Ikalai Bakishinka mu Bintu Byonse

Muntu yense ukeba kwikala na balunda bakishinka. Yehoba naye ukeba balunda nanji kwikala bakishinka. Pano bino, kechi kyapeela kwikala wakishinka mu ino ntanda mwavula bantu babula bukishinka ne. Nanchi ñanyi bintu byawama byo tumwenamo inge twaikala bakishinka mu bintu byonse?

1. Mambo ka o twafwainwa kwikela bakishinka?

Inge twaikala bakishinka na bakwetu, tumwesha’mba twatemwa Yehoba kabiji twamunemeka. Kabiji Yehoba wayuka bintu byonsetu byo tulanguluka ne byo tuba mu bwikalo bwetu. (Bahebelu 4:13) Aye umona inge twibakishinka kabiji kuba bino kumutokesha bingi ku muchima. Baibolo waamba’mba: “Yehoba washikwa muntu wa bujimbijimbi, pakuba aba baoloka bo balunda nanji ba pa muchima.”​—Byambo bya Maana 3:32.

2. Mu ñanyi mashinda amo mo twafwainwa kwikela bakishinka kimye kyonse mu bwikalo bwetu?

Yehoba ukeba atweba kuba’mba ‘twambenga bya kine mu lwetu.’ (Zekaliya 8:16, 17) Kuba bino kulumbulula ka? Inge tubena kwisamba na kisemi kyetu, mo twingijila nkito, balongo ne banyenga mu kipwilo nangwa na bakulumpe ba mukafulumende, kechi twafwainwa kwibabuula bya bubela nangwa kwamba bintu bingi ne. Bantu bakishinka kechi bebila bakwabo nangwa kwibepa ne. (Tangai Byambo bya Maana 24:28 ne Efisesa 4:28.) Bantu bakishinka bapana misonko yonse. (Loma 13:5-7) Mu ano mashinda ne mashindatu akwabo, atweba “tukebesha kwikala ba kishinka mu bintu byonse.”​—Bahebelu 13:18.

3. Ñanyi bintu byawama bifuma mu kwikala bakishinka?

Inge bantu betuyuka’mba twibakishinka, baketuketekela bingi. Inge twaikala bakishinka tulengela balongo ne banyenga bonse mu kipwilo kuyuka’mba bazhikijilwa byonkatu byo kikala mu kisemi muji bantu betemwa. Kuba bino kwitukwasha kwikala na jiwi ja mu muchima jatooka. Kabiji bukishinka bwetu bulengela “lufunjisho lwa Mupulushi wetu aye Lesa, kutotwa.” Kabiji butundaika bantu kukebesha kwingijila Yehoba.​—Titusa 2:10.

FUNJILAIPO BIKWABO

4. Bantu bakishinka batokesha Yehoba ku muchima

Tangai Salamo 44:21 ne Malakai 3:16, ne kwisamba ano mepuzho:

• Mambo ka o kyatamina kulanguluka’mba twakonsha kufya Yehoba bintu byo tuba?

• Mwalanguluka’mba Yehoba umvwa byepi ku muchima inge twaamba bintu bya kine nangwa kya kuba kyakatazha kuba bino?

5. Ubainga bintu mu bukishinka kimye kyonse

VIDYO: Ñanyi Kintu Kilengela Kwikala na Lusekelo?—Jiwi ja mu Muchima Jatooka (2:32)

Tangai Bahebelu 13:18, kepo mwisambe byo twakonsha kwikala bakishinka . . .

• mu kisemi kyetu.

• pa nkito nangwa pa sukulu.

• ne mu bintutu bikwabo.

6. Kwikala wakishinka kwitukwasha bingi

Kimye kitanshi, mwakonsha kulanguluka’mba inge muntu waikala wakishinka wakonsha kwiletelelatu. Pano bino, mu kuya kwa kimye, mukayuka’mba kwikala wakishinka mufuma bintu byawama bingi. Tangai Salamo 34:12-16, ne kwisamba buno bwipuzho:

• Bukishinka bwimukwasha byepi mu bwikalo bwenu?

1. Bamulume ne mukazhi bakishinka bakosesha masongola abo

2. Ba mingilo bakishinka bebaketekela bingi pa nkito ku bakulumpe babo

3. Bangikazhi bakishinka bebanemeka bingi ku bakulumpe ba mukafulumende

ÑANYI BISHINKA BYO MWAFUNDA?

Yehoba ukeba balunda nanji kwikala bakishinka mu bintu byonsetu byo bamba ne kuba mu bwikalo bwabo.

Mepuzho a kupitulukamo

• Mu ñanyi mashinda amo mo twafwainwa kwikela bakishinka?

• Mambo ka o kyatamina kulanguluka’mba twakonsha kufya Yehoba bintu byo tuba?

• Mambo ka o mukebela kwikala bakishinka kimye kyonse?

KEBAI BISHINKA BIKWABO

Bansemi bafwainwa kufunjisha byepi baana babo kwikala bakishinka?

Ikalai Bakishinka (1:44)

Mambo ka o kyawamina kufikizha bintu byonse byo tulaya?

Fikizhainga byo Mulaya pa Kuba’mba Lesa Emupeshe (9:09)

Twafwainwa kupananga misonko nangwa kya kuba babena kwiingijisha ku bintu bingi.

“Misonko—Abya Mwafwainwa Kwiipana Nyi?” (Kyamba kya Usopa, September 1, 2011)

Ñanyi kintu kyakwashishe mwanamulume umo wabujile bukishinka kupimpula byubilo byanji ne kutendeka kuba bintu mu bukishinka?

“Naishile Kuyuka’mba Yehoba wa Lusa Kabiji Ulekela Mambo” (Kyamba kya Usopa, May 1, 2015)