LUFUNJISHO 19
Nanchi Bakamonyi ba kwa Yehoba Bena Kilishitu ba Kine Nyi?
Atweba Bakamonyi ba kwa Yehoba, twayuka kuba’mba twi bena Kilishitu ba kine. Mambo ka o twaambila bino? Nanchi bintu byo tufunjisha twibifumya pi? Mambo ka o twitongwela’mba Bakamonyi ba kwa Yehoba? Tumwesha byepi kuba’mba twitemwa atweba bene na bene?
1. Bintu bifunjisha Bakamonyi ba kwa Yehoba bifuma pi?
Yesu waambile’mba: “Byambo bya [Lesa] bo bukine.” (Yoano 17:17) Byonkatu byaubanga Yesu, Bakamonyi ba kwa Yehoba nabo bintu byo bafunjisha bifuma mu Mambo a Lesa. Langulukai pa Bakamonyi ba kwa Yehoba batelwanga kala amba bafunda Baibolo. Mu mwaka wa 1870, jibumba ja bafunda Baibolo jatendekele kukebakeba bishinka mu Baibolo kuba’mba bayuke byo aamba. Byo bafunjishanga byafumanga mu Baibolo nangwatu kya kuba byapusene na bintu byafunjishanga machechi akwabo. Ponkapotu abo batendekele kusapwila bantu bukine bwa mu Baibolo bo bafunjilenga.a
2. Mambo ka o twitongwela’mba Bakamonyi ba kwa Yehoba?
Yehoba watongola bapopweshi banji amba Bakamonyi banji mambo basapwila bukine bwaamba pe aye. (Bahebelu 11:4–12:1) Kala Lesa wabuujile bantu banji amba: “Anweba yenu bakamonyi bami.” (Tangai Isaya 43:10.) Yesu bamutongola’mba “Kamonyi wa Kishinka.” (Lumwekesho 1:5) Onkao mambo, mu 1931 twatendekele kwitongola’mba Bakamonyi ba kwa Yehoba. Twatemwa bingi kwitutela pa jino jizhina.
3. Bakamonyi ba kwa Yehoba bamwesha byepi butemwe bwajingapo ne Yesu?
Yesu watemenwe bingi baana banji ba bwanga kabiji baikele ke kisemi kwi aye. (Tangai Mako 3:35.) Ne Bakamonyi ba kwa Yehoba nabo bakwatankana bingi, kabiji baikala ke kisemi kimo kya ntanda yonse. O ene mambo o twitongwela’mba balongo ne banyenga. (Filemonyi 1, 2) Kabiji tukookela mukambizho wa kuba’mba: “Saka mutemwa balongo bonse mwaya ntanda.” (1 Petelo 2:17) Bakamonyi ba kwa Yehoba bamwesha butemwe mu mashinda avula bingi. Jishinda jimo jo bobilamo bino, ke kukwasha balongo ne banyenga bakajilwa mwaya ntanda yonse.
FUNJILAIPO BIKWABO
Yukai byaiyako Bakamonyi ba kwa Yehoba ne kwimwena bishinka bimwesha’mba twi bena Kilishitu ba kine.
Bena Kilishitu ba kine bafunjisha bintu biji mu Baibolo ne kusapwila bantu
4. Byo tufunjisha bifuma mu Baibolo
Yehoba waambijile jimo amba mu moba a kupelako, tukomvwisha bukine buji mu Baibolo. Tangai Danyela 12:4 ne tubyambo twa munshi, ne kwisamba buno bwipuzho:
Ñanyi bintu ‘bikavula bingi’ mu bantu ba Lesa byo batwajijila kukebakeba biji mu Baibolo?
Monai byaubile jibumba ja bafunda Baibolo kuvwangakotu ne ba Charles Russell byo bafundanga Mambo a Lesa. Tambai VIDYO, ne kwisamba buno bwipuzho.
Mu vidyo ye mwatamba, ba Charles Russell ne bakwabo bafunda Baibolo, bafundanga byepi Baibolo?
Bishinka bikwabo
Bimye bimo, twapimpulako bintu bimo byo twaitabilamo. Mambo ka? Mambo byonkatu juba byo jisaama pachepache, ne Lesa naye witukwasha kumvwisha Mambo anji pachepache. (Tangai Byambo bya Maana 4:18.) Nangwa kya kuba biji mu Baibolo kechi byaluka ne, bino inge twaumvwisha byaamba Baibolo, tupimpulako byo tufunjisha.
