Ɛsilua

9 Dimioo nuaa miŋ chii sɔɔŋ muŋ tosa, mi laŋgbaa kalla huŋ naa ya chua, ma dimi aa: “Waŋnda Isɔluɛi, wanaa soliaa lasalaa, a Livaiya feŋaŋ wanaa cho o lɛŋnde hei niŋnda kɔɔli a kaala ndala nɔɔlɛilaŋ te.+ Nda yɔŋnuŋ ni maa, Kenanaitiiya, Hitaitiiya, Pɛluisaitiiya, Chɛbusaitiiya, Amɔnaitiiya, Mowabaitiiya, Ichipiaŋnda,+ a Amɔluaitiiya.+ 2 Nda ni, puaa ndaa ni, a chua chuauwaa ndaa apum o nɔlaŋ niŋ.+ Nda cho wanaa diandaa wa,+ ma muuliaŋ a wanaa cho o lɛŋnde hei niŋnda.+ Laŋgbaa kalla a wanaa cho masaa ikɛiya fɛŋ tosa hakioo, ma kɛɛ lo lechoo wo chɔmndo.”

3 Dimioo nuaa mi tuɛi hei, mi sɛɛsiaŋ nyɛlaŋ lekɔɔ, nduyɛ mi suiŋgi yiiŋnde i tiŋ ya o lebol a siɛiyii nii i tiŋ, okoŋ mi chal lɛŋ o kɔl tambɛi bɛndoo niŋ. 4 Nduyɛ, wana o wana ndoo nɔ siooŋnde* le diomnda Mɛlɛka Isɔluɛiya dimi laŋ, ma huŋ chuuŋgiaŋ ya ikɛi ma balu ya silɔ, le mɛɛ wanaa fula o biyɔɔ niŋnda kɛɛ le lo lechoo wo chɔmndo yɛ. A lo loŋ a ya latulu haaa a teleŋ sala ŋkul paale delaa.+

5 A teleŋ sala ŋkul paale delaa,+ mi chaŋ naa ya wa ichali o kɔl tambɛi bɛndoo niŋnda a nyɛla nila sɛɛsiɛi laŋ lekɔɔ, mi baŋ wulaŋ, mi heelu balaŋ o Chɛhowa Mɛlɛka nuu lo. 6 Mi dimi aa: “Oo Mɛlɛka nuu, siɔmbulaŋ la cho ya bɔɔ, nduyɛ I suliŋ bɛɛ pɛŋ le num nyunaa o piɛileŋ niŋ te. Kanifuule, hakila naalaŋ la mel naa kpou. Nduyɛ, la lo deŋgelaŋndo haaa mi la fuuluu o choo choo niŋ.+ 7 Chɔŋ a teleŋ finyaa naa mamaa haaa huŋ bii a paale hauleŋ ndeŋ, hakila naalaŋ la kui tau tau.+ Nduyɛ le hakila naalaŋ ndaŋ, naa ni, masaa naa ni, wanaa naa soliaa lasalaa ni, ma mal naa masaa cho o lɛŋnde hei niŋnda o ba ma diu diu naa a muɛi faŋnde,+ ma kua a naa o biyɔɔ niŋ,+ ma puŋga nyɛm naŋ,+ nduyɛ ma tusi naa simɔbulaŋ, a mɛɛ i cho paale hauleŋ ndeŋ yɛ.+ 8 Kɛ num Chɛhowa Mɛlɛka naa, ma tuiinuŋ naa wanaa lo haa yoomu wa inyiɛɛ, ma soli naa o biyɔɔ niŋ, ma huŋ a naa o fondaŋ num diandaa+ le naa mandaa le miŋ wa a nyaale, nduyɛ ma tosa miŋ sɔla yoomuma sɛnɛiyaŋ. 9 Mi che bɛɛ chiaa naŋ cho ni,+ kɛ num Mɛlɛka naa a mel naa o chɛleŋ niŋ te. Ma chɔm naa kaala lo lechoo wo masaa cho Paasiaa wa o hɔl,+ ma ke naa yoomuma sɛnɛiyaŋ le miŋ taŋgul chiɛi num tambu wo,+ nduyɛ ma manda naa* o Chuda a o Chulusalɛm niŋ.

10 “Oo Mɛlɛka naa, yɛɛ kpeekpei naŋ nɔla yɛ miŋ dimi o hei niŋ? Kanifuule, ŋ kɛɛ le sawala numndaŋ diikɔŋndo, 11 sawala ŋ ke naa sanaa a wanaa ndaa suaa le num nda. Ma dimi aa: ‘Lɛŋnde nya cho kɔlaŋ challe leniŋ ndeŋ, lɛŋnde nɔɔlɛileŋ le cho ni. Kanifuule, wanaa cho o lɛŋnde leŋ niŋnda, wanaa nɔɔlɛiya nda cho ni. Nduyɛ, a pei kaala ndala nɔɔlɛilaŋ+ o lɛŋnde leŋ niŋ cha. 12 Lelaŋ, la ke puaa ndaa chuauwaa nyaa laanduaa le, nduyɛ la chɛl mi puaa nyaa chua chuauwaa ndaa laanduaa le.+ Fɛɛŋ bɛɛ la mala nda ma wa o kɔl nyulu niŋ ɔɔ mi dɛnɛ kɛndɛ komal nda le.+ Te la tosa lende pɛ, la cho yoomuaŋ sɔla, nduyɛ mi la hɛlu lɛŋnde leŋ le chuauwaa nyaa le fɛɛŋ a fɛɛŋ, okoŋ mi la de nyɛm kɛndɛŋ cho loŋ ndoŋ.’ 13 Oo Mɛlɛka naa, le yɔŋnda naala wɔɔŋndaŋ sɔɔŋ muŋ kpou komal naa ni. Kɛ a bii naa mɛɛ yɔŋnda naala wɔɔŋndaŋ la cho yɛ le.+ Nduyɛ, ma soli naa o biyɔɔ niŋ.+ 14 Vɛɛ naŋ nɔla yɛ vɛlɛ miŋ tɛɛmbuu sawala numndaŋ, miŋ chal o nɔlaŋ niŋ* a wanaa tosa haa sɔɔŋ nɔɔlɛiyoŋ nda?+ Baa a doonuŋ niŋ tumbe a naa o kala kala, ma basu naa tɛɛ le? 15 Oo Chɛhowa, Mɛlɛka Isɔluɛiya, wana sakpoo ŋ cho ni.+ Kanifuule, ma tosa mi naa pumnda wa yoomu haaa a paale hauleŋ ndeŋ. A che naa isisi num lachi a hakila naalaŋ, mi che bɛɛ o bɛnda kposoŋ miŋ sim num lachi a sɔɔŋ yɔŋnuŋ muŋ ndoŋ te.”+