LUFUNJISHO 26
Mambo ka Bubi ne Buyanji o Byaikelako?
Inge bintu byatama byamweka, kijitu bulongo kwipuzha’mba: “Mambo ka bintu byatama o byamwekela?” Twatemwa bingi kuba’mba Baibolo witubuula mikumbu yawama bingi ya buno bwipuzho.
1. Satana waletele byepi bubi pano pa ntanda?
Satana Diabola wasatukijile Lesa. Satana wakebelenga’mba atangijilenga bantu. Onkao mambo, waongwele Adama ne Evwa kuba’mba nabo basatukile Lesa. Satana waingijishe bubela kujimbaika Evwa. (Ntendekelo 3:1-5) Satana walengejile Evwa kutendeka kuzhinauka Yehoba kuba’mba kechi wakebelenga’mba ekale na bintu byawama ne. Ñambilo yanji yamwesheshe kuba’mba bantu bafwainwa kwikala bingi bulongo inge kebabule kukookela Lesa. Satana wabepele Evwa amba kechi ukafwa ne. Akino kyo kyalengela Baibolo kutongola Satana amba “ye wa bubela kabiji ye shanja bubela.”—Yoano 8:44.
2. Ñanyi kintu kyasajilepo kuba Adama ne Evwa?
Yehoba wapeele Adama ne Evwa bintu byavula bingi. Wibambijile’mba bafwainwa kuja ku bipangwa byonse bya mu bujimi bwa Edena kufumyakotu kipangwa kimo. (Ntendekelo 2:15-17) Bino abo basajilepo kuja ku kipangwa kyo bebakainye kujako. Evwa “waapileko kipangwa ne kuja.” Kabiji Adama naye “wajiile” ku kino kipangwa. (Ntendekelo 3:6) Bonse babiji basajilepo kubula kukookela Lesa. Adama ne Evwa byo bajinga baoloka, kechi bajingapo na muchima wa kuba bintu byatama ne. Bino byo bakaine kukookela Lesa, bene besajijilepo kuba kintu kyatama. Onkao mambo, balengele mambo ne kukana buntangi bwa Yehoba. Kulengulula bibabuujile Lesa kwibaletelejile bya malwa byavula bingi.—Ntendekelo 3:16-19.
3. Bintu byaubile Adama ne Evwa bituletelela byepi ne atweba?
Adama ne Evwa byo balengele mambo, baikele ke bandengamambo. Onkao mambo, basambwisheko bundengamambo baana babo bonse. O ene mambo Baibolo o aambila pe Adama amba: “Bundengamambo byo bwatwelele pano pa ntanda mu muntu umo, ne lufu nalo lwaishijile mu bundengamambo, byonkabyo lufu lwakumbene ku bantu bonse.”—Loma 5:12.
Kuji bintu byavula bingi bitulengela kuyanda. Kimye kimo, tuyanda na mambo a kubula kufuukula bintu bulongo atweba bene. Bimye bikwabo, tuyanda na mambo a kuba’mba bakwetu bafuukwile bintu kutama. Kabiji tuyanda na mambo a kuba’mba kampe twajinga pa mpunzha yatama ne pa kimye kyabula kufwainwa.—Tangai Musapwishi 9:11.
FUNJILAIPO BIKWABO
Monai ene mambo o twafwainwa kubujila kupamo Lesa mambo pa bintu byatama ne kuyanda kuji mu ino ntanda lelo jino. Kabiji yukai Lesa byo omvwa ku muchima inge tubena kupita mu makatazho.
4. Ñanyi ubena kwitulengela kupita mu makatazho?
Bantu bavula bamba’mba Lesa ye ubena kulama ino ntanda. Nanchi kino kya kine nyi? Tambai VIDYO.
Tangai Yakoba 1:13 ne 1 Yoano 5:19, ne kwisamba buno bwipuzho:
Nanchi twafwainwa kupamo Lesa mambo amba ye ubena kwitulengela kuyanda ne kuleta bintu byatama nyi?
