၁ ၡမူၤအ့လး
၁၄ ဘၣ်တနံၤန့ၣ် စီၤစီလူးအဖိခွါ စီၤယိနၤသၣ်+ တဲဘၣ် အပှၤမၤစၢၤတၢ် လၢအစိာ် အတၢ်စုကဝဲၤ တဂၤလၢ “ဟဲ, ပလဲၤခီဃီၤ သကိးဆူ ပှၤဖလ့ၡသးသုးဖိ အိၣ်တၢ်လီၢ် လၢဝၢ်ခီဟီ.” ဘၣ်ဆၣ် အဝဲတတဲဘၣ် အပၢ်ဘၣ်. ၂ စီၤစီလူးန့ၣ် အိၣ်ဝဲလၢ သလဲထူၣ်အခီၣ်ထံး လၢမံးကြိၣ် လၢအအိၣ်လၢ ဝ့ၢ်ကံဘဧၤအချၢ+ ဒီးဖဲန့ၣ် အံၣ်စရ့လးသုးဖိ အိၣ်ဒီးအီၤ အဂၤ ၆၀၀ လီၤ.+ ၃ (ဒီးပှၤလုၢ်တၢ်ဒိၣ် စီၤအဃံယၤန့ၣ် ကၤဝဲဒီး အ့ဖိးတဘ့ၣ်လီၤ.+ စီၤအဃံယၤန့ၣ် အပၢ်မ့ၢ်ဝဲ စီၤအဃံးတူာ်လီၤ.+ စီၤအဃံးတူာ်န့ၣ် မ့ၢ်ဝဲ စီၤအံကဘိး အကၠီလီၤ.+ စီၤအံကဘိး အပၢ်မ့ၢ်ဝဲ စီၤဖံၤနဃၣ်+ ဒီးစီၤဖံၤနဃၣ် အပၢ်မ့ၢ်ဝဲ စီၤဧ့လံၤ+ လၢအမ့ၢ် ယဟိဝၤယွၤ အပှၤလုၢ်တၢ်ဒိၣ်တဂၤ လၢဝ့ၢ်ၡံလိၤလီၤ.)+ စီၤယိနၤသၣ် ဟးထီၣ်ကွံာ်ဝဲလံန့ၣ် အံၣ်စရ့လးသုးဖိ တသ့ၣ်ညါဝဲဘၣ်. ၄ ဒီးဒ်သိး စီၤယိနၤသၣ် ကတုၤလၢ ပှၤဖလ့ၡသးသုးဖိ အိၣ်တၢ်လီၢ်အဂီၢ်န့ၣ် အဝဲဘၣ် လဲၤခီဂာ်ကျဲလၢ အအိၣ်လၢ လ့ခိၣ်စူခံဖျၢၣ် အဘၢၣ်စၢၤလီၤ. လၢအံၤတခီန့ၣ် လ့ခိၣ်စူတဖျၢၣ် အမံၤမ့ၢ်ဝဲဘိစ့း ဒီးလၢန့ၣ်တခီန့ၣ် လ့ခိၣ်စူတဖျၢၣ် အမံၤမ့ၢ်ဝဲ စ့နၤလီၤ. ၅ လ့ခိၣ်စူတဖျၢၣ်န့ၣ် လီၤဂာ်ဒ် လၢၢ်ထူၣ်တခါ ဒီးအအိၣ်လၢ ကလံၤစိးတခီ ဒီးအမဲာ်ဃၣ်ဃီၤအသး လၢမံးကမၣ် ဒီးလ့ခိၣ်စူ အဝဲတဖျၢၣ်န့ၣ် အိၣ်လၢ ကလံၤထံးတခီ ဒီးအမဲာ်ဃၣ်ဃီၤအသးလၢ ဝ့ၢ်က့ဘၤလီၤ.+
၆ အဃိ စီၤယိနၤသၣ် တဲဘၣ် ပှၤလၢအစိာ်အတၢ်စုကဝဲၤ တဂၤလၢ “လဲၤသၢၤ. ပကလဲၤခီဃီၤဆူ သုးဖိလၢ အတဒိးဘၣ်တၢ်ကူးတရံးတဒူၣ်န့ၣ်+ အအိၣ်လီၤ. ဘၣ်သ့ၣ်သ့ၣ် ယဟိဝၤယွၤ ကမၤစၢၤပှၤလီၤ. ပအိၣ်အါဂၤမ့ၢ်ဂ့ၤ စှၤဂၤမ့ၢ်ဂ့ၤ တၢ်လၢအကတြီ ယဟိဝၤယွၤ ဒ်သိးအသုတမၤပူၤဖျဲးပှၤ တဂ့ၤအဂီၢ်န့ၣ် တအိၣ်နီတမံၤဘၣ်.”