tubyambo twamunshi) Ke jizhina jayilamo bingi kutela maofweshi a Bakamonyi ba kwa Yehoba mwaya ntanda po batangijila ne kutundaika mwingilo wa kusapwila. Jibumba Jitangijila jiji pa ofweshi mukatampe wa ntanda yonse ku New York State, mu U.S.A, jo jitangijila mingilo ya pa maofweshi a misampi mu byalo byavula. Bonse bengijila pa musampi bebatela’mba kisemi kya Betele. Byonka bikala kisemi, nabo bakwatankana bingi, bengijila pamo, kujiila kajo pamo ne kufunjila Baibolo bonse pamo.—Salamo 133:1.

Betele ke kisemi kya bantu bepana. Pa muzhi wa Betele ponse paji banabalume ne banabakazhi bena Kilishitu bepana kuba kyaswa muchima wa Lesa bengila mingilo ya kutundaika Bufumu kimye kyonse. (Mateo 6:33) Kafwako ufola mali ne, bino bonsetu baji na mwakulaala mwawama kabiji bebanengezhezha kajo ne kwibapapo kajali ka kupotamo byo bakeba. Yense uji pa Betele uji na ko engijila, bamo mu maofweshi, bakwabo bateka, kabiji bakwabo bengijila mu kibamba mwakujiila. Bakwabo bengila mwingilo wa kupulinta nangwa wa kulenga mabuku, kuwamisha mu bibamba, kuchapa, kufiika bya kufikafika ne mingilotu ikwabo.

Paji mingilo yavula itundaika mwingilo wa kusapwila Bufumu. Mwingilo mukatampe pa Betele ke wakusampanya bukine bwa mu Baibolo ku bantu. Uno buloshuwa naye kyo bamunembejile. Bamunengezhe na lutangijilo lwa Jibumba Jitangijila, ne kumutuma pa kompyuta ku mabumba a bantuntuluzhi avula mwaya ntanda, panyuma ya bino bamupulinchile na minkinyi ingila bingi bukiji iji pa Betele mu byalo bimo, apa bino bamusampanya mu bipwilo kukila pa 110,000. Ba mu kisemi kya Betele bengila bingi na ngovu pa kuba’mba balenge mabuku a kutundaikilamo mwingilo wanema bingi wa kusapwila mambo awama.—Mako 13:10.

• Bañanyi bengijila pa Betele kabiji balamwa byepi?

• Ñanyi mwingilo wanema bingi ubena kukebewa kwingijiwa bukiji ye batundaika pa Betele?

Ba mu kisemi kya Betele bengijila ku madipatimenti apusana pusana. Bonse batundaika mwingilo wa kusapwila mu kyalo kimo nangwa mu byalo byavula. Bamo bengila mu mabumba a ntuntulwilo, kupulinta magazini, kulenga mabuku, kwingijila mu mazubo mo balamina mabuku, kulenga mavidyo, kukopa mawi nangwa mingilotu ikwabo ya kukwasha mpunzha iji mu maboko abo.

Kavoto ka Musampi ko katala pa bibena kwenda mingilo. Jibumba Jitangijila japa Kavoto ka Musampi mwingilo wa kutala pa bibena kwenda mingilo pa ofweshi wa musampi. Mu kano kavoto mwikala bakulumpe bafikilamo basatu nangwa kukilapo. Kavoto kabula Jibumba Jitangijila ngyalutwe ya mingilo mu kyalo kiji mu maboko abo ne makatazho ekalako. Ano masawakya akwashako Jibumba Jitangijila kusala mitwe yo bakambapo mu mabuku akalondelapo, pa kupwila ne pa kubuñana. Bemenako Jibumba Jitangijila bebatuma kuya na kufwakesha misampi ne kukwasha Kavoto ka Musampi bya kwingila mingilo yabo. (Byambo bya Maana 11:14) Kwikala mutanchi wiikajila ne jashi jamba ntomesha wa ofweshi wa ntanda yonse ja kutundaika baji mu nyaunda ya musampi.

