မၢ်ကူး
၈ ဖဲမုၢ်နံၤတဖၣ်န့ၣ်အတီၢ်ပူၤ ပှၤဂီၢ်မုၢ်ဖးဒိၣ် ပာ်ဖှိၣ်ထီၣ်ကဒီးအသးတဒူၣ် ဒီးတၢ်အီၣ်လၢ အဝဲသ့ၣ်ကအီၣ်ဝဲန့ၣ် တအိၣ်နီတမံၤဘၣ်. အဃိ ယ့ၣ်ၡူးကိးဃီၤ အပျဲၢ်အဘီၣ်တဖၣ် ဒီးတဲအဝဲသ့ၣ်လၢ ၂ “ပှၤဂီၢ်မုၢ်အံၤ အိၣ်ဒီးယၤ သၢသီလံ, ဘၣ်ဆၣ် အဝဲသ့ၣ် အတၢ်အီၣ်တၢ်အီ တအိၣ်နီတမံၤဘၣ်အဃိ+ ယသးကညီၤဘၣ် အဝဲသ့ၣ်လီၤ.+ ၃ ဖဲအဝဲသ့ၣ် လီၤဘဲ* အခါ ယမ့ၢ်ပျဲက့ၤ အဝဲသ့ၣ်လၢအဟံၣ်န့ၣ် အဝဲသ့ၣ် ကလီၤဘှးဘၣ်ဖုး လၢကျဲလီၤ. ဒီးအဝဲသ့ၣ် တနီၤနီၤန့ၣ် အိၣ်လၢ တၢ်လီၢ်လၢအယံၤလီၤ.” ၄ အပျဲၢ်အဘီၣ်တဖၣ် တဲဆၢက့ၤအီၤလၢ “ပအိၣ်တၢ်လီၢ်ယံၤ ထဲထဲအံၤညါအဃိ ဒ်သိး ပှၤသ့ၣ်တဖၣ်အံၤ ကအီၣ်ဘၣ်ကိၣ် ဘျဲဘျဲအဂီၢ် ပလဲၤဃုန့ၢ်အီၤ ကသ့ဖဲလဲၣ်.” ၅ ဒီးယ့ၣ်ၡူး သံကွၢ်အဝဲသ့ၣ်လၢ “သုကိၣ်အိၣ်ပှဲၤလိၣ်လဲၣ်.” အဝဲသ့ၣ် တဲဝဲလၢ “နွံလိၣ်လီၤ.”+ ၆ ဒီးအဝဲမၤလိာ်ပှၤဂီၢ်မုၢ် ဒ်သိး ကဆ့ၣ်နီၤလၢ ဟီၣ်ခိၣ်လိၤလီၤ. ဒီးယ့ၣ်ၡူး ဟံးန့ၢ်ကိၣ်နွံလိၣ် ဒီးဃ့ထုကဖၣ်တၢ်လီၤ. ဝံၤဒီး အဝဲဘိးကၢ်ဝဲကိၣ် ဒီးဟ့ၣ်လီၤ အပျဲၢ်အဘီၣ်တဖၣ် ဒ်သိး အဝဲသ့ၣ် ကနီၤလီၤဝဲ ပှၤဂီၢ်မုၢ်တဖၣ်အဂီၢ်လီၤ.+ ၇ အဝဲသ့ၣ်အိၣ်စ့ၢ်ကီးဒီး ညၣ်ဆံးဆံးဖိ စှၤကိာ်ဘ့ၣ်လီၤ. အဃိ ယ့ၣ်ၡူးစံးဘျုးစံးဖှိၣ် ကစၢ်ယွၤဝံၤဒီး မၢအဝဲသ့ၣ်နီၤလီၤ ညၣ်တဖၣ်အံၤစ့ၢ်ကီးလီၤ. ၈ အဝဲသ့ၣ် အီၣ်ဝဲတုၤအဘျဲ ဝံၤဒီးအဝဲသ့ၣ် ထၢဖှိၣ်က့ၤဝဲ အဘျဲၣ်အစဲၢ်န့ၣ် ပှဲၤဝဲကုဖးဒိၣ်နွံဒုလီၤ.+ ၉ ဖဲန့ၣ် ပိာ်ခွါကအိၣ်ဝဲအဂၤ ၄,၀၀၀ လီၤ. ဝံၤဒီး အဝဲပျဲက့ၤ အဝဲသ့ၣ်လီၤ.
