Bantu bavula baleka kuya ku kupwila kwa mu bupopweshi mambo kechi batana mikumbu nangwa lutekenesho ne. Pano mambo ka o mwafwainwa kuyilanga ku kupwila kwa bwina Kilishitu kwa Bakamonyi ba kwa Yehoba? Nanchi kwikala byepi?

Kwikala pamo na bantu betemwa ne kwita muchima kuleta bingi lusekelo. Bena Kilishitu batanshi, bajinga na bipwilo mo bapopwelanga Lesa, kufunda Binembelo ne kwitundaika bene na bene. (Bahebelu 10:24, 25) Baumvwanga bingi bulongo kupwila pamo na balunda nabo bakine, balongo ne banyenga. (2 Tesalonika 1:3; 3 Yoano 14) Ne atweba tulondela byaubanga bena Kilishitu batanshi kabiji kituletela bingi lusekelo.

Ene mambo kufunda bya kwingijisha mafunde a mu Baibolo o kwanemena. Byonka byo kyajinga mu moba anembejilwemo Baibolo, banabalume, banabakazhi ne baana, bonse bapwilanga pamo. Bayuka kufunjisha bengijisha Baibolo kwitukwasha kuyuka bya kwingijisha mafunde ajimo mu bwikalo bwetu. (Mpitulukilo ya mu Mizhilo 31:12; Nehemiya 8:8) Bonse bakonsha kwambapo pa misambo ne kwimbako nyimbo, mu kuba bino momo tumweshesha luketekelo lwetu lwa bwina Kilishitu.—Bahebelu 10:23.

Mapesho afuma mu kukosesha lwitabilo lwenu mwi Lesa. Mutumwa Paulo waambijile ba mu kipwilo kimo amba: “Nkebesha bingi kwimumona, namba . . . tukekoseshe atwe bene na bene mu lwitabilo lwetu, ko kuba’mba lwitabilo lwenu ne lwami.” (Loma 1:11, 12) Pa kupwila, kupwanañana pamo na balongo betu ba mu lwitabilo kukosesha bingi lwitabilo lwetu ne kwitulengela kutwajijila kwikala bwikalo bwa bwina Kilishitu.

Nga mambo ka akubujila kwiya na kupwila pamo ne atweba pa kuba’mba mukemwene byo kwikala? Bakemutambwila bingi bulongo. Bonse bakasuluka kutanwako, kabiji kechi kwikala kupitamo na kutambula mali ne.

• Pa kupwila kwetu tulondela byaubanga bañanyi?

• Twakonsha kumwenamo ka mu kupwila pamo na bena Kilishitu?

Tuya na kutanwa ku kupwila kwa bwina Kilishitu kimye kyonse nangwa kya kuba tupita mu bitoto nangwa kechi kwakya bulongo ne. Mambo ka Bakamonyi ba kwa Yehoba o bayila na kupwila pamo na bakwabo ba mu lwitabilo, nangwa kya kuba baji na makatazho a mu bwikalo nangwa bakoka panyuma ya kukotoka ku nkito?

Kupwila kwitulengela kwikala bulongo. Paulo wanembele pa bakwetu bo tupwila nabo amba, “twitenga muchima atwe bene na bene.” (Bahebelu 10:24) Bino byambo bilumbulula “kwibavuluka,” ko kuba’mba twafwainwa kwibayuka bulongo. Onkao mambo, byambo bya uno mutumwa bitutundaika kuta muchima bakwetu. Umvwe twayuka bulongo bisemi bya bena Kilishitu bakwetu, tutana kuba’mba nabo bapitapo kala mu makatazho o tubena kupitamo ne kuyuka’mba bakonsha kwitukwasha kuyuka mwakwikela.

Kwitulengela kwikala na balunda bakine. Balongo ne banyenga botupwila nabo kechi bantu bo twayukilatu palepa ne, ke balunda netu bakine. Kabiji pa bimye bimo twikalapo ne na tubimye twakusangalela pamo. Tumwenamo ka mu kupwanañana pamo na bakwetu? Kwitulengela kwinemeka, kabiji kukosesha butemwe pakachi ketu. Kabiji bulunda bwakosa bwitulengela kwikwasha inge balunda netu baji na makatazho. (Byambo bya Maana 17:17) Kupwanañana pamo na bakwetu ba mu kipwilo kwitulengela ‘kwilama bulongo atweba bene na bene.’—1 Kolinda 12:25, 26.

Tubena kwimutundaika kwikala balunda na bantu boba kyaswa muchima wa Lesa. Mwakonsha kutana bano balunda mu Bakamonyi ba kwa Yehoba. Kange muleke kintu nangwa kimo kimulengele kubula kwikala balunda netu ne.

• Mambo ka o twatelapo muchima kupwila pamo na bakwetu?

• Ñanyi kimye kyo mukeya na kupwila pamo ne atweba?

Ku kupwila kwa bena Kilishitu batanshi javula kwaikalanga nyimbo, milombelo, kutanga ne kwisamba pa Binembelo, kechi kwaikalanga bisho ne. (1 Kolinda 14:26) Bino byobyo mukatana ne pa kupwila kwetu lelo jino.

Mikambizho imena pa Baibolo kabiji ikwashañana bingi. Ku mpelo ya mulungu twikala na jashi ja Baibolo ja maminiti 30 jilumbulula Binembelo byo byaamba pa bwikalo ne bimye byo tujimo. Bonse tutundaikwa kwingijisha ma Baibolo etu. Panyuma ya jashi, palondela Lufunjisho lwa “Kyamba kya Usopa,” lwa jiola jimo kabiji bonse mu kipwilo batundaikwa kukumbulapo pa kwisamba pa mutwe wa mu Kyamba kya Usopa kya kufundamo. Ino misambo itukwasha kulondela mikambizho ya mu Baibolo mu bwikalo bwetu. Bipwilo kukila pa 110,000 mwaya ntanda bafunda yenka uno mutwe.

Kwitukwasha kuyuka bya kufunjisha bulongo. Kabiji mukachi ka mulungu tutanwa ku kupwila kuji na mbaji isatu kwa kuba’mba Bwikalo ne Mwingilo Wetu wa Bwina Kilishitu, kufuma mu Kabuku ka Kupwila kwa Bwikalo ne Mwingilo. Jashi jitanshi ja kuno kupwila ke Bya Buneme Biji mu Mambo a Lesa, ajino jashi jitukwasha kumvwisha kitango kya mu Baibolo bonse mu kipwilo kyo batangila jimo. Jashi ja bubiji ke Taiko Muchima ku Mwingilo wa Kusapwila kabiji muji ne bimwesho bya kwitukwasha pa kwisamba na bantu Baibolo. Kalama wa bwikalo wambapo pa bintu bimo byakonsha kwitukwasha kutanga bulongo ne kuyuka bya kwamba. (1 Timoti 4:13) Jashi japelako ke Byafwainwa Kwikala Bena Kilishitu, jamba pa byo twafwainwa kwingijisha mafunde a mu Baibolo mu bwikalo bwetu. Kabiji mwikala mwisambo wa mepuzho ne mikumbu witukwasha kumvwisha byamba Baibolo.

Inge mwaya na kupwila, mukamwenamo mu bya mu Baibolo byo mukafunda.—Isaya 54:13.

• Ñanyi bintu byo muketekela kumvwa pa kupwila kwa Bakamonyi ba kwa Yehoba?

• Ñanyi kupwila kwetu ko mwakonsha kutemwa kutanwako?

Nanchi mwamona Bakamonyi ba kwa Yehoba baji mu uno buloshuwa byo bavwala bulongo pa kupwila nyi? Mambo ka o tutela muchima kumvwajilo, nsakwilo ne ntendelo ya nsuki yetu?

Ipana mushingi kwi Lesa. Kya kine kuba’mba Lesa kechi utala ku mwekelo ne, utala mu muchima wa muntu. (1 Samwela 16:7) Nangwa byonkabyo, inge twapwila pamo na kupopwela Lesa, tuta muchima pa kupa Lesa mushingi ne bapopweshi bakwetu. Inge tubena kuya na kwimana ku meso a mutonyi mu kije, tuta muchima ku mwekelo yetu pa kuba’mba ipane mushingi kwi aye. Kyo kimotu, mwekelo yetu pa kupwila inemeka Yehoba Lesa, “Mutonyi wa ba pano pa ntanda ponse” ne mpunzha yo tumupopwelapo.—Ntendekelo 18:25.