Batundaika bipwilo. Balongo batongolwa baji pa musampi bo baswisha kuba’mba kwikale bipwilo bikwabo byakatataka. Bano balongo batangijila ne mwingilo wa bapainiya ba kimye kyonse, bamishonale ne bakalama benda bengijila mu nyaunda ya musampi. Banengezha kubuñana ne kushonkena kwa kijiiji, kushimika Mazubo a Bufumu ne kumona kuba’mba bipwilo byonse byatambwila mabuku a kwibakwasha ku mupashi. Mingilo yonse ya pa ofweshi wa musampi yo ilengela mwingilo wa kusapwila kwenda bulongo.—1 Kolinda 14:33, 40.

• Kavoto ka Musampi kakwashako byepi Jibumba Jitangijila?

• Ñanyi mingilo iji pa ofweshi wa musampi?

Tutuntulula mabuku mu milaka kukila pa 750, pa kuba’mba tusapwilenga bulongo “mambo awama” “ku bisaka bya bantu byonse ne ku mikoka yonse ku ba njimi yonse ne ku mitundu yonse ya bantu.” (Lumwekesho 14:6) Pano uno mwingilo wabaya bibye tumwingila byepi? Tumwingila na bukwasho bwa bepana kwingila ba mu byalo byapusana pusana, banemba ne bantuntuluzhi, abano bonse Bakamonyi ba kwa Yehoba.

Byambo bitanshi binembwa mu Kizungu. Jibumba Jitangijila jo jitala pa mwingilo wa Dipatimenti ya Kunemba iji pa ofweshi wetu mukatampe wa ntanda yonse. Ino dipatimenti yo itala pa mingilo ya banembi bengijila pa ofweshi mukatampe ne ba mu maofweshi akwabo a misampi. Kwikala na banembi ba mu byalo byapusana pusana kwitulengela kunemba mitwe yaamba pa bisho byonse ne kufika bantu ba mu mikoka yonse pa muchima.

Byambo bebituma ku bantuntuluzhi. Inge bapwisha kunemba ne kwibitabizha, bebituma ku mabumba a bantuntuluzhi mwaya ntanda kwingijisha makompyuta, apa bino bantuntuluzhi batuntulula, bapitulukamo ne kutangamo. Bebikako kusala “byambo bya bukine” bya mu mulaka wabo byakonsha kulumbulula bulongo mwatala byambo bya Kizungu.—Musapwishi 12:10.

Makompyuta apezhako mingilo. Makompyuta kechi akonsha kwingila kwa kubula banembi ne bantuntuluzhi ne. Apezhakotu mwingilo wabo ne kumulengela kwenda bukiji mambo muji madikishonale ne mabuku a kupesapesamo. Bakamonyi ba kwa Yehoba baji na kingijisho kipeezhako mingilo pa kompyuta kitelwa’mba Multilanguage Electronic Publishing System (MEPS) mo babika milaka yavula, bipikichala kabiji kyo kilengela ne kuba’mba biye na kupulintwa.

Mambo ka o twibikilako kuba bino byonse ne mu milaka yambiwatu na bantu bacheche? Mambo kyo kyaswa muchima wa Yehoba kuba’mba “bantu bonse bapuluke ne kuyukisha bulongo bukine.”—1 Timoti 2:3, 4.

• Mabuku etu anembwa byepi?

• Mambo ka o tutuntulwila mabuku etu mu milaka yavula?

Jibumba jetu jinemba ne kusampanya ma Baibolo avula bingi atutu pa mwaka pa mwaka. Tushimika ne kulama bulongo Mazubo Bufumu ne maofweshi a misampi. Tukwasha bengijila pa Betele ne bamishonale, kabiji tupana ne bukwasho ku baji mu bya malwa. Kampe mwakonsha kushikisha’mba, ‘Nga ano mali onse beafumya pi?’

Kechi tupishamo muchiba mwakutaya mali ne. Nangwa kya kuba kutundaika mwingilo wa kusapwila kukebewa mali avula, kechi tulomba mali ku bantu ne. Kala, Kyamba kya Usopa kya bubiji kyaambile’mba, Yehoba ye witukwasha “kechi tulombanga nangwa kupopwela bantu kwitukwasha ne,” ne kya kine kechi tulomba mali ne.—Mateo 10:8.

