Fwenyai Kwipi ne Lesa
Shanja Baana Babulwa Shabo
“SHANJA babulwa shabo . . . ye Lesa, uji mwanji mwazhila.” (Salamo 68:5) Bino byambo byanembelwe na mupashi bitufunjisha kilengela kufwenya kwipi ne Yehoba Lesa, kabiji aye uta muchima bakajilwa. Mizhilo yo apaine ku bena Isalela yamwesheshe byo ata muchima baana banshiwa. Twayai tubalaule kinembelo kitanshi kyaamba pa “mwana wanshiwa” kiji mu Kulupuka 22:22-24.a
Lesa wibakambizhe’mba: “Kechi mukayanjishe . . . mwana wanshiwa ne.” (Kyepelo 22) Uno kechi wajingatu mukambizho wa kukebatu’mba bantu balame bulongo baana ba kishale ne, wajinga mukambizho wafumine ku mwine Lesa. Mwana wafwisha bashanji washalangatu kwa kubula wa kumuzhikijila ne kumulama ne. Onkao mambo, kyapelele bingi kumuyanjisha. Kafwako wafwainwe ‘kuyanjisha’ uno mwana ne. Mu ma Baibolo amo kyambo kya ‘kuyanjisha’ bekituntulula’mba “kunena,” “kumanyika” ne “kujimukila.” Kuba kyatama mwana wa kishale ajinga mambo akatampe ku meso a Lesa. Pano nga Lesa wamonanga byepi ano mambo akatampe?
Muzhilo watwajijile’mba “Inge mwibayanjisha, ke banjijile, kine nkomvwa kujila kwabo.” (Kyepelo 23) Kyepelo 22 kyaamba pa bantu bavula amba “inge mwibayanjisha,” bino kyepelo 23 akyo kyaamba pa muntu umo amba “kechi mukayanjishe.” Ko kuba’mba mukoka yense, ne bantu bonse pa muntu pa muntu bafwainwe kukokela uno muzhilo wa Lesa. Yehoba wibasopanga ne kwibomvwa baana banshiwa umvwe bamujijila kabiji winengezhezhe kwibakwasha.—Salamo 10:14; Byambo bya Mana 23:10, 11.
Pano i ki ka kyamwekanga umvwe muntu ke ayanjishe mwana wa kishale, kumulengela kujijila Lesa? Yehoba waambile’mba: “Bukaji bwami bukabuka; nkemwipaya na mpoko.” (Kyepelo 24) Buku umo waamba pa Baibolo wamba’mba “kyo kimotu ne kwamba amba ‘mubena kunununsha’ ino ke ñambilo ya kifwanyikizho ilumbulula bukaji bukatampe.” Yehoba kechi walekejile bamitonyi mu Isalela kuchiba ano mambo ne. Lesa mwine ye wachibanga mambo a muntu wayanjishenga mwana wanshiwa wabujile wa kumuzhikijila ne.—Mpitulukilo ya mu mizhilo 10:17, 18.
Yehoba kechi waaluka ne. (Malakai 3:6) Ne luno wakibata muchima baana babula bansemi nangwa bafwishapo umo. (Yakoba 1:27) Kange mwisulwe kwibamanyika ne, mambo shabo baana banshiwa uzhingila na mambo a bololoke bwanji umvwe mwauba kyatama baana bubula mambo. Bamanyika baana babula wa kwibazhikijila kechi bakapuluka pa “juba ja bukaji bwa Yehoba” ne. (Zefwaniya 2:2) Bano bandengamambo bakayuka’mba “kyo kintu kyakatazhatu kuponena mu maboko a Lesa mumi.”—Bahebelu 10:31.
[Tubyambo twa mushi]
a Kyambo kya “mwana wanshiwa” kitanwa mu Baibolo bimye 40. Nangwa mu Kihebelu baingijisha kyambo kimenako mwana wa mulume, bino kechi twafwainwa kulanguluka’mba ino mikambizho yashilepo baana ba nshiwa babakazhi bafwisha shabo ne. Mizhilo ya bena Isalela yaambile ne pa baana babakazhi babula bashabo.—Kubala 27:1-8