Imwesha mafunde o tulondela mu bwikalo bwetu. Baibolo itundaika bena Kilishitu ‘kuvwala bulongo na kwipelula ne kutekanya’ ne “kunemeka Lesa.” (1 Timoti 2:9, 10) Kuvwala na “kwipelula” kulumbulula kubula kuvwajila kwimwesha, kongola nangwa kuvwala bimwesha bya mukachi. Kabiji “kwikala na milanguluko yawama” kwitulengela kusala bya kuvwala byawama, kechi byabula kufwainwa nangwa byakilamo mutengo ne. Ano mafunde etuswisha kusala bya kuvwala bikeba muchima wetu. Kwa kubula kwamba kyambo, mwekelo yetu yakonsha kulengela “lufunjisho lwa Mupulushi wetu aye Lesa, kutotwa” ne “kutumbijika Lesa.” (Titusa 2:10; 1 Petelo 2:12) Kuvwala byafwainwa pa kupwila kulengela bantu kunemeka bupopweshi bwa kwa Yehoba.

Bivwalo kechi byafwainwa kwimulengela kubula kuya ku Nzubo ya Bufumu ne. Bivwalo byetu kechi kanatu amba byaikala bya mutengo bya kimenge ne, kyanemako ke kuvwala byafwainwa byabula biko.

• Mambo ka o kyanemena kuvwala bulongo kimye kyo tubena kuya na kupopwela Lesa?

• Ñanyi mafunde a mu Baibolo o tulondela mu mvwajilo, nsakwilo ne ntendelo?

Inge mufunda Baibolo na Kamonyi wa kwa Yehoba mwafwainwa munengezhezha jimo byo mukafunda. Ne pa kupwila kwa pa kipwilo kyawama kunengezhezha jimo pa kuba’mba tumwenemo. Tumwenamo byavula inge twaikala na mutanchi wa kuba bino.

Salai mpunzha ne kimye kya kutanga. Ñanyi kimye kyo mwakonsha kuteshako muchima? Lukelo saka mukyangye kutendeka mingilo nyi, inyi mabanga, banyike saka baya kala na kulaala nyi? Nangwa kya kuba kechi mwakonsha kutanga kimye kyabaya ne, salaipo kimye kya kubilamo bino kabiji monai kuba’mba kafwako kya kwimuvulañanya ne. Ikalai kwabula kyungwe, zhimyai byonse byakonsha kwimulabika nabiji kijimba, televizhonyi, ne foni. Kulomba saka mukyangye kutendeka lufunjisho kwanema bingi, mambo kulengela kulubako bintu bikwabo bya pa jojo juba ne kutatu muchima pa Mambo a Lesa.—Filipai 4:6, 7.

Shabulai pa mikumbu ne kwinengezha kukumbulapo. Yukai patanshi kibena kwambapo yeo mutwe. Langulukaipo pa mutwe wa kyo kyo kibaba nangwa kitango, ne kumona tumitwe twa tucheche byo twakwatankana na kishina, ne kumona bipikichala ne mepuzho a kupitulukamo aamba pa bishinka bikatampe. Apa bino mwatendeka kutanga mafuka ne kukeba mikumbu ya mepuzho anembwa. Tangai binembelo byonse byo bamwesha ne kumona byo byakwatankana na kyo babena kwambapo. (Byubilo 17:11) Inge mwamona mukumbu, shabulai byambo bicheche mu jifuka bya kwimukwasha kuvuluka mukumbu. Pa kupwila, umvwe musaka kukumbulapo mwakonsha kusuntula kuboko ne kwambapo mu byambo byenu kwa kubula kutanga.

Kupitamo mu mitwe yapusana pusana ya pa kupwila kukemulengela ‘kulama bya buneme’ byo mwafunda mu Baibolo.—Mateo 13:51, 52.

• Ñanyi mutanchi ye mwafwainwa kulenga pa kunengezha kupwila?

• Mwakonsha kunengezha byepi pa kuba’mba mukakumbulepo?

Kufumatu ne kala, Yehoba ukeba kisemi kwikala pamo na kukosesha bulunda bwabo ne aye pa kuba’mba kisemi kikale kyakwatankana. (Mpitulukilo ya mu Mizhilo 6:6, 7) O ene mambo Bakamonyi ba kwa Yehoba o bekela na juba ja kupopwela kwa kisemi mu mulungu jimo, na kwisamba mambo a Lesa saka bakasuluka kwesakana na bibena kukebewa mu kisemi kyabo. Nangwa kya kuba mwikala bunke, kyanema bingi kwikalapo na kimye kya kupopwela Lesa ne kufunda Baibolo pa mutwe ye mwisajila anweba bene.

