Masaa Diiŋ Nduaa

17 Wɔsi 12 Masaa Ehaasi wa o masaleŋ choo Chuda wo, Hoosiya,+ po Ɛlaa wo simnuŋ masaa le Isɔluɛi ni. Sameeliaa o wa ichali ni, nduyɛ mbo chii wɔsilaŋ la ŋɔmahiɔɔlu o masaleŋ choo. 2 Mbo hiau lachi a nyɛ bɛnda Chɛhowa o hɔl te wo tosaa, kɛ o sulaŋ a masaa keeku ndu lachi Isɔluɛi ya le. 3 Mi Sialimanɛɛsa, masaa le Asiiliaa huŋ chiŋalaŋ ndu.+ Nduyɛ mi Hoosiya simnuŋ buɛi ndɔɔ, mbo kandu ndu paawaa* malɔɔ o ba.+ 4 Kɛ nduyɛ, mi masaa le Asiiliaa tuɛi maa Hoosiya yii ndu dumbu.* Kanifuule, mbo yɔŋ waŋnda o So lo, masaa le Ichipi,+ nduyɛ o yɔŋgu masaa Asiiliaa paawaa mɛɛ ndoo yɔŋgu o wɔsiŋ hiou woŋ niŋ yɛ le. Le hei, mi masaa le Asiiliaa bii ndu, mbo yii ndu, mbo duau ndu o chiɛi manyumndo niŋ.

5 Mi masaa le Asiiliaa huŋ a puaa nduaa chɔuwa o lɛŋndeŋ niŋ kpou, nduyɛ mbo kua Sameeliaa mbo kɔ luei ndu o piŋndo niŋ le wɔsilaŋ la yaa. 6 Wɔsi ŋɔmahiɔɔlu ndɔ Hoosiya wa o masaleŋ choo wo, masaa le Asiiliaa bii Sameeliaa ni.+ Okoŋ, mbo kua a waŋnda Isɔluɛi o biyɔɔ niŋ+ Asiiliaa, mbo kɔ kɛsi nda o chioo Hela a o chioo Habɔɔ, o wa o pioo Kosaŋ+ ikɛiyo, a o chieeŋ Midiaŋnda.+

7 Le mɛɛ waŋnda Isɔluɛi tosa hakioo a Chɛhowa Mɛlɛka ndaa yɛ hei yɔŋnuŋ ni. Ndu soli nda o lɛŋnde Ichipi leŋ niŋ Feloo, masaa le Ichipi o ba bɛŋgu ni.+ Kɛ ma wa sooluuwo mɛlɛkaa cheleŋnda.*+ 8 Kaayii Chɛhowa tou nda lachi ve, ma tual naamula ndalaŋ kɔɔli. Nduyɛ, ma tual naamula masaa wa o Isɔluɛi niŋnda kɔɔli.

9 Sɔɔŋ bɛnda Chɛhowa Mɛlɛka ndaa o hɔl te woŋ, muŋ Isɔluɛiya ndaa tosa ni. Ma hiau lachi a fondaŋnda filioŋndaŋ taŋgullo o chieeŋ ndaŋ niŋ kpou,+ chɔŋ o bandu mɛŋgɛlaa kɔ bii o chiee nda taŋgul a kpaki kala kalaa wo.* 10 A wa hiouwɔɔ lachi a suŋgbuma nda toosiaa a poutaŋ ndaŋ, vɛlɛ a suŋgbuma iyɔm ndaŋ*+ simioo o pemboŋ choo a o yɔm bɛndu kɛ kɛ bɛŋgu+ le ndapila. 11 A wa salalaŋ lomɔɔ o pemboŋ choo kpou, mɛɛ o mɛɛ kaayii Chɛhowa tou nda lachi ve ndii tosa yɛ.+ Ma hiau lachi a sɔɔŋ wɔɔŋndoŋ tosaa le Chɛhowa kɔllo tɛɛmbuuwo.

12 A wa hiouwɔɔ lachi a piɔmaa nɔɔlɛiya* sooluuwo.+ Mi Chɛhowa dimul nda a piɔmaa kaŋ okɔɔ maa a nɔ ma sooluu nda le.+ 13 Mi Chɛhowa hiau lachi a waŋnda Isɔluɛi a Chuda silaa sanaa a wanaa ndaa suaa le ndu wa kpou, vɛlɛ a wanaa ndaa cha yilaŋndoŋ nda.+ Mbo dimul nda aa: “La mulul yɔŋnda nyala wɔɔŋndaŋ kɔɔ!+ Sawala ya ke finyaa nyaa mamaa laŋ kpou, a nyɛ o nyɛ ya dimul wanaa suaa le ya wa le ma dimul nya, la bii laŋ, mi la tosa nyɛ la dimi wo.” 14 Kɛ a yeŋ lani le. A wa hiouwɔɔ lachi a nilakalulaŋ tosaa,* mɛɛ finyaa ndaa mamaa kɛɛ tiindaŋndo dɔwɔɔ o Chɛhowa Mɛlɛka ndaa niŋnda tosa yɛ.+ 15 Ma hiau lachi a sawala o ke finyaa ndaa mamaa laŋ, vɛlɛ a silala o wa nda kioo le nda loonɔŋndo laŋ+ kiɔɔ. Nduyɛ, a lo o kpema+ o yii a finyaa ndaa mamaa wo choo le. A wa hiouwɔɔ lachi a piɔmaa nɔɔlɛiya sooluuwo.+ Le hei, mi ndapila bɛɛ simnuŋ wanaa nɔɔlɛi.+ Ma tual tamasi kaayii ndii balu nda kpou ve kɔɔli, i Chɛhowa ndoo dimul nda maa a tual ndi kɔɔli le ve.+