+ ၇ ဒီးပှၤလၢအစိာ် အတၢ်စုကဝဲၤတဂၤန့ၣ် တဲအီၤလၢ “ကွၢ်လၢအဘၣ်နသးန့ၣ် မၤဟီ. ဃၣ်နသးဖဲ နအဲၣ်ဒိးဃၣ် ဒီးဖဲနအဲၣ်ဒိးလဲၤန့ၣ် ယကလဲၤပိာ်နခံလီၤ.” ၈ ဒီးစီၤယိနၤသၣ် တဲဝဲလၢ “ပကလဲၤခီဃီၤဆူ ပှၤသုးဖိတဖၣ်န့ၣ် အအိၣ် ဒီးပကပာ်ဖျါထီၣ်ပသးလၢ အဝဲသ့ၣ်အမဲာ်ညါလီၤ. ၉ အဝဲသ့ၣ် မ့ၢ်တဲပှၤလၢ ‘ဆၢထၢၣ်ဖဲန့ၣ် တုၤလၢပလဲၤလၢသုအိၣ်’ န့ၣ်ပကဆၢထၢၣ် ဖဲပအိၣ်အလီၢ် ဒီးပတလဲၤထီၣ် လၢအဝဲသ့ၣ်အအိၣ်ဘၣ်. ၁၀ ဘၣ်ဆၣ် အဝဲသ့ၣ် မ့ၢ်တဲလၢ ‘ဟဲထီၣ်ဒုးပှၤသၢၤ’ န့ၣ်ပကလဲၤထီၣ်, မ့ၢ်လၢ အကဲဝဲ တၢ်ပနီၣ်လၢ ယဟိဝၤယွၤ ကဟ့ၣ်လီၤအဝဲသ့ၣ်လၢ ပစုပူၤအဃိလီၤ.”+
၁၁ ဒီးအဝဲသ့ၣ် ခံဂၤလၢာ် ပာ်ဖျါထီၣ်အသးလၢ ပှၤဖလ့ၡသးသုးဖိတဒူၣ် အမဲာ်ညါလီၤ. ဒီးပှၤဖလ့ၡသးဖိ တဲဝဲလၢ “ကွၢ်လၢန့ၣ်, ပှၤဧ့ၤဘြံၤဖိတဖၣ် ဟးထီၣ်ကွံာ်လၢ တၢ်ပူၤတဖၣ် လၢအအိၣ်ခူသူၣ်ဝဲ အလီၢ်လံ.”+ ၁၂ အဃိ ပှၤဖလ့ၡသးသုးဖိတဒူၣ် တဲဘၣ် စီၤယိနၤသၣ် ဒီးပှၤလၢအစိာ် အတၢ်စုကဝဲၤတဂၤန့ၣ်လၢ “ဟဲထီၣ်လၢပအိၣ်သၢၤ. ပကသိၣ်သုတထံၣ်.”+ တဘျီဃီန့ၣ် စီၤယိနၤသၣ် တဲဘၣ် ပှၤလၢအစိာ် အတၢ်စုကဝဲၤတဂၤန့ၣ်လၢ “မ့ၢ်လၢ ယဟိဝၤယွၤ ကဟ့ၣ်လီၤ အဝဲသ့ၣ်လၢ ပှၤအံၣ်စရ့လးဖိ အစုပူၤအဃိ ဟဲထီၣ်ပိာ်ယခံ.”+ ၁၃ ဒီးစီၤယိနၤသၣ် လဲၤထီၣ်ပဃၤဝဲလၢ အစုဒီးအခီၣ် ဒီးပှၤလၢအစိာ် အတၢ်စုကဝဲၤတဂၤန့ၣ် အိၣ်ဝဲလၢ အလီၢ်ခံလီၤ. ဒီးစီၤယိနၤသၣ် ကျီဝဲ ပှၤဖလ့ၡသးဖိတဖၣ် ဒီးမၤလီၤဃံၢ်အဝဲသ့ၣ် ဝံၤဒီး ပှၤလၢအစိာ် အတၢ်စုကဝဲၤတဂၤ လၢအအိၣ်လၢ အလီၢ်ခံန့ၣ် မၤသံကွံာ်ဝဲ အဝဲသ့ၣ်လီၤ. ၁၄ ဖဲစီၤယိနၤသၣ် ဒီးပှၤလၢအစိာ် အတၢ်စုကဝဲၤတဂၤ ဒုးတၢ် အဆိကတၢၢ်တဘျီအံၤန့ၣ် အဝဲသ့ၣ်မၤသံ ပှၤအဂၤ ၂၀ လၢတၢ်ဒ့ၣ်စၢၤ ထဲသိးဒီး ဟီၣ်ခိၣ်တကဝီၤ လၢအ့ကၢၢ်တဝာ်ဃၣ်ဃၣ် အပူၤလီၤ.
