Rɛvɛleshɔn

8 We i opin di nɔmba sɛvin sil,* ɔlsay na ɛvin kwayɛt fɔ lɛk 30 minit so. 2 Ɛn a si di sɛvin enjɛl dɛn we tinap bifo Gɔd, ɛn dɛn gi dɛn sɛvin trɔmpɛt.

3 Wan ɔda enjɛl, we ol gold kɔn- tena fɔ bɔn insɛns, kam ɛn tinap bay di ɔlta, ɛn dɛn gi am bɔku insɛns fɔ mek i bɔn am wit ɔl di oli wan dɛn prea pan di gold ɔlta we bin de bifo di tron. 4 Di smok we bin de kɔmɔt pan di insɛns we bin de na di enjɛl in an bin de go ɔp wit di oli wan dɛn prea bifo Gɔd. 5 Bɔt wantɛm wantɛm di enjɛl tek di kɔntena fɔ bɔn insɛns, ɛn i ful-ɔp am wit sɔm pan di faya we de na di ɔlta ɛn trowe am na di wɔl. Ɛn tɛnda krak, laytin flash, atkwek apin, ɛn a yɛri vɔys dɛn. 6 Ɛn di sɛvin enjɛl dɛn we ol di sɛvin trɔmpɛt dɛn rɛdi fɔ blo dɛn.

7 Di fɔs wan blo in trɔmpɛt. Ɛn ays blɔk ɛn faya we miks wit blɔd fɔdɔm na di wɔl lɛk ren, ɛn we di wɔl sheb to tri pat, wan pat bɔn; ɛn we di tik dɛn sheb to tri pat, wan pat bɔn; ɛn ɔl di plant dɛn bɔn.

8 Di sɛkɔn enjɛl blo in trɔmpɛt. Ɛn sɔntin we tan lɛk big mawntin we de bɔn wit faya fɔdɔm na di si. Ɛn we di si sheb to tri pat, wan pat tɔn to blɔd; 9 ɛn we di tin dɛn na di si we gɛt layf sheb to tri pat, wan pat day; ɛn we di ship dɛn na di si sheb to tri pat, wan pat pwɛl.

10 Di tɔd enjɛl blo in trɔmpɛt. Ɛn wan big sta we de bɔn lɛk lamp kɔmɔt ɔp ɛvin ɛn fɔdɔm, ɛn we di riva dɛn ɛn di spriŋ wata* dɛn sheb to tri pat, i fɔdɔm pan wan-wan pat. 11 Di sta in nem na Bita Plant. Ɛn we yu sheb di wata dɛn to tri pat, wan pat bita, ɛn di wata dɛn kil bɔku pipul dɛn bikɔs dɛn bita.

12 Di nɔmba 4 enjɛl blo in trɔmpɛt. We yu sheb di san, di mun, ɛn di sta dɛn to tri-tri pat, sɔntin nak wan-wan pat pan dɛn we mek di wan-wan pat dɛn dak, ɛn we yu sheb di de ɛn di nɛt to tri pat, wan-wan pat pan dɛn nɔ gɛt layt.

13 Ɛn a si ɛn yɛri wan igul we de flay midul di skay de tɔk wit lawd vɔys se: “Trɔbul, trɔbul, trɔbul go apin to di wan dɛn we de na di wɔl bikɔs ɔf di sawnd we go kɔmɔt pan di ɔda trɔmpɛt dɛn we di tri enjɛl dɛn de kam blo!”