Kupopwela kwa kisemi ke kimye kya kufwenyenyamo kwipi ne Yehoba. “Fwenyai kwipi ne Lesa, ne aye ukafwenya kwipi ne anweba.” (Yakoba 4:8) Tumuyuka bulongo Yehoba inge twafunda byavula mu Mambo anji pa byo aji ne pa byo oba. Jishinda japeela kutendekelamo kupopwela kwenu kwa kisemi ke kutangila pamo Baibolo na jiwi jasansuka. Mwakonsha kulondela mutanchi wa kutanga Baibolo wa Kupwila kwa Bwikalo ne Mwingilo. Kabiji mwakonsha kwabenya jimo bya kutanga ku bonse mu kisemi, kabiji ne kwisambapo pa byo mwafunjile mu Binembelo.

Ke kimye kya kukwatankanya kisemi. Balume ne bakazhi, bansemi ne baana, bakosesha bulunda bwabo kupichila mu kufunjila pamo Baibolo. Kyafwainwa kwikala kimye kya lusekelo ne mutende kabiji bonse bafwainwa kutengelanga na lusekelo jino juba mu mulungu. Kwesakana na mafumbi a baana, bansemi bakonsha kusala bya kwisambapo byakonsha kwibakwasha pa mitwe ikala mu Kyamba kya Usopa ne mu Labainga! nangwa pa intaneti pa keyala wetu wa jw.org/kqn. Mwakonsha kwamba pa makatazho baana benu o bapitamo ku sukulu ne bya kwiapwisha. Mwafwainwa kutamba mutanchi wa pa TV wa JW (tv.jw.org) ne kwisambapo. Mwakonsha kufunda nyimbo yo mukemba pa kupwila ne kutomapo byatalala nangwa kujapo tukajo panyuma ya kupopwela kwa kisemi.

Kwikala pamo na kupopwela Yehoba kwanema bingi mambo kulengela kisemi kutemwa kufunda Mambo a Lesa, kabiji Lesa ukemupesha bingi.—Salamo 1:1-3.

• Mambo ka o twikela na kupopwela kwa kisemi?

• Bansemi bakonsha kulengela byepi kisemi kyabo kutemwa kupopwela kwa kisemi?

Mambo ka bano bantu o basangalela bibye? Baji pa kupwila kwetu kukatampe. Byonkatu bakalume ba Lesa bakala byo bebakambizhe kushonkena jisatu pa mwaka, ne atweba tutonga bingi kupwila kukatampe. (Mpitulukilo ya mu Mizhilo 16:16) Twikala na kupwila kusatu pa mwaka, kubuñana kwa mwanzo kwa juba jimo kubiji ne kushonkena kwa kijiiji kwa moba asatu. Tumwenamo byepi mu kuno kupwila konse?

Kukosesha bwanabwankazhi bwetu bwa bwina Kilishitu. Byonkatu bena Isalela byo basangalalanga pa kutota Yehoba “mu bipwilo,” ne atweba tumvwa bingi bulongo kutota Lesa pa kupwila kukatampe. (Salamo 26:12; tubyambo twapanshi; 111:1) Kuno kupwila kwitulengela kumonañana na Bakamonyi bakwetu ba ku bipwilo bikwabo ne bafuma mu byalo bingi. Pachaile twiyowa kajo na bakwetu pa nkambi, kino kibayisha lusekelo lwikalako pa kuno kupwila kwa kutota Lesa. (Byubilo 2:42) Pa kupwila kwa uno mutundu popo twimwena butemwe bwa “balongo bonse mwaya ntanda” bwitulengela kukwatankana.—1 Petelo 2:17.

Kwitukwasha kukosesha bulunda ne Lesa. Bena Isalela nabo bamwenangamo bingi mu kuno kupwila, mambo “bakwatakenye byambo” bya mu Binembelo byo bebalumbulwijilenga mo byayila. (Nehemiya 8:8, 12) Ne atweba tusanta bingi pa mikambizho ya mu Baibolo yotutambwila pa kupwila kukatampe. Mutanchi wa kupwila konse wikala na kishina kyafuma mu Binembelo. Tufunda byo twakonsha kuba kyaswa muchima wa Lesa mu bwikalo bwetu mu majashi azakula muchima, a kushilañana ne mu byamwekele. Tutundaikwa bingi pa kumvwa bibena kuchinchika balongo betu babena kwikela mwayila bwikalo bwa bwina Kilishitu mu ano moba akatazha. Bifwanyikizho bya minkunkumba bikalako pa kushonkena kwa kijiiji bitulengela kumvwisha mashimikila a mu Baibolo kabiji tufunjilako bintu byanema bingi. Pa kuno kupwila kukatampe konse, kwikala lubatizhilo lwa babena kumwesha patoka kwipana kwabo kwi Lesa.

