စံၣ်ညီၣ်ကွီၢ်
၁၁ ပှၤကံးလဧးဖိ စီၤယံးဖသၤန့ၣ်+ မ့ၢ်ပှၤသုးဖိလၢ အဂံၢ်ဆူၣ်ဘါဆူၣ်တဂၤလီၤ. အမိၢ်မ့ၢ်ဝဲ ပိာ်မုၣ်ဆါလီၤအီၣ်သး ဒီးအပၢ်မ့ၢ်ဝဲ စီၤကံးလဧးလီၤ. ၂ ဘၣ်ဆၣ် စီၤကံးလဧးအမါ အိၣ်ဖျဲၣ်ထီၣ်န့ၢ်အီၤ အဖိခွါတဖၣ်စ့ၢ်ကီးလီၤ. ဖဲစီၤကံးလဧး အမါအဖိခွါတဖၣ် ဒိၣ်ထီၣ်အခါ အဝဲသ့ၣ် နီဟးထီၣ်ကွံာ် စီၤယံးဖသၤ ဒီးတဲအီၤလၢ “နမိၢ်ဒီးပမိၢ် တမ့ၢ်တဂၤဃီဘၣ် အဃိ နတကြၢးန့ၢ်သါဘၣ် ပပၢ်အတၢ်စုလီၢ်ခီၣ်ခိၣ်တဖၣ် နီတစဲးဘၣ်.” ၃ အဃိ စီၤယံးဖသၤ ဟးထီၣ်ကွံာ်လၢ အဒီပုၢ်ဝဲၢ်ခွါတဖၣ်အအိၣ် ဒီးလဲၤအိၣ်ဝဲလၢ တိာ်အဟီၣ်ကဝီၤ အပူၤလီၤ. ဒီးပှၤပိာ်ခွါလၢ အတၢ်မၤ တအိၣ်ဘၣ်တဖၣ် မၤသကိးတၢ်ဒီးအီၤ ဒီးပိာ်အခံလီၤ.
၄ လၢခံ တယံာ်ဘၣ်ဒီး ပှၤဧၣ်မိၣ်ဖိ ဒုးတၢ်ဒီး ပှၤအံၣ်စရ့လးဖိလီၤ.+ ၅ ဖဲပှၤဧၣ်မိၣ်ဖိ ဒုးဝဲ ပှၤအံၣ်စရ့လးဖိအခါ ဒ်သိး ကံးလဧး အပှၤသူၣ်က့သးပှၢ်တဖၣ်* ကဟဲက့ၤကိးက့ၤ စီၤယံးဖသၤအဂီၢ် အဝဲသ့ၣ် လဲၤဝဲလၢ တိာ်အဟီၣ်ကဝီၤ တဘျီဃီ ဒီးဟဲက့ၤကိး စီၤယံးဖသၤလီၤ. ၆ ဒီးအဝဲသ့ၣ် တဲဘၣ် စီၤယံးဖသၤလၢ “ဒ်သိး ပဒုးပှၤဧၣ်မိၣ်ဖိ ကနၢၤအဂီၢ် ဟဲကဲန့ၢ်ပသုးခိၣ်မီၤ.” ၇ ဘၣ်ဆၣ် စီၤယံးဖသၤ တဲဘၣ် ကံးလဧး အပှၤသူၣ်က့သးပှၢ် တဖၣ်လၢ “ပှၤလၢအသးဟ့ယၤ ဒီးနီဟးထီၣ်ကွံာ်ယၤလၢ ယပၢ်အဟံၣ်ပူၤန့ၣ် အကဲသုလီၤ တမ့ၢ်ဧီၤ.+ ခဲအံၤ ဖဲသုဘၣ်ကီဘၣ်ခဲအခါ ဘၣ်မနုၤအဃိ သုဟဲလၢယအိၣ်လဲၣ်.” ၈ အဃိ ကံးလဧး အပှၤသူၣ်က့သးပှၢ်တဖၣ် တဲဘၣ် စီၤယံးဖသၤလၢ “အဃိန့ၣ် ပဟဲလၢနအိၣ်မီၤ. နမ့ၢ်လဲၤဒီးပှၤ ဒီးဒုး ပှၤဧၣ်မိၣ်ဖိန့ၣ် နကကဲထီၣ်ဘၣ် ပှၤလၢအအိၣ်လၢ ကံးလဧး အဟီၣ်ကဝီၤပူၤ ကိးဂၤဒဲး အခိၣ်လီၤ.”+ ၉ စီၤယံးဖသၤ တဲဘၣ် ကံးလဧး အပှၤသူၣ်က့သးပှၢ် တဖၣ်လၢ “သုမ့ၢ်က့ၤကိးယၤ ဒ်သိးယကဒုး ပှၤဧၣ်မိၣ်ဖိ ဒီးယဟိဝၤယွၤ မ့ၢ်ဟ့ၣ်လီၤအဝဲသ့ၣ် လၢယစုပူၤန့ၣ် ယကကဲ သုခိၣ် သပှၢ်တၢၢ်လီၤ.” ၁၀ ဒီးကံးလဧး အပှၤသူၣ်က့သးပှၢ်တဖၣ် တဲဘၣ် စီၤယံးဖသၤလၢ “ပမ့ၢ်တမၤ ဒ်နတဲပှၤ အသိးဘၣ်န့ၣ် မ်ယဟိဝၤယွၤ ကဲပှၤအုၣ်အသး လၢပဘၢၣ်စၢၤတက့ၢ်.” ၁၁ အဃိ စီၤယံးဖသၤ က့ၤဝဲဒီး ကံးလဧး အပှၤသူၣ်က့သးပှၢ်တဖၣ် ဒီးပှၤကံးလဧးဖိတဖၣ် ပာ်ထီၣ်အီၤလၢ အဝဲသ့ၣ် အခိၣ်အနၢ် ဒီးအသုးခိၣ်လီၤ. ဒီးစီၤယံးဖသၤ တဲဖျါထီၣ်ကဒီး အတၢ်အၢၣ်လီၤ လၢယဟိဝၤယွၤ အမဲာ်ညါ လၢဝ့ၢ်မံးစပၤလီၤ.+
၁၂ ဒီးစီၤယံးဖသၤ ဆှၢလီၤ ပှၤစိာ်တၢ်ကစီၣ်ဖိတဖၣ်လၢ ပှၤဧၣ်မိၣ်ဖိ+ အစီၤပၤအအိၣ် ဒ်သိးကတဲအီၤလၢ “ဘၣ်မနုၤအဃိ နဟဲထီဒါယၤ ဒီးဟဲဒုးယထံကီၢ်လဲၣ်.” ၁၃ ပှၤဧၣ်မိၣ်ဖိ အစီၤပၤ တဲဘၣ် စီၤယံးဖသၤ အပှၤစိာ်တၢ်ကစီၣ်ဖိတဖၣ်လၢ “ဖဲပှၤအံၣ်စရ့လးဖိ ဟးထီၣ်လၢ ကီၢ်အဲၤကူပတူးအပူၤအခါ+ ခီဖျိလၢ အဝဲသ့ၣ် ဟံးန့ၢ် ယတၢ်လီၢ်တၢ်ကျဲ စးထီၣ်လၢ ထံကျိအၢ်နိၣ်+ တုၤလၢ ထံကျိယးဘိး ဒီးပၢၢ်တုၤလၢ ထံကျိယၢ်ဒ့ၣ်အဃိ+ ယဟဲဒုးသုလီၤ. ခဲအံၤ ဟ့ၣ်က့ၤယၤ ဒီးသုကအိၣ်ဘၣ် မုာ်မုာ်ခုၣ်ခုၣ်လီၤ.” ၁၄ ဘၣ်ဆၣ် စီၤယံးဖသၤ ဆှၢကဒါက့ၤ ပှၤစိာ်တၢ်ကစီၣ်ဖိတဖၣ် လၢပှၤဧၣ်မိၣ်ဖိ အစီၤပၤအအိၣ် ၁၅ ဒ်သိးကတဲအီၤလၢ
“စီၤယံးဖသၤ တဲဝဲလၢ ‘ပှၤအံၣ်စရ့လးဖိ တဟံးန့ၢ်ဝဲ ပှၤမိၤအးဖိ+ ဒီးပှၤဧၣ်မိၣ်ဖိ+ အတၢ်လီၢ်တၢ်ကျဲတဖၣ်ဘၣ်. ၁၆ ဖဲအဝဲသ့ၣ် ဟးထီၣ်လၢ ကီၢ်အဲၤကူပတူးအပူၤအခါ အဝဲသ့ၣ် ဟးလၢပှၢ်မုၢ်ကနၢ အပူၤ ပၢၢ်တုၤလၢ ပီၣ်လဲၣ်ဂီၤ+ ဒီးလဲၤတုၤဝဲလၢ ကၤဒ့ၣ်လီၤ.+ ၁၇ ဝံၤဒီး ပှၤအံၣ်စရ့လးဖိ ဆှၢလီၤ ပှၤစိာ်တၢ်ကစီၣ်ဖိတဖၣ်လၢ ပှၤအဒိၣ်ဖိ+ အစီၤပၤအအိၣ် ဒ်သိးကတဲအီၤလၢ “ဝံသးစူၤ ဟ့ၣ်ပှၤအခွဲး လၢပကလဲၤခီဂာ် နကီၢ်မီၤ.” ဘၣ်ဆၣ် ပှၤအဒိၣ်ဖိ အစီၤပၤ တကနၣ် အဝဲသ့ၣ်ဘၣ်. ဒီးပှၤအံၣ်စရ့လးဖိ ဆှၢလီၤစ့ၢ်ကီး တၢ်ကစီၣ်လၢ ပှၤမိၤအးဖိ+ အစီၤပၤအအိၣ် ဘၣ်ဆၣ် စီၤပၤ တဟ့ၣ်အဝဲသ့ၣ် အခွဲးဘၣ်. အဃိ ပှၤအံၣ်စရ့လးဖိ ဆဲးအိၣ်ဝဲလၢ ကၤဒ့ၣ်အပူၤလီၤ.+ ၁၈ ဖဲအဝဲသ့ၣ် ဟးလၢ ပှၢ်မုၢ်ကနၢအပူၤအခါ အဝဲသ့ၣ် လဲၤတရံး ကီၢ်အဒိၣ်+ ဒီးကီၢ်မိၤအးလီၤ. အဝဲသ့ၣ်လဲၤလၢ ကီၢ်မိၤအးအကပၤလၢ မုၢ်ထီၣ်တခီ+ ဒီးသူၣ်ဒဲလၢ ထံကျိအၢ်နိၣ် အကပၤလီၤ. ဘၣ်ဆၣ် ထံကျိအၢ်နိၣ် မ့ၢ်ဝဲ မိၤအးအကီၢ်ဆၢအဃိ+ အဝဲသ့ၣ် တလဲၤခီဂာ်ဝဲဘၣ်.