၁၅ ဒီးပှၤလၢအအိၣ်လၢ ဒဲကဝီၤလၢ တၢ်ပျီပူၤ ဒီးပှၤလၢအအိၣ်လၢ သုးဖိအိၣ်တၢ်အလီၢ် ကိးဂၤဒဲးန့ၣ် သူၣ်ကနိးသးကနိးလီၤ. တကးဒံးဘၣ် သုးဖိ သၢဒူၣ်လၢ အဘၣ်တၢ်ဆှၢလီၤအီၤဒၣ်လဲာ်+ သးကနိးလီၤ. ဒီးဟီၣ်ခိၣ်ဟူးဝဲ ဒီးကစၢ်ယွၤ ဒုးအိၣ်ထီၣ် တၢ်ပျံၤတၢ်ဖုးလီၤ. ၁၆ စီၤစီလူး အပှၤခိးကွၢ်တၢ်ဖိ လၢအအိၣ်လၢ ပှၤဘံၣ်ယၤမံၣ်ဖိ အဝ့ၢ်ကံဘဧၤန့ၣ်+ ထံၣ်ဘၣ်ဝဲလၢ တၢ်သဘံၣ်သဘုၣ် အိၣ်ထီၣ်ဝဲလၢ ပှၤဖလ့ၡသးဖိ အဒဲကဝီၤပူၤ ကိးကပၤဒဲးလီၤ.+
၁၇ စီၤစီလူး တဲဘၣ် ပှၤသုးဖိလၢ အအိၣ်ဒီးအီၤတဖၣ်လၢ “မတဂၤ တအိၣ်ဘၣ်လဲၣ်, ဝံသးစူၤ ဂံၢ်ကွၢ်တထံၣ်.” ဖဲအဝဲသ့ၣ် ဂံၢ်ကွၢ်ဝဲအခါ အဝဲသ့ၣ် သ့ၣ်ညါဘၣ်ဝဲလၢ စီၤယိနၤသၣ် ဒီးပှၤလၢအစိာ် အတၢ်စုကဝဲၤတဂၤန့ၣ် တအိၣ်ဖဲန့ၣ်ဘၣ်. ၁၈ ဒီးစီၤစီလူး တဲဘၣ် စီၤအဃံယၤလၢ+ “ဟဲယိး ယွၤလၢအမ့ၢ်အတီတဂၤ အတလါစီဆှံဖဲအံၤတထံၣ်.” (ဖဲန့ၣ်အခါ* ယွၤလၢအမ့ၢ်အတီတဂၤ အတလါစီဆှံ အိၣ်ဒီး ပှၤအံၣ်စရ့လးဖိလီၤ.) ၁၉ ဖဲစီၤစီလူး တဲတၢ်ဒီး ပှၤလုၢ်တၢ်ဒိၣ်အခါ လၢပှၤဖလ့ၡသးသုးဖိ အဒဲကဝီၤပူၤန့ၣ် တၢ်သဘံၣ်သဘုၣ် အိၣ်အါထီၣ်မး အါထီၣ်လီၤ. ဒီးစီၤစီလူး တဲဘၣ် ပှၤလုၢ်တၢ်ဒိၣ်လၢ “တၢ်လၢနမၤန့ၣ် မၤလၢၤတဂ့ၤ.” ၂၀ စီၤစီလူး ဒီးပှၤလၢအအိၣ်ဒီးအီၤ ကိးဂၤဒဲး ပာ်ဖှိၣ်ထီၣ်အသး ဒီးလဲၤထီၣ်လၢ တၢ်ဒုးကျါလီၤ. ဖဲန့ၣ် အဝဲသ့ၣ် ထံၣ်ဘၣ်လၢ ပှၤဖလ့ၡသးဖိ ကဒဲကဒဲ ဒုးလိာ်က့ၤအသး အဃိ တၢ်သဘံၣ်သဘုၣ် အိၣ်ဝဲနးမးလီၤ. ၂၁ ဒီးပှၤဧ့ၤဘြံၤဖိတဖၣ်လၢ အအိၣ်ဃူပာ်စၢၤ ပှၤဖလ့ၡသးဖိ ဒီးလဲၤထီၣ်သကိးဒီးအဝဲသ့ၣ် လၢအဒဲကဝီၤပူၤန့ၣ် က့ၤကဒါက့ၤဝဲလၢ အံၣ်စရ့လးအအိၣ်တခီ လၢစီၤစီလူး ဒီးစီၤယိနၤသၣ် အတၢ်တီခိၣ်ရိၤမဲ အဖီလာ်လီၤ. ၂၂ ဒီးပှၤအံၣ်စရ့လးဖိလၢ အအိၣ်ခူသူၣ်လၢ+ အ့ဖရဲၣ် အကစၢၢ်ကလိကျါ ခဲလၢာ်န့ၣ် နၢ်ဟူဘၣ်ဝဲလၢ ပှၤဖလ့ၡသးဖိ ဃ့ၢ်ဝဲအဃိ အဝဲသ့ၣ်စ့ၢ်ကီး လူၤဒုး ပှၤဖလ့ၡသးဖိလီၤ. ၂၃ အဃိ ဖဲတၢ်တနံၤန့ၣ် ယဟိဝၤယွၤ မၤပူၤဖျဲးဝဲ ပှၤအံၣ်စရ့လးဖိလီၤ.+ ဒီးတၢ်ဒုး ရၤလီၤအသး ပၢၢ်တုၤလၢ ဝ့ၢ်ဘ့ၤသအၤဝ့ၣ်လီၤ.+
၂၄ စီၤစီလူး မၤဝဲ တၢ်အၢၣ်လီၤ ဒ်အံၤလီၤ. “တချုးလၢ မုၢ်ဟါလီၤ ဒီးတချုးလၢယမၤကၣ်က့ၤ ယဒုၣ်ယဒါတဖၣ်ဒံးဘၣ်န့ၣ် ပှၤတဂၤဂ့ၤတဂၤဂ့ၤမ့ၢ်အီၣ် တၢ်အီၣ်တမံၤမံၤန့ၣ် မ်အဘၣ်ဆိၣ်အၢတက့ၢ်.” အဃိ အဝဲသ့ၣ်တအီၣ်တၢ်အီၣ် နီတဂၤဘၣ်+ ဒီးဖဲတၢ်တနံၤန့ၣ် အဝဲသ့ၣ် လီၤဘှံးလီၤတီၤလီၤ.
