NANCHI MWAYUKA NYI?
Nanchi nzubo ya Lesa yajinga mu Yelusalema beishimukulwile panyuma ya mwaka wa 70 C.E. nyi?
YESU waambile’mba kafwako jibwe ja ku nzubo ya Yehoba jikashala pa jibwe jikwabo ne. Buno bungauzhi bwafikile kimye nzhita ya bena Loma yo batangijilenga kwi Titus kyo yaonawine Yelusalema mu 70 C.E. (Mat. 24:2) Mu kuya kwa kimye, Mfumu mukatampe aye Julian wafuukwilepo kushimukulula nzubo ya Lesa.
Julian wayukanyikwa’mba ye mfumu wapeleleko wabulanga kupopwela Lesa mu Loma. Uno mwana wa kwa Constantine Mukatampe wafunjile byo batelanga bene amba mafunjisho a bwina Kilishitu. Nangwa byonkabyo, byo bamubikile pa bufumu bukatampe mu 361 C.E., wakaine ano mafunjisho ne bwina Kilishitu bwa bubela bwajingako mu oa moba ne kutendeka kupopwela balesa ba bubela. Mabuku aamba pa bya kala amutela’mba, “Nsatuki.”
Julian washikilwe bingi bwina Kilishitu. Kampe na mambo a kuba’mba byo akijingatu na myaka itanu na umo, wamwene bantangi ba bupopweshi bwa bwina Kilishitu byo baipayilenga bashanji ne balongo babo. Kwesakana na byaamba bashayuka ba bya machechi, Julian watundaikile Bayudea kushimukulula nzubo ya Lesa, na mulanguluko wa kuba’mba Yesu wajinga ngauzhi wa bubela.a
Kwa kubula nangwa kuzhinaukatu ne, Julian wakebelenga kushimukulula nzubo ya Lesa. Bashayuka bakichochekapo kukeba kuyuka inge kya kine batendekele kwiishimukulula, kabiji inge batendekele kwiishimukulula, ne kyalengejile kubula kwiipwisha. Nangwa byonkabyo, kishinka ke kya kuba’mba, Julian bamwipayile saka akyangye ne kupwishapo myaka ibiji pa bufumu ne, kabiji ne mwingilo wa kushimukulula ino nzubo po po apwijile.
[Tubyambo twa mushi]
a Yesu kechi waambilepo amba nzubo ya Lesa kechi bakeishimukulula ne, bino waambile’mba bakeyonauna, ne kya kine beyonawine mu 70 C.E.
[Kipikichala pa peja 32]
Pajinga nzubo ya Lesa ne kipikichala kibena kumwesha byo yamwekanga mu moba ajingako Yesu
[Kipikichala]
Kishimikwa kya ba Mozilemu kya kupopwelamo kyaikela pajinga nzubo ya Lesa