၁၉ “‘လၢခံ ပှၤအံၣ်စရ့လးဖိ ဆှၢလီၤ ပှၤစိာ်တၢ်ကစီၣ်ဖိတဖၣ်လၢ ပှၤအမိၢ်ဖိ အစီၤပၤစံဃိၣ် လၢအမ့ၢ် ဝ့ၢ်ဃ့ၡဘိၣ် အစီၤပၤအအိၣ် ဒီးတဲအီၤလၢ “ဒ်သိး ပကလဲၤလၢ ပတၢ်လီၢ်တၢ်ကျဲအဂီၢ် ဝံသးစူၤ ဟ့ၣ်ပှၤအခွဲးလၢ ပကလဲၤခီဂာ် နကီၢ်မီၤ.”+ ၂၀ ဘၣ်ဆၣ် စီၤစံဃိၣ် တနာ်န့ၢ်ဝဲ ပှၤအံၣ်စရ့လးဖိ လၢကလဲၤခီဂာ် အဟီၣ်ကဝီၤဘၣ်. အဃိ စီၤစံဃိၣ် ကိးဖှိၣ်ဝဲ အပှၤသုးဖိခဲလၢာ် ဒီးအဝဲသ့ၣ် ဆီလီၤအသးလၢ ဝ့ၢ်ယါစၤ ဒီးဒုးဝဲ ပှၤအံၣ်စရ့လးဖိလီၤ.+ ၂၁ ဒီးအံၣ်စရ့လးအကစၢ် ယဟိဝၤယွၤ ဟ့ၣ်လီၤဝဲ စီၤစံဃိၣ် ဒီးအပှၤသုးဖိခဲလၢာ် လၢပှၤအံၣ်စရ့လးဖိ အစုပူၤလီၤ. အဃိ ပှၤအံၣ်စရ့လးဖိ မၤနၢၤအဝဲသ့ၣ် ဒီးမၤန့ၢ်ဝဲ တၢ်လီၢ်တၢ်ကျဲခဲလၢာ် လၢပှၤအမိၢ်ဖိ အိၣ်ဝဲတဖၣ် လၢဟီၣ်ကဝီၤဖဲန့ၣ်လီၤ.+ ၂၂ အဃိ ပှၤအံၣ်စရ့လးဖိ မၤန့ၢ်ဝဲ ပှၤအမိၢ်ဖိ အဟီၣ်ကဝီၤခဲလၢာ် စးထီၣ်လၢ ထံကျိအၢ်နိၣ် တုၤလၢ ထံကျိယးဘိး ဒီးစးထီၣ်လၢ ပှၢ်မုၢ်ကနၢ တုၤလၢ ထံကျိယၢ်ဒ့ၣ်လီၤ.+
၂၃ “‘အံၣ်စရ့လးအကစၢ် ယဟိဝၤယွၤ မ့ၢ်ပှၤလၢ အနီဟးထီၣ်ကွံာ် ပှၤအမိၢ်ဖိလၢ အပှၤဂီၢ်မုၢ် အံၣ်စရ့လးအမဲာ်ညါ+ ဒီးခဲအံၤ မ့ၢ်နကနီဟးထီၣ် ပှၤအံၣ်စရ့လးဖိဧါ. ၂၄ တၢ်လၢ နယွၤ လၢအမ့ၢ် ကမိၣ်+ ဟ့ၣ်လီၤနၤန့ၣ် နမၤန့ၢ်အီၤ တမ့ၢ်ဧီၤ. မ့မ့ၢ်ပဝဲဒၣ်အံၤ ပှၤလၢ ပကစၢ် ယဟိဝၤယွၤ နီဟးထီၣ်ကွံာ်လၢ ပမဲာ်ညါ ကိးဂၤဒဲးန့ၣ် ပကနီဟးထီၣ်အီၤလီၤ.+ ၂၅ မ့ၢ်နဂ့ၤဒိၣ်န့ၢ်ဒံး ပှၤမိၤအးဖိ အစီၤပၤ စီၤဘၤလး+ လၢအမ့ၢ် စီၤစံးပိၢ် အဖိခွါဒံးဧါ. မ့ၢ်စီၤဘၤလး ဃုအ့ၣ်လိာ်သး ဒီးဒုးလိာ်သးဒီး ပှၤအံၣ်စရ့လးဖိ တဘျီဘျီဧါ. ၂၆ ဖဲအနံၣ် ၃၀၀ အတီၢ်ပူၤန့ၣ် ပှၤအံၣ်စရ့လးဖိ အိၣ်ဝဲလၢ ဝ့ၢ်ဃ့ၡဘိၣ် ဒီးအဒူသဝီတဖၣ်,+ ဝ့ၢ်ဧရိၤဧ့ၢ် ဒီးအဒူသဝီတဖၣ် ဒီးလၢကယဲၢ်ဝ့ၢ် တဖၣ်လၢ အဘူးဒီး ထံကျိအၢ်နိၣ် အကၢၢ်ခိၣ်လီၤ. ဖဲန့ၣ်အဆၢကတီၢ် ဘၣ်မနုၤအဃိ သုတဟဲဟံးန့ၢ်က့ၤ တၢ်လီၢ်တဖၣ်အံၤလဲၣ်.+ ၂၇ ယတမၤ ကမၣ်ဘၣ်နၤဘၣ် ဘၣ်ဆၣ် နဟဲဒုးယၤန့ၣ် ကမၣ်ဖးဒိၣ်ညါ. အဃိ တနံၤအံၤ မ်ယဟိဝၤယွၤ လၢအမ့ၢ် စံၣ်ညီၣ်ကွီၢ်န့ၣ်+ စံၣ်ညီၣ်န့ၢ်တၢ် လၢပှၤအံၣ်စရ့လးဖိ ဒီးပှၤဧၣ်မိၣ်ဖိ အဂီၢ်တက့ၢ်.’”
