Kitapisho kya kwa Yesu Kyaikala Byepi “Bukuzhi ku Bantu Bavula”?
Mukumbu wa mu Baibolo
Kitapisho kya kwa Yesu ke jishinda Lesa jo engijisha kukujilamo bantu nangwa kupulusha bantu ku bundengamambo ne lufu. Baibolo waamba pa mashi a kwa Yesu aichikile amba bo bukuzhi bwa kwa Yesu bo apaine. (Efisesa 1:7; 1 Petelo 1:18, 19) Oene mambo, Yesu o ambijile amba waishile “ne kupana bumi bwanji kwikala bukuzhi bwa kukuula bavula”—Mateo 20:28.
Mambo ka “bukuzhi bwa kukula bavula” o bwakebewenga?
Muntu mutanshi aye, Adama, wajinga walumbuluka, nangwa wabula bundengamambo. Wajinga na luketekelo lwa kwikala myaka ne myaka bino wasajilepo kubula kukookela Lesa. (Ntendekelo 3:17-19) Byo asemene baana, nabo basemenwe na bundengamambo. (Loma 5:12) Oene mambo, Baibolo kyo yambila amba Adama ‘wipoteshe’ aye mwine ne baana banji ku buzha bwa bundengamambo ne lufu. (Loma 7:14) Bonse byo bajinga bantu babula kulumbuluka ne, kafwako nangwa umo wakonsheshe kubwezha byaelele Adama ne.—Salamo 49:7, 8.
Lesa waubijile lusa baana ba kwa Adama. (Yoano 3:16) Na mambo a buchibamambo bwa Lesa, kechi wakebele kwibalekela mambo kwakubula kwibazhachisha ne. (Salamo 89:14; Loma 3:23-26) Lesa watemwa bantu, onkao mambo wapaine jishinda jafwainwa pa kuba’mba bundengamambo bwabo bulekelwe ne kwibupwishatu bonse. (Loma 5:6-8) Kitapisho kyo kyafwainwatu kupwisha bundengamambo.
Bukuzhi bwingila byepi?
Kyambo kya kuba’mba “bukuzhi” mu Baibolo kilumbulula bintu bisatu:
Ke mali.—Kubala 3:46, 47.
Ke kukasuluka, nangwa kukuulwa.—Kulupuka 21:30
Ke mali aesakana na kintu kibena kupotwa, nangwa mali o bapana pa kukuula.a
Akimonai bino bishinka byo byakwatankana na bukuzhi bwa kitapisho kya kwa Yesu Kilishitu.
Mali. Baibolo waamba kuba’mba Bena Kilishitu ‘bebapotele pa mutengo mukatampe.’ (1 Kolinda 6:20; 7:23) Ano mali ke mashi a Yesu mambo ‘wamupotejile Lesa bantu na mashi anji kufuma mu mikoka yonse ne mu njimi ne mu mitundu ya bantu ne mu bisaka bya bantu.’—Lumwekesho 5:8, 9.
Kukasuluka. Kitapisho kya kwa Yesu kitukasulula ku bundengamambo kupichila mu bukuzhi.—1 Kolinda 1:30; Kolose 1:14; Bahebelu 9:15.
Kwesakana. Kitapisho kya kwa Yesu kyaesakana na bumi bwalumbuluka bwaelele Adama. (1 Kolinda 15:21, 22, 45, 46) Baibolo waamba’mba: “Mambo byonkatu kubula kukookela kwa muntu umo [Adama] byo kwalengela bavula kwikala bandengamambo, ne mu lukookelo lwa muntu umo [Yesu Kilishitu] bavula bakekala baoloka.” (Loma 5:19) Ko kuba’mba kino kyalumbulula bulongo lufu lwa muntu umo byo bwakonsha kwikala bukuzhi bwa bandengamambo bavula. Kitapisho kya kwa Yesu ke “bukuzhi bwaesakana bwa kukuula bonse” bakeba kukuulwa.—1 Timoti 2:5, 6.
a Mu Baibolo, kyambo kyatuntululwa amba “bukuzhi” kilumbulula mali, nangwa kintu kya mutengo, kibena kulipilwa. Twambe pa kyambo kya Kihebelu kya kuba’mba ka·pharʹ kilumbulula “kuvweta.” (Ntendekelo 6:14) Kabiji kilumbulula ne kuvweta pa bundengamambo. (Salamo 65:3) Kyambo kikwabo kipashako kya koʹpher kilumbulula mali apanwa pa kuba’mba muntu bamukasulule. (Kulupuka 21:30) Kabiji kyambo kikwabo kya Kingiliki kipashako ke lyʹtron, kyatuntululwa amba “bukuzhi,” kabiji kyakonsha ne kulumbulula “mali-a-kukuula.” (Mateo 20:28; The New Testament in Modern Speech, by R. F. Weymouth) Banemba ano mabuku bengijisha kino kyambo kulumbulula mali apanwa pa kukuula bakaili nangwa bazha.