Fuukulaipo Kubatizhiwa Kwakubula Kuzhinyazhinya

1. Ñanyi bintu bimo byafwainwa kwimulengela kufuukulapo kubatizhiwa?

NANCHI mwatemwa Yehoba Lesa, yenka wimupa bya bupe byonse byawama, kuvwangakotu ne bumi nyi? Nanchi mukeba kumwesha byo mwamutemwa nyi? Jishinda janema jo mwafwainwa kubilamo bino ke kwipana anweba bene kwi aye ne kumwesha kino kupichila mu kubatizhiwa. Kuba bino kukemulengela kwikala mu kisemi kya Yehoba. Ne kikafumamo, Shenu kabiji Mulunda nenu ukemutangijilanga ne kwimuta muchima mambo mukekala ke bantu banji. (Sala. 73:24; Isa. 43:1, 2) Kabiji kwipana ne kubatizhiwa kukemulengela kwikala na luketekelo lwa kukekala myaka ne myaka.—1 Pe. 3:21.

2. Ñanyi bintu byo tusakwisambapo mu uno mutwe?

² Nanchi kujipo kintu kibena kwimulengela kuzhinyazhinya kufuukulapo kubatizhiwa nyi? Inge ibyo, yukai’mba kechi muji bunke ne. Bantu bavula bapimpwile byubilo ne milanguluko yabo pa kuba’mba bafikilemo kubatizhiwa. Kabiji luno babena kwingijila Yehoba na lusekelo ne na mukoyo. Ñanyi bintu bimo byo mwakonsha kufunjilako ku bantu bamo babatizhiwe mu myaka kitota kitanshi? Twayai twisambe pa mikiika yo bapichilemo ne byo twakonsha kufunjilako ku byo baubile.

BENA SAMALIYA BABATIZHIWE

3. Ñanyi mikiika imo yafwainwe kushinda bena Samaliya bamo saka bakyangye kubatizhiwa?

³ Bena Samaliya bajingako mu moba a kwa Yesu bajinga mu jibumba ja bapopweshi baikalanga mu Shekema ne mu Samaliya, mizhi yaikejile ku buyeke bwa Yudea. Bena Samaliya saka bakyangye kubatizhiwa, bafwainwe kufunda ne kuyuka bulongo Mambo a Lesa. Bena Samaliya baitabijiletu mu mabuku atanu a mu Baibolo kutendekela pa buku wa Ntendekelo kufika ku buku wa Mpitulukilo ya mu Mizhilo, kampe kuvwangako ne buku wa Yoshua. Nangwa byonkabyo, bena Samaliya batengelanga’mba Mesiasa ukeya na mambo a mulaye wa Lesa uji pa Mpitulukilo ya mu Mizhilo 18:18, 19. (Yoa. 4:25) Pa kuba’mba bafikilemo kubatizhiwa, bafwainwe kwitabila’mba Yesu ye wajinga Mesiasa walayilwe. Kabiji abino byo byaubile “bena Samaliya bavula.” (Yoa. 4:39) Bakwabo bafwainwe kushinda misalululo yajinga pa bena Samaliya ne Bayudea.—Luka 9:52-54.

4. Kwesakana na Byubilo 8:5, 6, 14, bena Samaliya bamo baubilepo byepi byo bebasapwijile kwi Filipa?

⁴ Ñanyi bintu byakwashishe bena Samaliya kufuukulapo kubatizhiwa? Filipa musapwishi byo ebasapwijile “pe Kilishitu,” bena Samaliya bamo batambwijile “mambo a Lesa.” (Tangai Byubilo 8:5, 6, 14.) Nangwa kya kuba Filipa wajinga Muyudea, kechi bakaine kuteleka ku byo ebasapwijile ne. Kampe bavulukile byepelo biji mu buku wa Ntendekelo kufika ku buku wa Mpitulukilo ya mu Mizhilo bimwesha’mba Lesa kechi uji na misalululo ne. (Mpitu. 10:17-19) Monse mo kyakonsha kwikela, ‘bateleko muchima ku byaambile Filipa’ pe Kilishitu, kabiji bemwenejile bishinka byamwesheshenga’mba Lesa wakwashishenga Filipa. Waubile ne bya kukumya byavula byavwangilemo kubuka bantu bakolelwe ne kupanga bandemona.—Byu. 8:7.

5. Ñanyi bintu byo mwakonsha kufunjilako ku bena Samaliya?