၂၈ ဘၣ်ဆၣ် ပှၤဧၣ်မိၣ်ဖိ အစီၤပၤ တကနၣ်ဝဲ တၢ်ကစီၣ်လၢ စီၤယံးဖသၤ ဆှၢန့ၢ်အီၤဘၣ်.
၂၉ ယဟိဝၤယွၤ အသးစီဆှံ ဟဲလီၤလၢ စီၤယံးဖသၤအလိၤ+ ဒီးအဝဲဟးဝဲလၢ ကံးလဧးအဟီၣ်ကဝီၤ ဒီးမနၤၡ့ၤအဟီၣ်ကဝီၤ ဒ်သိး ကလဲၤလၢ ဝ့ၢ်မံးစပၤ လၢကံးလဧးအဟီၣ်ကဝီၤအပူၤလီၤ.+ ဒီးအဝဲဟးထီၣ်လၢ ဝ့ၢ်မံးစပၤ လၢကံးလဧးအဟီၣ်ကဝီၤအပူၤ ဒီးဆဲးလဲၤဝဲလၢ ပှၤဧၣ်မိၣ်ဖိအအိၣ်လီၤ.
၃၀ ဝံၤဒီး စီၤယံးဖသၤ အၢၣ်လီၤ+ ယဟိဝၤယွၤလၢ “နမ့ၢ်ဟ့ၣ်လီၤ ပှၤဧၣ်မိၣ်ဖိ လၢယစုပူၤန့ၣ် ၃၁ ယဟိဝၤယွၤဧၢ, ဖဲယမၤနၢၤ ပှၤဧၣ်မိၣ်ဖိ လၢတၢ်ဒုးပူၤ ဒီးဟဲက့ၤဘၣ် မုာ်မုာ်ခုၣ်ခုၣ်အခါ ပှၤလၢအဟဲထီၣ် သဂၢၢ်ယၤလၢ ယဟံၣ်အတြဲၤတဂၤန့ၣ် ယကဟ့ၣ်လုၢ်ထီၣ်အီၤဒ် တၢ်လုၢ်ဒွဲၣ်အူအသိး+ ဒီးအဝဲကကဲထီၣ် နတၢ်လီၤ.”+
၃၂ အဃိ စီၤယံးဖသၤ လဲၤဒုးဝဲ ပှၤဧၣ်မိၣ်ဖိ ဒီးယဟိဝၤယွၤ ဟ့ၣ်လီၤအဝဲသ့ၣ်လၢ စီၤယံးဖသၤ အစုပူၤလီၤ. ၃၃ စီၤယံးဖသၤ ဒုးနၢၤဝ့ၢ်အဖျၢၣ် ၂၀ စးထီၣ်လၢ ဝ့ၢ်ဧရိၤဧ့ၢ် တုၤလၢ ဝ့ၢ်မံာ်နံး ဒီးမၤသံဝဲ ပှၤဧၣ်မိၣ်ဖိဖဲန့ၣ် အါအါဂီၢ်ဂီၢ် ပၢၢ်တုၤလၢ ဟ့းဘ့းလးကရၤမံလီၤ. အဃိ ပှၤအံၣ်စရ့လးဖိ မၤနၢၤဝဲ ပှၤဧၣ်မိၣ်ဖိတဖၣ်လီၤ.