၂၅ ဒီးပှၤသုးဖိခဲလၢာ် လဲၤလၢပှၢ်ပူၤ ဒီးဖဲန့ၣ် ကနဲစီ အိၣ်ဝဲလၢ ဟီၣ်ခိၣ်လိၤလီၤ. ၂၆ ဖဲပှၤသုးဖိ လဲၤလၢ ပှၢ်ပူၤအခါ အဝဲသ့ၣ် ထံၣ်ဝဲ ကနဲစီလီၤစီၤဝဲ ဘၣ်ဆၣ် မ့ၢ်လၢ အဝဲသ့ၣ်ပျံၤဝဲ တၢ်ဆိၣ်အၢအဃိ အဝဲသ့ၣ်အီၣ်ဝဲ တဘူၣ်နီတဂၤဘၣ်. ၂၇ ဘၣ်ဆၣ် စီၤယိနၤသၣ် အပၢ်အၢၣ်လီၤဝဲလၢ ပှၤကဘၣ် တၢ်ဆိၣ်အၢန့ၣ် စီၤယိနၤသၣ် တနၢ်ဟူဝဲဘၣ်အဃိ+ အဝဲယူာ်ဃီၤ အနီၣ်ထိးဘိ အခိၣ်ထိး ဒီးဘျၢလီၤဝဲလၢ ကနဲအဒၢပူၤလီၤ. ဖဲအဝဲအီၣ် ကနဲစီအခါ အဂံၢ်ထီၣ်ဝဲလီၤ.* ၂၈ အဃိ ပှၤသုးဖိတဂၤ တဲဝဲလၢ “နပၢ်မၢ ပှၤမၤပိာ်ထွဲ တၢ်အၢၣ်လီၤလၢ အဃံးတခါ ဒီးတဲဝဲလၢ ‘တနံၤအံၤ ပှၤတဂၤဂ့ၤတဂၤဂ့ၤမ့ၢ်အီၣ် တၢ်အီၣ်တမံၤမံၤန့ၣ် မ်အဘၣ်ဆိၣ်အၢတက့ၢ်.’+ အဃိန့ၣ် ပှၤသုးဖိတဖၣ် လီၤဘှံးလီၤတီၤ ဒိၣ်မးလီၤ.” ၂၉ ဒီးစီၤယိနၤသၣ် တဲဝဲလၢ “ယပၢ်ဒုးအိၣ်ထီၣ် တၢ်ကီတၢ်ခဲဖးဒိၣ်လၢ ပှၤဖီခိၣ်လံ. ကွၢ်တထံၣ်မီၤ, မ့ၢ်လၢ ယအီၣ်ဘၣ် ကနဲစီတစဲးဖိအဃိ ယဂံၢ်ထီၣ်လံ. ၃၀ တနံၤအံၤ တၢ်အီၣ်လၢ ပှၤသုးဖိ မၤန့ၢ်လၢအဒုၣ်အဒါအအိၣ်န့ၣ် အဝဲသ့ၣ် အီၣ်ဝဲ မ့ၢ်န့ၢ်န့ၣ် ကဂ့ၤဖးဒိၣ်ညါ တမ့ၢ်ဧီၤ.+ အန့ၣ်မး အဝဲသ့ၣ် ကမၤသံ ပှၤဖလ့ၡသးဖိ အါန့ၢ်အလီၢ်ဒံးလီၤ.”
၃၁ ဖဲတၢ်တနံၤန့ၣ် အဝဲသ့ၣ် ဆဲးမၤသံဝဲ ပှၤဖလ့ၡသးဖိ စးထီၣ်လၢ မံးကမၣ် တုၤလၢ ဝ့ၢ်အးယၤလိၣ်လီၤ.+ ဒီးပှၤသုးဖိတဖၣ် လီၤဘှံးလီၤတီၤ ဒိၣ်မးလီၤ. ၃၂ အဃိ လၢတၢ်သးကွံအပူၤန့ၣ် ပှၤသုးဖိတဖၣ် ကရီလဲၤဆူ တၢ်လၢအဝဲသ့ၣ် ဂုာ်န့ၢ်လၢ အဒုၣ်အဒါအအိၣ် ဒီးအဝဲသ့ၣ် မၤသံဝဲ သိ, ကျီၢ် ဒီးကျီၢ်ဖိတဖၣ် လၢဟီၣ်ခိၣ်လိၤ ဒီးအဝဲသ့ၣ် အီၣ်ဝဲတၢ်ညၣ် ဃုာ်ဒီးအသွံၣ်လီၤ.+ ၃၃ ဒီးပှၤတဲကျၢ စီၤစီလူးလၢ “ကွၢ်, ပှၤဂီၢ်မုၢ်အီၣ်တၢ်ညၣ် ဃုာ်ဒီးအသွံၣ် အဃိ အဝဲသ့ၣ် မၤကမၣ်ဘၣ် ယဟိဝၤယွၤလံ.”