Nengezhai Muchima Wenu

Pa kufunda Baibolo, tukeba bintu byo tubena kufunda pe Yehoba kwitufika pa muchima. Twafwainwa kufunjila kwi Ezela “wanengezhezhe muchima wanji kuba’mba akebekebe Mizhilo ya Yehoba.” (Eze. 7:10) Pano nga atweba twafwainwa kunengezha byepi muchima wetu?

Lombai. Mwafwainwa kulomba saka mukyangye kutendeka kufunda. Lombai kwi Yehoba kuba’mba emukwashe kumvwisha byo mubena kufunda ne kwibingijisha mu bwikalo bwenu.​—Sala. 119:18, 34.

Ipelulai. Yehoba kechi usolola bukine ku bantu betota ne kwiketekela abo bene ne. (Luka 10:21) Pa kufunda Baibolo, kechi twafwainwa kukebakeba bishinka kuba’mba twimweshe ku bakwetu amba twayuka byavula ne. Ipelulainga ne kupimpula milanguluko yenu inge mwayuka’mba kechi yaesakana na bikeba Yehoba ne.

Telekai ku nyimbo ya Bufumu. Nyimbo itufika bingi pa muchima kabiji kino kitulengela kwinengezha pa kuba’mba tupopwele Yehoba. Kuteleka ku lwimbo umo wa Bufumu saka mukyangye kutendeka kufunda kwakonsha kwimukwasha kunengezha muchima wenu.