⁵ Bano bena Samaliya kechi baswishishe misalululo nangwa kubula kuyuka byavula bya mu Mambo a Lesa kwibalengela kubula kuyilako palutwe ne. Bena Samaliya kechi bakankazhamine kubatizhiwa byo bashiinwe kuba’mba Filipa wibafunjishe bukine ne. Jishimikila ja mu Baibolo jaamba’mba: “Byo baitabijile byaambile Filipa, wasapwijilenga mambo awama a Bufumu bwa Lesa ne jizhina ja Yesu Kilishitu, banabalume ne banabakazhi babatizhiwenga.” (Byu. 8:12). Nanchi ne anweba mwashiinwa kuba’mba Mambo a Lesa bo bukine kabiji amba Bakamonyi ba kwa Yehoba bebikako kushinda misalululo ne kutwajijila kwimwesha butemwe bwa kine, kiyukilo kiyukanyikisha bena Kilishitu ba kine nyi? (Yoa. 13:35) Inge ibyo, mwafwainwa kubapo kimo kwakubula kuzhinyazhinya ne kuketekela’mba Yehoba ukemupesha.

6. Mwakonsha kufunjilako ka ku byaubile Ruben?

⁶ Ruben wikala mu kyalo kya Germany, wakomejile mu kisemi kya Bakamonyi. Nangwa byonkabyo, byo ajinga mwanyike, wazhinaukanga inge Yehoba koaji. Ñanyi bintu byamukwashishe kuleka kuzhinauka? Byo ayukile kuba’mba kechi wayukile bishinka byavula pa uno mutwe ne, wafuukwilepo kufunjilapo bishinka bikwabo. Waambile’mba: “Pa lufunjisho lwa pa bunke, nakebanga bishinka pa kuba’mba ngyuke bintu bya kine pa uno mutwe. Bimye byavula nafundanga pa mutwe waamba pa bintu inge bilengeletu abyo bine.” Watangile buku wa kuba’mba Is There a Creator Who Cares About You? Uno buku wakoseshe lwitabilo lwa kwa Ruben. Watendekele kulanguluka’mba: ‘Yehoba koaji.’ Kabiji byo ayile na kufwakasha pa ofweshi mukatampe wa ntanda yonse, Ruben wakuminye bingi pa byo twakwatankana mwaya ntanda yonse. Byo abwelele ku kyalo kya Germany, Ruben wabatizhiwe saka aji na myaka 17. Ne anweba inge muzhinauka pa bintu byo mwafunda, mwafwainwa kukebakeba bishinka mu mabuku etu. Twakonsha kuleka kuzhinauka inge ‘twayukisha bulongo’ bukine. (Efi. 4:13, 14) Kabiji kumvwa masawakya aamba pa butemwe ne kukwatankana kwa bantu ba Yehoba mwaya ntanda yonse, ne kwimwena butemwe ne kukwatankana kuji mu kipwilo mo muji, kukemulengela kunemeka bingi bulongo bwetu bwa ntanda yonse.

SAULO MWINA TALASUSA WABATIZHIWE

7. Ñanyi ndangulukilo yafwainwe kupimpula Saulo?

⁷ Akilangulukai pa byaubile Saulo mwina Talasusa. Wafunjile bingi Mizhilo ya Bayudea kabiji watumbalele bingi mu Bayudea bakwabo. (Nga. 1:13, 14; Fili. 3:5) Pa kyokya kimye, Bayudea bavula baitabijile’mba bena Kilishitu bajinga bansatuki, kino kyalengejile Saulo kwibamanyika bingi. Walangulukilenga’mba ubena kuba kyaswa muchima wa Lesa. (Byu. 8:3; 9:1, 2; 26:9-11) Pa kuba’mba etabile mwi Yesu ne kubatizhiwa kwikala mwina Kilishitu, Saulo naye wafwainwe kuyuka’mba bakamumanyikanga.

8. (a) Ñanyi kintu kyakwashishe Saulo kufuukulapo kubatizhiwa? (b) Kwesakana na Byubilo 22:12-16, Ananyasa wakwashishe byepi Saulo? (Monai ne kipikichala.)