16 Ma hiau lachi a sawala Chɛhowa Mɛlɛka ndaa kpou malɔɔ. Nduyɛ, ma toosiaa nauwa* a ŋiɔɔŋ a chiliŋnde+ vɛlɛ a suŋgbule iyɔm ndeŋ.*+ Okoŋ kɔɔli, ma tunduŋ nyɛm Mɛlɛka toosiaa o choo choo niŋndoŋ o hɔl,+ ma sooluu Baal.+ 17 Ma soli vɛlɛ puaa ndaa a chuauwaa ndaa laanduaa salaa o yiŋndeŋ niŋ.+ Ma wou balaŋ o mandeleŋ+ a o yawalaŋ viomɔɔ niŋ. Nduyɛ ma hiau lachi a nyɛ bɛnda Chɛhowa o hɔl te wo tosaa, le ndu kɔllo tɛɛmbuuwo.

18 Le hei, mi Chɛhowa tuulu kɔl o kala kala a waŋnda Isɔluɛi, mbo faŋa nda ndu o hɔl.+ O mɛi wana o wana o lɛŋndeŋ niŋ te, mɛɛ kaale Chuda leŋ kinɛi.

19 Waŋnda Chuda bɛɛ, a hiu lachi a sawala Chɛhowa Mɛlɛka ndaa diikɔŋndo le.+ Naamula waŋnda Isɔluɛi tol kɔɔli laŋ, nda bɛɛ ma tual taŋ kɔɔli.+ 20 Mi Chɛhowa kɛɛ waŋnda Isɔluɛi kpou, nduyɛ mbo tɛɛmbuu nda labɛɛ, mbo mal nda wanaa kei waŋnda delɔɔ choo ma puŋga nyɛm ndaŋ nda o ba. O lo keŋ tosaa haaa mbo faŋa nda ndu o hɔl. 21 Mbo faŋa Isɔluɛi o masale Deeve leŋ bɛŋgu, nduyɛ ma siiŋguu Chɛlobowam, po Nebati wo masaa.+ Kɛ mi Chɛlobowam tosa mi waŋnda Isɔluɛi faŋaŋ Chɛhowa kɔɔli, nduyɛ mbo tosa ma luei balaŋ o haki wɔɔŋ wɔɔŋndo niŋ. 22 Mi waŋnda Isɔluɛi hiau lachi a kɔlaŋ o hakila Chɛlobowam tosa laŋ choo kpou.+ A lo laŋ tosaa 23 haaa mi Chɛhowa faŋa nda ndu o hɔl, a mɛɛ o dimi sanaa a wanaa suaa le ndu wa kpou yɛ.+ Ma kua a waŋnda Isɔluɛi o chɛleŋ niŋ Asiiliaa.+ Nduyɛ a cho wɔ loŋ haaa a paale hauleŋ ndeŋ.

24 Mi masaa le Asiiliaa chua waŋnda Babilɔŋ, Kuti, Avaa, Hamaati, a Sɛfavem+ mbo kɔ kɛsi nda o chieeŋ bɛndoŋ Sameeliaa, sɔŋgɔ Isɔluɛiya. Ma chal niko Sameeliaa, a o chieeŋ ndɔŋ bɛndoŋ niŋ. 25 Teleŋ tase nda hiŋ o lɛŋnde leŋ niŋndo, ndaa nɔ isiooŋ le* Chɛhowa le. Le hei, mi Chɛhowa yɔŋ kpɔkuŋnda,*+ nduyɛ ma diu diu apum nda tɛɛŋ. 26 Ma dimul masaa le Asiiliaa aa: “Wanaa ŋ bii o chɛleŋ niŋ ma huŋ kɛsi nda o chieeŋ bɛndoŋ Sameeliaa wa, a sina mɛɛ wana piɛi* Mɛlɛka nɔ lɛŋndeŋ ndo yɛ le. Le hei, o cho nda kpɔkuŋnda yɔŋndo tɛɛŋ, ma wa nda diu diu wo. Kanifuule, wana o wana o nda tɛɛŋ sina mɛɛ wana piɛi Mɛlɛka nɔ lɛŋndeŋ ndo yɛ le.”