+ ဖဲန့ၣ် စီၤစီလူးတဲဝဲလၢ “သုမၤတၢ်လၢ တၢ်သးတတီဘၣ် အပူၤလံ. တလ့ၣ်လၢၢ်ဖးဒိၣ်တဖျၢၣ် လၢယအိၣ်ခဲခဲအံၤတက့ၢ်.” ၃၄ ဝံၤဒီး စီၤစီလူး တဲဝဲလၢ “လဲၤလၢ ပှၤသုးဖိအကျါ ဒီးတဲအဝဲသ့ၣ်လၢ ‘သုဝဲ တဂၤစုာ်စုာ် ကဘၣ်ဟဲစိာ် သုကျီၢ် ဒီးသုသိဖဲအံၤလီၤ. ဒီးမၤသံကွံာ်အီၤလၢ လၢၢ်တဖျၢၣ်အံၤအလိၤ ဝံၤဒီးအီၣ်အီၤတက့ၢ်. တဘၣ်မၤကမၣ် ယဟိဝၤယွၤ ခီဖျိ သုအီၣ်တၢ်ညၣ် ဃုာ်ဒီးအသွံၣ် န့ၣ်တဂ့ၤ.’”+ အဃိ ဖဲတၢ်တနၤန့ၣ် အဝဲသ့ၣ် တဂၤစုာ်စုာ် ဟဲစိာ်ဝဲ အကျီၢ် ဒီးမၤသံကွံာ်ဝဲ ဖဲန့ၣ်လီၤ. ၃၅ ဒီးစီၤစီလူး တ့ထီၣ်ဝဲ တၢ်လုၢ်လီၢ်တဖျၢၣ် လၢယဟိဝၤယွၤ အဂီၢ်လီၤ.+ တၢ်လုၢ်လီၢ်အံၤ မ့ၢ်ဝဲ တၢ်လုၢ်လီၢ် အဆိကတၢၢ်တဖျၢၣ် လၢအတ့ထီၣ်န့ၢ်ဝဲ လၢယဟိဝၤယွၤအဂီၢ်လီၤ.
၃၆ လၢခံ စီၤစီလူး တဲဝဲလၢ “ပကလဲၤလီၤဒုး ပှၤဖလ့ၡသးဖိ လၢမုၢ်နၤခီ ဒီးဂုာ်န့ၢ်ဆူၣ် အဝဲသ့ၣ် အတၢ်ဖိတၢ်လံၤ တုၤလၢ မုၢ်ဝါထီၣ် ဒီးပတပာ်မူ ပှၤနီတဂၤဘၣ်.” ဖဲန့ၣ် အဝဲသ့ၣ်တဲဝဲလၢ “ဖဲနအဲၣ်ဒိးမၤန့ၣ် မၤဟီ.” ဒီးပှၤလုၢ်တၢ်ဒိၣ် တဲဝဲလၢ “မ်ပသံကွၢ်တၢ်လၢ ယွၤလၢအမ့ၢ်အတီတဂၤ အအိၣ်ဖဲအံၤတက့ၢ်.”+ ၃၇ ဒီးစီၤစီလူး သံကွၢ် ကစၢ်ယွၤလၢ “မ့ၢ်ယကဘၣ် လဲၤလီၤဒုး ပှၤဖလ့ၡသးဖိဧါ.+ မ့ၢ်နကဟ့ၣ် အဝဲသ့ၣ် လၢပှၤအံၣ်စရ့လးဖိ အစုပူၤဧါ.” ဘၣ်ဆၣ် ဖဲတၢ်တနံၤန့ၣ် ကစၢ်ယွၤ တစံးဆၢအီၤဘၣ်. ၃၈ အဃိ စီၤစီလူး တဲဝဲလၢ “ပှၤဂီၢ်မုၢ် အခိၣ်အနၢ်ခဲလၢာ်သ့ၣ်ဧၢ, ဟဲလၢအံၤတက့ၢ်. တနံၤအံၤ ပှၤမၤဘၣ် တၢ်ဒဲးဘး မနုၤတမံၤလဲၣ်န့ၣ် ဃုသ့ၣ်ညါတက့ၢ်. ၃၉ ဒ်ယဟိဝၤယွၤလၢ အမၤပူၤဖျဲး ပှၤအံၣ်စရ့လးဖိန့ၣ် မူဝဲသပှၢ်တၢၢ်အသိး ယအၢၣ်လီၤလၢ ပှၤလၢ အမၤဘၣ်တၢ်ဒ်အံၤ တဂၤန့ၣ် မ့မ့ၢ်ယဖိခွါ စီၤယိနၤသၣ် ဒၣ်လဲာ် အဝဲကဘၣ်သံလီၤ.” ဘၣ်ဆၣ် ပှၤတစံးဆၢအီၤ နီတဂၤဘၣ်. ၄၀ ဒီးစီၤစီလူး တဲဘၣ် အံၣ်စရ့လးသုးဖိလၢ “သုဝဲခဲလၢာ် ကအိၣ်လၢ အဝဲတကပၤ မ့မ့ၢ်ယဖိခွါ စီၤယိနၤသၣ် ဒီးယၤန့ၣ် ပကအိၣ်လၢအံၤ တကပၤလီၤ.” ဒီးအဝဲသ့ၣ် တဲအီၤလၢ “ဖဲနအဲၣ်ဒိးမၤန့ၣ် မၤဟီ.”