⁸ Ñanyi kintu kyakwashishe Saulo kufuukulapo kubatizhiwa? Nkambo ye batumbijikile aye Yesu byo amwekele kwi aye, Saulo walekele kumona. (Byu. 9:3-9) Pa moba asatu, kechi wajiilepo kajo ne, kabiji kwakubula nangwa kuzhinaukatu ne, walangulukilenga pa kintu kyamumwekejile. Ibyo, Saulo washiinwe’mba Yesu wajinga Mesiasa kabiji amba baana banji ba bwanga bajinga mu bupopweshi bwa kine. Kyamweka Saulo wajinga bingi na binyenge na mambo a kutundaika lufu lwa kwa Setepena. (Byu. 22:20) Byo papichile moba asatu, mwana wa bwanga ye batelanga amba Ananyasa wayile kwi Saulo, wamulengejile kutendeka kumona jikwabo ne kumutundaika kubatizhiwa kwakubula kuzhinyazhinya. (Tangai Byubilo 22:12-16.) Saulo waswile bukwasho bo atambwijile kabiji waswile kubatizhiwa.—Byu. 9:17, 18.

9. Ñanyi bintu byo mwakonsha kufunjilako kwi Saulo?

⁹ Kuji bintu byo twakonsha kufunjilako kwi Saulo. Kwitota ne moyo wa kuchiina bantu kwakonsheshe kumulengela kubula kufuukulapo kubatizhiwa. Pano bino, kechi byo byo aubile ne. Saulo wapimpwile bwikalo bwanji byo afunjile bukine bwaamba pe Kilishitu. (Byu. 26:14, 19) Saulo wafuukwilepo kwikala mwina Kilishitu nangwa kya kuba wayukile’mba bakamumanyikanga. (Byu. 9:15, 16; 20:22, 23) Byo abatizhiwe, watwajijile kuketekela mwi Yehoba kuba’mba ukamukwashanga kuchinchika meseko apusana pusana o akapitangamo. (2 Ko. 4:7-10) Inge mwabatizhiwa ne kwikala Kamonyi wa kwa Yehoba, mwafwainwa kuyuka’mba mukapitanga mu meseko akesekanga lwitabilo lwenu. Nangwa byonkabyo, mwafwainwa kushiinwa’mba Lesa ne Kilishitu bakatwajijila kwimukwasha.—Fili. 4:13.

10. Mwakonsha kufunjilako ka ku byaubile Anna?

¹⁰ Anna wakomejile mu kisemi kingijisha mulaka wa Kurd ku Musela wa Europe. Bainanji byo babatizhiwe, Anna watendekele kufunda Baibolo saka aji na myaka 9 byo bamuswishishe kwi bashanji. Nangwa byonkabyo, bakilongo byo bayukile’mba ubena kufunda Baibolo na Bakamonyi ba kwa Yehoba, batendekele kumukanya. Balongo banji balangulukilenga’mba ke bumbulwamaana kufuma mu bupopweshi mwakomejile bashakulu. Byo afikizhe myaka 12, waipwizhe bashanji kuba’mba bamuswishe kubatizhiwa. Bashanji bakebelenga kuyuka inge aye mwine ye wifuukwijilepo kukeba kubatizhiwa nangwa inge kwajinga bamukanjikizhenga. Waambijile bashanji amba, “Kutemwa Yehoba ko kwandengela kufuukulapo bino.” Bashanji bamuswishishe kubatizhiwa. Byo abatizhiwe, bakilongo batendekele kumwendeleka ne kumuba bintu byatama bingi. Wakilongo umo wamwambijile’mba, “Kyawamatu ne kutendeka kwikala bwikalo buncha ne kupeepa fwanka kukila kwikala Kamonyi wa kwa Yehoba.” Anna waubile byepi na luno lukatazho? Waambile’mba, “Yehoba wankwashishe kutwajijila kuchinchika, kabiji bamama ne batata nabo bantundaikile bingi.” Anna wanemba bimye byonse Yehoba po amukwashishe. Utala jonse pa mutanchi po anembele bimye byonse byamukwashishe Yehoba pa kuba’mba abulenga kulubamo. Ne anweba inge muchiina kuba’mba bakemumanyikanga, vulukainga kuba’mba Yehoba ukemukwashanga.—Hebe. 13:6.

KONELEUSA WABATIZHIWE

11. Ñanyi bintu byafwainwe kulengela Koneleusa kukankazhama kufuukulapo kubatizhiwa?

¹¹ Baibolo waamba ne pa byaubile Koneleusa. Wajinga mukulumpe wa bashilikale watangijilanga bashilikale 100 mu nzhita ya bena Loma. (Byu. 10:1, tubyambo twa munshi.) Na mambo a kino, bamunemekele bingi mu kimasamasa ne ku bashilikale. “Wapananga bya bupe byavula ku bantu.” (Byu. 10:2) Yehoba watumine mutumwa Petelo kuya na kumusapwila mambo awama. Nanchi kifulo kyajingapo Koneleusa kyamulengejile kukankazhama kufuukulapo kubatizhiwa nyi?

