“Batemwa Kubanda pa Binyu”

ALLEN watendekele kutoma maalwa bibi saka akijitu na myaka 11.a Bayanga na bakwabo na kusombolola bantu ba mu mafilimu mungye. Bantu bo basombololanga babepekezhangatu, bino Allen na bakwabo batomanga maalwa kya kine.

Tony byo afikizhe myaka 40 po po atendekele kutoma maalwa bibi, watomanga mutumwa umo nangwa ibiji mabanga pa juba pa juba, ko kyakayanga katome mitumwa itanu nangwa itanu na umo. Kyapeleleko kechi wayukanga ne mitumwa yo atomanga pa juba jimo ne.

Allen wakebele bukwasho pa lukatazho lwanji lwa kukizhamo kutoma maalwa. Bino Tony wakaine byamubujilenga ba mu kisemi ne balunda nanji. Lelo jino Allen koaji, bino Tony wafwile kala mu mapuso apa mukwakwa panyuma ya kutoma maalwa.

Bifuma mu kukizhamo kutoma maalwa kechi bikunzatu mwine wiatoma ne, muyanjila bavula.b Kutoma maalwa bibi ko kulengela javula kwamba byabula kufwainwa, kukozhañana, kwipayañana, mapuso apa mukwakwa ne pa nkito kabiji kutamisha ne butuntulu bwa mubiji. Kukizhamo kutoma maalwa konauna bingi mali kabiji kuleta makatazho ku mwine muntu ne ku baana, ba kisemi, ne bantu bakwabotu.

Kipamo kitala pa butuntulu bwa bantu kya mu United States (U.S. National Institutes of Health) kyaambile’mba “kechi bonse batoma maalwa ba bitomi ne, kabiji kechi bonse babitomi batoma maalwa pa juba pa juba ne.” Bavula batendeka kwikala babitomi kwakubula kuyuka ne. Bamo batoma maalwa ja kamo kamo bino batoma avula pa kimye kimo.

Umvwe mwasalapo kutoma maalwa, mwakonsha kuyuka byepi pa kupelela? Mwakonsha kuchinuzhuka byepi “kubanda pa binyu?” (Byambo bya Mana 23:29, 30) Mitwe yalondelapo isakwitukwasha kuyukilapo byavula pa maalwa.

[Tubyambo twa mushi]