၄၁ ဒီးစီၤစီလူး တဲဘၣ် ယဟိဝၤယွၤလၢ “အိ အံၣ်စရ့လး အကစၢ်ယွၤဧၢ, စံးဆၢပှၤ ခီဖျိလၢ တူမံၣ်+ တက့ၢ်.” ဝံၤဒီးစီၤယိနၤသၣ် ဒီးစီၤစီလူး ဘၣ်တၢ်ဃုထၢထီၣ်အီၤ ဒီးပှၤသုးဖိတဖၣ် ပူၤဖျဲးဝဲလီၤ. ၄၂ စီၤစီလူး တဲဝဲလၢ “မ့ၢ်အကဲယၤ မ့တမ့ၢ် ယဖိခွါစီၤယိနၤသၣ်လဲၣ်, ဖးတၢ်တက့ၢ်.”+ ဒီးစီၤယိနၤသၣ် ဘၣ်တၢ်ဃုထၢထီၣ်အီၤလီၤ. ၄၃ စီၤစီလူး တဲဘၣ် စီၤယိနၤသၣ်လၢ “နမၤဘၣ်မနုၤလဲၣ်န့ၣ် တဲဘၣ်ယၤတထံၣ်.” ဒီးစီၤယိနၤသၣ် တဲအီၤလၢ “ယအီၣ်ဘၣ် ကနဲစီတစဲးဖိ လၢအအိၣ်လၢ ယနီၣ်ထိးဘိ အခိၣ်ထိးလီၤ.+ အဃိ ခဲအံၤ ယသံဘူၣ်လံ.”
၄၄ ဒီးစီၤစီလူး တဲဝဲလၢ “စီၤယိနၤသၣ်ဧၢ, နမ့ၢ်တသံဘၣ်န့ၣ် မ်ကစၢ်ယွၤ သိၣ်ဃီၣ်ယၤ ဆူၣ်ဆူၣ်တက့ၢ်.”+ ၄၅ ဘၣ်ဆၣ် ပှၤသုးဖိတဖၣ်တဲ စီၤစီလူးလၢ “စီၤယိနၤသၣ် လၢအဒုးအိၣ်ထီၣ် တၢ်မၤနၢၤဖးဒိၣ်လၢ+ အံၣ်စရ့လးအဂီၢ် တဘျီအံၤန့ၣ် မ့ၢ်အကြၢးသံဧါ. လ့ၤတက့ၤ တကြၢးဘၣ်. ဒ်ယဟိဝၤယွၤ မ့ၢ်ပှၤလၢအမူဝဲသပှၢ်တၢၢ်အသိး ယအၢၣ်လီၤလၢ တၢ်လၢစီၤယိနၤသၣ် မၤဝဲတနံၤညါအံၤန့ၣ် မ့ၢ်ဒၣ်ခီဖျိလၢ ကစၢ်ယွၤ အတၢ်မၤစၢၤ အဃိ အခိၣ်ဆူၣ် ထဲတဘိဒၣ်လဲာ် တဘၣ်လီၤတဲာ်လၢ ဟီၣ်ခိၣ်အလိၤတဂ့ၤ.”+ အဃိ ပှၤသုးဖိတဖၣ် မၤပူၤဖျဲး စီၤယိနၤသၣ် ဒီးအဝဲတသံဘၣ်.
