Pesiŋ bɛɛ Chɛhowa cho yiyaŋ maa a sɔla batiuwaa o kpeleŋ ŋ kɛsi wo niŋ te le. (2 Kɔl. 8:12) Pɛɛku o simul komal numndo niŋ. Wa yiyaŋndo a batiuwaa ŋ sɔla niŋndo okɔɔ. Baabuiyo dimi maa, “Mɛlɛka cho wana lakafa, mbo puɛɛnuŋ a wali nya cho tosaa wo le.” (Hibu. 6:10) Lelaŋ, num bɛɛ puɛɛnuŋ a batiuwaa ŋ sɔla niŋndo okɔɔ le. Wa yiyaŋndo a ndu okɔɔ. O wa aa le chaŋyɛi kpɛɛluŋnde nɔɔ a Chɛhowa, le suɛi a ndu okɔɔ o acheleŋnda lo, ɔɔ le yiŋɔɔ sɔlaa. Mɛɛ Chɛhowa mala num ma komal kpeleŋnda ŋ kɛsi o paandoo niŋndaŋ yɛ, lende koni o cho num mala ni ma hiou lachi a la ŋ kɛsi suŋ suŋndaŋ komallo. A mala Chɛhowaa, a tiuba ma komal kpeleŋ ŋ kɛsi wo. Mɛɛ ŋ hiau lachi fau a kindi kindiŋndo le kpeleŋ ŋ kɛsi wo komallo, puɛɛnuŋ le chɔɔ mɛɛ Chɛhowa cho num malaa a num salaa dɔwɔɔ yɛ le. (2 Kɔl. 4:7) Te a vi ŋdial te, a cho salalaŋ sɔla tau.—Kale. 6:9. w23.05 31 ¶16-18

Mi Chɛhowa nuuviaa nɛilaŋ le wanaa nduaa chɔmndo maa o kaala nda, nduyɛ maa o naŋ kɔl a nda. Mi Baabuiyo chɔm teleŋndaŋ latiɔɔŋ la Chɛhowa dimul Chiisu maa o kaala ndu, nduyɛ maa o hini kɔl a ndu laŋ. (Mat. 3:17; 17:5) A yeema pa mi Chɛhowa dimul num maa o hini kɔl a num? O kpeekpei niŋ, Chɛhowa suu hau o naa lo kpendekele le, kɛ mbo soliŋ Baabuiyo kpeku le suɛi o naa lo. Te ŋ veelu pɛ diomnda kaalaa la Chiisu wa buɛiyaa nduaa dimullo laŋ, i wa ko maa Chɛhowa cho diomnda laŋ suɛi o naa lo ni. Mi Chiisu tual suliŋnda kɛndɛla Finya ndɔlaŋ kɔɔli kpou. Lelaŋ, te ŋ veelu pɛ diomndaŋ a mɛɛ Chiisu wa buɛiyaa nduaa dimullo maa o hini kɔl a nda yɛ, mi che bɛɛ wanaa lahakiaa nda wa ni, i wa ko maa Chɛhowa cho diomnda laŋ suɛi o naa lo ni. (Chɔŋ 15:​9, 15) Te simultaŋ la komal naa pɛ, keŋ chɔm nuaa maa Chɛhowa hini kɔl a naa le le. Kɛ, miŋ sɔla fondaa le Chɛhowa chɔmndo mɛɛ kpɛ naŋ kaala ndu, nduyɛ miŋ duau tiindaŋndo o ndu niŋ yɛ.—Chemi. 1:12. w24.03 28 ¶10-11

Te kala chuaa ŋ cho ni, mala chuauwaa numnda ma bɛɛndiaa mulila nda tiuba le yɔŋgoo laŋ. Lepum, nyɛ naŋ wa pɛɛkoo wo wa a bahawɛila yuŋgoo, ɔɔ a kaalaŋ lapum okɔɔ. Kɛ naapum mi pɛllo opilɛ ɔɔ la tiɔɔŋ la wa, naa chuaambuaa tiuba ma muli wa. Nduyɛ mala chuauwaa numnda ma bii bila, le sabu nda chue nda teleŋ o teleŋ te wo, te a heelu pɛ baa. Hei mala o yɔŋ bɛɛ ma chue nda le, a tembu kɔl te. (1 Tim. 6:18) Naa kpou tiuba miŋ bɛɛndiaa mulila saŋgala Chɛhowa nduyɛ mi la dɛɛniaa chaaŋaa naa laalaŋnda kɔltaŋ ndaŋ. (Polo. 25:11) Mi che bɛɛ lepum o bɛnda miŋ soo a sɔɔŋ naŋ yɔŋnaŋndo okɔɔ, kɛ ŋ nɔ miŋ fafaŋ suɛi tau a naapila okɔɔ. (Polo. 27:2; 2 Kɔl. 10:18) Ŋ nɔ miŋ handu kɔl naa kpou o Chɛhowa, Diom ndɔɔ, vɛlɛ a o wanaa nduaa choo.—Sɔɔŋ. 4:11. w23.04 24-25 ¶17-18