12. Ñanyi kintu kyalengejile Koneleusa kufuukulapo kubatizhiwa?

¹² Ñanyi kintu kyalengejile Koneleusa kufuukulapo kubatizhiwa? Tutanga mu Baibolo kuba’mba ‘waakamwanga Lesa pamo na ba mu nzubo yanji bonse.’ Kabiji Koneleusa walombanga milombelo ya misashijilo kwi Lesa kimye kyonse. (Byu. 10:2) Petelo byo asapwijile mambo awama Koneleusa, aye ne ba mu nzubo yanji baitabijile Kilishitu kabiji bafuukwilepo kubatizhiwa ponkapotu. (Byu. 10:47, 48) Kwakubula nangwa kuzhinaukatu ne, Koneleusa wipaine kupimpula bwikalo bwanji pa kuba’mba aye ne kisemi kyanji pamo bapopwelenga Yehoba.—Yosh. 24:15; Byu. 10:24, 33.

13. Ñanyi bintu byo mwakonsha kufunjilako kwi Koneleusa?

¹³ Byonka byaubile Saulo, Koneleusa naye kechi waswishishe kifulo kyo ajingapo kumulengela kubula kwikala mwina Kilishitu ne. Nanchi ne anweba mwafwainwa kupimpula bwikalo bwenu pa kuba’mba mufikilemo kubatizhiwa nyi? Inge ibyo, yukai’mba Yehoba ukemukwashanga. Yehoba ukemupesha inge mwatwajijila kulondela mafunde a mu Baibolo pa kuba’mba mumupopwelenga bulongo.

14. Ñanyi bintu byo mwafunjilako ku byaubile Tsuyoshi?

¹⁴ Tsuyoshi wikala mu kyalo kya Japan wafwainwe kuleka kubako bintu bimo ku nkito ko aingilanga pa kuba’mba afikilemo kubatizhiwa. Waingilanga nkito ya kukwashako mukulumpe wa pa sukulu wa Ikenobo po bafunjishanga bantu kuyuka bya kutanchika bulongo maluba. Inge uno mukulumpe wa pa sukulu wakankalwa kutaanwa ku kijilo, Tsuyoshi ye wayanga na kumwimenako ne kwivwanga mu bisho bya ba Buddha. Nangwa byonkabyo, Tsuyoshi byo afunjile bukine bwaamba pa lufu, wayukile’mba kechi ukafikilamo kubatizhiwa inge watwajijila kwivwanga mu bino bisho ne. Onkao mambo, wafuukwilepo kuleka kwivwangamo mu bisho bya ba Buddha. (2 Ko. 6:15, 16) Tsuyoshi wayile na kwisambapo na mukulumpe wa pa sukulu pa kino. Ñanyi bintu byafuminemo? Tsuyoshi bamuswishishe kutwajijila kwingila nkito kwakubula kwivwangamo mu bisho. Wabatizhiwe byo papichile mwaka umo kufuma po atendekejile kufunda Baibolo.a Inge mukeba kuleka kubako bintu bimo ku nkito ko mwingila pa kuba’mba mutokeshenga Lesa ku muchima, shiinwai’mba aye ukemukwasha kutaana bintu bya mu bwikalo byo mukeba anweba pamo ne kisemi kyenu.—Sala. 127:2; Mat. 6:33.

BENA KOLINDA BABATIZHIWE

15. Ñanyi bintu bimo byakonsheshe kulengela bena Kolinda kukankazhama kufuukulapo kubatizhiwa?

¹⁵ Mu muzhi wa Kolinda wa kala mwajinga bantu batemenwe bingi bunonshi kabiji bajinga na byubilo byatama bingi. Onkao mambo, kyakonsheshe kukatazha bingi ku bantu baikalanga mu uno muzhi kufuukulapo kwingijila Lesa. Nangwa byonkabyo, mutumwa Paulo byo aishile mu uno muzhi ne kusapwila mambo awama aamba pe Kilishitu, “bena Kolinda bavula baumvwine mambo awama baitabijile ne kubatizhiwa.” (Byu. 18:7-11) Kepo Nkambo Yesu Kilishitu amwekele kwi Paulo mu kimwesho ne kumwambila’mba: “Nji na bantu bavula bingi mu uno muzhi.” Onkao mambo, Paulo watwajijile kusapwila mu uno muzhi mwaka umo ne kichika.

