Nanchi Mwafikilamo Kubatizhiwa Nyi?

Mwafunda bintu byavula bingi mu Baibolo byaamba pe Yehoba. Kampe mwapimpula ne byubilo byenu bimo na mambo a kwingijisha bintu byo mwafunda. Kabiji kampe kujipo bintu bimo bibena kwimulengela kubula kwipana kwi Yehoba ne kubatizhiwa. Onkao mambo, mu uno mutwe musakufunda pa mikiika imo ilengela bantu bamo kubula kubatizhiwa. Kabiji tusakwisamba ne pa byo mwakonsha kuba.

1. Ñanyi bintu byo mwafwainwa kuyuka saka mukyangye kubatizhiwa?

Pa kuba’mba mubatizhiwe, mwafwainwa “kuyukisha bulongo bukine.” (1 Timoti 2:4) Akino kechi kibena kulumbulula’mba mwafwainwatu kubatizhiwa kana mwayuka mikumbu yonse imwipuzha bantu pa Baibolo ne. Mambo nangwatu bena Kilishitu babatizhiwe kala nabo kechi baleka kufunda ne. (Kolose 1:9, 10) Pano bino, mwafwainwa kuyuka bukine bwa mu Baibolo. Inge mubena kwizhinauka kana mwayuka byavula pa Baibolo nangwa ne, bakulumpe mu kipwilo bafwainwa kwimukwasha.

2. Ñanyi bintu bimo byo mwafwainwa kuba saka mukyangye kubatizhiwa?

Saka mukyangye kubatizhiwa, mwafwainwa ‘kulapila ne kwaluluka.’ (Tangai Byubilo 3:19.) Akino kibena kulumbulula’mba mwafwainwa kulomba kwi Yehoba kwimulekelako mambo enu ne kuja nyenye. Kabiji mwafwainwa kushikwa bintu byonse byatama ne kwibikako kubanga bintu bitokesha Lesa ku muchima. Kununga pa bino mwafwainwa kutendeka kutanwanga ku kupwila kabiji inge mwaikala musapwishi wabula kubatizhiwa mukasapwilanga pamo na kipwilo.

3. Mambo ka o mwafwainwa kubujila kuchina kubatizhiwa?

Bantu bamo bachina kubatizhiwa amba bakakankalwa kutwajijila kuba kyaswa muchima wa Yehoba. Akino kishinka, mambo kimye kimo mukalenga mambo. Mambo nangwatu banabalume ne banabakazhi bakishinka bo baambapo mu Baibolo nabo balenganga mambo. Yehoba wayuka’mba bantu banji kechi baoloka ne. (Tangai Salamo 103:13, 14.) Yehoba utemwa bingi inge mwibikako kuba bintu byawama! Aye ukemukwasha. O ene mambo, Yehoba o etubuujila’mba kafwako kintu nangwa kimo ‘kyakonsha kwitwabanya na butemwe bwa bwanji ne.’​—Tangai Loma 8:38, 39.

FUNJILAIPO BIKWABO

4. Yukai bulongo Yehoba

Ñanyi bintu byo mwafwainwa kuyuka pe Yehoba saka mukyangye kubatizhiwa? Mwafwainwa kumuyuka bulongo Yehoba pa kuba’mba mumutemwe ne kubanga bintu bimutokesha ku muchima. Tambai VIDYO mumone bantu babena kufunda Baibolo mwaya ntanda byo babena kuba kino. Kepo mwisambe ano mepuzho:

VIDYO: Kufuukulapo Kubatizhiwa (3:56)

• Ñanyi bintu byakwashishe bano bantu bo mwatamba mu vidyo kufuukulapo kubatizhiwa?

Tangai Loma 12:2, ne kwisamba ano mepuzho:

• Nanchi mubena kuzhinaukapo bintu bimo biji mu Baibolo nangwa inge Bakamonyi ba kwa Yehoba bafunjisha bukine nyi?

• Inge kujipo bintu bimo byo muzhinauka, mwakonsha kuba byepi?