27 Okoŋ, mi masaa le Asiiliaa dimul nda aa: “Wanaa soliaa lasalaa nya bii o lɛŋnde leŋ niŋ mi la huŋ a nda o chɛleŋ niŋnda, la miŋgi wana pilɛ loŋ le mbo kɔ pɛɛku nda mɛɛ wana piɛi Mɛlɛka nɔ lɛŋndeŋ ndo yɛ.” 28 Le hei, mi wanaa soliaa lasaa nda bii Sameeliaa ma kua a nda o chɛleŋ niŋnda o pilɛ miiŋgu, mbo kɔ chal Bɛtɛl.+ Okoŋ, mbo kandu nda pɛɛkoo mɛɛ wana nɔ siooŋii Chɛhowa ve yɛ.+

29 Kɛ, mi kaale kɛ kɛ toosiaa mɛlɛka ndaa,* ma kɛsi ndu o maaŋnda Sameeliaŋnda ndaa toosiaa o fondaŋnda filioŋndaŋ le mɛlɛkaa ndaa sooluuwo laŋ. Mi kaale kɛ kɛ tosa hei o chieeŋ bɛnduŋ nda wa woŋ niŋ. 30 Le hei, mi waŋnda Babilɔŋ toosiaa Sukɔti-bɛnɔti, mi waŋnda Kuti toosiaa Nɛkaa, mi waŋnda Hamaati+ toosiaa Asima, 31 nduyɛ mi waŋnda Avaa toosiaa Nibihasi a Tataki. Mi waŋnda Sɛfavem ndaa lom puaa ndaa o yiŋndeŋ niŋ le mɛlɛkaa ndaa, Aduluamɛlɛki a Anamɛlɛki.+ 32 Mi che bɛɛ ndaa nɔ siooŋnde le Chɛhowa, kɛ ma hɛli wanaa soliaa lasalaa wanaa ndaa tɛɛŋ. Nda wa niŋ chilaŋ chuaa o maaŋnda nda sooluu mɛlɛkaa ndaa o fondaŋnda filioŋndaŋ ni.+ 33 Mi che bɛɛ ndaa nɔ siooŋnde le Chɛhowa, kɛ mɛlɛkaa ndaa ndaa sooluu ni, a mɛɛ naamu ndaa wa o lɛŋii nda chɛŋ nde niŋ yɛ.+

34 Haaa a paale hauleŋ ndeŋ, piɛiyii nda wa choo paandu ve* nda cho tolɔɔ kɔɔli ni. Wana o wana cho Chɛhowa piɛi le. Wana o wana cho sawala ndɔlaŋ, yamaŋ ndɔŋ, a nyɛ ndu Chɛhowa dimul puaa Chekɔpu wa le tosaa wo tolɔɔ kɔɔli le. Chekɔpu wo hoo o siŋga diolaŋ ni aa Isɔluɛi.+ 35 Mɛɛ Chɛhowa yii kpemaa a Isɔluɛiya,+ mbo dimul nda aa: “La nɔ mi la nɔ siooŋii mɛlɛkaa cheleŋ te. Nduyɛ, la nɔ mi la beŋ nda wulaŋ, mi la sooluu nda, ɔɔ mi la solul nda salalaŋ te.+ 36 Kɛ ya Chɛhowa siɛndi ba nuu mi soli nya o lɛŋnde Ichipi leŋ niŋ a kpaaya ni bɛndoo wo,+ ya nya nɔ ni mi la nɔ siooŋii nii,+ mi la beŋ ya wulaŋ, okoŋ mi la solul la salalaŋ. 37 Nduyɛ sawala nilaŋ, yamaŋ nuŋ, a nyɛ o nyɛ ya dimul nya le tosaa mbo wa o poonyiaa,+ le teleŋ o teleŋ, ndu nya nɔ ni mi la tol kɔɔli nyɛkɛndɛi. La nɔ mi la nɔ siooŋnde le mɛlɛkaa cheleŋ te. 38 La nɔ mi la puɛɛnuŋ kpema ya yii a nya wo le,+ nduyɛ siooŋii nɔ mi i wa nya le mɛlɛkaa cheleŋ te. 39 Ya Chɛhowa Mɛlɛka nyaa nya nɔ ni mi la nɔ siooŋii nii. Kanifuule, ya cho nya piŋi yaamɔɔwaa nyaa kpou o ba ni.”

40 Kɛ kaaye hei tuii ndu diom te. Ma tual piɛiyii ndɛi paanduei* kɔɔli.+ 41 Mi che bɛɛ ma nɔ siooŋii Chɛhowa ve,+ kɛ a wa vɛlɛ piɔmaa ndaa sooluuwo. Haaa a paale hauleŋ ndeŋ, chuauwaa ndaa a chuauwaa ndaa mamaa cho tosaa mɛɛ finyaa ndaa mamaa tosa yɛ.