Byo Mwakonsha Kumvwa Biji mu Baibolo

2. Tangainga na Muchima Umo

Nanchi bakimubulapo byambo byatama ku mulunda nenu pa muntu ye mwabula kumonañanapo kala nanji nyi? Byo mwamonañene na yewo muntu nanchi bimubujile mulunda nenu bimulengejile kubula kumona bya bupe ne byubilo byawama mu yewo muntu nyi? Byobyo kiji ne ku Baibolo.

MUTUMWA Paulo witujimwineko ku kyakonsha kumweka umvwe ketutange Baibolo na michima ibiji. Paulo wanembele pa Bayudea bamo bajingako mu oa moba amba: ‘Amiwa nebashimuna namba baji na lupata lwa kusaka Lesa, bino kechi lwayila mu maana ne.’—Loma 10:2.

Bayudea bamo ba mu myaka kitota kitanshi kechi baitabile amba Yesu ye Mesiasa ne, nangwa kya kuba Binembelo bya Kihebelu byo byo byaambile. Yesu mwina Nazala wamwesheshetu suka byonse byaambilenga pe Mesiasa mu Binembelo bya Kihebelu kabiji wafikizhe bungauzhi bwaambile pa byo akoba. Bino kwikala na muchima waimena pa kubingisha byo bayukile kala kwalengejile Bayudea ba mu oa moba kukankalwa kumvwa Mambo a Lesa.

Twakonsha kufunjilako ka ku kino? Kyanema bingi kutanga Baibolo na muchima umo. Misalululo nangwa kwikala na muchima waimena pa kubingisha bintu byo twayuka kala kulengela bantu kubula kumvwa bukine bwa mu Baibolo.

Kya kumwenako, shayuka wa bya bupopweshi mu North Carolina, U.S.A., waambile pa Baibolo amba “muji milanguluko ya bantu yapusana pusana, kabiji kafwako nangwa mulanguluko umo walumbulula bulongo byo twafwainwa kwikala ne.” Umvwe muntu katange Baibolo na mulanguluko wa kuba’mba “muji milanguluko ya bantu” ko kuba’mba kechi wakonsha kukokela mikambizho nangwa mafunde akanya bintu byo atemwa ne.

Kupusanako, Baibolo witutundaika kuteshapo muchima kumutanga. Binembelo byaamba pa bena Beliya ba mu moba akwa Paulo amba: “Batambwile mambo na maboko abiji, ne kubalaulabalaula mu binembelo pa juba pa juba, amba, tumone kana bino bintu bya kine.” (Byubilo 17:11) Byonka byajinga bano batanganga Baibolo, mwafwainwa kuleka milengulwila nangwa kukosela pa byo mwayuka kala byakonsha kwimulengela kubula kumvwa. Tangainga Mambo a Lesa na muchima umo wa kukebesha kumvwa byambo byanji bileta lusekelo.