Mwingilo wetu utundaikwa na bukwasho bwa kwitemenwa. Bantu bavula banemeka bingi mabuku etu o twingijisha pa kufunda Baibolo kabiji bapana bupe. Bakamonyi bengijisha kimye, bulume bwabo ne bipe byabo kutundaikilamo kyaswa muchima wa Lesa pano pa ntanda. (1 Byambo bya Moba 29:9) Pa Nzubo ya Bufumu, pekala tubilambwilo mwakutaya mali bonse bakeba kupana bukwasho. Nangwa mwakonsha kupana mali kwingijisha keyala wetu wa pa intaneti wa jw.org. Mali avula afuma ku bantu babula kunonka baji nobe yewa mwanamukazhi wafwilwa waambilepo Yesu kuba’mba wapana mali avula pa kutayamo tumali twa muwayawaya tubiji twakepesha mu kilambwilo kya mu nzubo ya Lesa. (Luka 21:1-4) Onkao mambo, kimye kyonse ‘mwakonsha kutulapo bya bupe bimo’ bya kupana “mwayila bintu byo muji nabyo.”—1 Kolinda 16:2; 2 Kolinda 9:7.

Twashiinwa kuba’mba Yehoba usakutwajijila kulengela bantu ‘kumunemeka na bintu byabo’ kupichila mu kutundaika mwingilo wa Bufumu.—Byambo bya Maana 3:9.

• Ki ka kyalengela jibumba jetu kupusanako na bupopweshi bukwabo?

• Bukwasho bwa kwitemenwa bebwingijisha byepi?

Jizhina ja kuba’mba Nzubo ya Bufumu jilumbulula mpunzha pa kufunjila Baibolo kikatakata byo yaamba pa Bufumu bwa Lesa bwasapwilangapo Yesu.—Luka 8:1.

Ke kishimikwa kya bupopweshi bwa kine. Pa ino mpunzha popo banengezhezha bya kwingila mwingilo wa kusapwila mambo awama a Bufumu. (Mateo 24:14) Mazubo a Bufumu ashimikwa apusana pusana, amo abaya akwabo akepa bino onse amweka bulongo, kabiji mu amo mupwijila bipwilo byavula. Mu myaka ya kunyuma kwe, twashimika Mazubo a Bufumu avula bingi, atanu pa juba jimo, pa kuba’mba bipwilo bibena kulengwa bikale na mwa kupwijila. Ashimikwa byepi?—Mateo 19:26.

Ashimikwa na mali a bukwasho akonkakena ku ofweshi mukatampe. Ano mali beatuma ku ofweshi wa musampi pa kuba’mba beapane kyatutu ku bipwilo bikeba kushimika nangwa kuwamisha Nzubo ya Bufumu.

Ashimikwa na bamwingilo ba kwitemenwa babula kufola mali. Mu byalo byavula muji Mabumba a Bantungi ba Mazubo a Bufumu. Ano mabumba a bantungi bakwitemenwa ne bamingilo bepana baya ku bipwilo byapusana pusana mu kyalo mo baji ne mu mapunzha a mu mizhi, na kushimika Mazubo a Bufumu. Mu byalo bimo batongola Bakamonyi bafikilamo bakutangijila mwingilo wa kushimika nangwa kuwamisha Mazubo a Bufumu mu yoyo mpunzha. Nangwa kya kuba balongo ne banyenga ba ku yoyo mpunzha bepana kwingila, bino ba mu kipwilo paji yeo mwingilo bo beya bavula na kwingila. Mupashi wa Yehoba ne kwibikako kwa bantu banji bengila na muchima yense ko kulengela uno mwingilo kwenda bulongo.—Salamo 127:1; Kolose 3:23.

• Mambo ka motupwijila o mutelelwa’mba Nzubo ya Bufumu?

• Mazubo a Bufumu mwaya ntanda yonse ashimikwa byepi?