၄၆ အဃိ စီၤစီလူး တလူၤဝဲ ပှၤဖလ့ၡသးဖိလၢၤဘၣ် ဒီးပှၤဖလ့ၡသးဖိ က့ၤကဒါက့ၤလၢ အနီၢ်ကစၢ် အဟီၣ်ကဝီၤလီၤ.
၄၇ စီၤစီလူး မၤဂၢၢ်ကျၢၤထီၣ် အတၢ်ပၢလၢ အံၣ်စရ့လးအဖီခိၣ် ဒီးဒုးဝဲ အဒုၣ်အဒါခဲလၢာ် လၢတၢ်လီၢ်ကိးကပၤဒဲးလီၤ. အဝဲဒုးဝဲ ပှၤမိၤအးဖိ,+ ပှၤဧၣ်မိၣ်ဖိ,+ ပှၤအဒိၣ်ဖိ,+ စိဘၤအစီၤပၤတဖၣ်+ ဒီးပှၤဖလ့ၡသးဖိလီၤ.+ ဖဲအလဲၤ တပူၤဂ့ၤတပူၤဂ့ၤန့ၣ် အမၤနၢၤတၢ်လီၤ. ၄၈ စီၤစီလူးဒုးတၢ်ဒူဒူ ဒီးမၤနၢၤဝဲ ပှၤဧမၤလ့းဖိလီၤ.+ ဒီအမၤပူၤဖျဲး ပှၤအံၣ်စရ့လးဖိလၢ ပှၤဂုာ်ဆူၣ်ပျိဆူၣ်တၢ်တဖၣ် အစုပူၤလီၤ.
၄၉ စီၤစီလူးအဖိခွါတဖၣ် မ့ၢ်ဝဲ စီၤယိနၤသၣ်, စီၤယံးၡဝံၤ ဒီးစီၤမးလကံၡူၤလီၤ.+ ဒီးစီၤစီလူးအိၣ်ဒီး အဖိမုၣ်ခံဂၤလီၤ. အဖိမုၣ် အဒိၣ်တဂၤန့ၣ် အမံၤမ့ၢ်ဝဲ နီၢ်မ့ရ့ာ်+ ဒီးအဖိမုၣ်လၢ အဆံးတဂၤန့ၣ် အမံၤမ့ၢ်ဝဲ နီၢ်မံကၤလးလီၤ.+ ၅၀ စီၤစီလူး အမါအမံၤမ့ၢ်ဝဲ နီၢ်အဃံနိၣ်လီၤ. နီၢ်အဃံနိၣ် အပၢ်မ့ၢ်ဝဲ စီၤအဃံမဧးလီၤ. စီၤစီလူး အသုးမုၢ်အခိၣ် အမံၤမ့ၢ်ဝဲ စီၤအဘံန့ၢ်လီၤ. စီၤအဘံန့ၢ်+ အပၢ်မ့ၢ်ဝဲ စီၤန့ၢ် ဒီးစီၤန့ၢ်မ့ၢ်ဝဲ စီၤစီလူး အတံလီၤ. ၅၁ စီၤစီလူး အပၢ်မ့ၢ်ဝဲ စီၤကံၣ်+ ဒီးစီၤအဘံန့ၢ်အပၢ် စီၤန့ၢ်န့ၣ်+ အပၢ်မ့ၢ်ဝဲ စီၤအဘံၤအ့လးလီၤ.
၅၂ ဖဲစီၤစီလူး ပၢတၢ်အဆၢကတီၢ် အဝဲဒုးတၢ်ဒီး ပှၤဖလ့ၡသးဖိ ဆူၣ်ဆူၣ် ထီဘိလီၤ.+ ဒီးဖဲ စီၤစီလူးထံၣ်ဘၣ် ပှၤလၢအသးဒူ မ့တမ့ၢ် ပှၤလၢအဂံၢ်ဘါဆူၣ် တဂၤဂၤန့ၣ် အဝဲကိးနုာ်အီၤလၢ အသုးမုၢ်အကျါလီၤ.+