• Mambo ka kupwila kukatampe kyo kwikela kimye kya lusekelo?

• Mwakonsha kumwenamo byepi mu kupwila kukatampe?

Lufu lwanji byo lwafwenyenye pepi, Yesu waambile’mba: “Ano mambo awama a Bufumu bakeasapwila pano pa ntanda ponse kwikala bukamonyi ku bisaka byonse bya bantu, apa bino mpelo ikafike.” (Mateo 24:14) Pano uno mwingilo wa kusapwila mwaya ntanda yonse twakonsha kumwingila byepi? Twakonsha kumwingila kupichila mu kulondela byaubanga Yesu byo ajinga pano pa ntanda.—Luka 8:1.

Tuya na kwisamba na bantu ku mazubo abo. Yesu wafunjishe baana banji ba bwanga kusapwila mambo awama ku nzubo ku nzubo. (Mateo 10:11-13; Byubilo 5:42; 20:20) Bano basapwishi batanshi bebabenye mapunzha a kusapwilamo. (Mateo 10:5, 6; 2 Kolinda 10:13) Ne lelo jino mwingilo wetu wa kusapwila bamunengezha bingi bulongo, bipwilo byonse bebipa nyaunda mwakwingijila. Kuba bino kwitulengela kufikizha mukambizho wa kwa Yesu wa “kusapwila bantu ne kushimuna bulongo.”—Byubilo 10:42.

Twibikako kusapwila bantu konse ko bakonsha kutanwa. Yesu witushijile mwa kulondela byo asapwilanga mu mapunzha mutanwa bantu bavula, nabiji kukitulu kya kalunga ka mema nangwa pa mushima patapulanga bantu mema. (Mako 4:1; Yoano 4:5-15) Ne atweba twisamba bya mu Baibolo na bantu mu mapunzha apusana pusana nabiji mu mikwakwa, mu mapunzha a busulu, nangwa pa lamya. Ne atweba tusapwila ku bo twikala nabo kipikipi, bo twingila nabo, bo tufunda nabo ne balongo betu. Kuno kwibikako kwetu kwalengela bantu bavula mwaya ntanda kumvwa “mambo a lupulukilo.”—Salamo 96:2.

Nanchi mwakonsha kuvulukapo muntu ye mwakonsha kwisamba nanji mambo awama a Bufumu bwa Lesa ne byo bukoba kulutwe nyi? Kange mwilamine ano mambo apana luketekelo ne. Isambaingapo na bakwenu.

• Ñanyi “mambo awama” o twafwainwa kusapwila?

• Bakamonyi ba kwa Yehoba babena kulondela byepi jishinda jaingijishanga Yesu pa kusapwila?

Kyambo kya kuba’mba “painiya,” kyamba pa boba basokola mapunzha akatataka ne kushinkwila bakwabo jishinda. Yesu wajinga nobe painiya, mambo bamutumine pano pa ntanda na kwingila mwingilo wa kupulusha bantu ne kushinkwila bantu jishinda ja lupulukilo. (Mateo 20:28) Lelo jino, baana banji ba bwanga bamulondela kupichila mu kwingilako pakatampe mu mwingilo wa ‘kufunjisha bantu kwikala baana banji ba bwanga.’ (Mateo 28:19, 20) Bamo bengilako mwingilo wa bupainiya.

Painiya ke musapwishi wa kimye kyonse. Bakamonyi ba kwa Yehoba bonse basapwishi ba mambo awama. Nangwa byonkabyo, bamo banengezha bwikalo bwabo bulongo pa kuba’mba bengilengako bupainiya bwa kimye kyonse, kwingila maola 70 pa ñondo pa ñondo mu mwingilo wa kusapwila. Basalapo kubula kutwela nkito yakonsha kwibajila kimye kyabaya pa kuba’mba bengileko uno mwingilo. Bakwabo nabo bebatongola kwikala bapainiya beikajila ne kwibatuma ku mapunzha kwakepa basapwishi ba Bufumu kabiji bengila maola 130 pa ñondo pa ñondo. Bapainiya bekala bwikalo bwapela, baketekela kuba’mba Yehoba ukebamwenanga byo bakeba mu bwikalo bwabo. (Mateo 6:31-33; 1 Timoti 6:6-8) Aba babula kukonsha kwikala bapainiya ba kimye kyonse, bengilako bupainiya bwa kukwasha pa bimye byo bakonsha, bengila maola 30 nangwa 50 pa ñondo.