5. Tusapwila bukine bwaamba pe Yehoba
Mambo ka o twitongwela’mba Bakamonyi ba kwa Yehoba? Tambai VIDYO, ne kwisamba buno bwipuzho.
Mambo ka jizhina ja kuba’mba Bakamonyi ba kwa Yehoba o jayilamo?
Mambo ka Yehoba o asajila bantu kuba’mba bekale bakamonyi banji? Wibasala kuba’mba bakwashe bantu kuyuka’mba ye Lesa wa kine, mambo bantu baamba bya bubela byavula bingi pe aye. Twayai twisambepo bubela bubiji.
Bupopweshi bumo bufunjisha bantu amba Lesa ukeba’mba bamupopwelenga kwingijisha bipashañano. Nanchi kino kya kine nyi? Tangai Bena Levi 26:1, ne kwisamba ano mepuzho:
Ñanyi kishinka kyasoloka mu kino kinembelo? Yehoba umvwa byepi ku muchima kumona bantu na kwingijisha bankishi?
Bantangi ba bupopweshi bamo bafunjisha’mba Yesu Lesa. Nanchi kino kya kine nyi? Tangai Yoano 20:17, ne kwisamba ano mepuzho:
Ñanyi kishinka kyasoloka mu kino kinembelo? Nanchi Lesa ne Yesu muntu umotu nyi?
Mumvwa byepi ku muchima kuyuka’mba Yehoba watuma Bakamonyi banji kusapwila bukine pe aye ne pa Mwananji?
6. Twitemwa atweba bene na bene
Baibolo waesakanya bena Kilishitu ku mubiji wa muntu uji na binungwa byapusana pusana. Tangai 1 Kolinda 12:25, 26, ne kwisamba ano mepuzho:
Ñanyi kintu kyuba bena Kilishitu inge bakwabo bena Kilishitu babena kupita mu makatazho?
Ñanyi kintu kyo mwamona pa bitemwa Bakamonyi ba kwa Yehoba?
Inge Bakamonyi ba kwa Yehoba babena kumanama ku mpunzha imo, Bakamonyi bakwabo ntanda yonse bepana kwibakwasha. Pa kuba’mba muswe kino, tambai VIDYO. Apa bino mwisambe buno bwipuzho.
Bakamonyi ba kwa Yehoba bakwashishe byepi bakwabo kitentanshi byo kyapwile?
Bena Kilishitu ba kine bakwasha bakwabo baji mu makatazho
BANTU BAMO BEPUZHA’MBA: “Anweba kechi mwamumonapo kala Yehoba ne. Pano mwitongola byepi amba Bakamonyi ba kwa Yehoba?”
Kufuma ñanyi kimye Yehoba po atongwele bapopweshi banji ba kine amba Bakamonyi?
ÑANYI BISHINKA BYO MWAFUNDA?
Bakamonyi ba kwa Yehoba ke bena Kilishitu ba kine. Atweba twi kisemi kya ntanda yonse kya bapopweshi ba Yehoba. Byo tufunjisha bifuma mu Baibolo kabiji tubuula bantu bukine bwaamba pe Yehoba.
Mepuzho a kupitulukamo
Mambo ka o twitongwela’mba Bakamonyi ba kwa Yehoba?
Tumwesha byepi kuba’mba twitemwa atweba bene na bene?
Nanchi mwalanguluka’mba Bakamonyi ba kwa Yehoba bena Kilishitu ba kine nyi?
KEBAI BISHINKA BIKWABO
Funjilaipo bishinka bikwabo byaamba pe atweba Bakamonyi ba kwa Yehoba.
Monai kino kyamwekele kyamwesha Bakamonyi ba kwa Yehoba byo basolwele patoka mafunjisho a bubela.
Taanai mikumbu ya mepuzho o muji nao pa Bakamonyi ba kwa Yehoba.
“Mepuzho Epuzha Bantu Javula pa Bakamonyi ba kwa Yehoba” (Kibaaba kiji pa jw.org)
Ba Stephen bashikilwe bantu bamba milaka ingi ne kwibakatazha. Tangai pa ba Stephen muyuke kintu kyo bamwene mu Bakamonyi ba kwa Yehoba kibalengejile kupimpula byubilo byabo.
“Bwikalo Bwami Bwayilengatu na Kutaminako” (Kyamba kya Usopa, July 1, 2015)
a Kufuma mu mwaka wa 1879, bantu ba Yehoba basampanya Kyamba kya Usopa ku bantu kulumbulwilamo bukine bwa mu Baibolo.