5. Shindai mikiika yakonsha kwimulengela kubula kubatizhiwa

Inge twasalapo kwipana kwi Yehoba ne kubatizhiwa, kechi kilumbulula’mba pano twaamukako ku makatazho ne. Akimonai kino kyamwekele, tambai VIDYO, ne kwisamba ano mepuzho.

VIDYO: Kutemwa Yehoba Kushinda Makatazho (5:22)

• Mu vidyo ye mwatamba, ñanyi makatazho ashinjile Narangerel pa kuba’mba engijilenga bulongo Yehoba?

• Kutemwa Yehoba kwamukwashishe byepi kushinda ano makatazho?

Tangai Byambo bya Maana 29:25 ne 2 Timoti 1:7, ne kwisamba buno bwipuzho:

• Ñanyi kintu kitukwasha kushinda makatazho?

6. Ketekelai mwi Yehoba kwimukwasha

Yehoba ukatwajijila kwimukwasha. Tambai VIDYO, ne kwisamba ano mepuzho:

VIDYO: Yehoba Lesa Ukemukwasha (2:50)

• Mu vidyo ye mwatamba, ñanyi kintu kyalengejile wafundanga Baibolo kubula kukeba kubatizhiwa?

• Ñanyi bintu byo afunjile byamukwashishe kuketekela mwi Yehoba?

Tangai Isaya 41:10, 13, ne kwisamba buno bwipuzho:

• Mambo ka o mwafwainwa kushiinwa’mba mukafizha mulaye ye mwalayile pa kwipana kwi Yehoba?

7. Mweshainga’mba musanta pa butemwe bwimumwesha Yehoba

Inge saka mulanguluka pa bimutemwa Yehoba, kikemulengela kumusanchilanga ne kukebesha kumwingijilanga myaka ne myaka. Tangai Salamo 40:5, ne kwisamba buno bwipuzho:

• Ñanyi bintu byawama bimubilapo Yehoba byo mu musanchilapo?

Ngauzhi Yelemiya watemenwe bingi Yehoba ne Mambo anji. Kabiji wasanchile bingi pa kwikala kalume wa Yehoba. Waambile’mba: “Byambo byenu byalengejile muchima wami kusekela ne kusangalala, mambo natelwa pa jizhina jenu, anweba Yehoba Lesa.” (Yelemiya 15:16) Kumbulai ano mepuzho:

• Mambo ka o kyanemena kwikala Kamonyi wa kwa Yehoba?

• Nanchi mukeba kubatizhiwa kwikala Kamonyi wa kwa Yehoba nyi?

• Nanchi kujipo bintu bimo bibena kwimulengela kubula kukeba kubatizhiwa nyi?

• Ñanyi bintu byo mwafwainwa kuba pa kuba’mba mubatizhiwe?

ÑANYI BISHINKA BYO MWAFUNDA?

Na bukwasho bwa Yehoba, mukashinda mikiika yonse yakonsha kwimulengela kubula kubatizhiwa.

Mepuzho a kupitulukamo

• Ñanyi bintu bya mu Baibolo byo mwafwainwa kuyuka pa kuba’mba mubatizhiwe?

• Ñanyi bintu byo mwafwainwa kuleka kuba saka mukyangye kubatizhiwa?

• Mambo ka o mwafwainwa kubujila kuswisha moyo kwimulengela kubula kubatizhiwa?

KEBAI BISHINKA BIKWABO

Monai kine kintu kyafwainwa kwimutundaika kubatizhiwa.

“Nanchi Mwafikilamo Kubatizhiwa Nyi?” (Kyamba kya Usopa, March 2020)

Yukai bya kushinda mikiika yakonsha kwimulengela kubula kubatizhiwa.

“Ñanyi Kintu Kisakunkanya Kubatizhiwa?” (Kyamba kya Usopa, March 2019)

Monai bintu byakwashishe mwanamulume umo kushinda mikiika pa kuba’mba abatizhiwe.

‘Ki ka Kibena Kunkanya Kubatizhiwa?’ (1:10)

Patanshitu mwanamulume wa jizhina ja Ataa wakankazhaminenga kubatizhiwa. Pano monai kintu kyamulengejile kufuukulapo kubatizhiwa.

Nanchi Kine Byamfwainwabye Nyi? (7:21)