Mepuzho Afuma Ku Batanga

Kowa ku maboko kwaikele byepi lukatazho ku balwanyi ba kwa Yesu?

Luno lo lukatazho lumo pa makatazho avula bingi balwanyi ba kwa Yesu lo bamupelejilengapo mambo aye ne baana banji ba bwanga. Mu Mizhilo ya Mosesa mwajinga mikambizho yavula yaambile pa kwitokesha ku bintu nabiji kusuuma ku bya bulume, mbumba, ne kukwata bitumbi bya bantu ne banyama. Kabiji yaambile pa bya kwitokesha. Kino kyaubiwanga kupichila mu kupana bitapisho, kowa nangwa kwibasansa mema.—Levi., bita. 11-15; Bala., kita. 19.

Balabi ba Bayudea balondelanga bingi ino mizhilo. Buku umo wamba’mba kyonse kyalengelanga kwikala wa muzhilo “bekipitulukangamo kumona byalengejile muntu kwikala wa muzhilo, byo kyakonsheshe kusambukila bakwabo, bipe ne bintu byakonsheshe kwikala bya muzhilo, apa bino ne jishinda ne bisho bya kwitokesheshamo.”

Balwanyi bwa kwa Yesu bamwipwizhe’mba: “Mambo ka baana bobe ba bwanga o babujila kulondela bisho bya bashakulu, bino abo bajatu kajo na maboko a biko?” (Mako 7:5) Bano balwanyi ba kwa Yesu kechi baambilenga’mba kyatama kuja kwa kubula kowa ku maboko ne. Balabi bajinga na kisho kya kwiichila mema ku maboko saka bakyangye kutendeka kuja. Buku ye twaambapo kala wanungapo’mba: “Kabiji batalanga ne pa bipe byo bafwainwe kwingijisha pa kwichila mema, mema a mutundu ka o bafwainwe kwingijisha, muntu wafwainwa kwichilako bakwabo mema, ne pafwainwe kufika mema ku maboko.”

Yesu kechi kyamukatezhe kuyuka bya kuba na ino mizhilo yalengele bantu ne. Wabuujile bantangi ba Bayudea ba mu myaka kitota kitanshi amba: “Isaya waawile kine pe anweba bakamfutumfutu byonka byo kyanembwa’mba, ‘Bano bantu bannemekatu na byatunwa byabo, pakuba michima yabo iji kwalepa ne amiwa [Yehoba]. Bampopwelatu kyatu, mambo bafunjisha mafunjisho a bantu.’ Anweba mulengulula mikambizho ya Lesa ne kukakachila ku bisho bya bantu.”—Mako 7:6-8.