Bya Kuvuluka Binembelo

Nanchi kyakimukatazhapo kala kuvuluka kyepelo kya mu Baibolo kyo mwatemwa nyi? Kampe kyakonsha kwikala kinembelo kimutekenesha bingi, kimukwasha kwikala na milanguluko yawama nangwa kyo mukeba kwisambapo na bantu. (Sala. 119:11, 111) Akimonai mashinda amo akonsha kwimukwasha kuvulukanga binembelo.

• Ingijishainga JW Library^®. Inge mubena kutanga Baibolo pa JW Library kabiji mwataana kinembelo kyo mukeba kuvuluka, mwakonsha kubikapo kayukilo pa kuba’mba kimupelele kwikataana pa kimye kikwabo.

• Nembai kinembelo po mwakonsha kwikimona. Nembai kinembelo kyo mukeba kuvulukanga pa kipepala ne kwikilamika po mwakonsha kwikimona bukiji. Bamo babika kwipi na kimbonyi kabiji bakwabo bekilamika ku fuliji. Bakwabo nabo bakopa kipikichala kya kinembelo ne kwikibika pa foni nangwa pa kompyuta pa kuba’mba inge bashinkulatu foni bekimona.

• Lengai tubikachi. Nembai kinembelo ku lubaji lumo lwa kikachi ne kunemba byambo bya kyokyo kinembelo ku lubaji lukwabo. Esekai kutala ku lubaji kuji kinembelo ne kuvuluka byambo bijipo nangwa kutala ku lubaji kuji byambo ne kuvuluka kinembelo kine.