၁၀ တဘျီဃီန့ၣ် အဝဲဒိးထီၣ် ကဘီဒီးအပျဲၢ်အဘီၣ်တဖၣ် ဒီးလဲၤနုာ်လီၤလၢ ဒၤလမၤနူၤသၤ+ အဟီၣ်ကဝီၤအပူၤလီၤ. ၁၁ ဖဲန့ၣ် ပှၤဖၤရံၤၡဲတဖၣ်ဟဲ တဲအါတၢ်ဒီးအီၤ ဒီးဒ်သိး ကမၤကွၢ်အီၤအဂီၢ်+ အဝဲသ့ၣ်မၢအမၤ တၢ်ပနီၣ်လီၤလးတခါ လၢမူခိၣ်လီၤ. ၁၂ အဃိ ယ့ၣ်ၡူးသးအုးဒိၣ်မး ဒီးတဲဝဲလၢ “ပှၤတစိၤအံၤ ဃ့တၢ်ပနီၣ်လီၤလးဘၣ်လဲၣ်.+ ယမ့ၢ်တဲတီတီန့ၣ် တၢ်တဟ့ၣ်လီၤ ပှၤတစိၤအံၤလၢ တၢ်ပနီၣ်လီၤလး နီတမံၤဘၣ်.”+ ၁၃ ဝံၤဒီးယ့ၣ်ၡူး ဟးထီၣ်ကွံာ်ဖဲန့ၣ်, ဒိးထီၣ်ကဒီးကဘီ ဒီးလဲၤဝဲလၢ ဝၢ်ဘးခီလီၤ.
၁၄ ဘၣ်ဆၣ် အဝဲသ့ၣ် သးပ့ၤနီၣ်လဲၤစိာ် ကိၣ်အဃိ လၢကဘီပူၤန့ၣ် တၢ်အီၣ်အဂၤ တအိၣ်နီတမံၤဘၣ်, အိၣ်ထဲ ကိၣ်တလိၣ်လီၤ.+ ၁၅ ဒီးယ့ၣ်ၡူး တဲပလီၢ်အဝဲသ့ၣ်လၢ တၢ်သးဆူၣ်အပူၤလၢ “ပလီၢ်သုသးလၢ ပှၤဖၤရံၤၡဲ အကိၣ်မံၣ် ဒီးစီၤဟ့ၤရိာ် အကိၣ်မံၣ်နီၤ.”+ ၁၆ အဃိ အဝဲသ့ၣ် တဲအါလိာ်သး ကဒဲကဒဲ ခီဖျိလၢ အဝဲသ့ၣ်တဟဲစိာ် ကိၣ်ဘၣ်အဃိလီၤ. ၁၇ ဖဲယ့ၣ်ၡူး သ့ၣ်ညါဝဲအခါ အတဲဘၣ်အဝဲသ့ၣ်လၢ “ဘၣ်မနုၤအဃိ သုတဲအါလိာ်သး ဘၣ်ဃးဒီး ကိၣ်တအိၣ်ဘၣ်အဂ့ၢ်လဲၣ်. သုတသ့ၣ်ညါနၢ်ပၢၢ်ဒံးဧီၤ. တုၤခဲအံၤဒၣ်လဲာ် သုတနၢ်ပၢၢ်ထီၣ်ဒံးဧီၤ. ၁၈ ‘သုမဲာ်ချံအိၣ်ဘၣ်ဆၣ် သုတထံၣ်တၢ်ဧီၤ. ဒီးသုနၢ်အိၣ်ဘၣ်ဆၣ် သုတနၢ်ဟူတၢ်ဧီၤ.’ သုတနီၣ်ဘၣ်လၢၤဧီၤ, ၁၉ ဖဲယဘိးကၢ် ကိၣ်ယဲၢ်လိၣ်+ လၢပိာ်ခွါအဂၤ ၅,၀၀၀ အဂီၢ်အခါ သုထၢဖှိၣ် တၢ်အဘျဲၣ်အစဲၢ် အိၣ်ကုပှဲၤဒုလဲၣ်.” အဝဲသ့ၣ်တဲအီၤလၢ “တဆံခံဒုလီၤ.”+ ၂၀ “ဖဲယဘိးကၢ် ကိၣ်နွံလိၣ်လၢ ပိာ်ခွါအဂၤ ၄,၀၀၀ အဂီၢ်အခါ သုထၢဖှိၣ် တၢ်အဘျဲၣ်အစဲၢ် အိၣ်ကုဖးဒိၣ်ပှဲၤဒုလဲၣ်.” ဒီးအဝဲသ့ၣ်တဲအီၤလၢ “နွံဒုလီၤ.”+ ၂၁ အဃိ ဖဲန့ၣ် ယ့ၣ်ၡူး တဲဘၣ်အဝဲသ့ၣ်လၢ “သုတနၢ်ပၢၢ်ဒံးဧီၤ.”
