၂၃ “နကဘၣ်တ့ထီၣ်​ စီၢ်နီၤခိၣ်+ တဖျၢၣ်လၢ သ့ၣ်ဖှ့ၡံးတၤ ဒီးအထီကဘၣ်အိၣ်ဝဲ ခံပျၢ်, အလဲၢ်တပျၢ် ဒီးအကစီၤထီၣ်ထီ တပျၢ်တထါလီၤ.+ ၂၄ ဒီးနဘၣ်ကျးအီၤဒီး ထူစီကဘျၣ်တဖၣ်​ ဒီးနကဘၣ်​ ကျီၤဝးတရံး အကနူၤလၢ ထူလီၤ. ၂၅ တၢ်ကွီၤတခါ လၢအလဲၢ် စုနၢလွံၢ်ဘိန့ၣ်* နကဘၣ်​ ထီထီၣ်အီၤလၢ စီၢ်နီၤခိၣ်​ အကနူၤအဖီခိၣ်ဝးဝး ဒီးနကဘၣ်ကျီၤဃာ် တၢ်ကွီၤအံၤ အကနူၤ လၢထူလီၤ. ၂၆ နဘၣ်တ့ထီၣ်​ ထူကွီၤလွံၢ်ကွီၤ ဒီးပာ်အီၤလၢ စီၢ်နီၤခိၣ်​ အနၢၣ်လွံၢ်နၢၣ်​ ဖဲစီၢ်နီၤခိၣ်​ အခီၣ်ဘုးတာ်လိာ်အသးဒီး စီၢ်နီၤခိၣ်အလီၢ်န့ၣ်လီၤ. ၂၇ ဒီးကွီၤတဖၣ်အံၤန့ၣ်​ နကဘၣ်ထီထီၣ်အီၤဘူးဒီး စီၢ်နီၤခိၣ်အကွီၤ ဒ်သိးကဖီၣ်ဃာ် နီၣ်ယိးဘိတဖၣ်​ ဒီးပှၤကယိးဝဲ စီၢ်နီၤခိၣ်အဂီၢ်လီၤ. ၂၈ ဒီးနကဘၣ်တ့ထီၣ်​ နီၣ်ယိးဘိတဖၣ်​ လၢသ့ၣ်ဖှ့ၡံးတၤ ဒီးနဘၣ်ကျးအီၤဒီး ထူကဘျၣ်တဖၣ်​ ဒီးနကဘၣ်သူ နီၣ်ယိးဘိတဖၣ်အံၤ ဒ်သိးကယိး စီၢ်နီၤခိၣ်အဂီၢ်လီၤ.