Painiya watemwa Lesa ne bantu. Byonka byajinga Yesu, ne atweba mu ano moba tumona bantu bavula bapelelwa bafwainwa kuyuka Lesa ne kyaswa muchima wanji. (Mako 6:34) Pano bino twayuka bintu byakonsha kwibakwasha lonka luno ne kwibalengela kwikala na luketekelo lwakosa lwa kulutwe. Kutemwa bantu ko kulengela painiya kwingila kimye kyabaya na kukwasha bantu kuba’mba bomvwe mambo awama. (Mateo 22:39; 1 Tesalonika 2:8) Uno mwingilo wibalengela kufwenya kwipi ne Lesa, kwikala na lwitabilo lwakosa ne kwikala na lusekelo.—Byubilo 20:35.

• Painiya mwakonsha kumulumbulula byepi?

• Ki ka kilengela bamo kwikala bapainiya ba kimye kyonse?

Masukulu a kufunda pe Lesa anema bingi ku Bakamonyi ba kwa Yehoba. Aba bepana kwingila kimye kyonse mu mwingilo wa kusapwila Bufumu bebanengezhezha masukulu akwibakwasha “kwingila bulongo mwingilo.”—2 Timoti 4:5.

Sukulu wa Mwingilo wa Bupainiya. Panyuma ya kwingila mwaka umo mu mwingilo wa bupainiya bwa kimye kyonse, mulongo nangwa nyenga wakonsha kutanwa ku sukulu wa moba atanu na jimo wikela pa Nzubo ya Bufumu iji pepi. Uno sukulu waikelako kukwasha bapainiya kwikala na bulunda bwakosa ne Yehoba, kuwamisha busendwe bwabo mu mwingilo, ne kwibakwasha kutwajijila mu uno mwingilo mu bukishinka.

Sukulu wa Basapwishi ba Bufumu. Uno sukulu wa bañondo babiji waikelako kufunjisha bapainiya bapijilwa benengezha kuya na kwingijila konse kuji kukajilwa. Nabo kijitu nobe babena kwamba’mba: “Amiwa bano! Ntumai!” byonka byaubile Yesu Kilishitu, Musapwishi mwine wayukisha. (Isaya 6:8; Yoano 7:29) Kufuma pa nzubo ne kuya na kwingijila kungi kwavwangamo ne kufunda kwikala bwikalo bwapela. Bisho, nkilo ne kajo byakonsha kupusana bingi na byo apijilwa ko afuma. Kimo kimye kikebewa ne kufunda mulaka wakatataka. Uno sukulu ukwasha bonsetu, bakatanda ne bazhike ne baji mu masongola, baji na myaka ya kusemwa kutendekela pa 23 kufika pa 65 kwikala na bipangwa bya mupashi bya kwibakwasha mu mwingilo wabo ne kufunda bintu bibalengela kwibengijisha bingi kwi Yehoba ne jibumba janji.

Sukulu wa Baibolo wa Gileada wa Watchtower. Mu Kihebelu kyambo kya “Gileada” kilumbulula “Mulumba wa Bukamonyi.” Uno sukulu watendekele mu 1943. Baana ba sukulu kukila pa 8,000 bapwisha uno sukulu bebatuma mu mwingilo wa bumishonale na kushimuna bukamonyi “kufika kwapela ntanda.” Kabiji bengila bingi bulongo. (Byubilo 13:47) Bapwishishe uno sukulu byo bafikile kimye kitanshi mu Peru, kechi mwajingapo kipwilo ne. Pano luno muji bipwilo kukila pa 1,000. Bamishonale byo bafikile mu kyalo kya Japan, Bakamonyi kechi bakijile pa jikumi ne. Lelo jino muji Bakamonyi kukila pa 200,000. Uno sukulu wa Gileada wa bañondo batanu mwavwangwa kufunda Mambo a Lesa bulongo. Baji mu mwingilo wa bupainiya bwiikajila nangwa bamishonale, bengijila pa ofweshi wa musampi, ne baji mu mwingilo wa bukalama bwa mwanzo bebeta ku uno sukulu ko bebafunjisha bulongo bya kwibakwasha kushikimana ne kutwala mwingilo wa kusapwila palutwe.

• Mambo ka o kwaikela Sukulu wa Mwingilo wa Bupainiya?

• Bañanyi bo banengezhezha Sukulu wa Basapwishi ba Bufumu?