၂၂ ဖဲအဝဲသ့ၣ် လဲၤတုၤလၢ ဘ့ၤသစဲဒၤအခါ ပှၤဟဲကိး ပှၤမဲာ်တထံၣ်တၢ်တဂၤလၢ ယ့ၣ်ၡူးအအိၣ် ဒီးအဝဲသ့ၣ် ဃ့ကညးယ့ၣ်ၡူးလၢ ကထိးအီၤလီၤ.+ ၂၃ ယ့ၣ်ၡူးတွံၢ်ထီၣ် ပှၤမဲာ်တထံၣ်တၢ်တဂၤန့ၣ်အစု ဒီးလဲၤကိးအီၤလၢ သဝီအချၢလီၤ. ဒီးယ့ၣ်ၡူး ထူးပှဲာ်ဒီးအမဲာ်ချံ+ ဝံၤဒီး ပာ်ထီၣ်အစုလၢအလိၤ ဒီးသံကွၢ်အီၤလၢ “နထံၣ်တၢ်တမံၤမံၤဧါ.” ၂၄ ဒီးပှၤတဂၤန့ၣ် ကွၢ်ထီၣ်တၢ် ဒီးတဲဝဲလၢ “ယထံၣ်ပှၤတဖၣ် ဘၣ်ဆၣ် ယကွၢ်လီၤဂာ်ဒီး သ့ၣ်ထူၣ်လၢ အဟးဝဲလီၤ.” ၂၅ ဒီးယ့ၣ်ၡူး ပာ်ထီၣ်ကဒီးအစုလၢ ပှၤတဂၤန့ၣ် အမဲာ်ချံအလိၤ ဒီးအဝဲကွၢ်တၢ် ဖျါထီၣ်က့ၤဂ့ၤဂ့ၤလီၤ. ဒီးအမဲာ်ထံၣ်ထီၣ်က့ၤတၢ် ဒီးအထံၣ်တၢ်ကိးမံၤဒဲး ဂ့ၤဂ့ၤဘၣ်ဘၣ်လီၤ. ၂၆ အဃိ ယ့ၣ်ၡူး ပျဲက့ၤအီၤလၢအဟံၣ် ဒီးတဲအီၤလၢ “တဘၣ်က့ၤနုာ်လီၤလၢ သဝီပူၤတဂ့ၤ.”
၂၇ ယ့ၣ်ၡူး ဒီးအပျဲၢ်အဘီၣ်တဖၣ် ဟးထီၣ်ဝဲ ဒီးလဲၤလၢ သဝီတဖၣ်လၢ ဖံလံးပံၤ ကဲၤစါရံၤ အဟီၣ်ကဝီၤလီၤ. လၢကျဲန့ၣ် ယ့ၣ်ၡူးသံကွၢ် အပျဲၢ်အဘီၣ်တဖၣ်လၢ “ပှၤတဲဝဲလၢ ယမ့ၢ်မတဂၤလဲၣ်.”+ ၂၈ အဝဲသ့ၣ်တဲအီၤလၢ “ပှၤဘျၢတၢ်စီၤယိၤဟၣ်လီၤ.+ ဘၣ်ဆၣ် ပှၤတနီၤနီၤ တဲဝဲလၢ ဝံအ့ၤလံယၤ,+ မ့မ့ၢ် အဂၤတနီၤနီၤန့ၣ် တဲဝဲလၢ ဝံအဂၤတဂၤဂၤလီၤ.” ၂၉ ဒီးယ့ၣ်ၡူးသံကွၢ် အဝဲသ့ၣ်လၢ “သုမီၤ, မ့ၢ်သုကတဲလၢ ယမ့ၢ်မတဂၤလဲၣ်.” စီၤပ့းတရူး တဲဆၢဝဲလၢ “နမ့ၢ်ခရံာ်လီၤ.”+ ၃၀ ဖဲန့ၣ် ယ့ၣ်ၡူး မၤလိာ်အဝဲသ့ၣ် လီၤတံၢ်လီၤဆဲး ဒ်သိး အသုတတဲဘၣ် ပှၤဂၤလၢအဂ့ၢ် နီတဂၤတဂ့ၤလီၤ.