၃၄ လၢခံ စီၤယံးဖသၤ က့ၤတုၤလၢအဟံၣ် လၢဝ့ၢ်မံးစပၤလီၤ.+ ဒီးအဖိမုၣ် ဟဲထီၣ်သဂၢၢ်အီၤ ဒီးဒိသီၣ်ဝဲ တၢ်ခြ့ခြ့ ဒီးဂဲၤကလံၣ်ဝဲလီၤ. စီၤယံးဖသၤ အဖိအိၣ်ဝဲ ထဲတဂၤလီၤ. အဖိမုၣ် ဒီးအဖိခွါလၢအဂၤန့ၣ် တအိၣ်နီတဂၤဘၣ်. ၃၅ ဖဲစီၤယံးဖသၤ ထံၣ်ဘၣ် အဖိမုၣ်အခါ အဝဲဖှီညာ်အဆ့ကၤ ဒီးတဲဝဲလၢ “အၣ်လါ, ဖိမုၣ်ဧၢ, ယသးကသ့ၣ်ဖးလီၤ. ခဲအံၤ ယကဘၣ် ဒုးဟးထီၣ်ကွံာ်နၤလီၤ. ယအၢၣ်လီၤ ယဟိဝၤယွၤ ဝံၤလံအဃိ ယဂုာ်က့ၤယလီၢ်ခံ တသ့လၢၤဘၣ်.”+
၃၆ ဒီးအဖိမုၣ် တဲအီၤလၢ “ပါဧၢ, နအၢၣ်လီၤ ယဟိဝၤယွၤဝံၤလံ ဒီးမ့ၢ်လၢ ယဟိဝၤယွၤ မၤဆၢက့ၤ နဒုၣ်နဒါ ပှၤဧၣ်မိၣ်ဖိတဖၣ် လၢနဂီၢ်အဃိ မၤယၤဒ် နအၢၣ်လီၤအသိးတက့ၢ်.”+ ၃၇ ဝံၤဒီး အဝဲတဲ အပၢ်လၢ “ယအဲၣ်ဒိး ဃ့နၤတၢ်တမံၤ. ခီဖျိလၢ ယဆီဟံၣ်ဆီဃီ တန့ၢ်လၢၤဘၣ်အဃိ ပျဲယလဲၤလၢ ကစၢၢ်ကလိကျါ ခံလါဒီး ဟီၣ်ဒီးယသကိးမုၣ်တဖၣ် တက့ၢ်.”
၃၈ ဒီးစီၤယံးဖသၤ တဲအီၤလၢ “လဲၤသၢၤ.” ဒီးစီၤယံးဖသၤ ပျဲလဲၤအီၤ ခံလါလီၤ. အဃိ အဝဲလဲၤလၢ ကစၢၢ်ကလိကျါ ဒီးဟီၣ်ဒီး အသကိးမုၣ်တဖၣ် ခီဖျိလၢ အဆီဟံၣ်ဆီဃီ တန့ၢ်လၢၤဘၣ်အဃိလီၤ. ၃၉ ခံလါဝံၤဒီး အဝဲဟဲက့ၤလၢ အပၢ်အအိၣ် ဒီးဒ်အပၢ်အၢၣ်လီၤဝဲ ဘၣ်ဃးဒီးအီၤ အသိး အပၢ်မၤဝဲလီၤ.+ ဒီးအဝဲ တမံဃုာ်အိၣ်ဃုာ်ဒီး ပှၤပိာ်ခွါ နီတဂၤဘၣ်. ဒီးလၢအံၣ်စရ့လး အကီၢ်ပူၤန့ၣ် လုၢ်လၢ် ဟဲအိၣ်ထီၣ်တခါလၢ ၄၀ တနံၣ်ဘၣ်တနံၣ်န့ၣ် ပှၤအံၣ်စရ့လးဖိ ပိာ်မုၣ်သးစၢ်တဖၣ် လဲၤပတြၢၤဝဲ ပှၤကံးလဧးဖိ စီၤယံးဖသၤအဖိမုၣ် တနံၣ်လွံၢ်သီလီၤ.