Fundainga Mambo A Lesa

Mambo ka Bena Kilishitu o ba Batizhiwilwa?

Mu kino kibaba muji mepuzho kampe o mwakipuzhapo kala kabiji kyamwesha ne po mwakonsha kutana mikumbu mu Baibolo wenu. Bakamonyi ba kwa Yehoba bakatemwa bingi kwisamba nenu mikumbu ya ano mepuzho.

1. Lubatizhilo lwa bena Kilishitu lulumbulula ka?

Lubatizhilo ke jishinda ja kwikelamo na bulunda bwawama ne Lesa. Onkao mambo, mwina Kilishitu kechi wafwainwa kubatizhiwa saka akiji lukeke ne, wafwainwa kukoma pa kuba’mba afunde pe Lesa ne kwikala mwana wa bwanga wa kwa Yesu. (Byubilo 8:12; 1 Petelo 3:21) Inge twafunda ne kuba bintu byo akambizhe popo twikala baana wa bwanga wa kwa Yesu.—Tangai Mateo 28:19, 20.

Mu moba a batumwa ba kwa Yesu, bavula bakebelenga kufunda pe Lesa ne Yesu. Nabiji kyamwekele ku mwanamulume umo kimye kyo afunjile’mba lufu lwa kwa Yesu lwashinkula jishinda ja kupulukilamo bantu, ponkapotu waikele ke mwana wa bwanga. Ne lelo jino bantu ba michima yawama basalapo kwikala baana ba bwanga ba kwa Yesu.—Tangai Byubilo 8:26-31, 35-38.

2. Mambo ka Yesu o abatizhiwilwe?

Yesu wajinga na myaka ya kusemwa nobe 30 kimye Yoano Mubatizhi kyo a mubatizhizhe mu Mukola wa Yodano. Lubatizhilo lwa kwa Yesu lwamwesheshenga byo afuukwilepo kuba kyaswa muchima wa Lesa. (Bahebelu 10:7) Kino kyavwangilemo kupana bumi bwanji kwikala kitapisho kya bundengamambo bwa bantu. Nangwatu kimye kyo ajinga mwiulu saka akyangye kwiya pano pa ntanda, Yesu watemenwe Shanji, Yehoba, kabiji wamukokelanga kimye kyonse.—Tangai Mako 1:9-11; Yoano 8:29; 17:5.

3. Mambo ka mwina Kilishitu o afwainwa ku batizhiwilwa?

Atweba twapusana bingi na byajinga Yesu, atweba twasemwa na bundengamambo. Nangwa byonkabyo, lufu lwa kitapisho kya kwa Yesu lwitulengela kwikala na bulunda bwawama ne Lesa. (Loma 5:10, 12; 12:1, 2) Onkao mambo ne atwceba twakonsha kwikala ba mu kisemi kya Lesa. (2 Kolinda 6:18) Pano twikala byepi ba mu kisemi kyanji? Kupichila mu lulombelo lwa pa bunke, twipana kwi Yehoba, ne ku mulaya’mba tukobanga kyaswa muchima wanji mu bwikalo bwetu bonse. Panyuma ya kwipana, tubatizhiwa, kumwesha patoka kwipana kwetu ku meso a bantu bavula.—Tangai Mateo 16:24; 1 Petelo 4:2.

4. Mwakonsha byepi kwinengezha kubatizhiwa?

Bakamonyi ba kwa Yehoba bafunda Baibolo na yense ukeba kufwenya kwipi ne Lesa. Kufunda Baibolo ne kutanwa ku kupwila kwa bwina Kilishitu kukemulengela kutemwa Lesa ne kwitabila mwi aye. Kabiji kukemulengela ne kwikala na byubilo byawama. Kwikala na butemwe, lwitabilo ne byubilo bikwabo bitokesha Lesa ku muchima, kukemukwasha kutwajijila kwingijila Yehoba myaka ne myaka.—Tangai Yoano 17:3; Bahebelu 10:24, 25.

Umvwe mukeba kuyukilapo byavula, monai kitango 18 kya buku wa Nanchi Baibolo Kine Ufunjisha’mba ka? wanembwa na Bakamonyi ba kwa Yehoba.