Kukeba Mikumbu

“Bantu bonse baji na mo bamuyukila Yesu. Nangwa twaitabila mwi aye nangwa ne, bonse twakilangulukapo kala pa bwipuzho bwa kuba’mba: ‘Nanchi Yesu ye ñanyi?’”—MUNEMBESHI, STAN GUTHRIE.

BANTU bonse bakeba kuyuka byavula pe Yesu. Mabuku aamba pe aye beapota bingi. Mafilimu mo bamumwesha aya bingi nkuwa. Nangwa byonkabyo, bantu bavula bepuzha pe Yesu. Kabiji bamuyukila mwapusana pusana.

Myaka icheche yapitapo, banemba mapepala a byambo babiji baipwizhe bantu bavula pa intaneti bwipuzho bwa kuba’mba: “Nanchi Yesu ye ñanyi?” Pa mikumbu yapaine bantu pajinga ne ya kuba’mba:

● “Wajinga labi (mufunjishi) wayukanyikijilwe mu kubila bantu lusa.”

● “Wajingatu muntu waubanga bya kukumya.”

● Kafwako bishinka bimwesha’mba Yesu wajingako.”

● “Yesu Mwana Lesa wasemenwe, kufwa ne kusangulwa kuba’mba etupokolole ku bundengamambo bwetu. Ne lelo jino koaji kabiji ukeya jikwabo pano pa ntanda.”

● “Naitabila kuba’mba Yesu Kilishitu ye Mwana Lesa yenkawa umotu, wajinga muntu wazhila.”

● “Yesu muntu wa mu bishimitu bya kuletela banyike.”

Kwambatu kine bino byonse byamba bantu konsha byaikala bya kine ne. Nanchi kujipo ko twakonsha kutana mikumbu ya kine ya mepuzho etu pe Yesu nyi? Banemba uno magazini baitabila kuba’mba Baibolo Mambo a Lesa kabiji mo monkatu muji bukine pe Yesu.a—2 Timoti. 3:16.

Mu mutwe walondelapo tusakwamba pa mikumbu ya mu Baibolo ya mepuzho epuzha bavula pe Yesu. Aye mwine Yesu waambile’mba bonse “bamwitabila” wibashinkwila jishinda ja kukapuluka. (Yoano 3:16) Tubena kwimutundaika kulanguluka pa ino mikumbu kabiji inge mukeba ne kufunjilapo byavula pe Yesu ne bya kwikala na lwitabilo mwi aye.

[Tubyambo twa mushi]