+ ၃၁ တကးဒံးဘၣ် အဝဲစးထီၣ် သိၣ်လိစ့ၢ်ကီး အဝဲသ့ၣ်လၢ ပှၤကညီဖိခွါအံၤ ကဘၣ်တူၢ် တၢ်နးတၢ်ဖှီၣ်အါမံၤ ဒီးပှၤသူၣ်က့သးပှၢ်တဖၣ်, ပှၤလုၢ်တၢ်ဒိၣ်အခိၣ်တဖၣ် ဒီးပှၤကွဲးလံာ်ဖိတဖၣ် တတူၢ်လိာ်အီၤဘၣ် ဒီးပှၤကမၤသံအီၤလီၤ.+ ဒီးသၢသီဝံၤအလီၢ်ခံန့ၣ် အကဂဲၤဆၢထၢၣ်က့ၤဝဲလီၤ.+ ၃၂ ယ့ၣ်ၡူးတဲဝဲ တၢ်ဂ့ၢ်တခါအံၤ ပျီပျီလီၤ. ဒီးစီၤပ့းတရူး ကိးဃီၤအီၤလၢ တၢ်ကပၤ ဒီးသိၣ်အီၤလီၤ.+ ၃၃ ဒီးယ့ၣ်ၡူး ဃၣ်ကွံာ်အသး, ကွၢ်ဃီၤ အပျဲၢ်အဘီၣ်တဖၣ် ဒီးသိၣ် စီၤပ့းတရူး ဒီးတဲဝဲလၢ “စၤတၣ်ဧၢ,* ယတကနၣ်ဃုာ် နတၢ်ကတိၤဘၣ်. နတၢ်ဆိကမိၣ်န့ၣ် တမ့ၢ်ကစၢ်ယွၤ အတၢ်ဆိကမိၣ်ဘၣ်. မ့ၢ်ပှၤဟီၣ်ခိၣ်ဖိ အတၢ်ဆိကမိၣ်လီၤ.”+
၃၄ အဝဲကိးဃီၤ ပှၤဂီၢ်မုၢ် ဒီးအပျဲၢ်အဘီၣ်တဖၣ် ဒီးတဲအဝဲသ့ၣ်လၢ “ပှၤလၢ အအဲၣ်ဒိးပိာ်ယခံ တဂၤဂၤန့ၣ် အတဘၣ်အိၣ်မူလၢ အနီၢ်ကစၢ်အဂီၢ်လၢၤဘၣ်. ဒီးအဘၣ်ယိးထီၣ် အတၢ်မၤအၢမၤနး အသ့ၣ်တၢၣ်* ဒီးပိာ်ယခံထီဘိလီၤ.+ ၃၅ ပှၤလၢ အအဲၣ်ဒိးမၤပူၤဖျဲး အနီၢ်ကစၢ် အသးသမူန့ၣ် အသးသမူ ကလီၤမၢ်ကွံာ်ဝဲလီၤ. မ့မ့ၢ်ပှၤလၢ အသးသမူ လီၤမၢ်ကွံာ်လၢယဃိ ဒီးလၢ တၢ်သးခုကစီၣ်အဃိန့ၣ် ကအိၣ်မူဘၣ်ကဒီးလီၤ.+ ၃၆ ပှၤတဂၤဂၤ မ့ၢ်န့ၢ်ဘၣ် ဟီၣ်ခိၣ်ဒီတဘ့ၣ် သနာ်က့ အသးသမူ မ့ၢ်လီၤမၢ်ကွံာ်န့ၣ် မ့ၢ်အဘျုး ကအိၣ်လၢအဂီၢ်ဒ်လဲၣ်.+ ၃၇ ပှၤတဂၤ ခီလဲဝဲ အသးသမူဒီး တၢ်မနုၤကကဲလဲၣ်.+ ၃၈ ပှၤလၢ အမဲာ်ဆှးလၢယဃိ ဒီးလၢ ယကလုၢ်ကထါအဃိ လၢပှၤလၢ အတတီဒီးယွၤ ဒီးပှၤအၢပှၤသီတစိၤအံၤအကျါန့ၣ် ဖဲပှၤကညီဖိခွါအံၤ ဟဲတုၤဒီး အပၢ်အလၤကပီၤ ဃုာ်ဒီး မူခိၣ်ကလူးစီဆှံတဖၣ်အခါ+ ကမဲာ်ဆှးဒီးအီၤ စ့ၢ်ကီးလီၤ.”+