Saamiɛɛ Tasoo
18 Dimioo nuaa mi Deeve nda Sɔɔ chii baltaŋ, mi chaŋyɛi kpɛɛluŋnde luɛi Chonataŋ+ nda Deeve tɛɛŋ. Nduyɛ, mi Chonataŋ kaala Deeve tau mɛɛ o kaala ndupila yɛ.+ 2 Chɔŋ niŋ a paale leŋ, Sɔɔ chɛllɛ mi Deeve miiŋgu o finya ndɔ lo le. Mbo wa niko mial ndɔ.+ 3 Mi Chonataŋ nda Deeve yii kpemaa,+ kanifuule mbo kaala ndu mɛɛ ndoo kaala ndupila yɛ.+ 4 Mi Chonataŋ soli doma bala biŋgi wa ndu lekɔɔ wo, mbo ke Deeve. Mbo ke ndu vɛlɛ doma ndɔ chɔuwo, muɛi nduɛi faŋnde, chiɔule ndɔleŋ, a yaule ndɔleŋ. 5 Okoŋ mi Deeve kandu kɔlaŋ o chɔuwo. Nduyɛ ba o ba Sɔɔ ndoo vem ndu pɛ, batiuwaa ndoo sɔla ni.+ Le hei, mi Sɔɔ ke ndu kpaayaa puaa nduaa chɔuwa choo.+ Mi waŋnda a buɛiyaa Sɔɔ wa kpou naŋ kɔl le hei.
6 Te Deeve a puaa chɔuwa apiliaa ndaa kɔ yom pɛ Filitiaŋnda o chɔuwo ma miiŋgu, mi waŋ laanduaa ndaa fula o chieeŋ bɛndoŋ niŋ kpou Isɔluɛi ma hiŋ o Sɔɔ lo a chondoŋ+ vɛlɛ a yolaŋ. Mi ndaa hiŋ a dundula pɔmbɔlaŋ lɔɔ vɛlɛ a nyɛm chaaŋ cheleŋndoŋ,+ nduyɛ ma dɔɔnuŋ nyaale tau. 7 Mi ndaa hiŋ a kpeŋjoo, nduyɛ ma soli chondei aa:
“Sɔɔ dii waŋnda o waalaŋ niŋ,
Kɛ Deeve ndu waalaŋ o tɔ tɔ laŋ niŋ.”+
8 O mɛɛlulaŋ kpɔŋ, mi Sɔɔ tambu kɔllo tau,+ kanifuule ndoo kaala chondei hei le. Mbo dimi aa: “A cho Deeve lisaa maa o dii yaamɔɔwa waalaŋ o tɔ tɔ laŋ niŋ, kɛ ya maa o waalaŋ niŋ kinɛi. Masaleŋ koni le lo niŋ le ndu kioo ni!”+ 9 Chɔŋ niŋ a paale leŋ, Sɔɔ ndoo dindu lɛ kɔl a Deeve le.
10 Diimandɔɔ, mi Mɛlɛka tosa mi yiyaŋ wɔɔŋndo luɛi Sɔɔ o kɔl,+ okoŋ mbo kandu sɔɔŋ tosaa yalaka yalaka o ndu lo chiɛiniŋ. Deeve wa ndu towaa loolullo+ mɛɛ ndoo tosa paandu yɛ. Nduyɛ ballo wa Sɔɔ o ba.+ 11 Mbo wuu ballo,+ mbo dimi o kɔl niŋ aa: ‘I cho Deeve baŋɔɔ o chiɛiyo!’ Bɛmbɔɔ le diiŋ kpulukuu o tosa hei ni, kɛ mi Deeve hialuŋ. 12 Mi siooŋnde bii Sɔɔ le Deeve, kanifuule Chɛhowa wa a ndu latulu.+ Kɛ Sɔɔ ndu, ndoo faŋaŋ ndu niŋ kɔɔli.+ 13 Le hei, mi Sɔɔ faŋa Deeve ndu ikɛi, mbo handu ndu masaa puaa 1,000 choo. Nduyɛ Deeve ndoo sim nda lachi ni le kɔlaŋ o chɔuwo.+ 14 Deeve wa hiouwɔɔ lachi a batiuwaa sɔlaa+ o nyɛ o nyɛ o wa tosaa niŋ, nduyɛ Chɛhowa wa a ndu latulu.+ 15 Mɛɛ Sɔɔ che maa Deeve wa batiuwaa sɔlaa tau, mi siooŋnde chɔɔlu ndu biyɔɔ le ndu. 16 Kɛ waŋnda Isɔluɛi a Chuda kpou ndaa kaala Deeve, kanifuule ndu ndoo sim nda lachi ni le kɔlaŋ o chɔuwo.