Pa Nzubo ya Bufumu yonse ya Bakamonyi ba kwa Yehoba paji jizhina jazhila ja Lesa. Onkao mambo, tumvwa bingi bulongo kwingilako mwingilo wa kuwamisha bino bishimikwa pa kuba’mba bimwekenga bulongo, kabiji kuba bino ke lubaji lwa mpopwelo yetu yazhila. Bonse bakasuluka kwiya na kwingilako.

Ipanainga kwingilangako mingilo ya kuwamisha mu Nzubo ya Bufumu pa kupwisha ya kupwila. Pa kupwisha kupwila bonse balongo ne banyenga bengila tumingilo twapelapela twa kuwamisha mu Nzubo ya Bufumu pa kuba’mba mumwekenga bulongo. Kabiji jimo mu mulungu, kwikala kuwamishamo kya kine kine. Mukulumpe mu kipwilo nangwa nkwasho umona bibena kwenda mingilo, javula ulondela byanembwa pa mutanchi wa bintu bya kuwamisha. Kwesakana na mingilo ijipo, bamo bakolopa, kupyanga, kutanchika bulongo bipona, kukuntapo lukungu, kuwamisha mabenkele mu bipenze, kutaya biswaswa nangwa mingilo ikwabo ya kuwamisha pangye. Kwikala kunengezhapo juba jimo mu mwaka ja kuwamisha yonsetu. Kwiya na baana betu ku ino mingilo kwibalengela kunemeka mpunzha yetu ya kupopwelapo.—Musapwishi 5:1.

Ipanainga kuwamisha byonse byaonaika. Pa mwaka pa mwaka kwikala juba ja kupikita Nzubo ya Bufumu mukachi ne pangye. Kwesakana na byo bataine pa kupikita, kwikala kuwamisha nzubo pa kuba’mba ikale bulongo ne kukepeshako kutaya mali avula. (2 Byambo bya Moba 24:13; 34:10) Nzubo ya Bufumu yo balama bulongo yo yafwainwa kupopwelamo Lesa wetu. Kwingilako ino mingilo kumwesha’mba twatemwa Yehoba kufuma panshi ya muchima ne kuba’mba twanemeka bingi mpunzha yetu ya kupwijilamo. (Salamo 122:1) Kabiji kino kilengela bantu ba mu nyaunda nabo kwiinemeka.—2 Kolinda 6:3.

• Mambo ka o twafwainwa kutela muchima po tupwijila?

• Ñanyi lunengezho lujiko lwa kulondela pa kuwamisha Nzubo ya Bufumu?

Nanchi mukeba kupesapesa ne kuyukilapo byavula bya mu Baibolo nyi? Abya pajipo kinembelo, muntu, mpunzha nangwa kintu kyo batongola mu Baibolo kyo mukebesha kuyuka nyi? Inyi mwakilangulukapo’mba, kana Mambo a Lesa akonsha kwimukwasha mu makatazho o mubena kupitamo nyi? Umvwe byo kiji, katangai mu mabuku aji mu butala bwa mabuku mu Nzubo ya Bufumu.

Akwasha pa kukeba bishinka. Mwafwainwa kechi muji na mabuku onse a Bakamonyi ba kwa Yehoba alumbulula Baibolo a mu mulaka wenu ne. Bino mu Nzubo ya Bufumu muji mabuku avula akatataka. Mwakonsha kutanamo ma Baibolo apusana pusana, madikishonale, ne mabuku akwabo akonsha kwimukwasha pa kukeba bishinka. Mwakonsha kwingijisha butala bwa mabuku saka kukyangye kutendeka kupwila ne panyuma ya kupwila. Inge kya kuba muji ne kompyuta, pakonsha kwikala ne mabuku etu mu mutanchi utelwa’mba, Watchtower Library. Uno mutanchi wa pa kompyuta uji na mabuku etu onse kabiji wapeela bingi kwingijisha pa kukeba bishinka pa mutwe, kyambo nangwa kinembelo.