5. Ñanyi bintu byamweka kufuma patendekejile Satana kulama ino ntanda?
Tangai Ntendekelo 3:1-6, ne kwisamba ano mepuzho:
Ñanyi bubela bwaambile Satana?—Monai kyepelo 4 ne 5.
Satana watazhizhenga muka byo aambile’mba Yehoba wataaine bantu bintu byawama?
Kwesakana na byaambile Satana, nanchi bantu bafwainwa kusala Yehoba kwikala kalama wabo pa kuba’mba bekale na lusekelo nyi?
Tangai Musapwishi 8:9, ne kwisamba buno bwipuzho:
Pa myaka yonseye Yehoba yo abula kwikala kalama wa ino ntanda, bintu byaikala byepi mu ntanda?
Adama ne Evwa bajinga baoloka kabiji baikelenga mu paladisa. Nangwa byonkabyo, abo basajilepo kumvwina Satana ne kusatukila Yehoba
Kufumatu kimye kyo basatukile, ntanda yakumbene na bundengamambo, kuyanda ne lufu
Yehoba ukafumyapo bundengamambo, kuyanda ne lufu. Kabiji bantu bakekala baoloka jibiji ne kwikala mu paladisa
6. Yehoba wituta bingi muchima nangwa tubena kupita mu makatazho
Nanchi Lesa wituta muchima inge tubena kupita mu makatazho nyi? Tangai byanembele Mfumu Davida ne mutumwa Petelo. Tangai Salamo 31:7 ne 1 Petelo 5:7, ne kwisamba buno bwipuzho:
Bino binembelo bimukosesha byepi kuyuka’mba Yehoba umona ne kwituta muchima pa makatazho o tubena kupitamo?
7. Lesa ukafumyapo makatazho onse abena kupitamo bantu
Tangai Isaya 65:17 ne Lumwekesho 21:3, 4, ne kwisamba buno bwipuzho:
Yehoba walaya’mba ukafumyapo bintu byonsetu byatama byalengela bantu kuyanda. Nanchi uno mulaye mwamutemwa nyi?
Bishinka bikwabo
Satana byo aambile bubela butanshi, walengulwile bingi Yehoba. Satana walengejile bantu kulanguluka bintu byatama pe Yehoba amba kechi kalama wawama ne. Inge Yehoba wafumyapo makatazho onse abena kupitamo bantu, uketumbijika mwine. Ko kuba’mba ukamwesha’mba bukalama bwanji kine bo bwawama. Kutumbijika jizhina ja Yehoba ke kintu kyanema bingi mwiulu ne pano pa ntanda.—Mateo 6:9, 10.
BANTU BAMO BAMBA’MBA: “Lesa ukeba’mba tuyandenga.”
Nga anweba musakwambapo’mba ka?
ÑANYI BISHINKA BYO MWAFUNDA?
Satana Diabola, Adama ne Evwa bo baleta makatazho aji mu ntanda. Pakuba Yehoba wituta bingi muchima nangwa tubena kupita mu makatazho kabiji katatakatu akeafumyepo onsetu.
Mepuzho a kupitulukamo
Ñanyi bubela Satana Diabola bo abuujile Evwa?
Bunsatuki bwa kwa Adama ne Evwa bwituletelela byepi ne atweba bonse?
Twayuka byepi amba Yehoba wituta bingi muchima nangwa tubena kupita mu makatazho?
KEBAI BISHINKA BIKWABO
Umvwai byalumbulula Baibolo kyambo kya bundengamambo.
Tangilaipo ne bishinka bikwabo pa mambo akolomwene Satana Diabola mu bujimi bwa Edena.
“Mambo ka Lesa o Aswishisha Buyanji?” (Kyamba kya Usopa, January 1, 2014)
Monai mikumbu yawama ya buno bwipuzho bwakatazha bingi.
Umvwai byaambile mwanamulume umo byo ayukile bishinka pa makatazho apichilengamo bantu.