17 Okoŋ kɔɔli, mi Sɔɔ dimul Deeve aa: “Chua ni tasoo cho naŋ diolaŋ aa Mɛluabi.+ I cho num ndu ke mbo wa laa num.+ Kɛ num hiou lachi a kɔl simulaa chɔmndo le ya, nduyɛ ma sɔŋga a yaamɔɔwaa Chɛhowa wa.”+ Mi Sɔɔ dimi o kɔl niŋ aa: ‘O cho ya le cho Deeve diyɔɔ le, kɛ Filitiaŋnda cho ndu diyɔɔ ni.’+ 18 Okoŋ mi Deeve dimul Sɔɔ aa: “Yuŋgu ya fula choo o Isɔluɛi niŋndo cho bɛɛ yuŋgu sɔvɛ le. Nduyɛ, wana maavɛɛ ya cho yɛ le mi simnuŋ lefoo masaa?”+ 19 Kɛ tuupa mi teleŋndo fuuluu le mi Deeve chua Mɛluabi chua Sɔɔ wo o nɔɔ niŋ, ma chua Mɛluabi ma ke Adiluɛi,+ Mɛholataitiinɔɔ le mbo wa laa ndɔ.
20 Nduyɛ, chua Sɔɔ wo Maikaa+ ndoo kaala Deeve. Mɛɛ nda dimul Sɔɔ a ndi okɔɔ, mbo naŋ kɔl tau. 21 Okoŋ mi Sɔɔ dimi o kɔl niŋ aa: “I cho ndu chua nuu ke o nɔɔ niŋ le mi yeŋ ndu yaŋɔɔleŋ, le halikpeŋ mi Filitiaŋnda dii ndu.”+ Mi Sɔɔ dimul vɛlɛ Deeve aa: “O paale hauleŋ ndeŋ choo, a cho simnɔŋ lefu nuu.” 22 Okoŋ kɔɔli, mi Sɔɔ dimul buɛiyaa nduaa aa: “La kɔ soo o Deeve lo sɔɔsɔɔ mi la dimul ndu aa, ‘Masaa naŋ kɔl tau a num, nduyɛ buɛiyaa nduaa kpou kaala num. Lelaŋ, chɛl ma simnuŋ lefoo masaa.’” 23 Mɛɛ buɛiyaa Sɔɔ wa kɔ dimul Deeve sɔɔŋ muŋ, mi Deeve dimi aa: “Baa la che ndi pa maa suɛi bɛɛŋ bɛɛŋ i cho ni le simnɔŋndo lefoo masaa? Wana bala fondoo ya cho ni, nduyɛ I cho bɛɛ wana sɔvɛ pɛŋ te.”+ 24 Okoŋ, mi buɛiyaa Sɔɔ wa kɔ dounuŋ ndu kona a nyɛ Deeve dimi wo okɔɔ.
25 Mi Sɔɔ dimi aa: “Nyɛ nya nɔ mi la dimul Deeve wo cho hoo ni, ‘Masaa yeema num fulu o fulu o ba le.+ Nyɛ o yeema num o ba kinɛiyo cho suundula Filitiaŋnda 100 ni.+ Kanifuule, o yeema mbo miŋgul yaamɔɔwaa nduaa maa.’” Sɔɔ wa nɛilaŋ nuuviaa le halikpeŋ mi Filitiaŋnda dii Deeve. 26 Mi buɛiyaa nduaa kɔ dounuŋ Deeve kona, nduyɛ mi Deeve naŋ kɔl tau le mbo simnuŋ lefoo masaa.+ Kɛ tuupa mi teleŋ masaa kɛsul ndu wo fuuluu, 27 mi Deeve nda puaa nduaa kɔ diu puaa Filitiaŋnda 200. Okoŋ, mbo faaŋiaa suundula ndalaŋ mbo chuu masaa, le mbo simnuŋ lefu ndɔ. Okoŋ kɔɔli, mi Sɔɔ ke Deeve Maikaa chua ndɔ le mbo wa laa ndɔ.+ 28 Mi Sɔɔ sina kɛsɛ maa Chɛhowa wa latulu a Deeve,+ nduyɛ maa Maikaa chua ndɔ kaala Deeve.+ 29 Mi hei tosa mi Sɔɔ chɔɔlu siooŋnde nɔ le Deeve. Nduyɛ mi Sɔɔ chua niko Deeve maa yaamɔɔnɔ ndɔ haaa a yoomu ndɔɔ mɛɛlulaŋ.+
30 Mi waŋ banaa Filitiaŋnda ndaa kuɛ sɔŋgɔɔ a Isɔluɛiya. Kɛ teleŋ o teleŋ ndaa kuɛ pɛ sɔŋgɔɔ, Deeve ndoo hiau batiuwaa sɔla a buɛiyaa Sɔɔ wa.+ Le hei, mi tɔɔ ndɔɔ tiu kpou.+