Biji Kyalo kya Georgia

Kyalo Mu kyalo kya Georgia muji mitumba yavula bingi iji na sino peulu, kabiji imo yalepa mamita 4500. Kino kyalo kya Georgia kyaabanapo pabiji, kuji lubaji lwa ku musela, ne lwa ku muzhika. Mu ano mapunzha abiji muji bibunji byavula, kabiji muji bisho, nyimbo, nzhilo, ne kajo byapusana pusana monka mwapusena bibunji.

Bantu Mu Georgia muji bantu 3.7 milyonyi, kabiji bavula kyo kyalo kyabo kya kisemwa.

Bupopweshi Bantu bavula betela’mba bena Kilishitu kabiji baya mu chechi wa Orthodox. Kabiji bachechetu bo Bamozilemu.

Mulaka Mulaka wa bena Georgia kechi wipashako na milaka iji mu byalo byazhokoloka kino kyalo ne. Bashayuka ba bintu byamwekele kala bamba’mba bisopelo bya uno mulaka wa bena Georgia bebilengele kala Yesu saka akyangye kwiya pano pa ntanda.

Bwikalo Bavula mu kino kyalo banjimi. Mu myaka ya kuno kulutwe, bakañenda bavula baya na kufwakesha kyalo kya Georgia nabo banungako ku bukomo bwa kino kyalo.

Byo Kuji Ku kibunji kya ku musela kuji mwela wawama, kechi kwatwa kyuya nangwa kubisha mashika ne. Ku kitulu kya Kalunga Kafiita ku kibunji kya ku muzhika wa Georgia, kuji mwela wa kyuya, onkao mambo kuji bingi bipangwa byapusana pusana byavula.

Kajo Pa kajo konse ko banengezha, babikapo ne shinkwa. Uno shinkwa bamusokela mu kitofu kya matafwali. Kajo ko batemwa bingi ke nyama yo bavwangamo bipangwa byapusana pusana. Kabiji kufumatu ne kala kene, bena Georgia batemwa bingi kulenga binyu. Pa kuba’mba bino binyu bibile, bebibika mu milondo. Bisemi byavula biji na majimi a miñanzañanza kabiji belengela bene binyu. Mu Georgia muji mitundu ya miñanzañanza 500.