Butemwe Bwakwatankanya Bantu ba mu Byalo Byapusana Pusana

SANEL saka akyangye kusemwa, badokotala babuujile bansemi banji amba kechi ukasemwa mutuntulu ne, kabiji amba inge wasemwa kechi ukekala bulongo ne. Bafwainwe kumutumbula jonka juba jo asemenwe. Bansemi banji baikalanga mu kibunji kya Abkhazia kyatambwile bwana bwa bene kufuma ku kyalo kya Georgia, bakankelwe kutaana dokotala wafwainwe kutumbula mwanabo kwa kubula kumubikamo mashi.

Bansemi banji besambile na Kavoto ka Bambañana na ba Mingilo mu Bipatela (HLC).a Balongo ba mu kano kavoto ka HLC bataaine dokotala waswile kutumbula uno mwana kwa kubula kumubikamo mashi mu Tbilisi, muzhi mukatampe wa mu kyalo kya Georgia. Bino bainanji Sanel bakijinga na misongo ya pa kupaapa, kabiji kechi bakonsheshe kuya kwalepa ne. Onkao mambo, bafuukwilepo kuba’mba bankambo yanji Sanel, bonse babiji bajinga Bakamonyi, batwale uno mwana wa mukazhi ku kipatela mu muzhi wa Tbilisi.

Uno mwana bamutumbwiletu bulongo kwa kubula lukatazho. Byo papichiletu moba acheche, bankambo yanji babakazhi banembele’mba: “Twaikele mu kipatela moba kukila pa 20. Kimye kyo twajinga mu kipatela, balongo ne banyenga bavula bena Georgia baishilenga na kwitupempula ne kwitukwasha. Bavula betumvwijilenga bingi lusa. Twaumvwangatu amba balongo bamwesha butemwe, bino pa kikye kimye twimwenejile buno butemwe.”