Akwasha bingi baji mu kupwila kwa Bwikalo ne Mwingilo. Inge mwanembesha mu uno sukulu, mwakonsha kwingijishako mabuku aji mu Nzubo ya Bufumu pa kunengezha jashi jo bemupa. Kalama wa Kupwila kwa Bwikalo ye utala pa buno butala bwa mabuku. Ye umona ne kuba’mba mabuku onse akatataka mo aji kabiji atanchikwa bulongo. Aye nangwa bemufunjisha Baibolo bakonsha kwimubula bya kutaana byo mubena kukeba. Nangwa byonkabyo, kechi mwafwainwa kusenda buku wa mu butala bwa mu Nzubo ya Bufumu ku nzubo kwenu ne. Kabiji twafwainwa kwialama bulongo ano mabuku, kechi twafwainwa kushabaulangamo ne.

Baibolo walumbulula’mba twikala na ‘maana a kumuyuka Lesa’ inge twatapo muchima kwiakeba nobe “bya buneme byafyamika.” (Byambo bya Maana 2:1-5) Butala bwa mabuku buji mu Nzubo ya Bufumu bwakonsha kwimukwasha kuba bino.

• Ñanyi mabuku aji mu butala bwa mabuku bwa mu Nzubo ya Bufumu akonsha kwimukwasha pa kupesapesa?

• Bañanyi bakonsha kwimubula bya kwingijisha ano mabuku?

Yesu waambijile baana banji ba bwanga amba: “Kyeya kyenu kimweke ku bantu bonse, kuba’mba bamone mingilo yenu yawama ne kutumbijika Shenu wa mwiulu.” (Mateo 5:16) Pa kuba’mba tube bino tubena kwingijisha biñambañamba byaiyamo, kubikapo ne intaneti. Pa keyala wetu wa jw.org/kqn, po patanwa byaitabilamo Bakamonyi ba kwa Yehoba ne mingilo yabo. Ñanyi mitwe imo itanwapo?

Mikumbu ya mu Baibolo ya mepuzho epuzha bavula. Mwakonsha kutaana mikumbu ya mepuzho avula anema bingi akatazha bavula. Talakiti wa kuba’mba Nanchi Buyanji Bukapwa Nyi? ne wa kuba’mba Umvwe Muntu Wafwa, Wakonsha Kwikala Mumi Jibiji Nyi? aji ne pa intaneti mu milaka kukila pa 600. Kabiji mwakonsha ne kutaana Baibolo wa Binembelo bya Ntanda Ipya mu milaka kukila pa 130 ne mabuku a kwingijisha pa kufunda Baibolo nabiji buku wa Nanchi Baibolo Kine Ufunjisha’mba Ka? ne Kyamba kya Usopa ne Labainga! wakatataka. Ano mabuku mwakonsha kwiatanga, nangwa kukopolola byambo pa MP3, PDF, nangwa kwingijisha EPUB. Mwakonsha ne kupulinchila bantu bamwesha lusekelo bya mu mulaka ye bomvwa. Kabiji mavidyo avula nao atanwapo ne mu milaka ya kwamba na maboko. Kabiji mwakonsha kukopolola bifwanyikizho bya mu Baibolo, ne mashimikila a mu Baibolo o batangila jimo ne nyimbo yawama ya kumvwako kimye kyo mubena kukokoloka.

Bishinka pa Bakamonyi ba kwa Yehoba. Pa keyala wetu patanwa masawakya ne bipikichala bya bimweka mu mwingilo wetu wa ntanda yonse, biponako bikunza Bakamonyi ba kwa Yehoba ne byo bakwasha bantu baji mu bya malwa. Mwakonsha ne kutanapo mabulañano a kushonkena kwa kijiiji ne makeyala a maofweshi a misampi.

Na bino biñambañamba byaiyamo, tubena kusamisha kyeya kya bukine mwaya ntanda yonse. Bantu bonse mwaya ntanda, ne ba ku Antarctica, bonsetu babena kumwenamo. Tubena kulomba kuba’mba “byambo bya Yehoba bikomenga bukiji” mwaya ntanda yonse ne kuleta lukumo kwi Yehoba.—2 Tesalonika 3:1.

• Nga keyala wetu wa jw.org/kqn ubena kukwasha byepi bantu kufunda bukine bwa mu Baibolo?

• Ñanyi bintu byo mukeba kumona pa keyala wetu wa pa intaneti?