16. Ñanyi bintu byakwashishe bantu bamo ba mu Kolinda kusankilapo bintu bimo pa kuba’mba babatizhiwe? (2 Kolinda 10:4, 5)

¹⁶ Ñanyi bintu byalengejile bena Kolinda kufuukulapo kubatizhiwa? (Tangai 2 Kolinda 10:4, 5.) Mambo a Lesa ne mupashi wanji wazhila byo bibakwashishe kupimpula bwikalo bwabo. (Hebe. 4:12) Bantu baikalanga mu muzhi wa Kolinda batambwijile mambo awama aamba pe Kilishitu basankijilepo miteeto yatama nabiji kupendwapendwa, bwivi ne kwilaala kwa banabalume bonka bonka.—1 Ko. 6:9-11.b

17. Ñanyi bintu byo mwafunjilako ku byaubile bena Kolinda?

¹⁷ Bena Kolinda bamo bajinga na byubilo byatama bingi byakonsheshe kwibakatazha kwibisankilapo. Nangwa byonkabyo, kechi balangulukilenga’mba kikebakatazha kwikala bena Kilishitu ne. Bebikileko bingi pa kuba’mba batendeke kwenda mu jishinda jakatazha jitwala ku bumi bwa myaka ne myaka. (Mat. 7:13, 14) Nanchi kibena kwimukatazha kusankilapo muteeto nangwa kyubilo kyatama pa kuba’mba mubatizhiwe nyi? Kange muleke kwibikako ne. Sashijilai Yehoba kuba’mba emukwashe kwingijisha mupashi wanji wazhila kusankilapo bintu byatama bisakasaka muchima wenu.

18. Ñanyi bintu byo mwafunjilako ku byaubile Monika?

¹⁸ Monika wikala mu kyalo kya Georgia, wibikileko bingi kusankilapo ñambilo ne byakisangajimbwe byatama pa kuba’mba abatizhiwe. Waambile’mba: “Byo najinga mwanyike, lulombelo lwankwashanga bingi. Yehoba wayukile’mba nakebelenga kuba kintu kyawama, kabiji kimye kyonse wankwashanga ne kuntangijila.” Monika wabatizhiwe saka aji na myaka 16. Nanchi ne anweba kujipo miteeto imo yo mwafwainwa kusankilapo pa kuba’mba mwingijilenga Yehoba bulongo nyi? Twajijilai kulomba kwi aye kuba’mba emukwashe kupimpula byubilo byenu. Yehoba ukemupa mupashi wanji wazhila.—Yoa. 3:34.

LWITABILO LWENU LWAKONSHA KUFUMYAPO MITUMBA

19. Ñanyi bintu byakonsha kwimukwasha kushinda makatazho aji nobe mitumba? (Monai ne kipikichala.)

¹⁹ Shiinwai kuba’mba Yehoba wimutemwa bingi kabiji ukeba’mba mwikale mu kisemi kyanji. Ukemukwashanga kushinda bintu byonse byakonsha kwimulengela kubula kubatizhiwa. Yesu waambijile baana banji ba bwanga ba mu myaka kitota kitanshi amba: “Inge mwaikala na lwitabilo nobe luchacha wa masitate, mukambila uno mutumba amba, ‘Fuma papo uye popa,’ ne aye ukafumapo, kabiji kafwako kintu kyo mukakankalwa kuba ne.” (Mat. 17:20) Bantu baumvwine bino byambo baingijile ne Yesu pa myakatu icheche. Onkao mambo, bafwainwe kutwajijila kukosesha lwitabilo lwabo. Pano bino, Yesu wibalayile’mba inge baikala na lwitabilo lwakosa, Yehoba ukebakwashanga kushinda makatazho aji nobe mitumba. Ne anweba Yehoba ukemukwashanga.

20. Byaubile bena Kilishitu ba mu myaka kitota kitanshi ne ba mu ano moba bo twafundapo mu uno mutwe bimutundaika kuba ka?

²⁰ Inge mwamona’mba kuji bintu bimo bibena kwimulengela kukankazhama kubatizhiwa, ingijilaipo kwakubula kuzhinyazhinya. Funjilaiko ku byaubile bena Kilishitu ba mu myaka kitota kitanshi ne ba mu ano moba. Mwane bintu byo baubile bimutundaike kufuukulapo kwipana kwi Yehoba ne kubatizhiwa. Kino kyo kintu kyanema kyo mwafwainwa kufuukulapo kuba kabiji mukekala bingi na lusekelo.